Kam Butimwaeaki Nakon Te Aroaro Ni Maiu Ae Te Kabanea N Tamaroa!
“Ngkana ti maiu ke ti mate, ma bon ana bwai Iehova ngaira.”—I-ROM 14:8.
1. Tera ana reirei Iesu ibukin te aroaro ni maiu ae te kabanea n tamaroa?
E tangirira Iehova bwa ti na bwaina te aroaro ni maiu ae te kabanea n tamaroa. A kona aomata ni maiuakin aroaro ni maiu aika kakaokoro ma bon tii teuana te aroaro ni maiu ae te kabanea n tamaroa. Akea te bwai ae raoiroi riki ae ti kona ni karaoia nakoni kaboraoani maiura ma Ana Taeka te Atua ao karekean reireiara mairoun Natina ae Iesu Kristo. E reiakinia taan rimwina Iesu bwa a na taromauria te Atua n te taamnei ao te koaua, ao e mwiokoiia bwa a na karekeia taan rimwina. (Mataio 28:19, 20; Ioane 4:24) Ti kakukureia Iehova ao ti karekei Ana kakabwaia ngkana ti maiuakin ana kaetieti Iesu.
2. Tera aroia aomata aika bati ni butimwaea rongorongon te Tautaeka n Uea n te moan tienture, ao tera ae nanonaki ni kaainakini “kawain te Uea”?
2 Ngkana a riki bwa taan onimaki te koraki ake “a tauraoi nanoia ni butimwaea te koaua ae kairiia nakon te maiu are aki toki,” ao ni bwabetitoaki iai, e a reke ngkanne bukina ae kakawaki bwa ti na kangai nakoia: “Kam butimwaeaki nakon te aroaro ni maiu ae te kabanea n tamaroa!” (Mwakuri 13:48) Ni moan aia tai Kristian n te moan tienture, nga ma nga aomata ake a kaoti man natannaomata aika kakaokoro ake a butimwaea te koaua ao ni kaotia i mataia aomata koauan aia katabu nakon te Atua n te bwabetito. (Mwakuri 2:41) Taan rimwini Kristo akanne a kaaina “kawain te Uea.” (Mwakuri 9:2; 19:23) E tonu raoi te taeka aei ngkai te koraki ake a riki bwa taan rimwini Kristo a nimta te aroaro ni maiu ae aanaki n onimakinan Iesu Kristo ao a kakairi n ana katoto.—1 Betero 2:21.
3. Bukin tera bwa a bwabetitoaki ana aomata Iehova, ao iraman aika a a tia ni bwabetitoaki i nanon tebwina te ririki aika a tibwa nako?
3 E a korakora rikiraken te mwakuri ae karekeaia taan rimwini Kristo ni boong aika kaitira aikai ao ngkai e a tia ni karaoaki n aaba aika raka i aon 230. Man te ririki 1999 ni karokoa ngkai ao e riaon 2,700,000 ake a motinnanoa te beku iroun Iehova ao ni bwabetitoaki ni kaota koauan aia katabu nakoina. E oti n te mwaiti anne bwa ai aron ae e raka i aon 5,000 aomata ake a bwabetitoaki ni katoa wiki! E boto te motinnano ibukin te bwabetito i aon tangiran te Atua, te atatai i aon te Baibara ao ai onimakinani baike a reiakinaki iai. Bon te mwaneka ae rangi ni kakawaki ni maiura te bwabetito, bwa ngaia ae kanikinaea moanakin ara iraorao ae kaan ma Iehova. Boni kaotiotan naba onimakinana raoi bwa e na buokira ni kakaonimaki ni beku irouna, n arona naba ni buokiia ana toro ake rimoa ake a nakonako ni kawaina.—Itaia 30:21.
E Aera Ngkai E Kakawaki Bwa Ko na Bwabetitoaki?
4, 5. Taekini kakabwaia tabeua ao baika raraoi ake a kona n reke man te bwabetito.
4 Tao e bae n ae ko a tia ni karekea ataakin te Atua, ko a tia ni bita maium ao ngkai ko a riki bwa te tia uarongorongo ae tuai ni bwabetitoaki. Anne te aeka n rikirake ae kamoamoaaki. Ma ko a tia ni katabua maium nakon te Atua n te tataro ao n iangoa te bwabetito? Ko a bae n ataia ngkai imwin am reirei n te Baibara bwa e riai ni boto maium i aon neboan Iehova ao tiaki ni kakukureiam ke ni bwaikorakin te maiu aei. (Wareka Taian Areru 148:11-13; Ruka 12:15) Baikara kakabwaia tabeua ao baika raraoi ake a kona n reke man te bwabetito?
