Teimatoa N Ukoukora Moa “Ana Raoiroi” Te Atua

“Mangaia are teimatoa n ukoukora moa ana tautaeka n uea te Atua ma ana raoiroi, ao a na karekeaki baikai nakoimi.”​—MATAIO 6:33.

1, 2. Tera ana raoiroi te Atua, ao e boto i aon tera?

“MANGAIA are teimatoa n ukoukora moa ana tautaeka n uea te Atua.” (Mataio 6:33) E rangi n ataaki irouia Ana Tia Kakoaua Iehova ni boong aikai te kaungaunga are e taekinna Iesu Kristo n ana Kabwarabwara i aon te Maunga. Ti kakorakoraira ni kaota tangiran te Tautaeka n Uea anne, ao ni kani kakaonimaki nako iai n aroaroni maiura ni kabane. Ma ti riai naba n ururinga kauouan iteran te taeka aei ae “ma ana raoiroi.” Tera ana raoiroi te Atua, ao tera ae nanonaki n ukoukorana moa?

² E kona naba n rairaki te moan taetae are nako ma iai te taeka ae “raoiroi” nakoni “kaetitaeka ae riai” ke “te aroaro ae riai.” Ai ngaia are bon te aroaro ae riai ana raoiroi te Atua ni kaineti ma ana kaetieti ao baika kakawaki irouna. Ngkai Iehova te tia Karikiriki, iai riaina ni karaoi kaetieti ibukin ae raoiroi ke ae buakaka, ae riai ao ae kairua. (Te Kaotioti 4:11) Mangaia are e aki nanonaki n ana raoiroi te Atua bwa e aki tabeakinia aomata ni karaoan ana tua ao ana moti aika bati aika matoatoa. Ma a boto i aon aroaron Iehova ao ana kaetitaeka ae riai ae aroarona teuana, ae rangi ni kakawaki n ikotaki naba ma aroarona aika kakawaki ae te tangira, te wanawana ao te mwaaka. E reitaki ana raoiroi te Atua ma nanona ao ana kantaninga. E irekereke iai te bae e kantaningaia mairouia te koraki ake a kani beku irouna.

3. (a) Tera ae nanonaki n ukoukorani moa ana raoiroi te Atua? (b) E aera ngkai ti boutokaa ana kaetieti Iehova aika raoiroi?

³ Tera ae nanonaki n ukoukorani moa ana raoiroi te Atua? E teretere raoi bwa e nanonaki iai karaoan nanon te Atua ibukini kakukureiana. E irekereke ukoukoran ana raoiroi te Atua ma arora ni kataia ni maiuakini baika kakawaki irouna, ana kaetieti aika kororaoi ao tiaki oin ara kaetieti. (Wareka I-Rom 12:2.) E irekereke te aroaro ni maiu aio ma ara iraorao ma Iehova. E aki nanonaki iai te ongeaba nakon ana tua nako ibukini maakakin te katuuaaeaki. Ma e kairira tangiran te Atua bwa ti na kakorakoraira ni kakukureia rinanoni boutokaan ana kaetieti nako ao n aki karaoi oin ara kaetieti. Ti ataia bwa aio ae ti riai ni karaoia bwa boni ngaia bukini karikara. Ti riai n tangira te raoiroi n aron Iesu Kristo ae te Uea n Ana Tautaeka n Uea te Atua.​—I-Ebera 1:8, 9.

4. E aera ngkai e rangi ni kakawaki ukoukoran ana raoiroi te Atua?

⁴ Tera aroni kakawakin ukoukoran ana raoiroi Iehova? Iangoa te koaua aei: E boto te moani kataaki n te onnaroka are i Eten n aroia Atam ao Ewa bwa a na butimwaea riain Iehova ni karaoi kaetieti ke a na aki. (Karikani Bwaai 2:17; 3:5) Ibukini kabwakaia ni karaoan anne, ti a karawawataaki ao ni mate ngkai ti riki mairouia. (I-Rom 5:12) N te itera teuana, e taekinaki ae kangai n Ana Taeka te Atua: “Ane kaaea te raoiroi ma te atataiaomata Ao e reke i rouna te maiu, ma te raoiroi, ma te karineaki.” (Taeka N Rabakau 21:21, BG) Eng, e na nakoraoi ara iraorao ma Iehova n ukoukorani moa ana raoiroi te Atua, ao n te aro anne e a kairira nakon te kamaiuaki.​—I-Rom 3:23, 24.

