Kabebeteingkami N Onimakinan Te Atua

“Amoa amou i aomi . . . , ao e na kabebeteaki nanomi iai.”—MATAIO 11:29.

1. Tera are e baireia te Atua n te Maunga are Tinai, ao bukin tera?

NI KATABUAN te berita n Tua n te Maunga are Tinai, iai naba i buakona te babaire ibukini kawakinan te bongi n Taabati ni katoa wiki. E anga ana kaetieti Iehova nakon te natannaomata ae Iteraera rinanon ana tia taetae ae Mote ni kangai: “Onobong am bong ni karaoa am makuri, ao ko na motika rawam n te kaiti bong: ba e aonga ni motika rawana am kao ma am ati, ao e aonga ni karekea te marurung natin am toro te aine ae te mwane, ma te iruwa.” (Te Otinako 23:12, BG) Eng, ibukin tabeakinaia ake a mena i aan te Tua iroun Iehova, e a karaoa ana baire ae tatangira ibukin te bong ni motirawa bwa a aonga ni ‘karekei marurungia’ ana aomata.

2. A kanga ni kakabwaiaaki I-Iteraera ni kawakinan te bongi n Taabati?

² E baireaki te bongi n Taabati bwa tii te bong ni motirawa? E aki, ma bon aia bong I-Iteraera ae rangi ni kakawaki ae iteran naba aia waaki n taromauri ibukin Iehova. Ni kawakinan te bongi n Taabati, a a reke iai aia tai atun utu n reirei ma aia utu bwa a aonga ni “kakawakina ana aro Iehova, ni kakaraoa te raoiroi.” (Karikani Bwaai 18:19, BG) E reke naba aia tai iai utu ma raoraoia ni bobotaki n iaiangoi ana mwakuri Iehova ao ni kimwareirei n aia iraorao. (Itaia 58:13, 14) Ma ae kakawaki riki, e kaikonakaki te tai ae na roko n te bongi n Taabati ike e nang reke iai te kabebeteaki ni koaua n Ana Tautaeka Kristo ae Maanna Tenga te Ririki. (I-Rom 8:21) Ma tera aron ara bong aikai? A na karekea ia kabebeteaia Kristian ni koaua ake a butimwaei ana aaro nako Iehova, ao n te aro raa?

Kabebeteingkami n te Iraorao ni Kristian

3. A kanga Kristian n te moan tienture ni boutokaiia i marenaia, ao tera uaana?

³ E kabwarabwaraa te ekaretia ni Kristian te abotoro Bauro bwa “bouan te koaua ma aana.” (1 Timoteo 3:15) A karekei boutokaaia aika rangi ni bati Kristian rimoa ni kaungaaia ao kateimatoaaia n te tangira. (I-Ebeto 4:11, 12, 16) E kaungaaki Bauro ni menana i Ebeto ngke e kawaraki irouia kaain te ekaretia i Korinto. Nora uaana, bwa e taku Bauro: “I kimwareirei ni menan Tetebana ma Boretunato ao Akaiko ikai . . . Bwa a kabebetea nanou.” (1 I-Korinto 16:17, 18) N aron anne, ngke e nako Korinto Tito ni beku ibukia taari ikekei, e kororeta rikaaki Bauro nakon te ekaretia ni kangai: ‘E karauaki nanona iroumi ni kabane.’ (2 I-Korinto 7:13) Ai bon arona naba ni boong aikai, bwa a karekea te kabebeteaki ni koaua Ana Tia Kakoaua Iehova ni kateimatoaan aia iraorao ma raoia ni Kristian.

