Bukin Tera Bwa Ko Katabua Maium Nakon Iehova?

“E tei i rarikiu ngkebong ana anera te Atua are I taromauria.”​—MWAKURI 27:23.

1. Baikara mwaneka ake a a kamani karaoia te koraki ake a tauraoi nakon te bwabetito, ao baikara titiraki aika wai mai iai?

“IBUKINA bwa ko onimakina ana karea Iesu Kristo, ko a tia ngkai n raraoma man am bure ma ni katabua maium nakon Iehova bwa ko na kakaraoa nanona?” Aio teuana mai buakon titiraki ake uoua aika kaekaaki irouia taani bwabetitoaki n tokin te kabwarabwara ibukin te bwabetito. Bukin tera bwa a riai Kristian ni katabui maiuia nakon Iehova? Tera te kakabwaia ae na reke mani katabuani maiura nakon te Atua? Bukin tera bwa e aki kona ni butimwaeaki ana taromauri temanna nakon te Atua ngkana e tuai ni katabua maiuna? Ngkana ti na ota raoi ni kaeka akanne, ti riai moa n iangoia bwa tera te katabu.

2. Tera ae nanonaki ni katabuani maiun temanna nakon Iehova?

² Tera ae nanonaki ni katabuani maiun temanna nakon te Atua? Nora aron te abotoro Bauro ni kabwarabwaraa ana iraorao ma te Atua. Imwain tokaran te kaibuke are a na ruanikai iai aomata aika bati ao e wewete Bauro ni kangai: Iehova bon “te Atua are I taromauria.” (Wareka Mwakuri 27:22-24.) Bon ana bwai Iehova Kristian ni koaua ni kabane. Ni kaitaraan anne, angia kaain te aonnaba a “mena i aani mwaakan teuare buakaka.” (1 Ioane 5:​19) A kona n riki Kristian bwa ana bwai Iehova ngkana a karaoi aia katabu nakoina n te tataro. Te aeka ni katabu anne e bon nakon ana motinnano temanna ao n taorimwiaki n te bwabetito n te ran.

3. Tera ae kaotaki ni bwabetitoan Iesu ao a kanga taan rimwina ni kakairi irouna?

³ E katauraoa te katoto ibukira Iesu ngke e motinnanoia i bon irouna bwa e na karaoa nanon te Atua. E a kamani katabuaki nakon te Atua ibukina bwa e bungiaki i nanon te botannaomata ae Iteraera ae katabuaki. Ma e ngae n anne, ni bwabetitoana e a karaoa iai te bwai ae kakawaki riki nakon are kainnanoaki i aan te Tua. E kaotaki n Ana Taeka te Atua bwa e kangai: “Akea bwa I a roko . . . bwa N na karaoa nanom te Atua.” (Ebera 10:7; Ruka 3:21) Ngaia are e kaota ana anganano Iesu nakon te Atua ibukini karaoan nanon Tamana ni bwabetitoana. A kakairi n ana katoto taan rimwina ngke a anga ngaiia bwa a na bwabetitoaki. E ngae n anne, ao aroia aei a kaotia iai i mataia aomata ni bwabetitoaia n te ran bwa a a tia ni katabui maiuia nakon te Atua n te tataro.

Aroni Kakabwaiaara n te Katabu

4. Tera ae ti noria n aia iraorao Tawita ao Ionatan ni kaineti ma te berita?

⁴ E rangi ni kakawaki te katabu ni Kristian. E bati riki ae nanonaki iai nakon ae tii te berita. Ma e na kanga katabuani maiura ni karekei kakabwaiara? N aroni kabotauana, ti na iangoia bwa e kanga karaoan te berita n aia iraorao aomata ni karekei kakabwaia. Te katoto teuana bon te reitaki n iraorao. Ni karekean te kakabwaia ngkana iai raoraom, ko riai ni butimwaea te mwioko ibukin te iraorao. E irekereke anne ma karaoan nanon te berita are ko namakina kabaeam iai ibukin tararuaan raoraom. Teuana mai buakon iraorao aika rangi n rianako ake a kabwarabwaraaki n te Baibara, bon aia iraorao Tawita ao Ionatan. A boni karaoa aia berita ae boto i aon aia iraorao. (Wareka 1 Tamuera 17:57; 18:1, 3, BG.) E ngae ngke a burenibwai n riki aeka n iraorao akanne, ma angiin iraorao a kona n rikirake ni korakora ngkana a berita raao ke a namakina kabaeaia i marenaia.​—Taeka N Rabakau 17:17; 18:24, BG.

