Kateimatoa Te Kimwareirei N Taai Ni Karawawata

‘A na bane ni kukurei akana onimakina Iehova, a na aki toki n anene ni kakatonga.’​—TAIAN ARERU 5:11.

1, 2. (a) Baikara bwaai tabeua aika a karikii rawawata aika bati ni boong aikai? (b) Irarikini kangaanga aika taabangaki nakoia aomata nako, tera ae a riai n nanomwaaka iai Kristian ni koaua?

A ROROTAKI naba Ana Tia Kakoaua Iehova ni kangaanga aika a kaaitara ma ngaai botannaomata. A mwaiti i buakoia ana aomata te Atua aika karawawataaki ni mwakuri ni kakeru, te buaka, ao aaro n ribuaka. E kona n reke te rawawata ae bati mani kabuanibwai aika karina, te maiu ni kainnano, te aoraki, ao te mate. E tonu raoi ma ae e koreia te abotoro Bauro ae kangai: “Ti atai baika karikaki ba a bane ni ngirangira nako ma n ariri ni maraki ni karokoa te bong aei.” (I-Rom 8:22) Ti karawawataaki naba ibukin aki kororaoira. Ti kona n taekina ae kangai n aron te Uea are Tawita rimoa: ‘A ri aon atura ara bure; Kaanga ai aron uotara aika rawawata, aika ti aki konai ngkai a rawawata.’​—Taian Areru 38:4.

² A uouota te kai ni kammaraki n te aro ni kaikonaki Kristian ni koaua, irarikini kangaanga aika taabangaki nakoia aomata nako. (Ruka 14:27) Eng, n aron Iesu, a riribaaki naba taan rimwina ao a bwainikirinaki. (Mataio 10:22, 23; Ioane 15:20; 16:2) Ngaia are, e kainnanoa te kakorakora ao te nanomwaaka rimwiani Kristo, ngkai ti kantaningai kakabwaia n te aonnaba ae boou.​—Mataio 7:13, 14; Ruka 13:24.

3. Ti kanga n ataia bwa e aki tangirira te Atua bwa ti na rinanon te maiu ae rangi ni kananokawaki ao ni karawawata?

³ E nanonaki n aei bwa Kristian ni koaua a uaiakina te maiu ae akea iai te kimwareirei ao te kukurei? E na tii rorotaki naba maiura n te nanokawaki ao te rawawata ni karokoa te toki? E teretere ae e tangirira Iehova bwa ti na kukurei ngkai ti kantaningai kakoroani bukin ana berita. E okioki te Baibara ni kabwarabwaraia taan taromauri ni koaua bwa aomata aika kukukurei. (Wareka Itaia 65:13, 14.) E mwaneweaki ae kangai n Taian Areru 5:11: ‘A na bane ni kukurei akana onimakina Iehova, a na aki toki n anene ni kakatonga.’ Eng, e boni kona naba n namakinaki te kimwareirei ae bati, raun te iango ao te nano, i buakoni kangaanga. Ti na rinanoni ngkai aron te Baibara ni kona ni buokira ni kaaitarai kataakira ao n teimatoa ni kimwareirei.

Bon Iehova “Te Atua ae Kukukurei”

4. Tera ana namakin te Atua ngke e tinanikuaki ana kantaninga?

⁴ Nora te katoto ni kaineti ma Iehova. E bane te iuniweeti ni mena i aani mwakana ngkai te Atua ngaia ae Moan te Mwaaka. E aki tare n te bwai teuana ao e aki kainnanoa temanna. E ngae ngke iai mwaakan Iehova ae moan te korakora, ma e bae n namakina te uruakinnano ngke e karitei temanna mai buakoia natina aika taamnei ao n riki bwa Tatan. E bae n tia naba n rotakibuaka te Atua rimwi riki ngke a a ira buakon te karitei anera tabeman. Iangoa naba te rawawata are e namakinna te Atua ngke a tinanikuia ana karikibwai aika rianako i aon te aba aika Atam ao Ewa. A a tia birion ma birion kanoaia n tinanikua mwaakan Iehova n tautaeka man te tai arei ni karokoa ngkai.​—I-Rom 3:23.