4. Ti na kanga ni kabebeteaki ni bobotaki n te ekaretia?

⁴ Ko ataia ni baika ko a tia n nori bwa nibwan te kimwareirei ae bati boni bobotaki n te ekaretia. Ti karekea iai te “ikaungaunga i marenara n ara onimaki.” (I-Rom 1:12) Ti aki kabwarabae n ara iraorao ma tarira ao mwaanera ni Kristian, ma bon raoraora ni koaua, ti tangiriia ao ti karineia. Ti rangi ni kimwareirei ao ni kabebeteaki ngkana ti katoatai n ikoikotaki ma ngaiia n ara bobotaki.​—Biremon 7.

5. Ti na kanga ni kabebetea nanon temanna ma temanna ni bwabwaro ao ruunga?

⁵ Nibwani kabebeteara teuana riki, bon rinanon ara bwabwaro ma ruunga ni katoa ririki. Irarikini karekean ranin te koaua ae kakamaiu man Ana Taeka te Atua ae te Baibara ni bobotaki aika bubura riki aikai, a reke naba iai ara tai ni ‘kamwaawai nanora’ n ara reitaki n itamwaomwao. (2 I-Korinto 6:12, 13) Ma tera ae ti na karaoia ngkana ti mamaamaa ao n namakinna bwa e kangaanga iroura kawaraia aomata n taetae ma ngaiia? Te anga teuana ae ti kona n ikikina iai ma tarira ao mwaanera, boni man arora n anga boni ngaira ibukia n te bwabwaro. E taku temanna te tari te aine imwin ana ibuobuoki n te bwabwaro ibukin aaba aika kakaokoro: “I tii kinaia kaain au utu ao raoraou tabeman ma e karako ae I kinaia ikekei. Ma ngke I a buoka te kaitiaki ao I a kaitiboo ma taari mwaane ao aine aika bati! Ai kakukureira te aro aei!”

6. Tera te anga teuana ae ti kona ni karekea te kimwareirei iai n ara tai ni motirawa?

⁶ A taneiai I-Iteraera n nanako n taromauri i Ierutarem n aia toa ake tenua ni katoa ririki. (Te Otinako 34:23) N angiin te tai, e nanonaki n anne kitanakin aia tawaana ma aia titooa ao n rianna ni kawai aika bubu i nanon tabeua te bong. Ma e ngae n anne, e “kabatia te kimareirei” waerakeia nakon te tembora ngke a noriia ake a roko iai ni “kamoamoa Iehova.” (2 Rongorongo 30:21, BG) A bati ana toro Iehova ni boong aikai ake a kabatiaa kimwareirei naba imwini mwanangaia ma aia utu ni kawara te Betaera ao aia aobiti n tararua Ana Tia Kakoaua Iehova ake a uakaan nakoia. Ko kona ni karina naba aei n am babaire n am tai ni motirawa ma am utu n ae na roko?

7. (a) A na kanga n rangi ni manena nakoira bobotaki n iraorao? (b) Tera ae e kona ni boutokaaki iai te botaki ae ururingaki ao ni kateimatoa?

⁷ E kona naba ni kaungaunga te ikoikotaki ma ara utu ao raoraora n ara bobotaki n iraorao. E taku te Uea ae wanawana are Toromon: “Akea ae raoiroi riki iroun te aomata nakon te amamarake ma te momoi, ma te kakukureia tamneina n te raoiroi i buakon ana makuri.” (Te Minita 2:24, BG) E aki tii kakimwareireia te nano bobotaki n iraorao, ma a kakorakoraa naba ara tangira ma raora ni Kristian ngkai ti a kinaia riki. Ngkana ti boutokaa te botaki n iraorao bwa e na ururingaki ao ni kateimatoaira, moan te raoiroi bwa ti na kauarerekei ao n tararuai raoi, ai moarara riki ngkana iai te kamanging.

E Kabebeteingkami te Mwakuri ni Minita

8, 9. (a) Kaota kaokoron ana rongorongo Iesu ma taani koroboki ao Baritaio. (b) Ti na kanga ni kakabwaiaaki n tibwaakin ana koaua nako te Baibara?

