Anene Nakon Iehova!

“N na anenea kamoamoan Atuau, ngkai iai maiuu.”​—TAIAN ARERU 146:2, BG.

1. Tera ae kaungaa nanon te ataeinimwaane ae Tawita bwa e na otei ana areru tabeua?

E KABANEA te tai ae bati Tawita n te tawaana n uakaan ma Betereem n tararuaiia ana nanai n tiibu tamana n ana bong n rikirake. I nanon ana tai n tararuaiia tiibu, e kona Tawita n taratarai ana mwakuri ni karikibwai Iehova aika kamimi: karawa ae unekenekeaki n itoi aika bati, “manin te tawana,” ao “manin aan-ang.” E rotaki ni baike e nori ao ibukin anne, e a kairaki bwa e na otei anene aika a rota te nano ibukini kamoamoan te tia Karikii bwaai aika rangi n tamaroa aikai. A kona ni kuneaki angiin ana ototo Tawita n te boki ae Taian Areru.a​​—Wareka Taian Areru 8:3, 4, 7-9.

2. (a) Tera rotakira n tatabemanira nako ae kona n reke man te katangitang? Taekina te katoto. (b) Ti na kanga n reireiaki man Taian Areru 34:7, 8 ao Taian Areru 139:2-8 ibukin ana iraorao Tawita ma Iehova?

² N ai aron naba anne, Tawita bon te tia katangitang ae rabakau i nanoni maiuna. Ni koauana, e a rikirake rabakauna iai, ai ngaia are e a kaoaki bwa e na katanga te abi ibukin te Uea ae Tauro. (Taeka N Rabakau 22:29) A karaunano ana katangitang Tawita nakon te uea ae iai raraomana aei, n aroni karauan nanoia aomata ni katangitang aika raraoi n ara bong aikai. N te tai are e katanga iai ana bwai ni katangitang Tawita, “ao e manga rau ma ni marurung Tauro.” (1 Tamuera 16:23, BK) A teimatoa manenan ana anene te tia katangitang ao te tia otea te anene ae mamaaka te Atua aei i nanon ara bong aikai. Iangoia raoi aei! E raka i aon 3,000 tabun te ririki imwini bungiakin Tawita, ao a katoatai n okiokira ana areru Tawita ibukini karauan nanoia ao te kantaninga ae raoiroi, mirion ma mirion aomata ake a kakaokoro aroaroni maiuia ao ake a maeka n iteran nako te aonnaba i nanoni boong aikai.​—2 Rongorongo 7:6; wareka Taian Areru 34:7, 8; 139:2-8; Amota 6:5.

A Kakawaki Katangitang n te Taromauri ae Koaua

3, 4. E kanga ni baireaki waakinani katangitang aika kakawaki n ana bong Tawita?

³ Iai rabakaun Tawita, ao e kabongana rabakauna n te aro ae rangi n tamaroa bwa e na neboa Iehova iai. Imwin rikina bwa uean Iteraera, e bairea te mwakuri n te tembora Tawita n irianaki naba ma katangitang aika raraoi. E kaania te mwaiti ae 4,000 mai buakoia tibun Rewi aika a mwamwakuri, ae te mwaiti ae raka i aon tebwina te katebubua, aika a mwiokoaki bwa “taan anga taeka ni kamoamoa.” Ao a a mwiokoaki mai buakon te mwaiti anne 288 bwa a na “reireiaki te anene nakon Iehova, ake a rabakau ni kabaneia.”​—1 Rongorongo 23:3, 5; 25:7, BG.

⁴ A bati anene ake a anenei tibun Rewi aika a oteaki iroun Tawita. A rangi n rotaki nanoia angiia tibun Iteraera ake a ongora irouia ake a mwiokoaki bwa a na anenei ana areru Tawita n tain te taromauri. Rimwi riki, ngke e a uotaki te ati ni berita nako Ierutarem, “Ao e taetae Tawita nakoni mataniwiia tibun Rewi bwa e na rineiia tariia ake taan anene, ma bwaai ni katangitang, aika raea ma aabi ma timbara, ba a na katangimwakai ma ni kanenea te bwana ni kimareirei.”​—1 Rongorongo 15:16, BG.