5 Ngkai te Kristian ngkoe ae ko katabua maium, e riai n iai am kantaninga ae te kabanea ni kakawaki ibukini maium. Ko na boni kukurei ngkai ko karaoa nanon te Atua. (I-Rom 12:1, 2) E na rikirake i nanom aroaron te Atua n aron te rau ao te onimaki, n ana ibuobuoki te taamnei ae raoiroi are mairoun Iehova. (I-Karatia 5:22, 23) E na kaekai am tataro nako te Atua ao ni kakabwaiaa am kakorakora ni kaboraoani maium ma ana Taeka. E na kakimwareireiko am mwakuri ni minita, ao e na kakorakoraaki kantaningaan te maiu n aki toki iroum mani maiuakinan ae kukurei iai te Atua. Ma ae kakawaki riki, te katabu ao te bwabetito a na kaotia bwa ko a kan riki raoi bwa temanna Ana Tia Kakoaua Iehova.—Itaia 43:10-12.
6. Tera ae kaotaki n ara bwabetito?
6 Ni katabuani maiura nakon te Atua ao ni bwabetitoara, ti a kaotia iai bwa ai ana bwai Iehova ngaira. E korea ae kangai te abotoro Bauro: “Bon akea i buakora ae maiu i bon ibukina, ao akea naba ae mate i bon ibukina, bwa ngkana ti maiu, ao ti maiu ibukin Iehova, ma ngkana ti mate, ti mate ibukin Iehova. Mangaia ae ngkana ti maiu ke ti mate, ma bon ana bwai Iehova ngaira.” (I-Rom 14:7, 8) E a tia te Atua ni kaota kakawakira n arona n anganira inaomatara. Ti na kakukureia nanon te Atua ngkana ti kamatoai ara iango n uaiakina te aeka ni maiu aei ibukin tangirana. (Taeka N Rabakau 27:11) Ara bwabetito boni kaotan ara katabu nakon te Atua ao te bwai naba ni kaotioti i mataia aomata ae Iehova bon ara tia Tautaeka. E kaotaki naba n aei bwa ti a tia n tei n ana itera, ni kaineti ma mwaakana n tautaeka i aoni bwaai ni kabane. (Mwakuri 5:29, 32) Ao ibukin anne, e a boutokaira Iehova. (Wareka Taian Areru 118:6.) Te bwabetito, e kauka naba te kawai nakoni karekeani kakabwaiaara aika bati riki ni kaineti ma te onimaki, ngkai ao nakon taai aika imwaira.
Ti a Kakabwaiaaki Ngkai Ti a Kaaina te Botaki n Itaritari Ae Tatangira
7-9. (a) Tera te karaunano are e anga Iesu nakoia te koraki ake a kitan aia bwai nako ma n iriria? (b) E kanga ni kakoroaki nanon ana berita Iesu are ni Mareko 10:29, 30?
7 E taku te abotoro Betero nakon Iesu: “Noria! Ti a tia ni kaaki bwaai nako ao n rimwim, tera ngkanne ae e a mena imwaira?” (Mataio 19:27) E kan ataia Betero bwa tera ae e na riki nakoina n taai ake imwaina ao nakoia taan rimwin Iesu ake tabeman riki. A a tia ni kakeai baika kakawaki irouia bwa a aonga n anga ngaiia nakon te mwakuri n tataekina te Tautaeka n Uea. (Mataio 4:18-22) Tera te karaunano are e angania Iesu?
8 Ni kaineti ma ana rongorongo Mareko ae aekan aei, e kamataata iai Iesu bwa a na boni kaaina te botaki n itaritari n te onimaki taan rimwina. E taku: “Akea ae kitana mwengana ke tarina ke mwaanena ke tinana ke tamana ke natina ke ana tawaana ibukiu ao ibukin te rongorongo ae raoiroi, ae e na aki karekea ngkai n te tai aei, tebubua riki mwaitini mwengana ma tarina ma mwaanena ma tinana ma natina ma ana tawaana ma taiani bwainikirinaki naba, ao te maiu are aki toki n te waaki ae na roko i aon te aba.” (Mareko 10:29, 30) Kristian ake n te moan tienture n aron Nei Ruria, Akura, Beritikira ao Kaio, boni ngaiia mai buakoia tabeman Kristian ake a katauraoi “auti” ao a riki bwa ‘tariia ao mwaaneia ma tinaia’ raao n te onimaki, n aron are e a tia ni beritanna Iesu.—Mwakuri 16:14, 15; 18:2-4; 3 Ioane 1, 5-8.