Karuanikain Onimakinan Raoiroim i Bon Iroum

5. Tera te karuanikai ae ti riai ni kararoaira ma iai?

⁵ Ngke e koroboki te abotoro Bauro nakoia Kristian ake i Rom, e a kamataata iai te karuanikai ae ti riai ni bane ni kararoaira ma iai, bwa ti aonga ni karikiuaa ngkana ti ukoukora moa ana raoiroi te Atua. E taekinia raona n I-Iutaia Bauro ni kangai: “I kaotiotia bwa bon iai ingaingan nanoia ibukin te Atua, ma e aki boraoi ma te atatai ae eti. Bwa a rawa ni kananorinanoia i aan ana raoiroi te Atua, kioina ngkai a aki ataa ana raoiroi te Atua, ma a kataia ni karikiia n raoiroi i bon irouia.” (I-Rom 10:2, 3) Ni kaineti ma are e taekinna Bauro, a aki ataa ana raoiroi te Atua taan taromauri aikai ibukina bwa a kataia ni karikiia n raoiroi i bon irouia.a

6. Tera te aroaro ae ti riai n rarawa nako iai, ao bukin tera?

⁶ Te aro teuana ae ti kona ni bwaka iai n te bwai ni kamwane aei, boni man iangoakin te kaiangatoa n ara beku ibukin te Atua ike ti a kabotauira iai ma tabeman. Ni karaoan aei ti kona ni kai kairaki iai bwa ti na kabatiaa iangoani wanawanara ao aroarora aika raraoi. Ma ni koauana, ngkana ti karaoa te aro anne, ti na boni mwanuokina ana raoiroi Iehova. (I-Karatia 6:3, 4) Ti karaoa aei ibukina bwa ti kairaki n tangiran Iehova. E na kamamaraaki ara koaua ae ti tangira Iehova ngkana ti kakorakoraira ni kaota oin raoiroira.​—Wareka Ruka 16:15.

7. Tera aron Iesu n taekina te kangaanga ibukin onimakinan raoiroim i bon iroum?

⁷ E tabeaianga Iesu irouia “te koraki ake a onimakinia i bon irouia bwa a raoiroi, ao a iangoiia aomata ake tabemwaang bwa akea uaaia.” E taekina te kangaanga ibukin onimakinan raoiroim i bon iroum n taekinan te kaikonaki aei: “A waerake uoman mwaane nakon te tembora bwa a na tataro, temanna te Baritaio ao temanna te tia rikoa te taekiti. E tei te Baritaio ao e tataro ni kangai i nanona, ‘Te Atua, I kaitauko bwa tiaki aroia aomata nako ngai, aika babakanikawai, a buakaka, ao a wene ni kimoa, ke tiaki naba aron te tia rikoa te taekiti aei. I aki mamatam uoua te tai n te wiki, ao I anganga te kabwianibwai ni bwaai ni kabane aika reke irou.’ Ma e tei te tia rikoa te taekiti i kiraroa ao e rawa ni kan tararake naba teutana nako karawa, ma e ororea bwanibwanna, ao e taku, ‘Te Atua, nanoangaai bwa te tia bure ngai.’” Ni motikan anne, e taku Iesu: “I tuangingkami, Bwa e oki rikaaki te aomata aei nakoni mwengana ao e noraki bwa e raoiroi riki nakon te aomata are temanna, ibukina bwa ane karietataa ao e na karinanoaki, ma ane karinanoa ao e na karietataaki.”​—Ruka 18:9-​14.

Te Karuanikai Riki Teuana ni ‘Kabatiaan Am Raoiroi n te Aro ae Aki Riai’

8, 9. Tera nanon te taeka ae “kabatia am raoiroi n te aro ae aki riai,” ao e kona ni kairira nakon tera?

