Kateimatoaan Ara Iraorao N Te Aonnaba Ae Akea Iai Te Tangira
“I tuangngkami baikai, ba kam na i tangitangiri.”—IOANE 15:17.
1. Bukin tera bwa a riai n teimatoa ni kaan aia iraorao Kristian ake n te moan tienture?
E KAUNGAIA taan rimwina ake a kakaonimaki ni koaua Iesu, n ana kabanea n tairiki ma ngaiia imwaini matena, bwa a na teimatoa n iraorao. Ngke e moan tairiki, ao e tuangia bwa a na kinaaki ae taan rimwina ngaiia, ngkana a kaotiota te itangitangiri. (Ioane 13:35) A riai n teimatoa ni kaan aia iraorao abotoro ngkana a kan nanomwaaka ni kataaki n taai ake imwaia, ao ni kakororaoan naba te mwakuri are e nang mwiokoiia Iesu iai. Ni koauana, a rangi ni kinaaki Kristian ake n te moan tienture man tangiran te Atua irouia ae rangi n nene ao te tangira i marenaia naba.
2. (a) Tera ae ti kamatoai nanora iai bwa ti na karaoi, ao bukin tera? (b) Baikara titiraki aika ti na rinanoi?
2 Ai kakukureira te bobotaki ni boong aikai ma kaain te botaki ae katobibia te aonnaba, ake a tou mwin aia katoto Kristian ake n te moan tienture! A matoa nanora bwa ti na ongeaba n ana tua Iesu ae kaotiotan te tangira ni koaua i marenara. Ma e ngae n anne, angia aomata ni boong aika kaitira aikai, a aki kakaonimaki ni koaua ao a kabwaka ni kaotiota te tangira ni koaua. (2 Timoteo 3:1-3) N angin te tai, te iraorao ae a kaotia bon tii ibukini kabwaiaia ao e aki nako mai nanoia. Ngkana ti kan teimatoa ni kinaaki bwa Kristian ni koaua ngaira, ti riai n aki katotongia kaain te aonnaba aika aki kakaonimaki ao akea aia tangira. Ti na rinanoi ngkai baikai: E boto i aon tera iraorao aika raraoi? Ti na kanga ni karekeia raoraora aika raraoi? N ningai ae tao ti riai ni katoka iai ara iraorao ma raoraora? Ao ti na kanga ni kateimatoa te iraorao ae kaungaunga?
E Boto i Aon Tera Iraorao Aika Raraoi?
3, 4. A boto i aon tera iraorao aika rangi n nene, ao bukin tera?
3 A boto i aon tangiran Iehova iraorao aika rangi n nene. E korea ae kangai te Uea ae Toromon: “Ngkana tao e kataea ana kai ae akea raona te aomata temanna, ao a na tei rake n tokanikai uoman i matana; ao e aki kai moti te karai ae te biro tenai.” (Te Minita 4:12) E na teimatoa te iraorao ngkana Iehova bon te katenua ni karai n te iraorao anne.
4 Ni koauana, a kona naba ake a aki tangira Iehova ni karekei aia iraorao aika rau nanoia iai. Ma ngkana a kaaniaki aomata ibukina bwa a kaai n tangira te Atua, e na boni kangaanga ngkanne uruakin aia iraorao. Ngkana iai te aki ota raoi, a na uaia raao ni koaua aikai n tabeakinia n te aro ae e kukurei iai Iehova. A nang tibwa ataia taani kakaitaraa te Atua bwa e aki kona n uruakaki te itangitangiri i marenaia Kristian ni koaua, ngke a a kataia ni karekea te iraraure. A a tia ana toro Iehova mangkekei ni karokoa ngkai ni kaota koauan ae a kukurei riki ni kaaitara ma te mate nakon ae a na ikamwamwane i marenaia.—Wareka 1 Ioane 3:16.
