3 N te Aro Raa?

A BATI Aaro aika a kaatuui waaki tabeua ibukin te tataro bwa aia katei, n aron tein te rabwata ae tau ibukin te tataro, taekana ao aroaro aika a taneiai iai. Ma e buokira te Baibara bwa ti na aki kaatuui iangoani waaki aikai ma ti na kaatuui iangoani baika kakawaki riki ibukin te titiraki ae “Tera arora n tataro?”

E kaotaki n te Baibara aroia ana toro te Atua n tataro n taabo ao teia aika bati. A tataro i nanoia ke ni kabaibati ni kaangaraoia nakoni baika riki. A tataro n tararake ke ni bobaraaki. A tataro ma nanoia ni koaua n oin aia taeka n oneani mwini kamanenaan taamnei, korona, ke booki n tataro bwa buokaia n tataro. Tera ae karika aia tataro bwa a na ongoraeaki iroun te Atua?

N aron ae taekinaki n te kaongora are mai mwaina, a boni kaineta aia tataro nakon te Atua ae tii temanna ae Iehova. Iai riki bukina teuana ae kakawaki. Ti wareka ae kangai n 1 Ioane 5:14: “Ti aki nanokokoraki iroun te Atua, bwa ngkana ti bubutiia te bwai teuana ae boraoi ma nanona ao e bon ongo iroura.” A riai ni boraoi ara tataro ma nanon te Atua. Tera ae nanonaki n anne?

Ngkana ti na kaboraoa ara tataro ma nanon te Atua, ti riai n ataia bwa tera nanona. Te anga teuana ae kakawaki ibukin te tataro bon te ukeuke n reirei n te Baibara. E nanonaki n aei bwa e na aki ongoraei ara tataro te Atua, ma e na tii ongoraei ngkana ti riki bwa taan rabakau n te Baibara? Tiaki, ma e kantaningaira te Atua bwa ti na reiakina moa nanona, n ukeria bwa ti na ota iai ao ni maiuakinna. (Mataio 7:21-23) Ti riai ni kaboraoa ara tataro ma te bae ti reiakinna.

Ngkana ti reiakina taekan Iehova ao nanona, e na bae n rikirake ara onimaki ae boni ngaia naba te bwai ae kakawaki n te tataro. E taku Iesu: “Bwaai ni kabane ake kam bubutii n te tataro ma te onimaki, ao kam na karekei.” (Mataio 21:22) E aki nanonaki n te onimaki kakoauaan te bwai ae akea aana. Ma e nanonaki iai onimakinan te bwai ae e ngae ngke e tuai noraki ma e boutokaaki n te bwai ni kakoaua ae noraki. (I-Ebera 11:1) E ngae ngke ti aki kona n nora Iehova ma e onrake te Baibara ni bwaai ni kakoaua bwa bon iai ngaia, e kakaonimaki, ao e tatauraoi ni kaekai aia tataro akana onimakinna. Irarikin anne, ti kona n teimatoa ni butiia Iehova kakorakoraan riki ara onimaki, ao e na anganira te bae ti kainnanoia.​—Ruka 17:5; Iakobo 1:17.

Ma aio riki te anga teuana ae kakawaki ibukin te aro n tataro. E taku Iesu: “Akea ae e na nakon te Tama ma tii ane rirou.” (Ioane 14:6) Bon te kawai Iesu are ti kona ni bubutii iai nakon te Tama ae Iehova. Ngaia are e tuangia taan rimwina Iesu bwa a na tataro n arana. (Ioane 14:13; 15:16) E aki nanonaki n anne bwa ti riai n tataro nakon Iesu. Ma ti tataro i nanon aran Iesu n uringan are bon tii rinanona are ti a kona ni bubutiia Tamara ae kororaoi ma n tabu.

A butiia Iesu taan rimwina ake bon raoraona ni kangai: “Te Uea, reireinira n tataro.” (Ruka 11:1) E teretere bwa a aki bubutii ibukin aaro ake ti a tibwa tia ni maroroakin. A kan ataa raoi kanoan te tataro n aroia ngke a kangai: ‘Tera ae ti riai n tataroia?’