⁸ E kabwarabwaraaki n Te Minita 7:16, (BG) te karuanikai riki teuana ae ti riai ni kararoaa ni kangai: “Tai kabatia am raoiroi n te aro ae aki riai: ao tai kabatia rabakaum n te aro ae aki riai: e aera ngkai ko na kamateko?” E kairaki n te taamnei te tia korea te Baibara n aron ae noraki n te kibu 20 ngke e reitianako n tuangira bukini kararoaakira man te aeka n aroaro anne ni kangai: “Bon akea te aomata ae raoiroi i aonaba, ae kakaraoa ae raoiroi, ae aki bure.” E karaoa oin ana kaetieti ibukin te raoiroi te aomata ae ‘kabatiaa ana raoiroi n te aro ae aki riai,’ ao e tiribureia iai tabemwaang. Ma e kabwaka n ataia bwa ni karaoan anne, e na karietataa riki iai ana kaetieti nakon ake mairoun te Atua, ike e a kakoauaaki iai bwa e aki raoiroi i matan te Atua.

⁹ Ni ‘kabatiaan ara raoiroi n te aro ae aki riai,’ ke n aron ae rairaki ni Baibara tabeua bwa “rangi n raoiroi” ke “te raoiroi ae riao,” e kona ni kairira bwa ti na nanououa n aron Iehova ni karaoi bwaai nako. Ma e ngae n anne ti riai n uringnga bwa ngkana ti nanououa bwa a eti ma n nakoraoi ana babaire Iehova, ti a moanna iai n iangoi ara kaetieti ibukin te raoiroi bwa a raoiroi riki nakon ana kaetieti Iehova. Ai aron ae ti kataa Iehova ao n tiribureia n oin ara kaetieti ni kaineti ma ae eti ao ae kairua. Ma bon Iehova ae iai riaina ni karaoi kaetieti ibukin te raoiroi, ao tiaki ngaira!​—I-Rom 14:10.

10. Tera ae kona ni kairira bwa ti na tiriburea te Atua, n aron Iobi?

¹⁰ E ngae ngke akea i buakora ae kan tiriburea te Atua, ma ti kona ni karaoa aio ibukin rikiara ae te aki kororaoi. E kona ni kai riki aio ngkana ti nora te bwai ae ti taku bwa e aki eti ke ngkana ti karawawataaki. E boni kairua naba Iobi are kakaonimaki. E kabwarabwaraaki n te moantai Iobi bwa “e eti arona, ao e mamaka te Atua, ao e ririba te buakaka.” (Iobi 1:1, BG) Ma imwina, e taonaki Iobi ni kabuanibwai teuana imwin teuana are n ana iango a aki riai n riki nakoina. Ibukin aei e a kairaki Iobi bwa e na “karaoiroia i bon i rouna ao e aki karaoiroa te Atua.” (Iobi 32:1, 2, BG) E riai ni kaetaki ana iango Iobi. Ai ngaia are ti riai n aki mimi ngkai n taai tabetai, e kona n riki naba aei nakoira. Tera ae na buokira ni kaeta ara iango ngkana e riki anne?

E Aki Tabwanin Raoi te Rongorongo Iroura n Taai Nako

11, 12. (a) Tera ae ti riai n uringnga ngkana ti namakinna bwa e aki eti te bwai teuana? (b) E aera ngkai e kona temanna n iangoia bwa e kaotaki te ribuaka n ana kaikonaki Iesu ibukia taani mwakuri n te nne ni kureebe?

¹¹ Te moanibwai, ti riai n uringnga are e aki tabwanin raoi te rongorongo iroura n taai nako. E kakoauaaki anne n rongorongon Iobi. E bon aki ataia Iobi ae a botaki i karawa natin te Atua aika anera ike e a uaraoaki iai iroun Tatan. (Iobi 1:7-12; 2:1-6) E aki ataia Iobi ae a riki ana kangaanga aikai mairoun Tatan. Ni koauana, ti aki kona n ataia bwa e kinaaki Tatan iroun Iobi ke e aki! Ngaia are e kairua ana iango are a riki ana kangaanga mairoun te Atua. Eng, ti kai karekea te iango ae kairua ngkana e aki tabwanin raoi te rongorongo iroura.