5. Tera te bwai ae e a tia ni karawawataa riki Iehova?

⁵ E teimatoa n ririkirake ni korakora ana karitei Tatan. I nanon 6,000 tabun te ririki, e a tia Iehova n nori mwakuri n taromaurii bouannanti, iowawa, tiritiri, ao te wene ni bure. (Karikani Bwaai 6:5, 6, 11, 12) Irarikina, e a tia naba n ongo keewe aika bubuaka ao taetaebuaka. A kona naba taan taromauria ni koaua te Atua ni kammaraka nanona n tabetai. E kabwarabwaraa te bae riki te Baibara ae ai aron anne n taeka aikai: “Ai bati ra aia tai ni katei nakoina ma ni kamaraka nanona n te rereua! A okioki ni kata te Atua ma ni karawawata Teuare e Tabu ae Atuaia Iteraera.” (Taian Areru 78:40, 41, BK) E rangi ni korakora te rawawata are e namakinna Iehova ngke a tinanikuia ana aomata. (Ieremia 3:1-10) E teretere bwa a riiriki baika bubuaka, ao e namakina te rawawata ae korakora Iehova ngkana a riki.​—Wareka Itaia 63:9, 10.

6. E kanga te Atua ni kaaitarai karawawataana?

⁶ E ngae ngke e maraki Iehova ao e uruaki nanona, ma e aki tukaki man ana mwakuri. Ngkana a riki kangaanga, e waekoa Iehova ni karaoi aanga ake e na kabebetea iai mwini kangaanga ake a riki. E a tia naba ni kawenea ana babaire ibukin te tai ae maan bwa n tokina, e na boni kakoroa bukin ana kantaninga. E kimwareirei Iehova n noran ana mwakuri ake e a tia ni karaoi, ao e kariariaa kakoauaan riaina n tautaeka i aoni bwaai ni kabane, are e na karekei kakabwaia nakoia taan taromauria aika kakaonimaki ni koaua. (Taian Areru 104:31) Eng, e ngae ngke e mwaiti kabuakakaan Iehova ma e teimatoa n riki bwa “te Atua ae kukukurei.”​—1 Timoteo 1:11 [NW]; Taian Areru 16:11.

7, 8. Ti na kanga ni kona ni kakairi iroun Iehova ngkana iai kangaanga aika riki?

⁷ Ni koauana, ti aki kona ni kabotauira ma Iehova ni kaineti ma kabonganaan ara konabwai ni katoki ara kangaanga. Ma ti kona ni kakairi iroun Iehova ngkana ti kaaitarai karawawataara. Ti boni bae n namakina te nanokawaki ngkana iai baika a riki, ma ti aki riai n titiku n arora anne. Ibukina bwa ti karikaki ni katotongan Iehova, iai iroura te konabwai n iango ao te wanawana ae kona ni kairira bwa ti na rinanoi raoi ara kangaanga, ao ni karaoi mwakuri aika raraoi n taai nako ngkana e riai.

⁸ Te bwai teuana ae kakawaki ae kona ni buokira ni kaaitarai kangaanga i nanoni maiura, bon ataakin ae iai bwaai tabeua aika riaon ara kona. A kona ni kauaataoa riki bwaran nanora rawawatara ibukini baikai ao n urua kimwareireira ae bati ae irekereke ma te taromauri ni koaua. Imwini karaoani babaire aika riai ibukini kaetan te kangaanga, moan te raoiroi riki ae ti a aki bati n iangoi ara kangaanga ao ni kaatuui ara iango i aoni baika a uaana riki. E na kabwarabwaraaki raoi aei n taian rongorongo man te Baibara aika imwina.