9 E a tia ni korakora kakoroan nanon ana taeka Iesu akanne ni boong aikai. E kaineti te “tawaana” ma baike a kukurei ni kitan taan rimwina aika bati, n ikotaki naba ma mitinare, kaain te utu ni Betaera, taani kateitei ni katobibia te aonnaba ake a anga ngaiia ao ai tabemwaang riki, ibukini moanibwaian te Tautaeka n Uea n aaba aika kakaokoro. A mwaiti taari mwaane ao aine ake a a tia ni kitani mwengaia bwa a aonga ni kona ni kabebetei maiuia, ao e karekea te kimwareirei nakoira ongoraeakinan aroia are e a kaotaki iai aron Iehova n tabeakinia ao aron naba kukureina n aia beku ibukina. (Mwakuri 20:35) Irarikin anne, a kona ana toro nako Iehova ake a a tia ni bwabetitoaki ni karekei kakabwaia ngkana a “ukoukora moa ana tautaeka n uea te Atua ma ana raoiroi” ngkai a kaaina te botaki n itaritari ae katobibia te aonnaba.—Mataio 6:33.
Kamanoko n “te Tabo ae Raba”
10, 11. Tera “te tabo ae raba ae ana tabo Teuare Moan te Rietata” ao ti na kanga ni kariaiakaki n rin iai?
10 Te katabu ao te bwabetito e karekea naba te kakabwaia teuana ae rangi n tamaroa ae te memena n “te tabo ae raba ae ana tabo Teuare Moan te Rietata.” (Wareka Taian Areru 91:1, BG.) Aio te tabo ni kamanomano ao ni kamweraoi n te aro ni kaikonaki, ae te aro ke te waaki ae kawakinira man ruanikain ara onimaki. Bon te “tabo ae raba” ibukina bwa e aki ataaki irouia aomata aika akea otaia n te onimaki ao aika aki onimakina te Atua. Ni maiuakinan ara katabu ao ni kaotiotan onimakinan Iehova ma nanora ni kabane, ai aron ae ti kangai iai nakoina: “Boni neu ni kamaiu ao au nono; Bon Atuau, ae I onimakinna.” (Taian Areru 91:2, BG) E a riki Iehova ae te Atua bwa nnera ni maeka ae mano raoi. (Taian Areru 91:9, BG) Iai te tabo ae mano riki nakon aei?
11 Kariaiakara n rin n “te tabo ae raba” ae ana tabo Iehova, e katerea bwa ti a tia ni kakabwaiaaki ni karikirakean ara iraorao ae kaani ma ngaia. E moanaki raoi aei man te katabu ao te bwabetito. Imwina, ti a karikirakei ara iraorao ma te Atua rinanoni kaaniana n te ukeuke n reirei n te Baibara, te tataro ae nako man te nano, ao n te ongeaba ma nanora ni kabane. (Iakoba 4:8) Bon akea te aomata temanna ae e a tia ni kaan riki ana iraorao ma Iehova irarikin Iesu, are e aki kona ni kaingingaki onimakinan ana tia Karikiriki irouna. (Ioane 8:29) Ngaia are, ti bia aki nanououa iroun Iehova ke ibukin nanona ma ana konabwai ni buokira ni kakoroa nanon ara berita n ara katabu. (Te Minita 5:4) A a riki baike e katauraoi te Atua ibukin ara onimaki bwa bwaai ni kakoaua aika aki kona ni kakeweaki, bwa e bon tangirira ao e kani buokira n tokanikai n ara beku ibukina.
Kaota Kakawakin Ara Bwaretaiti n Taamnei
12, 13. (a) Tera te bwaretaiti n taamnei? (b) Ti na kanga ni buokiia aika boou?
12 A kauka naba te kawai nakoira te katabu ao te bwabetito bwa ti na memena n te bwaretaiti n taamnei ae kakabwaiaaki. Bon te aroaro n taamnei teuana ae okoro are a mena iai raao n te onimaki ake a raoi ma Iehova ae te Atua ao bon i marenaia. (Taian Areru 29:11; Itaia 54:13) Bon akea te bwai teuana n te aonnaba aei ae riai ni kabotauaki ma te bwaretaiti n taamnei. E rangi ni kakoauaaki riki aei n taiani bwabwaro ni katobibia te aonnaba ike a a botaki iai tarira ma mwaanera mai buakoia natannaomata aika bati, taetae ao reeti aika kakaokoro ake a roko ni botaki n te tabo ae rau, ae a katiteuanaaki iai ao n itangitangiri bwa kaanga taari.