⁸ E ingainga Iesu n te mwakuri ni minita, ao e kaungaia taan rimwina bwa a na kakairi iai. E teretere aei n ana taeka aikai: “E a rangi ni mwaiti te uaa ae riai n taiaki ngkai, ma a karako taani mwakuri. Mangaia ae butiia Mataniwin te tai bwa e na kanakoia taani mwakuri nakon taiakin ana uaa.” (Mataio 9:37, 38) E reke te kabebeteaki ni koaua n ana rongorongo Iesu are e reireinia aomata, ae te “rongorongo ae raoiroi.” (Mataio 4:23; 24:14) E rangi ni kaokoro aei ma tuua aika karawawata ake a kairoroia aomata Baritaio bwa a na butimwaei.​—Wareka Mataio 23:4, 23, 24.

⁹ N tibwaakin rongorongon te Tautaeka n Uea nakoia aomata, ti a kakorakoraa iai onimakinan te Atua irouia ao n te tai naba anne, ti karin i nanora riki ao n ara iango koaua aika kakawaki man te Baibara. E tonu raoi aei ma ana taeka te tia areru aikai: “Kam na kamoamoa Iehova; Ba e raoiroi te anenea kamoamoan Atuara; Ba e kakukurei.” (Taian Areru 147:1, BG) Ko kona ni karikirakea kimwareireim ni kamoamoaan Iehova nakoia kaain rarikim?

10. E boto nakoraoin ara mwakuri ni minita mani butimwaean ara rongorongo? Kabwarabwaraa.

¹⁰ Ni koauana, iai aomata n aono tabeua aika a kan ongora riki te rongorongo ae raoiroi nakoia ake n aono ake tabeua. (Wareka Mwakuri 18:1, 5-8.) Ngkana ko maeka n te tabo ae karako iai butimwaean rongorongon te Tautaeka n Uea, kataia kaatuua am iango n te bwai ae raoiroi ae ko kakororaoia n te mwakuri ni minita. Uringnga bwa e aki matebuaka teimatoam ni kakorakorako n tataekina aran te Atua ae Iehova. (1 I-Korinto 15:58) Irarikina, e aki boto nakoraoin ara mwakuri ni minita man aroia aomata ni butimwaea te rongorongo ae raoiroi. Ti kona ni kakoauaa ae e na taraia raoi Iehova bwa a na reke aia tai aomata ake a raoiroi nanoia n ongoraeakina rongorongon te Tautaeka n Uea.​—Ioane 6:44.

E Kaungaunga te Taromauri n Utu

11. Tera mwiokoaia kaaro mairoun Iehova, ao a na kanga ni kakororaoia?

¹¹ A mwiokoaki kaaro aika mamaaka te Atua bwa a na reireinia natiia taekan Iehova ma ana aaro nako. (Te Tua-Kaua 11:18, 19) Ngkana te karo ngkoe, ko a tia ni bairea am tai n reireinia natim taekan Tamara ae tatangira are i karawa? Ibukini buokam ni kakororaoa mwiokoam ae kakawaki aei ao ni karekei baika a kainnanoi kaain am utu, e a tia Iehova ni katauraoi amwarake n taamnei aika kaungaunga rinanoni booki, maekatin, viteo, ao bwanaa aika raweaki.

12, 13. (a) A na kanga ni kakabwaiaaki utu man te Taromauri n Utu n te tairiki? (b) A na kanga ni kakoauaa raoi kaaro bwa aia taromauri n utu bon nibwani kaungaaia?

¹² Irarikin anne, e a tia te toro ae kakaonimaki ma ni wanawana ni bairea te tairiki ibukin te Taromauri n Utu. Aei teuana te tairiki ae kaokoroaki ni katoa wiki ibukin te reirei n te Baibara n te utu. A bati ake a namakina kaanin aia iraorao n te tangira n te babaire aei, ao e a nene riki iai aia iraorao ma Iehova. Ma a na kanga ni kakoauaa raoi kaaro bwa aia taromauri n utu bon nibwani kaungaaia n aia onimaki?