5, 6. (a) Bukin tera bwa e rangi ni mutiakinaki te katangitang n ana tai n uea Tawita? (b) Ti kanga n ataia bwa e kaatuuaki iangoani kakawakin te katangitang n te taromauri i Iteraera rimoa?

⁵ Bukin tera bwa e rangi ni mutiakinaki te katangitang n ana bong Tawita? Ibukina ngke bon te tia katangitang te uea? Tiaki ngaia anne, iai riki bukina teuana ae kaotaki n tienture ake imwina iroun te Uea ae raoiroi are Etekia ngke e a manga kaoka aron te taromauri n te tembora. Ti wareka ae kangai n te 2 Rongorongo 29:25, BG: “Ao e kateia tibun Rewi [Etekia] ni maneaban Iehova ma timbara, ma raea, ma aabi, n ai aron ana tua Tawita, ma Kata are ana tia matairiki te uea, ma Natan are te burabeti: ba mairoun Iehova te tua irouia ana burabeti.”

⁶ Eng, e kairiia taan taromauriia rinanoia ana burabeti Iehova bwa a na anene ni kamoamoaa. A kainaomataaki mani mwakuri ake a kantaningaaki iai tibun Rewi bwa a na karaoi taan anene man te baronga n ibonga. N te aro anne a kona ni kabanei riki aia tai ae bati taan anene aikai n otei anene ao ni kamatenikunai naba.​—1 Rongorongo 9:33.

7, 8. Ngkana e a roko tain aneneakin anene ibukin te Tautaeka n Uea, tera te bwai ae kakawaki riki nakon te rabakau n anene?

⁷ Tao ko na bae ni kangai: “Ngkana e a roko tain te anene, tao N na bon aki warekaki i buakoia ake a rabakau iai n te umwanrianna ae tabu!” Ma a bon aki bane n rabakau tibun Rewi ake taani katangitang. Ni kaineti ma ae e taekinaki n 1 Rongorongo 25:8, a boni bati naba aika ‘reireiaki.’ E rangi ni kakawaki ataakin ae tao a bae n iai taani katangitang ao taan anene tabeman aika a rabakau riki i buakoia barongan Iteraera ake tabeua, ma Iehova e rineia tibun Rewi bwa a na tararua te katangitang. Tao ti na kakoauaa ngkanne bwa e ngae ngkana tao a ‘rabakau’ ke a ‘reireiaki,’ ma a boni kabanei nanoia nako iai tibun Rewi aika kakaonimaki ni kabane.

⁸ E tangira te katangitang Tawita ao e rangi n rabakau iai. Ma e kakawaki iroun te Atua te rabakau n tii ngaia? E korea ae kangai Tawita n Taian Areru 33:3 (BG): “Katangitang n te rabakau [ma “am kabanea ni kona iai,” NW] ma kanenean te bwana.” E mataata n te rongorongo aei, bwa te bwai ae kakawaki boni ‘kabanean ara kona’ ibukini kamoamoan Iehova.

Aron te Katangitang Imwin Ana Bong Tawita

9. Kabwarabwaraa bwa tera ae ko na noria ao n ongo ngke arona bwa ko ira katabuan te tembora n ana tai n uea Toromon.

⁹ N ana tai n tautaeka Toromon, ao e teimatoa n rangi ni kakawaki te katangitang n te taromauri ae koaua. Ni katabuan te tembora, ao iai taani katangitang aika rabakau ake a katangi bwaai ni katangitang aika kakaokoro mani kakaongora tangia, ao ai taani katangi buu aika burati aika 120 mwaitiia. (Wareka 2 Rongorongo 5:12.) E taekinaki n te Baibara bwa “taani katangi buu [ake ibonga ni kabane] ma taan anene [a] karaoa te bwana ae tii teuana, ni kamoamoa Iehova ma ni katituaraoia; . . . Ba E raoiroi; ba akea tokin ana atataiaomata.” Ao “e kaonaki te maneaba n te nang,” ngke a tatakarua ni kimwareirei, ike e a kaota iai kukureina Iehova. Ai boni kakimwareireira ao ai kamimira ongoraeakinani bwaai ni katangitang irouia taan anene aika a katiteuanaaki!​—2 Rongorongo 5:13, BG.