E Rangi ni Kakawaki te Wanawana

9. E kanga Anna ni kaotiota te wanawana?

⁹ Iangoa ana katoto Anna are e a manga riki bwa tinan Tamuera are te burabeti. E bwara nanon neiei n te kantaninga are e a aki kona ni kariki. E bwainingareaki ao e kakanikoaki ibukini kanoabona irouni Beninna. E bwara nanon Anna n tabetai, n te aro are e a tang ao e a aki amwarake. (1 Tamuera 1:2-7) N teuana mai buakon ana tai Anna ni kakawara umwan Iehova, e “nanomaraki ao e tataro nakon Iehova, ao e tang ni korakaai.” (1 Tamuera 1:10) Ngke e a tia ni bunra nanona Anna nakon Iehova ao e a kawaria Eri are te ibonga ae rietata ao e taku: “Naako ma te rau: ao E na anganiko Atuaia Iteraera te bwai ni bubuti are ko butiia.” (1 Tamuera 1:17) E ataia raoi Anna n te tai aei bwa e a tia ni karaoa ana kabanea ni kona. E bon aki kona n totokoa kanoabona. E kaotiota te wanawana Anna. ‘E waakina kawaina ao e amwamwarake ao e a aki manga mata ni kananoanga.’​—1 Tamuera 1:18.

10. Te aeka n aroaro raa ae e kaotiotia Bauro ngke e kaitaraa te kangaanga ae aki kona ni katokia?

¹⁰ E kaotiota naba te aeka n aroaro anne te abotoro Bauro ngke e kaaitara ma te rawawata. Iai aorakina ae rangi ni karawawataaki iai are e atongnga bwa ‘te kateketeke n irikona.’ (2 I-Korinto 12:7) E karaoa ana kabanea ni kona Bauro ni kanakoa n aki ongeia bwa te aeka n aoraki raa, ao e tataro nakon Iehova ibukini katokana. Mwaitira ana tai Bauro ni butiia Iehova ibukin aei? Bon tenua te tai. Imwin te katentai, e a katereterea te Atua nakoni Bauro bwa e aki kona ni kanakoaki te ‘kateketeke n irikona’ n te kakai. E butimwaea te koaua aei Bauro ao e a kaatuua iaiangoan ana beku iroun Iehova ma nanona ni kabane.​—Wareka 2 I-Korinto 12:8-10.

11. Tera manenan te tataro ao te bubutii ngkana ti kaaitara ma kabuanibwai?

¹¹ E aki nanonaki ni katoto aikai bwa ti nang katoka ara tataro nakon Iehova ibukini baika karawawataira. (Taian Areru 86:7) Ni kaitaraan anne, e kaumakira ni kangai Ana Taeka te Atua: “Kam na tai iangoa te bwai teuana n raraomaeakinna; ma a na kaotaki ami bubuti nakon te Atua ni bwaai ni kabane, n te tataro ma te bubuti ma te katituaraoi.” E na kanga Iehova ni kaekai aeka ni kakorakora n tataro ni bubutii ao n onnon aikai? E reitaki riki n te Baibara ni kangai: “Ao te rau are mairoun te Atua, are te rau are aki konaki n ataki teutana, e na kawakin nanomi ao aia iango nanomi i nanoni Kristo Iesu.” (I-Biribi 4:6, 7) Eng, e na bon aki uotiinako ara kangaanga Iehova, ma e kona ni kaekai ara tataro n arona ni kawakin ara iango. Imwin tataroakinan te bae riki, ti a kona n ataa karuanikain te taonakinako n taian raraoma.