13 Boni kaitaraan raoi aroaro aika rangi ni bubuaka ni boong aikai te bwaretaiti n taamnei ae ti mena iai. (Wareka Itaia 65:13, 14.) Ngkana ti tataekina rongorongon te Tautaeka n Uea, ti a mwiokoaki iai bwa ti na taekina te kakao nakoia tabemwaang bwa a na rin n te bwaretaiti n taamnei. Bon te kakabwaia naba buokaia aomata ake a a tibwa bobotaki ma kaain te ekaretia, ao a na karekei kakabwaiaaia ni kataneiaia n te mwakuri ni minita. I aan aia kairiri unimwaane, tao ti kona ni kakabwaiaaki n te mwioko ni buokiia aika boou n aron naba are a karaoia Akura ao Beritikira ni ‘kamatataani kawain te Atua ni kaetia riki’ nakon Aboro.—Mwakuri 18:24-26.
Kateimatoa Reireiam Iroun Iesu
14, 15. Baikara bukina aika kakawaki aika ti riai iai n teimatoa ni karekei reireiara mairoun Iesu?
14 Iai bukina aika kakawaki ngkai ti riai n teimatoa n reirei iroun Iesu. E a tia ni kabanei ririki aika nga ma nga Iesu ni mwakuri ma Tamana imwain rikina n aomata. (Taeka N Rabakau 8:22, 30) E ataia bwa e boto te aroaro ni maiu ae te kabanea n tamaroa n te beku iroun te Atua ao n tataekinan te koaua. (Ioane 18:37) E mataata Iesu bwa maiuakinan te maiu teuana irarikin riki aei, bon te aro ni bangaomata ao e aki mutiakinaki iai kanoan taai aika a na roko. E ataia ae e na boni kakaiaki kataakina ao e na tiringaki. (Mataio 20:18, 19; Ebera 4:15) Ngkai bon Teuare ara banna ni katoto ngaia, e reireinira arora bwa ti aonga n teimatoa ni kakaonimaki.
15 Teutana te tai imwini bwabetitoan Iesu, ao e kataaki iroun Tatan bwa e na kitana te aroaro ni maiu ae te kabanea n tamaroa, ma e boni matebuaka. (Mataio 4:1-11) Ti reireiaki n aei bwa ti boni kona ni kateimatoa ara kakaonimaki n aki ongea te bwai ae e karaoia Tatan. E bae ni kaatuua riki ana iango i aoia naake a uaiakina te bwabetito ao ake a a tibwa bwabetitoaki. (1 Betero 5:8) A na bae ni kaaitaraira ara utu, bwa a taku bwa a buokira iai ma a aki ataia ae a a tia ni mwamwanaaki n rongorongo aika kairua ibukia Ana Tia Kakoaua Iehova. Ma e ngae n anne, aeka ni kataaki aikai a a reke iai ara tai ni kaotiotii aroaro ni Kristian aika raraoi n aron te karinerine ao te rabakau, ngkana ti kaekai titiraki ao n tataekina te rongorongo. (1 Betero 3:15) A kona n uaana baika a riki aikai nakoia akana a ongora iroura.—1 Timoteo 4:16.
Nimta te Aroaro ni Maiu ae te Kabanea n Tamaroa!
16, 17. (a) Baikara baika tenua aika kakawaki ibukin te maiu aika n Te Tua-Kaua 30:19, 20? (b) A kanga Iesu, Ioane ao Bauro ni boutokaa are e koreia Mote?
16 Tao 1,500 te ririki imwain rokon Iesu i aon te aba ao e kaumakiia I-Iteraera Mote bwa a na rinea te aroaro ni maiu ae te kabanea n tamaroa are a kona ni karekea. E taku: “I wetea karawa ma aonaba ba a na kaota kakoauan arou nako imi n te bong aei, ba I katea te maiu i matam ma te mate, ao kakabaian te aba ma karekeani kain te aba: ma ngaia ae ko na rinea te maiu, ba ko aonga ni maiu, ngkoe ma am kariki; ba ko na tangira Iehova ae Atuam, ma ni kan ongo bwanana, ma n nimtia.” (Te Tua-Kaua 30:19, 20, BG) E noraki koauan aia aki kakaonimaki I-Iteraera nakon te Atua, ma a bon tuai bitaki kaetieti aika tenua aika kakawaki ibukin te maiu, ake a taekinaki irouni Mote. A a manga taekinaki riki iroun Iesu ma tabemwaang riki.