5.E na kanga ni kona ni kakabwaiaaki te toro n aki toki n tikuna iroun ana toka ae raoiroi?

⁵ E kabwarabwaraaki n te Tua are a anganaki I-Iteraera iroun te Atua taekan te iraorao riki teuana are a kona iai ni kakabwaiaaki aomata ngkana a karaoa te berita. Ngkana e tangiria te toro bwa e na kamatoaaki tikuna iroun ana toka ae raoiroi, e riai n rinanon te boraraoi ae teimatoa ae riai ni kakoroaki nanona ma ana toka. E taekinaki ae kangai n te Tua: “Ngkana tao e bon atonga raoi ae kangai, I tangira au toka, ma buu, ma natiu; N na aki nako n inaomata: ao e na kairia ana toka nako matan te Atua, ao e na kairia naba nakon te mataroa ke nako rarikin te mataroa; ao e na ewara taningana n te ubai; ao e na toro i rouna n aki toki.”​—Te Otinako 21:5, 6, BG.

6, 7. (a) E kanga te berita ni kakabwaiaia aomata? (b) Tera ae kaotaki n anne ni kaineti ma ara iraorao ma Iehova?

⁶ Te mare bon te iraorao ae kainnanoaki iai te berita ae rangi ni karineaki. Bon tiaki tii te boraraoi ma bon te berita nakon te aomata. A aki kona ni karekea te mweraoi ni koaua aomata aika uoman ake a kaai ni maeka ao a tuai ni mare, n ikotaki naba ma natiia. Ma taanga ake a karaoa ae riai i marenaia ni karinea te mare, bon iai bukina man te Baibara ae a rangi ni kakorakoraia iai ni kaetii aia kangaanga ma te tangira ngkana a riki.​—Mataio 19:5, 6; 1 I-Korinto 13:7, 8; Ebera 13:4.

⁷ N taai ake a karakinaki n te Baibara, a kakabwaiaaki aomata man te boraraoi ae matoa n te bitineti ao n te mwakuri. (Mataio 20:1, 2, 8) Ai bon titeboo naba ma ae riki ni boong aikai. N te katoto, ti karekea kakabwaiaara man te boraraoi ae matoa are koreaki ke korean te boraraoi ibukin te mwakuri, imwaini moanakin te bitineti ae boou, ke moanakin am mwakuri n te kambwana teuana. Mangaia are, ngkana e kakorakoraaki te iraorao n aron te mare ao te mwakuri n te berita, ai batira riki ngkanne kakabwaiam ni kakoroan nanoni katabuani maium ma nanom ni koaua n am iraorao ma Iehova! Ti na iangoa ngkai kakabwaiaaia aomata ake rimoa mani katabuani maiuia nakon Iehova ae te Atua ao e kanga n rangi n riao riki aio nakon ae tii te berita.

Aron te Katabu Nakon te Atua ni Kakabwaiaia I-Iteraera

8. Tera ae nanonaki n te katabu nakon te Atua ibukia I-Iteraera?

⁸ A katabui maiuia kaain te botannaomata ae I-Iteraera ngke a taekina aia taeka ni bau nakon te Atua. E botiia Iehova i rarikin te Maunga are Tinai, ao e taku nakoia: “Ngkana tao kam boni kan ongo bwanau, ma ni kawakina au berita, ao kam na riki iai ba bon au aomata mai buakoia botanaomata ni kabaneia.” A kaeka aomata n te nano ae tii teuana ao a taku: “Ti na tou mwin ana taeka Iehova ni kabane.” (Te Otinako 19:4-8, BG) E bati riki ae nanonaki n te katabu irouia I-Iteraera nakon ae tii mwiokoaia ni karaoan te bwai teuana. E nanonaki n anne bwa a riki bwa ana bwai Iehova, ao e tabeakinia n aron ae “aomata” ngaiia aika okoro.