Karekea Kukureim ni Karaoan Nanon te Atua

12. E aera ngkai e kona ni kakoauaaki bwa e karuanikai namakinan te bwarannano ae wenemaan?

¹² E taekinaki ae kangai n Taeka N Rabakau 24:10: ‘Ko nimamate ni bongin te rawawata? E na karako korakoram.’ E taekinaki ae kangai n te taeka n rabakau riki teuana: “E uruaki te tamnei n rawawatan te nano.” (Taeka N Rabakau 15:13) A a tia n rikirake ni bwara nanoia Kristian tabeman ni karokoa ae a a katoka aia wareware n te Baibara ma kananoan aia iango i aon Ana Taeka te Atua. E a riki aia tataro bwa bwaai ni kabwarabae, ao tao a a kakaokoroia mairouia raoia n taromauri. E teretere bwa e kona n rangi ni karuanikai te teimatoa n nanokawaki.​—Taeka N Rabakau 18:1, 14.

13. Baikara mwakuri tabeua aika kona n ibuobuoki ni katoka te bwarannano ao ni karekea kimwareireira ae bati?

¹³ N te itera are teuana, a kona ni buokira iango aika raraoi ni kaatuui ara iango n iterani maiura ake ti kona ni karekea iai te kukurei ao te kimwareirei. E korea ae kangai Tawita: “I kukurei ni karaoa ae Ko tangiria, Atuau.” (Taian Areru 40:8) Ngkana iai kangaanga aika riki ni maiura, ti aki riai ni katoka ara babaire ae raoiroi ae ti taneiai iai ni kaineti ma ara taromauri. Ni koauana, bwainnaorakian te nanokawaki boni katabetabeam ni mwakuri aika kakukurei. E tuangira Iehova bwa ti kona ni karekea te unga ao te kukurei mani warekan ana Taeka ao nenerana ni katoatai. (Taian Areru 1:1, 2; Iakobo 1:25) Ti kona ni karekei “taeka aika raraoi” man te Baibara, ao man irirani botaki ni Kristian ake a kona ni kaungaira ao ni kakimwareireira.​—Taeka N Rabakau 12:25; 16:24.

14. Tera te karaunano mairoun Iehova ae karekea kimwareireira ngkai?

¹⁴ A bati bukini kimwareireira ae e anganira te Atua. Bon nibwan te kukurei ae bati ana berita ibukin te kakamaiu. (Taian Areru 13:5) Ti ataia bwa n aki ongei baika a riki nakoira ngkai, ma n tokina ao te Atua e na kakabwaiaia te koraki ake a kakorakoraia n ukoukoria. (Wareka Te Minita 8:12.) E kaota kakoauaan anne n te aro ae tamaroa te burabeti ae Abakuka ngke e korea ae kangai: “Ngkana tao e aki ue te biku, Ao ngkana akea naba uaani kurebe; Ao e toki uaan te oriwa, Ao ngkana a aki karika te amarake tawana; Ao ngkana a kamateaki tiibu mani neia, Ao ngkana akea riki kao i nanoni neia n amarake: Ao N na boni kimareirei naba iroun Iehova, N na kakatonga iroun Atuani kamaiuau.”​—Abakuka 3:17, 18.

“E a Kabaia te Botanaomata ae Atuana Iehova!”

15, 16. Taekin ana bwaintituaraoi tabeua te Atua ake ti kona ni kukurei iai, ngkai ti kantaningai kakabwaia aika imwaira.

¹⁵ Bon nanon Iehova bwa ti na kukurei ni baika raraoi ake e anganira, ngkai ti kantaningaa te tai ae moan te tamaroa ae imwaira. E taekina ae kangai te Baibara: “I ataiia ba akea te bwai ae raoiroi riki i rouia, nakon te kimareirei, ma te karaoa ae raoiroi ni kabane aia bong ni maiu. Ao aio ana bwai n akoi te Atua ba a na bane n amamarake ma ni momoi, ma n nonora ae raoiroi n ana makuri ni bane.” (Te Minita 3:12, 13) ‘Kakaraoan ae raoiroi’ e nanonaki naba iai karaoani mwakuri aika raraoi ibukia aomata. E taku Iesu bwa e kakukurei riki te anga nakon te anganaki. E karekea te raunnano ae bati ara mwakuri n akoi nakoia buura, natira, ara karo ao ara koraki riki tabemwaang. (Taeka N Rabakau 3:27) E karekea naba te kimwareirei ae bati ao e kakukureia Iehova, bwainan te mwamwannano, te akoi ao te kakabwarabure nakoia tarira ao mwaanera n te onimaki. (I-Karatia 6:10; I-Korote 3:12-14; 1 Betero 4:8, 9) E rangi n uaana naba kakororaoan ara mwakuri ni minita ma te nano ni kan anga ngaira.