¹³ E riai n aki kabotu ao ni kakamaaku te tairiki ibukin te Taromauri n Utu. Ni koauana, ti bon taromauria “te Atua ae kukukurei,” ao e tangirira bwa ti na kukurei naba n ara taromauri. (1 Timoteo 1:11; I-Biribi 4:4) Bon te kakabwaia ni koaua te tairiki ae raka ibukini maroroakinani koaua aika rangi ni kakawaki man te Baibara. A kona ni bibitii aroia n angareirei kaaro, ni kamanenaan aia karioiango ma wanawanaia. N te katoto, n te utu teuana ao e kariaiakaki te nati te mwaane ae Brandon ae tebwina ana ririki bwa e na taekina ana ribooti i aon te atu n reirei ae, “Bukin Tera Bwa E Kabongana te Naeta Iehova Bwa E na Tei Ibukin Tatan?” E a kaman tabeaianga Brandon n te titiraki aei bwa e tatangiriia naeta, ao e nanokawaki ngkai a kairekerekeaki ma Tatan. A a tia utu tabeua ni karaoi kaotioti aika boto man te Baibara n taai tabetai, ao a katoaaki kaain te utu bwa e na wareka tibwangana temanna man te Baibara ke tao ni karaoia n te kaotioti. A aki tii kaunga aaro n angareirei aikai, ma a kona n irekereke iai natimi bwa a aonga n ringaki nanoia n ana boto n reirei te Baibara.a

Rarawa Nakoni Baika Kona ni Karawawatako

14, 15. (a) E kanga n rikirake te rawawata ao te raraoma ni kabaneani boong aikai? (b) Tera riki te rawawata ae ti kona n aitara ma ngaia?

¹⁴ E a rikirake te rawawata ao te raraoma ni kabaneani bongin te waaki ae buakaka ae ngkai. A rotakibuaka mirion ma mirion aomata n akean aia mwakuri ao aki taun te mwane. A aki toki naba n namakinna te koraki ake a mwakuri bwa uouotan aia bwakabwai nakon aia auti, ai aron ae a uotia n aia bua ae kiribwangabwanga ngkai e bon aki tau ibukini kainnanon aia utu. (Kabotaua ma Akai 1:4-6.) E taraa n akea korakoraia taan tautaeka ao mataniwi riki tabeman ngkai a kabokorakora ni katoki mwakuri n iowawa ao nibwan te buakaka riki tabeua. A bati aika karawawataaki ibukini mamaaraia.​—Taian Areru 38:4.

¹⁵ A kaaitara naba Kristian ni koaua ma kangaanga ao karawawata man ana waaki Tatan. (1 Ioane 5:19) N tabetai, e kona ni kauaataoaki rawawatan nanoia taan rimwini Kristo ngkai a kakorakoraia n teimatoa ni kakaonimaki nakon Iehova. E taku Iesu: “Ngkana a bwainikirinai ao ane a na bwainikiriningkami naba.” (Ioane 15:20) Ma “tiaki n ae ti katukaki n aki buokaki” ngkana ti “bwainikirinaki.” (2 I-Korinto 4:9) E aera bwa e riki aei?

16. Tera ae kona ni buokira ni kateimatoa kimwareireira?

¹⁶ E taku Iesu: “Nakomai nakoiu ngkami akana kam korakai ma n rawawata, ao N na motiki rawami.” (Mataio 11:28) Ti mwiokoa Iehova ni maiura ngkana ti onimakina raoi ana karea ni kaboomwi Kristo. Ni karaoan aei, ti a karekea iai te “korakora ae riaoni korakoraia aomata.” (2 I-Korinto 4:7) Bon “te tia ibuobuoki,” te taamnei ae raoiroi mairoun te Atua ae e kakorakorai ara onimaki bwa ti aonga n aki tii nanomwaaka i aani kataaki ao karawawata aika ti rinanoi, ma ti teimatoa naba ni kimwareirei.​—Ioane 14:26; Iakobo 1:2-4.