9. A kanga ni karekei kakabwaiaaia I-Iteraera ni katabuani maiuia nakon te Atua?

⁹ A karekei kakabwaiaaia I-Iteraera n rikia bwa ana bwai Iehova. E kakaonimaki ao e mwamwannanoia n ai aron te karo ae tatangira n tabeakina natina. E taku te Atua nakoia I-Iteraera: “E kona te aine ni manuoka natina ae mamma, ba e na aki nanoanga natini biritona? Eng, a boni kona aine ni manuokiia natiia, ao Ngai N na aki manuokiko.” (Itaia 49:15, BG) E angania te Tua Iehova ibukini kairiraia, te kaunganano rinanoia burabeti, ao te kamanomano rinanoia anera. E korea ae kangai te tia areru: “E kaota ana taeka nakoia Iakoba, Ana tua ma ana moti nakoia Iteraera. Bon tiaki arona aei nakon te botanaomata teuana.” (Taian Areru 147:19, 20, BG; wareka Taian Areru 34:7, 19; 48:14, BG.) N ai aron Iehova ni mwannanoia botannaomata ake ana bwai ngkoa, ni boong aikai e na boni kawakinia naba te koraki ake a katabui maiuia nakoina.

Bukin Riaini Katabuani Maiura Nakon te Atua

10, 11. Ti kanga ni bungiaki i nanon ana utu te Atua ae kaainaki irouia aomata ao anera? Kabwarabwaraa.

¹⁰ Tao tabeman a kona n iango ni kangai ngkai a iaiangoa katabuani maiuia ao bwabetitoaia, ‘E aera ngkai I aki kona n taromauria te Atua ngkana I tuai ni katabua maiu nakoina?’ E rikirake ni mataata bukina ngkana ti iangoa koauan teira i matan te Atua. Uringnga bwa ti bane ni bungiaki i tinanikun ana utu te Atua ibukin ana bure Atam. (I-Rom 3:23; 5:12) E bon rangi ni kakawaki katabuani maiura nakon te Atua bwa ti aonga ni butimwaeaki bwa kaain ana utu aika aomata ao anera. Ti na noria bwa tera bukina.

¹¹ Akea mai buakora ae iai oin tamana ae kona n anganna te maiu ae aki toki n aron ae iangoia te Atua. (1 Timoteo 6:19) Ibukin te bure are a karaoia moan aomata ake uoman, ti aikoa riki iai bwa natin te Atua ni bungiakira, ao a a karaureaki botannaomata mairoun te Tama ae tatangira ae te tia Karikiriki. (Kabotaua ma Te Tua-Kaua 32:5, BG.) Man te tai anne ni karokoa ngkai, a a tia kaain te aonnaba ni maeka i tinanikun ana utu Iehova ae kaainaki irouia aomata ao anera, ao n ianena mairoun te Atua.

12. (a) A na kanga n riki aomata aika aki kororaoi bwa kaain ana utu te Atua? (b) Mwaneka raa aika ti riai ni karaoi imwain te bwabetito?

¹² Ma e ngae n anne, ti kona n tatabemanira nako ni bubutiia te Atua bwa e na kariaira n rin n ana utu ae kaainaki irouia ana toro aika tangiraki irouna.a E na kanga ni kona n riki anne nakoia taani bure n ai arora? E korea ae kangai te abotoro Bauro: “Ngke ti kairiribai ngkoa nakon te Atua, ao ti raoiakinaki ma ngaia rinanoni maten Natina.” (I-Rom 5:10) Ni bwabetitoara, ti butiia te Atua bwa e na anganira mataniwin nanora ae raoiroi bwa ti aonga ni butimwaeaki irouna. (1 Betero 3:21) Ma imwaini bwabetitoara, iai mwaneka aika ti riai ni karaoi. Ti riai n ataa te Atua, n reireinira onimakinana, n raraoma ma n rairi nanora, ao ni bitii kawaira. (Ioane 17:3; Mwakuri 3:19; Ebera 11:6) Ao iai riki te bwai teuana ae riai ni karaoaki imwain ae ti na butimwaeaki n ana utu te Atua. Tera te bwai anne?