5. Bukin tera bwa e rangi n teimatoa aia iraorao Ruta ao Naomi?
5 Akea te nanououa bwa iraorao aika rangi ni karaunano, bon te iraorao ma aika a tangira Iehova. Iangoa aia katoto Ruta ao Naomi. Bon teuana mai buakon rongorongo aika rangi n anainano n te Baibara, aia iraorao aine aikai. Bukin tera bwa a rangi n nene ao n teimatoa aia iraorao? E kaota bukina Ruta ngke e kangai nakon Naomi: “Am koraki au koraki, ao Atuam Atuau. . . . E bia karaoa te aro aei Iehova nako iu, ma ni kamaitia riki, ngkana e karaureira te bwai teuana, ba ti te mate ae riai.” (Ruta 1:16, 17) E teretere bwa iai tangiran te Atua ae korakora iroun Ruta ao Naomi, ao a kairaki n te tangira aei bwa a na tabeakinia i marenaia. Ibukin anne, e a kaai ni kakabwaiaia aine aikai Iehova.
Aroni Karekean Raoraora Aika Raraoi
6-8. (a) A riki iraorao aika teimatoa imwin tera? (b) Ko na kanga ni biririmoa ni karekeia raoraom?
6 E oti n aia katoto Ruta ao Naomi bwa a aki kona ni manennanti n riki iraorao aika raraoi, ma a boto i aon tangiran Iehova irouia. Ma a riki iraorao aika teimatoa imwin te mwakuri korakora ao te anga boni ngkoe. A kainnanoa naba karikirakean te iraorao ae kaan naati i nanon utu ni Kristian aika a taromauria Iehova. Ko na kanga ni karekeia raoraom aika raraoi?
7 Biririmoa. E kaungaia raoraona n te ekaretia i Rom te abotoro Bauro bwa a na “akoakoiia iruwa.” (I-Rom 12:13) Ngkana ko nakonako n te kawai, iai mwaneka aika ko riai n tou aika rereena teuana imwin teuana. N aron anne, ngkana ko na bwaina te akoi, ko riai naba ni katoatai ni karaoi mwakuri aika uarereke teuana imwin teuana. Akea temanna ae kona ni karaoa te mwakuri n akoi ibukim. (Wareka Taeka N Rabakau 3:27.) Te anga teuana ae ko kona ni bwaina iai te akoi, boni mani kaoaia aomata aika kakaokoro n te ekaretia bwa ko na kaai n amwarake ma ngaiia n te aro ae bon tau. Ko kona ni karaoa am babaire ae ko na katoatai ni kaotiota te akoi nakoia kaain am ekaretia?
8 Te anga riki teuana ae ko kona ni biririmoa ni karekeia raoraom iai, boni man tuangakia tabeman aika kakaokoro bwa ko na mwakuri ma ngaiia n te mwakuri ni minita. Ngkana ko tei n te mataroa teuana ao ko ongo ana taetae raom anne ae nako mai nanona ibukin tangiran Iehova, n etina ko na rangi ni kani kaaniaki riki nakoina.
9, 10. Tera ana katoto Bauro are e kateia, ao ti na kanga ni katotongnga?
9 Karababaa nako am tangira. (Wareka 2 I-Korinto 6:12, 13.) Iai te tai ae ko a tia n namakinna bwa ai bon akea ae ko kona n iraorao ma ngaia n am ekaretia? Ngkana e riki aei nakoim, e koaua bwa ko tiatiana am iango bwa antai ae kona n riki bwa raoraom? E katea te katoto ae kakukurei te abotoro Bauro ni karababaan nako ana tangira. E tuai man iangoia bwa e na iraorao ma aika tiaki I-Iutaia. Ma e ngae n anne, ao e riki bwa “aia tia tuatua Tientaire.”—I-Rom 11:13.