10, 11. Tera ae kaotia bwa a kabongana te katangitang n aia taromauri Kristian ake rimoa?

¹⁰ E kabonganaaki naba te katangitang n aia tai n taromauri Kristian ake rimoa. Ni koauana, a bobotaki taan taromauri n te moan tienture, tiaki n taian umwanrianna aika tabu ke n taian tembora ma ni bon oini mwengaia. E a aki rangi n nakoraoi aroaroia n aia tai ni bobotaki ibukin te bwainikirinaki ma aaro riki tabeua aika aki raoiroi. Ma, a bon teimatoa naba Kristian aikai n anene ni kamoamoa te Atua.

¹¹ E kaungaia tarina ni Kristian ake i Korote te abotoro Bauro ni kangai: “Teimatoa n . . . ikaungaunga i marenami n taian areru ma nebonebo nakon te Atua, ao anene aika bwain te onimaki ma te nanoraoi.” (I-Korote 3:16) Imwini kabureani Bauro ao Tira, a a moanna n “tataro . . . ao a kamoamoaa te Atua n te anene,” e ngae ngke akea aia boki n anene ae a na iriria. (Mwakuri 16:25) Ngkana arona bwa ko kabureaki, iraua mwaitin ara anene ibukin te Tautaeka n Uea aika ko kona n anenei man am ururing?

12. Ti na kanga ni kaotiota nanora ni kakaitau n ara anene ibukin te Tautaeka n Uea?

¹² Kioina ngkai iai katangitang aika kakawaki n ara tabo n taromauri, ti kona n titirakinira raoi ni kangai: ‘I kaotiota nanou ni kakaitau iai? I roroko i aon te tai n taiani bobotaki, ruunga n aono, ao taiani bwabwaro n raonia tariu ao mwaneu n anenea te moan anene, ao I anene raoi mai nanou? I kaungaia natiu bwa a na aki iaiangoa te anene bwa aia tai ni kitan aia kaintekateka n akea bukina, ke ni kakammwakuri naba n tain te anene i nukan te Kuura ni Kataneiai Ibukia Taan Uarongorongo ao te Botaki Ibukin te Uarongorongo ke teuana i marenan te kabwarabwara ibukia aomata nako ao te Reirei n Te Taua-n-Tantani?’ Te anene bon iteran naba ara taromauri. Eng, e ngae ngke ti ‘rabakau’ ke ti ‘reireiaki,’ ma ti bon riai ngaira ni kabane ni katiteuanaaki ni bwanaara ni kamoamoaa Iehova.​—Kabotaua ma 2 Korinto 8:12.

Bitakini Baika Ti Kainnanoi ni Bitakin te Tai

13, 14. Tera manenan arora n anene mai nanora ni kabane, i nanoni bobotaki n te ekaretia? Kabwarabwaraa.

¹³ E raka i aon 100 te ririki n nako ao e kabwarabwaraaki n te Zion’s Watch Tower bukina teuana ae e kakawaki iai ara anene ibukin te Tautaeka n Uea. E taekinaki iai ae kangai: “Anenean te koaua bon te anga teuana ibukini karinana n aia iango ao nanoia ana aomata te Atua.” A mwaiti taekan ara anene aika a titeboo ma kibun te Baibara, ngaia are reiakinara taekan anene tabeua e kona n riki bwa te anga ae tamaroa ibukini karinan te koaua ae nano i nanora. N taai aika bati, aomata aika ai tibwa aia moan tai n roko n ara bobotaki nako a rotaki nanoia n anene ake a anenei mai nanoia kaain te ekaretia.