¹² Iangoa te katoto are n ana kaikonaki Iesu ibukia taani mwakuri n te nne ni kureebe. (Wareka Mataio 20:8-16.) E kabwarabwaraa ikai Iesu te tia bwaibwai n te nne ni kureebe bwa e katitebooa aia bwakabwai ana tia mwakuri ni kabane, e ngae ngke a mwakuri ni kabongnga ke tii teuana te aoa. Tera am namakin iai? E taraa n eti anne? N te moantai tao ko bae n nanoangaia taani mwakuri ake a kabongnga ni mwakuri i aan te riringa. Ni koauana e riai ni bati riki booia! Ni kaineti ma te iango anne, e kona n iangoaki te tia bwaibwai bwa e aki tatangira ao e ribuaka. E taraa n ae e kabongana mwaakana n te aro ae aki riai n ana kaeka nakoia taani mwakuri ake a ngurengure. Ma e tabwanin raoi te rongorongo iroura?

13. Tera te iango teuana riki ae ti kona ni karekea ni kaineti ma ana kaikonaki Iesu ibukia taani mwakuri n te nne ni kureebe?

¹³ Ti na rinanon te kaikonaki aei n te itera teuana. Akea te nanououa bwa e ataia te tia bwaibwai are n te kaikonaki bwa a tangiria taani mwakuri aikai ni kabane ni karekei baika kainnanoaki n aia utu. N ana bong Iesu, a bwakabwai ni katoa bong taani mwakuri n te tawaana. E boto maiuia kaain te utu n aia bwakabwai ni katoa bong. N ururingan aei, ti a iangoa iai aroia naake a a tibwa kuneaki iroun te tia bwaibwai n te bwakantaai, ai ngaia are a a mwakuri tii teuana te aoa. Tao a na aki kona ni kaamwarakeia aia utu tii mani booia ibukin teuana te aoa, ma e ngae n anne a a kaman tauraoi ibukin te mwakuri ao a tataninga ni kabongnga. (Mataio 20:1-7) Bon tiaki nanoia bwa a na aki mwakuri ni kabongnga ma a aki kariaiakaki. E aki kaotaki ae a baireia bwa a rawa ni mwakuri n oin nanoia. Iangoia bwa ko tataninga ni kabongnga ao ko ataia ae a kantaningaa boom tabemwaang ibukin te bong anne. Ai kukureira ngkoe ngkana e a reke am mwakuri ao ai te kubanako tera ngkoe ngkai ko a karekea ae bon tau ibukini maiuia am utu!

14. Tera reireiara ae rangi ni kakawaki ni kaineti ma te kaikonaki ibukin te nne ni kureebe?

¹⁴ Ti na manga rinanoni ngkai ana mwakuri te tia bwaibwai. E bon tau booia taani mwakuri. E karaoa ae riai nakoia taani mwakuri nako ake a riai ni karekea ae tau ibukini maiuia ma aia utu. E ngae ngke e kona n reke ana tai te tia bwaibwai ni babakanikawaia taani mwakuri n te boo ae uarereke kioina ngkai a bati taani mwakuri, ma e aki karaoa aio. A bane n okiri mwengaia taani mwakuri ma booia ae tau ibukini maiuia aia utu. A kona ni bitaki ara iango ni kaineti ma baike e karaoi te tia bwaibwai ngkana ti iaiangoi rongorongo riki aikai. E tatangira n ana babaire ao e aki kabongana mwaakana n te aro ae aki riai. Tera reireiara ma iai? Ngkana ti iangoi rongorongo aika tii tabeua aikai, e a uotira iai nakon te iango ae kairua. Ni koauana, e katuruturuaki n te kaikonaki aio rianakon ana raoiroi te Atua ae aki tii boto i aon ana tua te tautaeka ao wanawanaia aomata.

A Kona ni Kairua ke n Tianaki Ara Iango

15. E aera ngkai a kona ni kairua ke n tianaki ara iango ni kaineti ma ae e eti?

¹⁵ Te kauoua ni bwai ae ti riai n uringnga ngkana ti kaaitara ma te aroaro ae taraa n aki eti, boni kairuan ke tianakin ara iango. A kona n tianaki ara iango ibukin aki kororaoira, te riribai ke ara katei. E tianaki naba ara iango ni kabwakara n ataa bukini karaoani bwaai ao ataakin nanoia aomata. Ni kaitaraan anne, a bon aki tianaki Iehova ao Iesu n ai arora.​—Taeka N Rabakau 24:12; Mataio 9:4; Ruka 5:22.