10 I rarikina, e aki tiatiana ana iraorao Bauro nakoia tabonrorona. N te katoto, e rikirake ana iraorao ae kaan ma Timoteo n aki ongea kaokoron aia ririki ao aroaroia. Ni boong aikai, a bati rooro n rikirake ake a rangi ni kakawaki irouia aia iraorao ma kaara i nanon te ekaretia. E taku Vanessa ae ai 20 tabun ana ririki: “Iai raoraou ae I rangi n tangiria ae ai 50 tabun ana ririki. I kona ni maroro ma ngaia n te bwai ae I kona n tuangia naba tabonrorou. Ao e rangi n tatabeakinai.” A kanga n reke aeka n iraorao aikai? E taku Vanessa: “Boni ngai ae I kakorakoraai ni karekea te iraorao aei ao I aki taningaa rikina i bon irouna.” Ko kukurei ni karekeia raoraom aika tiaki tabonrorom? Ni koauana, e na boni kakabwaiako Iehova ibukin am kakorakora.
11. Tera reireiara n aia katoto Ionatan ao Tawita?
11 Bwaina te kakaonimaki ni koaua. E korea ae kangai Toromon: “E tangira te aomata raona n te bong ae koraki, Ao e bungiaki te tari ba katokani kain tarina.” (Taeka N Rabakau 17:17) Ngke e korei taeka akanne Toromon ao e bae n uringa te iraorao ngkoa are i marenan tamana are Tawita ao Ionatan. (1 Tamuera 18:1) E tangiria te Uea are Tauro bwa e na ruamwina natina are Ionatan n uea i aoia I-Iteraera. Ma Ionatan, e butimwaea te koaua are e a tia Iehova n rinea Tawita bwa e na uea. E kaokoro Ionatan ma Tauro bwa e aki bakantang iroun Tawita. E aki naba ribaa Tawita ngke e kamoamoaaki, ao e aki kakoauaa kabuakakaan Tawita are e kabutanakoa Tauro. (1 Tamuera 20:24-34) Tii te arona arora ma Ionatan? Ti kukurei ngkana a reke mwiokoaia raoraora n te ekaretia? Ti kabebeteia ao ni boutokaiia ngkana a karawawataaki? Ti waekoa ni kakoauaa winnantian raoraora? Ke tii te arona ngaira ma Ionatan ae ti kakaonimaki ni koaua n tei ibukia raoraora?
Te Tai Ibukin Riain Tokin te Iraorao
12-14. Tera te kataaki ae a kaaitara ma ngaai aomata tabeman ake a reirei n te Baibara, ao ti na kanga ni buokiia?
12 Ngkana e a moanna ni bita maiuna te aomata ae reirei n te Baibara, e kona ni kaaitara ma te kataaki ni koaua ibukin ana iraorao. Tao iai raoraona ake e kukukurei ma ngaiia, ma a aki boraoi aroaroia ma ana kaetieti te Baibara. Tao e katoatai rimoa ni bobotaki ma ngaiia, ma ngkai e a nori aia mwakuri bwa a na kona n riki bwa kairarangana, e a namakinna bwa e riai n tiatiana reitakina ma aeka n aomata akanne. (1 I-Korinto 15:33) E kona naba ni manga iangoia bwa ngkana e a aki bobotaki ma ngaiia, e a aki kakaonimaki ni koaua nakoia.
13 Ngkana ngkoe ae ko reirei n te Baibara ao e riki aei nakoim, uringnga bwa e na boni kukurei te rao ni koaua ngkana ko a kekeiaki ni karaoiroa riki maium. Tao e kona naba ni kan reiakina taekan Iehova i rarikim. N te itera are teuana, a na teimatoa ‘n taetaebuakaiko’ raao ni kewe ibukina bwa ko a aki iriia n “aia mamairiri aika a bubuaka.” (1 Betero 4:3, 4, BK) Ni koauana, bon raoraom aikai aika a aki kakaonimaki ni koaua nakoim, ao tiaki ngkoe.
14 Ngkana a kitanaki aomata aika reirei n te Baibara irouia raoraoia ngkoa ake a aki tangira te Atua, a kona n oneaki mwia irouia kaain te ekaretia. (I-Karatia 6:10) Ko kinaia raoi te koraki ake a iriri n am bobotaki nako aika a ukeuke n reirei n te Baibara? Ko tii iraorao ni kaungaunga ma ngaiia n taai tabetai?
15, 16. (a) Tera arora ae riai ngkana e a aki beku ibukin Iehova raoraora? (b) Ti na kanga ni kaota koauan tangiran te Atua iroura?