17 Te moan, ‘ti riai n tangira Iehova ae Atuara.’ Ti kaotia bwa ti tangira te Atua, ni maiuakinan ae boraoi ma aroarona aika raraoi. (Mataio 22:37) Te kauoua, ‘ti riai ni kan ongo bwanaan Iehova’ ao ti karaoa aei rinanon ara ukeuke n reirei n Ana Taeka te Atua ao n ongeaba n ana tua. (1 Ioane 5:3) E kainnanoaki n aei ara katoatai n roroko ni botaki ni Kristian, ike e a mamaroroakinaki iai te Baibara. (Ebera 10:23-25) Te katenua, ‘ti riai n nimta Iehova.’ Ti bia onimakina te Atua n taai nako ao n toua mwini mwanekan Natina, n aki ongei baika ti riai n aitara ma ngaai.—2 I-Korinto 4:16-18.
18. (a) E kanga ni kabwarabwaraaki te koaua rimoa n Te Taua-n-Tantani ae bwain 1914? (b) Tera te namakin ae riai n reke iroura ibukin ootan te koaua ni boong aikai?
18 Bon te kakabwaia kaboraoani maiura ma ana koaua te Baibara! N 1914, a boreetiaki taeka aika kakawaki aikai n Te Taua-n-Tantani ae kangai: “Tiaki aomata ngaira aika ti kakabwaiaaki ao ni kukukurei? Tiaki bwa e boni kakaonimaki Atuara? Ngkana iai ae ataa te bwai ae raoiroi riki, ao ke e anaia. Ngkana iai ae kunea te bwai ae raoiroi riki, ara kantaninga bwa ko na kaongoira. Akea te bwai ae ti kunea ae raoiroi riki nakon ae kuneaki n Ana Taeka te Atua. . . . Akea te newe ke te kai ni koroboki ae kona ni kabwarabwaraa te rau, te kimwareirei ao te kakabwaia, ake a a tia n rin i nanora ao ni maiura man ataakin raoi te Atua ni koaua. E karaui raoi nanora ao ara iango Rongorongon Wanawanan te Atua, ana Kaetitaeka ae Riai, Mwaakana ao ana Tangira. Ai akea riki te bwai ae ti ukeria. Akea riki te bwai ae ti tangiria ma tii karikirakean ara atatai ibukin Atuara.” (Te Taua-n-Tantani n te taetae n Ingiriti ae bwain Ritembwa 15, 1914, iteraniba 377-378) E aki bitaki nanora ni kakaitau ibukin otara n taekan te Atua ao te koaua. Ni koauana, ti a nora bukini kimwareireira ae korakora riki bwa “ti nakonako n ana oota Iehova.”—Itaia 2:5, BG; Taian Areru 43:3; Taeka N Rabakau 4:18.
19. E aera ngkai a riai n aki baenikai nakon te mwaneka ae te bwabetito te koraki ake a a tau iai?
19 Ngkana ko kan “nakonako n ana oota Iehova” ma ko tuai ni katabua maium ke tao ni bwabetitoaki bwa te Kristian, tai baenikai. Karaoi baika kainnanoaki man te Baibara ibukini katauam nakon te bwabetito, ae te kawai ae okoro ibukini kaotiotan te kakaitau ibukini baike a a tia ni karaoi te Atua ao Kristo ibukira. Angan Iehova am bwai ae moan te kakawaki ae boni maium. Kaotia bwa bon nanom bwa ko na kakaraoa nanon te Atua n arom n toua mwini mwanekan Natina. (2 I-Korinto 5:14, 15) Akea te nanououa bwa bon aio te aroaro ni maiu ae te kabanea n tamaroa!
Ko na Kanga ni Kaeka?
• Tera ae kaotaki ni bwabetitoara?
• Baikara kakabwaia aika kona n reke n te katabu nakon te Atua ao te bwabetito?
• E aera ngkai e rangi ni kakawaki karekean te reirei iroun Iesu?
• Tera ae e na buokira n nimta te aroaro ni maiu ae te kabanea n tamaroa?
[Taamnei n iteraniba 27]
E kaotaki n am bwabetito bwa ko a tia n rinea te aroaro ni maiu ae te kabanea n tamaroa
[Taamnei n iteraniba 28]
Ko kamanoaki n “te tabo ae raba”?