16, 17. E aera Iehova ngke e aki kamatoaa ana tua ibukin te wene ni kimoa are a karaoia Tawita ma Bata-teba?

¹⁶ Ti na rinanon rongorongon aroia ni wene ni kimoa Tawita ma Bata-teba. (2 Tamuera 11:2-5) A riai n tiringaki ni kaineti ma te Tua Rinanoni Mote. (Nakoaia Ibonga 20:10; Te Tua-Kaua 22:22) E ngae ngke e katuuaaeia Iehova, ma e bon aki kamatoaa ana tua. E koaua bwa e aki eti are e karaoia Iehova? E inanonano nakon Tawita ao e urui Ana kaetieti aika raoiroi? A iango n aron anne tabeman taani wareware n te Baibara.

¹⁷ E ngae n anne, e anga te tua ibukin te wene ni kimoa Iehova nakoia taani moti aika aki kororaoi ake a aki kona n atai nanoia aomata. E ngae ngke a tianaki aia konabwai, ma a kona ni kaboraoi aia moti rinanon te tua aio. N te itera teuana, e bon nori naano Iehova. (Karikani Bwaai 18:25; 1 Rongorongo 29:17) Ai ngaia ae ti riai n aki kantaningaia bwa e na tianaki Iehova n te tua are e boni karaoia ibukia taani moti aika aki kororaoi. Ngkana ngaia anne aron Iehova, tiaki ngkanne titeboo ma e kairoroaki temanna ae raoiroi ana taratara bwa e na kabongana te kiraati ni mata ae karaoaki ibukini kaetan aia taratara tabeman aika aki bati n noraaba? E bon nora nanon Tawita ma Bata-teba Iehova ao e ataa aia rairannano ni koaua. N iangoan te koaua aei, e motiki taekaia ni kaineti ma nanoia ma te nanoanga ao te tangira.

Teimatoa n Ukoukora Ana Raoiroi Iehova

18, 19. Tera ae na buokira bwa ti aonga n aki tiriburea Iehova n oin ara kaetieti ibukin te raoiroi?

¹⁸ Mangaia are ngkana ti iangoa te bwai ae aki eti ae e karaoia Iehova n taai tabetai, ti riai n aki tiriburea te Atua n oin ara kaetieti ibukin te raoiroi e ngae ngkana ti wareka taekana n te Baibara ke ti bon rinanona. Uringnga ae e aki tabwanin raoi te rongorongo iroura n taai nako, ai ngaia are a kona ni kairua ke n tianaki ara iango. Uringnga bwa “e aki kona unin te aomata ni karekea uaana ae ana raoiroi te Atua.” (Iakobo 1:19, 20) N te aro aio, ti a aki kona ni ‘ngurengure nakon Iehova.’​—Taeka N Rabakau 19:3, BG.

¹⁹ N aron Iesu, ti bia kakoauaa n taai nako ae bon tii Iehova ae riai ni karaoi kaetieti ibukin ae eti ao ae raoiroi. (Mareko 10:17, 18) Kakorakorako ni karekea “te atatai ae eti” ibukin ana kaetieti. (I-Rom 10:2; 2 Timoteo 3:7) Ni butimwaean aei ao kaboraoani maiura ma nanon Iehova, ti a kaotia iai bwa ti ukoukora moa “ana raoiroi” te Atua.​—Mataio 6:33.

[Kabwarabwara ae nano]

Ko Uringnga?

• E aera ngkai e kakawaki ukoukoran ana raoiroi Iehova?

• Baikara karuanikai aika uoua aika ti riai ni kararoai?

• Ti na kanga n ukoukora moa ana raoiroi te Atua?

[Taamnei n iteraniba 16]

Tera reireiara man ana kaikonaki Iesu ibukia mwaane ake a tataro n te tembora?

[Taamnei n iteraniba 17]

E aki eti kaboraoani booia taani mwakuri ake a kabongnga ni mwakuri ma ake tii teuana aia aoa?