15 Tera ae ko na karaoia ngkana e a tannako mairoun Iehova raoraom n te ekaretia temanna, ao tao e a riai ni kabaneaki? E kona n rangi ni karawawata te aro anne. Ngke e kabwarabwaraa ana namakin te tari te aine ibukini kerikaakin raoraona ae rangi ni kaan ma ngaia man ana beku ibukin Iehova, e taku neiei: “I namakinna bwa I a bon rangi n nanokawaki. I taku bwa e a rangi n nene raoraou aei i nanon te koaua ma ngaia e aki. I a manga iangoia bwa tao e beku ibukin Iehova tii ibukini kakukureiaia kaain ana utu. Ibukin anne, I a moanna n tuoa raoi nanou. I beku iroun Iehova ibukin tangirana ni koaua mai nanou?” E kanga n tokanikai te tari te aine aei? E taku neiei: “I kaaki rawawatau ni kabane i aon Iehova. I kamatoa nanou bwa N na kaotia nakon Iehova ae I tangiria ibukina bwa bon te Atua ni koaua, ma tiaki tii ibukin ae e anganai raoraou i nanon ana botaki.”
16 Ti aki kona ni kantaningaia bwa ti na teimatoa n riki bwa raoraon te Atua ngkana ti iraorao ma aika a rineia bwa a na iraorao ma te aba. E korea ae kangai te tia rimwini Kristo ae Iakobo: “Kam aki ata te raoraona te aba ba bon ribaan te Atua? Ma ngaia aei, ba ane kan raona te aba, ao e riki ba ana kairiribai te Atua.” (Iakobo 4:4) Ngkana ti kakaonimaki ni koaua nakon te Atua, ti a kona iai ni kaota koauan tangirana iroura n onimakinan ae E na boni buokira n tokanikai i aon nanokawakira ni buan raoraora. (Wareka Taian Areru 18:25.) E botii ni kakimototoi baikai te tari te aine are e taekinaki mai moa ni kangai: “I ataia bwa ti aki kona n tuanga te aomata bwa e na tangira Iehova ke tao n tangirira. Mangaia are, bon ana rinerine te aomata i bon irouna.” Ma tera ae ti kona ni karaoia ni kateimatoa iai te iraorao ae kaungaunga ma aika a teimatoa n tiku i nanon te ekaretia?
Kateimatoaan Ara Iraorao Aika Raraoi
17. Tera aroia n taetae i marenaia raao aika raraoi?
17 E kateimatoa te iraorao ae kaan te uaia ni mamaroro. Ngkana ko wareki rongorongo n te Baibara aika irekereke ma Ruta ao Naomi, Tawita ma Ionatan, ao Bauro ma Timoteo, ane ko na noria bwa a tatauraoi n taetae n akea te imamaakin raao aika raraoi ao a ikarinerine. E korea ae kangai Bauro ibukin te aro ae ti riai ni karaoia ngkana ti taetaenikawai ma aomata: “A na raonaki ami taeka n te akoi, ao a na taarinaki n taari.” E boni katuruturua riki aei Bauro nakon arora n taetaenikawai ma “akana i ao,” ae nanonaki iai te koraki ake tiaki tarira n te onimaki. (I-Korote 4:5, 6) Ni koauana, ngkana ngaia bwa ti riai ni karineia akana tiaki kaain te onimaki ngkana ti taetae nakoia, ai batira riki ngkanne riaira ni karaoa anne nakoia raoraora n te ekaretia!
18, 19. Tera arora ae riai n iaiangoan reirei nako aika ti anganaki mairoun raoraora ae te Kristian, ao tera aia katoto ibukira unimwaane n te ekaretia are i Ebeto?
