Aia Titiraki Taani Wareware . . .

E mena ia te Bwaretaiti ae taekinaki n te Baibara?

▪ E berita Iesu nakon te mwaane ae nangi mate are e ninikoria ni kaota onimakinana ni kangai: “Ko na mena ma ngai n te Bwaretaiti.” (Ruka 23:43) E na mena ia te mwaane anne? E koaua bwa e mena te Bwaretaiti i karawa ke n te aonnaba ke n te tabo teuana riki are a tataningaa iai te motikitaeka aomata?

A maeka ngkoa ara bakatibu n te Bwaretaiti. E taekinaki ae kangai n te Baibara: “Ao Iehova ae te Atua E unika te ne n aroka i mainiku, i Eten; ao E kamaeka iai te aomata are E a tia n karaoia. . . . Ao Iehova ae te Atua E kaira te aomata arei, ao E kamaeka n te ne n aroka are Eten ba e na ribanaia ma ni kawakinna.” (Karikani Bwaai 2:8, 15, BG) Ngke a rairaki taeka akanne nakon te taetae ni Kuriiti, ao rairan te taeka ae “onnaroka” bon pa·raʹdei·sos, ike e a reke mai iai te taeka n Ingiriti ae “paradise.”

N aron te taanga ni kabuburaa riki mwengaia ngkana e a mwaiti natiia, ai aron naba ara moani karo ake a kantaningaaki bwa a na karakanakoa te Bwaretaiti n riaon tian Eten ibukin rikiraken aia utu. E taku te Atua nakoia: “Kaona aonaba, ao kataea ana kai.”​—Karikani Bwaai 1:28, BG.

Ana kantaninga ngkanne ara tia Karikiriki bwa a na maeka aomata ao ni karikiia natiia n te Bwaretaiti ikai n te aonnaba. A na maiu n aki toki n te onnaroka n te aonnaba ike e a aki kainnanoaki iai te ruanimate teuana. E na riki te aonnaba bwa mwengaia n aki toki te botannaomata ni kabane. Maroaka ae e karekea te kakukurei ae bati nakoira tein ara buraneti aei! Ti karikaki bwa ti na maiu n te aonnaba ae tamaroa aei.

E a tia ni bita ana kantaninga te Atua? E bon tuai. E karaunanora Iehova ni kangai: “Ai aron naba au taeka ae oti nako mai wiu: e na aki okirai ni matebuaka, ma e na boni karaoa ae I tangiria.” (Itaia 55:11, BG) E taekinaki n te Baibara 3,000 tabun te ririki imwini karikaia aomata bwa “bon te Atua Ngaia; ae karika aonaba ma ni karaoia” are e “aki matebuaka karaoana i Rouna,” ma e “karaoia ba e na maekanaki.” (Itaia 45:18, BG) E bon aki bitaki ana kantaninga te Atua. E na riki te aonnaba bwa te bwaretaiti n te tai ae na roko.

E kakannongora bwa taekan te Bwaretaiti ni kibun te Baibara aika bati a boni tii kabwarabwaraa aron te maiu n te aonnaba. N te katoto, e taekinaki ae kangai n ana taetae ni burabeti Itaia: “A na katei auti, ao a na maeka i nanoia; ao a na uniki kurebe, ao a na kang uaaia.” (Itaia 65:21, BG) A na kateaki auti ia ao a na unikaki kureebe ia? A na kanaki uaaia ia? Ni bon te aonnaba. E kamatataaki n Taeka N Rabakau 2:21 (BG), bwa “a na maekana aon te aba akana raoiroi.”

E taekina naba taekan te bwaretaiti n te aonnaba Iesu. Ma ni koauana, e beritana naba te bwaretaiti i karawa, ma tii tabeman ake a rineaki nako iai. (Ruka 12:32) Imwini mateia, a na kautaki nakon te Bwaretaiti i karawa ao n raona Kristo n tautaekana te Bwaretaiti i aon te aonnaba. (Te Kaotioti 5:10; 14:1-3) A na taraia raoi taan tautaeka i karawa ake raon Iesu aikai bwa e na tautaekanaki n te aro ae riai te Bwaretaiti n te aonnaba ao ni kateimatoaaki ni kaineti ma ana kaetieti te Atua.

E ataia Iesu bwa bon anne ana kantaninga te Atua ibukin te aonnaba. Ni koauana, e boni mena i karawa irarikin Tamana ngke e karikaki te onnaroka are i Eten. A kona n rin n te bwaretaiti n te aonnaba n te tai ae na roko aomata nako ake a kaotiota aia onimaki ni boong aikai. (Ioane 3:16) E berita Iesu nakoia koraki akanne n tatabemania nako ni kangai: “Ko na mena ma ngai n te Bwaretaiti.”​—Ruka 23:43.

[Picture Credit Line n iteraniba 23]

© FORGET Patrick/SAGAPHOTO.COM/Alamy