13. E aera ngkai e riai n taetae ni bau te aomata temanna nakon te Atua bwa e aonga n riki bwa kaain Ana utu ae kaainaki irouia taan taromauria aika tangiraki irouna?

¹³ Imwain ae e kona n riki temanna ae ianena mairoun te Atua bwa kaain ana utu ae kaainaki irouia ana toro aika tangiraki irouna, e riai moa ni karaoa ana berita ae rangi ni kakawaki nakon Iehova. Ibukini kamatataakira i aon aei, iangoa te tama ae karineaki ae kaotiota ana akoi nakon te teinimwaane ae akea ana karo ni kan tabekia bwa kaain ana utu. E ataaki te tama aei bwa te mwaane ae raoiroi. Ma imwain ae e na butimwaea te teei aei bwa natina, e tangiria moa teuaei bwa e na karaoa te berita te teei aei. Ngaia are e taku teuaei: “Imwain ae I natiniko, I rangi ni kan ataia bwa ko na tangirai ao ni karineai n ai aron tamam.” Tii ngkana e kukurei te teei aei ni karaoa te berita ae kakawaki aio, e na butimwaeaki iroun te karo bwa kaain ana utu. E aki taraa n eti anne? N aron anne, e butimwaeia Iehova tii ake a kukurei ni karaoa te taeka ni bau ibukin aia katabu nakoina, bwa ai kaain ana utu. E taekinaki ae kangai n te Baibara: “Anga rabwatami bwa te karea ae maiu ae itiaki, ae butimwaeaki iroun te Atua.”​—I-Rom 12:1.

Te Katabu Boni Kaotan te Tangira ao te Onimaki

14. N aaro raa ae e a riki iai te katabu bwa kaotiotan te tangira?

¹⁴ Taekinan ara taeka ni bau nakon te Atua boni kaotiotan tangiran Iehova ae nako mai nanora. N aaro tabeua tii te arona ma te taeka ni bau n te mare. E kaotiota ana tangira te buu te mwaane ae te Kristian nakoni buuna n ana taeka ni bau bwa e na kakaonimaki nakoni buuna n aki ongei baika a na riki. Bon te taeka ni bau nakon te aomata nakon ae tii te berita ibukini karaoan te bwai teuana. E ataia te buu te mwaane ae te Kristian bwa e aki kona ni karekea te kakabwaia ae te tekateka n taanga ma buuna ngkana e aki taetae ni bau moa n te mare. N aron anne, ti aki kona ni kimwareirei ni koaua ni karekei kakabwaia aika kona n reke ni kaainan ana utu Iehova, ngkana ti aki moa karaoa ara taeka ni bau n ara katabu. Ai ngaia are, ti katabui maiura nakon te Atua bwa ti rangi ni kan riki bwa ana bwai ao ti kakorakoraira bwa ti na kakaonimaki nakoina n aki ongei baika riki, e ngae ngke ti aki kororaoi.​—Mataio 22:37.

15 E kanga n riki te katabu bwa kaotan te onimaki?

¹⁵ Ngkana ti katabui maiura nakon te Atua, ti a kaota iai ara onimaki. Bukin tera? Onimakinan Iehova iroura e kairira bwa ti na boni kakoauaa raoi ae kaanian te Atua bon te bwai ae raoiroi ibukira. (Taian Areru 73:28, BG) Ti ataia bwa e boni kangaanga n taai nako te nakonako ma te Atua i buakon te “roro ae buakaka ma ni bubure,” ma ti onimakina ana berita te Atua ae e na boutokaira n ara kakorakora. (I-Biribi 2:15; 4:13) Ti ataia bwa ti aki kororaoi, ma ti onimakina raoi Iehova bwa e na bon nanoangaira naba ngkana ti kairua. (Wareka Taian Areru 103:13, 14, BG; I-Rom 7:21-​25.) Ti onimakina Iehova bwa e na boni kabooi mwin nanomatoara ni kateimatoa kakaonimakira n te aro ae eti.​—Iobi 27:5, BG.