¹⁴ N te tairiki teuana n 1869, ngke e a okira mwengana C. T. Russell man ana mwakuri ao e ongo te anene ae nako man te ruu teuana. I nanoni maiuna n te tai anne, e kakoauaa ae e aki kona n ataa te koaua ibukin te Atua. Ngaia are e a iangoia bwa e na kabanea maiuna n ana bitineti, ma ana koaua ae ngkana e karekea te mwane ae tau, e na kona ngkanne ni buokiia aomata ma baika a kainnanoi ibukini maiuia, e ngae ngke e aki kona ni buokiia bwa a na ataa te koaua ibukin te Atua. E rinnako i nanon te ruu ae bubu ao ni baarekareka aei Brother Russell, ao e kunea iai bwa e boo te taromauri n te tabo anne. E karaua n tekateka ao ni kakauongo. E koreia imwina riki bwa te bwai are e ongo n te tairiki anne “e rangi n tau ibukini kakorakoraakin riki [ana] onimaki bwa e boni kairaki korean te Baibara iroun taamnein te Atua.” Noria bwa e anaaki nanon Brother Russell nakon te botaki n te moan tai tii man te anene.

15. Rikiraken otara raa aika a kairira bwa e riai ni bitaki iai ara boki n anene?

¹⁵ Ni waakinakon te tai, e a rikirake otara n te Baibara. E taekinaki ae kangai n Taeka N Rabakau 4:18: “Kawaiia akana raoiroi ai aron te oota ngkana e bo mainiku, ae karaka ootana ni karokoa te tawanou.” E kairira rikiraken otara bwa ti na karaoi bitaki nakon arora n ‘anenea taekan te koaua.’ A kukurei ni kabongana te boki n anene Ana Tia Kakoaua Iehova man aaba aika mwaiti ae e atunaki n Anene ni Kamoamoa Iehova i nanon 25 te ririki n nako.b N te ririki are e moani boreetiaki iai te boki anne, e a tia n ririkirake riki te oota i aon reirei aika bati, ao a aikoa kamanenaaki ngkai taeka tabeua aika n ara boki n anene anne. N te katoto, ti a aki bati n taekina “te aonnaba ae boou” ma ai “te waaki ae boou i aon te aba.” Ao ti a kaotia ngkai bwa e riai ni “katabuaki.” E kateretereaki man ana koaua te Aro, bwa e kainnanoaki te bitaki nakon ara boki n anene.

16. E na kanga ara boki n anene ae boou ni buokira bwa ti na kakairi n ana reirei ni kairiri Bauro are taekinaki n I-Ebeto 5:19?

¹⁶ Ibukin anne ao bukina riki tabeua, e a kariaiakaki iroun te Rabwata n Tautaeka boreetiakin te boki ae boou are e atunaki iai Anene Nakon Iehova. E a kauarerekeaki riki mwaitin anene aika i nanon ara boki ae boou aei nakon 135. Kioina ngkai a karako riki anene aika a na reiakinaki, e riai riki ngkanne bwa ti na kamatenanoi taekan anene tabeua mai buakon anene aika boou aikai. E boraoi aei ma ana reirei ni kairiri Bauro are taekinaki n I-Ebeto 5:19.​—Warekia.

Ko Kona ni Kaota Am Kakaitau

17. Baikara iango aika kona ni buokira n tokanikai ni maakan kamaamaaeakira ngkana ti iangoa ara anene n te ekaretia?

¹⁷ Ti riai ni kariaia maakani kamaamaaeakira bwa e na totokoira n anene mai nanora ni kabane ni bobotaki ni Kristian nako? Iangoia n te aro aei: Tiaki te koaua bwa “ti bane n titibanako n taai aika bati” n ara taeka ake ti taekin? (Iakobo 3:2) Ma e ngae n anne, ti aki kariaia aki kororaoira n taetae bwa e na totokoira mani kamoamoaan Iehova man te auti teuana ma teuana. E riai n tukira aki rabakaura n anene mani kamoamoaan Iehova n ara anene? E kukurei n ongoraei bwanaara Iehova “ae karaoa win te aomata,” ake ti kabonganai ibukini kamoamoaana.​—Te Otinako 4:11.