17, 18. (a) Tera te nano ae ti riai ni kawakinira mai iai? (b) Tera ae kona n riki ngkana ti kaatuua iangoani kakukurein te maiu aei?

¹⁷ A riai Kristian ni koaua ni boong aikai ni kawakinia bwa a na aki kaririaki n tangirani kakukurein te maiu aei. (Wareka I-Ebeto 2:2-5.) Bwa ngkana ti aki karaoa aei, ti kona ni mwane n ana “kaibwabwaru te rabwata ma baika tangiri maata ma te kainikatonga ni kaubwain te maiu aei.” (1 Ioane 2:16) Ke ti kona ni burebureaki ni kakoauaa bwa ti na kabebeteaki ngkana ti nanoraoi nakon ana kaibwabwaru te rabwata. (I-Rom 8:6) N te katoto, a a tia tabeman ni kakukureiia ni kamanenaan te drug ao te kamanging n te aro ae aki riai, te bwaitingako, takaakaro aika tiritiri, ke mwakuri aika kaokoro aika aki eti i aan te tua. E karaoi ana “kunemwaan nako” Tatan ibukini bureburean temanna bwa e na iaiangoa te kakukurei n te aro ae kairua.​—I-Ebeto 6:11.

¹⁸ Ni koauana, akea buren te amwarake, te moi, aaro ni kaakibotu aika kakukurei ngkana a karaoaki n ae riai. Ma ti aki kariaia moanibwaiani baikai ni maiura. E rangi ni kakawaki te iangoraoi ao te taotaonakinnano, riki n iangoan taai aika ti maiu iai. Ti kona n rangi ni karawawataaki n uaiakinani bwaai i bon ibukira ao ti a “taningaroti iai ke n aki uaa ni kaineti ma te atatai ae eti ibukin ara Uea ae Iesu Kristo.”​—2 Betero 1:8.

19, 20. E na kanga n reke te kabebeteaki ni koaua?

¹⁹ Ngkana ti kaboraoi arora n iango ma ana tua Iehova, ti a ataia iai bwa a kai toki kakukurein te maiu aei. E ataa anne Mote ao ngaira naba. (I-Ebera 11:25) Ni koauana, e reke te kabebeteaki ni koaua ae namakinan te kimwareirei ae korakora ae teimaan ao te raunnano, mani karaoan nanon Tamara are i karawa.​—Mataio 5:6.

²⁰ Ti bia teimatoa ni kabebeteaki ni baika kaota onimakinan te Atua. Ni karaoan anne, ti “rawa nakoni bwaai ni kabane ake a kaitaraa nanon te Atua ao nakon tangirani bwain aon te aba . . . ngkai ti kariariaa te kantaninga ae kakukurei ao mimitongini kaotin te Atua ae kakannato, ao ara tia Kamaiu ae Kristo Iesu.” (Tito 2:12, 13) Ngaia are ti bia motinnanoia bwa ti na teimatoa n amoa amon Iesu n arora n aantaeka nakoni mwaakana n tautaeka ao ana kairiri. Ti na karekea te kukurei ni koaua ao te kabebeteaki ni karaoan aei!

[Kabwarabwara ae nano]

Ko na Kanga ni Kaeka?

• A kanga ni kabebeteaki ana aomata Iehova ni boong aikai?

• N te aro raa are ti a kabebeteaki iai ma te koraki ake ti taetae nakoia, n te mwakuri ni minita?

• Tera ae a kona ni karaoia atun utu ni kakoauaa raoi bwa e na kaungaunga aia taromauri n utu?

• Baikara baika karawawatai ara onimaki?

[Taamnei n iteraniba 31]

Ti karekei nibwani kabebeteara aika bati n amoakin amon Iesu