E Kairiri Nakon te Kukurei te Katabu Nakon te Atua

16, 17. Bukin tera ngkai e kairiri nakon te kukurei te katabu nakon Iehova?

¹⁶ E karekea te kukurei te katabu nakon Iehova kioina ngkai e irekereke ma te anga boni ngaira. E taekina te koaua ae rangi ni kakawaki Iesu ngke e kangai: “E kakukurei riki te anga nakon te anganaki.” (Mwakuri 20:35) E namakina te kukurei Iesu man te anganga n ana tai ni mwakuri ni minita i aon te aba. Ngkana e nora riaina, e aki motirawa ke tao n amwarake ibukini karauan nanoia aomata bwa e aonga ni kona ni buokiia ni kairiia nakoni kawain te maiu. (Ioane 4:34) E namakina te kimwareirei Iesu ni kakukureian nanon Tamana. E taku: “I kakaraoi baike a kakukurei nakoina.”​—Ioane 8:29; Taeka N Rabakau 27:11, BG.

¹⁷ Ngaia are, e kairiia taan rimwina Iesu nakoni kawain te maiu ae kakukurei ngke e taekina ae kangai: “Ngkana iai ae kan rimwiu ao ke e kakeaa boni ngaia.” (Mataio 16:24) Karaoan anne e kaanira riki ma Iehova. Ti kona ni kariaia bwa e na iai te aomata ae e na kona n tabeakinira n te aro ae tatangira riki?

18. Bukin tera bwa maiuakinan ara katabu nakon Iehova e karika te kukurei ae bati riki nakon are ti na katabu nakon te bwai teuana ke te aomata temanna?

¹⁸ E karika te kukurei ae bati riki katabuani maiura nakon Iehova ao maiuakinan ara katabu anne n arora ni karaoa nanona, nakon are ti na katabui maiura nakon te bwai teuana ke te aomata temanna. N te katoto, a bati ake a kabanei maiuia ibukin uaiakinan te kaubwai ao e aki reke irouia te kukurei ni koaua ao te raunnano. Ma aomata aika katabui maiuia nakon Iehova a karekea te kukurei ae teimaan. (Mataio 6:24) E a karika kukureia te mwioko ae rine ae te riki bwa “raon te Atua ni mwakuri” ma e ngae n anne, a aki katabu nakon te mwakuri teuana ma bon nakon Atuara ae mwamwannano. (1 I-Korinto 3:9) Bon akea temanna ae kona ni mwamwannano riki nakoina ni kaineti ma aroia n anga boni ngaiia. E na manga kaokiia ana aomata aika kakaonimaki nakon aia bong ni kairake bwa a aonga ni kona ni kabwaia n aki toki man ana mwamwannano.​—Iobi 33:25, BG; wareka Ebera 6:10.

19. Tera te kakabwaia ae e reke irouia te koraki ake a katabui maiuia nakon Iehova?

¹⁹ Katabuani maium nakon Iehova e a kaania riki am iraorao ma ngaia. E taekinaki ae kangai n te Baibara: “Kaania te Atua, ao ane e na kaaningkami.” (Iakobo 4:8; Taian Areru 25:14, BG) N te kaongora ae imwin aei ao ti na noria bwa bukin tera ngkai ti kona n nanomatoa ni karaoan ara motinnano ae ti na riki bwa ana bwai Iehova.

[Kabwarabwara ae nano]

Ko na Kanga ni Kaeka?

• Tera ae nanonaki ni katabuani maiun temanna nakon te Atua?

• Ti kanga ni kakabwaiaaki ni katabuani maiura nakon te Atua?

• Bukin tera bwa a riai Kristian ni katabui maiuia nakon Iehova?

[Taamnei n iteraniba 9]

Maiuakinan ara katabu e kairiri nakon te kukurei ae teimaan