18 A kakawaki irouia raao aika raoiroi aia iango raoraoia, mangaia are e riai n irianaki aroia ni mamaroro n te akoi ao n aki wimakiki. E korea ae kangai te Uea ae wanawana ae Toromon: “E kakimareireia te nano te kabira ma te bwai ae boiarara: Ao ai aron naba ana taeka ni kawanawana te aomata e a karewerewe iroun raona.” (Taeka N Rabakau 27:9) Anne arom n iaiangoi reirei aika ko anganaki mairoun raoraom? (Wareka Taian Areru 141:5.) Ngkana e kaota tabeaiangana raoraom ibukini bwaai tabeua aika ko kakaraoi, tera arom iai? Ko iangoi taeka akanne bwa te mwakuri n akoi ae boto i aon te tangira, ke ko un iai?
19 E rangi ni kaan ana iraorao te abotoro Bauro ma unimwaane n te ekaretia i Ebeto. E bae ni kinaia tabeman mai buakoia mwaane akanne ngke a moan riki bwa kaain te onimaki. Ibukin anne, e angania reirei tabeua aika mataata raoi n aki wimakiki n ana kabanea ni botaki ma ngaiia. Tera aroia iai? A aki maneang raoraoni Bauro, ma a kaitaua ibukin nanona n tabeakinia, ao a tang ngke a iangoa are a nang aki manga noria.—Mwakuri 20:17, 29, 30, 36-38.
20. Tera ae e na karaoia te rao ae tatangira?
20 A aki tii butimwaea te reirei ae kawanawana te aba raoraora aika raraoi, ma a tibwaia nako naba. Ni koauana, ti riai n ataia bwa n ningai ae ti riai ni ‘kakaraoi oin ara bwai’ iai. (1 I-Tetaronike 4:11) Ao ti riai ngaira n tatabemanira nako ni kakoauaa ae ti “na bane n angan te Atua taekan arora.” (I-Rom 14:12) Ma te rao ae tatangira, e na kaota te akoi ni kauringa raoraona ana kaetieti Iehova ngkana e nora riaina. (1 I-Korinto 7:39) N te katoto, tera ae ko na karaoia ngkana e iraorao raoraom ae tuai ni mare ma temanna ae tiaki kaain te onimaki? Te koaua bwa ko na rawa n taekina te bwai ae ko raraoma iai irouna, ibukini maakum bwa e kaawa n uruaki ami iraorao? Ke tera ae ko na karaoia ngkana e aki mutiakina am taeka n reirei raoraom anne? E na bon ukera te ibuobuoki mairouia taani kawakintiibu aika tatangira, te rao ae raoiroi ibukini buokan raona are e a tia n toua te kawai ae bure. E kainnanoaki te ninikoria ni karaoan anne. Ngkana e boto am iraorao i aon tangiran Iehova, e na aki kona n uruaki n aki toki am iraorao anne.
21. Tera ae ti na bane ni kakaraoia n taai tabetai, ma bukin tera bwa e kakawaki kateimatoaan te iraorao ae nene n te ekaretia?
21 Wareka I-Korote 3:13, 14. N tabetai, ti na bae ni ‘kabuakakaaki’ irouia raoraora, ao ngaiia naba a kona ni karaoi mwakuri ke n taekini baika ti na un iai. E korea ae kangai Iakobo: ‘Ti bane n tatatata n taai aika bati.’ (Iakobo 3:2) E ngae n anne, e boto te iraorao i aon arora ni kabwarai raoi aia bure ake a kariki ngurengurera, ma tiaki man okiokin ara bure i marenara. Ai kakawakira ngkanne karikirakean ara iraorao aika nene rinanon te uaia ni mamaroro n akea te imamaakin ao te uaia n tatauraoi n ikabwarabure n taai aika bati! Ngkana ti kaotiota te aeka n tangira anne, e na riki iai ngkanne bwa “te bwai ni kabaebae are e riki ni moan te raoiroi te aomata iai.”
Ko na Kanga ni Kaeka?
• Ti na kanga ni karekei raoraora aika raraoi?
• N ningai ae tao e a riai n toki iai te iraorao?
• Tera ae ti riai ni karaoia ibukini kateimatoaan ara iraorao aika nene?
[Taamnei n iteraniba 27]
E boto i aon tera aia iraorao ae teimatoa Ruta ma Naomi?
[Taamnei n iteraniba 28]
Ko katoatai ni kaotiota te akoi?