¹⁶ A taekinaki baika bebete aika kakukurei n te maiu n taeka ake a mwaneweaki mai eta n te boki ae Te Minita, n aron te amwamwarake ao te momoi. Eng, ti kona ni karekea te kimwareirei ni bwaai n tituaraoi ake e anganira Iehova, e ngae ngke ti rinanoni kataaki. Irarikina, ti kona naba n rangi ni mimi ao ni kimwareirei n tamaroani bungin taai, tein te aba, aroia n takaakaro maan aika uarereke ao baika kamimi riki tabeua aika aki kabooaki matakuakinaia. Ngkana ti iaiangoi baikai, e na rikirake iai tangiran Iehova iroura bwa boni ngaia te tia Anga bwaai ni kabane aika raraoi.

17. Tera ae kona ni kabebetei nanora n te aro ae tabwanin raoi mani kangaanga, ao n anganira te raunnano mangkai ni karokoa te tai anne?

¹⁷ N tokina, e na tabwanin raoi kabebetean nanora mani kangaangan te aki kororaoi, n ara tangira ibukin te Atua, ongeabara nakon ana tua, ao onimakinan te karea ni kaboomwi, ao a na kairira baikai nakon te kimwareirei ae akea tokina. (1 Ioane 5:3) Mangkai ni karokoa te tai anne, ti kona ni karekea te raunnano n ataakin ae Iehova e atai raoi bwaai ni kabane ake ti karawawataaki iai. E korea ae kangai Tawita: “N na kukurei ma ni kimareirei n am atataiaomata: Ba Ko tarataraa kananoangau; Ko ata marakin tamneiu.” (Taian Areru 31:7) E kairaki Iehova n ana tangira ibukira bwa e na kamaiuira man te rawawata.​—Taian Areru 34:19.

18. E aera ngkai e riai n taabangaki te kimwareirei i buakoia ana aomata te Atua?

¹⁸ Ngkai ti kariariaa kakoroani bukin ana berita, ti bia kakairi iroun Iehova ae te Atua ae kukukurei. Ti bia aki kariaia namakin aika akea uaaia bwa a na totokoira mani kateimatoaan ara beku ibukin te Atua. Ti bia kairaki n ara konabwai n iango ao wanawanara ae manena ngkana a riki kangaanga. E na buokira Iehova n tokanikai i aon rawawatara ao ni karaoi baike a kona ni kabebetei rotakibuakara imwini kangaanga aika riki. Ti bia kimwareirei ni baika raraoi ake a reke mairouna ni kaineti ma baika ti kainnanoi ibukin rabwatara ao ara onimaki. Ti na kimwareirei ngkana ti kaania te Atua, ibukina bwa e a “kabaia [kukurei, NW] te botanaomata ae Atuana Iehova!”​—Taian Areru 144:15.

Tera ae Ko a Tia n Reiakinna?

• Ti na kanga ni kakairi iroun Iehova ngkana ti aitara ma kangaanga aika karawawata?

• E na kanga ni buokira te wanawana ni kaaitarai kangaanga aika karawawata?

• Ti na kanga ni karekea te kukurei ni karaoan nanon te Atua n taai ni karawawata?

[Taamnei n iteraniba 15]

E nanokawaki Iehova ni baika bubuaka aika riki

[Te Kabwarabwaraan te Taamnei]

© G.M.B. Akash/Panos Pictures

[Taamnei n iteraniba 17]

E a tia Iehova n anganira baika ti kona ni kateimatoa iai kimwareireira