18. Kaotii aanga ibukin reiakinam taekan anene.

¹⁸ E a tia n tauraoi n taetae aika bati te CD ae atunaki n Sing to Jehovah​—Vocal Renditions. Are a kaotaki iai anene aika boou ibukin tangiraoini bwaai ni katangitang aika kakaokoro irouia kaain te kuaea are a barongaaki iai. E rangi ni kakukurei ongoraeakinani katangitang aika barongaaki raoi. Ongora n taai nako iai ao n te aro anne ko na rabakau taekan anene tabeua mai buakon ara anene aika boou aikai rimwi riki. A tia n oteaki taekan anene aika bati n te aro are ngkana ko anenea teuana te rain, ko na bae n ataia bwa tera ae na nako imwina. Ngaia are ngkana ko katanga te CD, e aera ngkai ko aki kataia n anene n irira te korati? Ngkana ko a rangi n rabakau taekan te anene ao katangitang ni mwengam, akea te nanououa bwa ko na bae ni mwaatai n anene n te Tabo n Taromauri.

19. Baikara mwaneka ake a irekereke ma katauraoani katangitang aika tangiraoi n ara anene ibukin te Tautaeka n Uea?

¹⁹ E bebete bwa ti na aki rangi n iangoi katangitang aika katauraoaki n ara bong ni botaki aika okoro, ruunga n aono, ao taiani bwabwaro. E irekereke te mwakuri ae bati ibukini katauraoana. Imwin rinean te katangitang, a tia ni karauaki raoi ni koreaki taiani katangitang irouia kaain te Watchtower orchestra aika 64 mwaitiia ibukini katangakini bwaai ni katangitang aika kakaokoro. A tia ni kabanea te tai ae bati taani katangitang aikai ibukin rinanoakin te katangitang ao ni manga kataneiai iai ao imwina a rawei n te tabo ni kanakobwanaa i Patterson i New York. Tengaun mai buakoia taari mwaane ao taari aine aikai a maeka i tinanikun te United States. A iangoa aia mwakuri aei bwa e rangi ni kakawaki ibukini karaoan te katangitang ae tamaroa ibukin ara bobotaki aika kakaraoaki n ara bobotaki n taromauri aika bubura. Ti kona ni kaotiota ara kakaitau ibukin aia mwakuri korakora ma te tangira. Ngkana e kaoira te tia babaire n ara runga ao ara bwabwaro, ti bia kaman roko i aon te tai ao ni kakauongo raoi nakoni katangitang aika a tia ni katauraoaki ma te tatangira.

20. Tera ae ko motinnanoia bwa ko na karaoia?

²⁰ E ongoraei ara anene n nebonebo Iehova. A rangi ni kakawaki irouna. Ti kona ni kakukureia nanona man ara anene aika nako mai nanora ni kabane n taai ake ti botaki iai ibukin te taromauri. Eng, e ngae ngkana ti mwaatai n anene ke ti reireinira, ma ti bia “anene nakon Iehova”!​—Taian Areru 104:33.

[Kabwarabwara ae nano]

Tera Am Iango?

• Baikara katoto n taai ake e koreaki iai te Baibara ae kaota kakawakin te katangitang n ara taromauri?

• Tera ae ko noria ae a irekereke i marenan te ongeaba n ana tua Iesu ae taekinaki ni Mataio 22:37 ao uataboan aneneakin anene mai nanom ni kabane ibukin te Tautaeka n Uea?

• Baikara aanga aika ti kaotiota iai ara kakaitau n te aro ae riai n ara anene ibukin te Tautaeka n Uea?

[Taamnei n iteraniba 26]

Ko kaungaia natim bwa a na aki kitan aia tabo n tekateka n akea bukina n tain te anene?

[Taamnei n iteraniba 27]

Ko reireiniko taekan ara anene aika boou ni mwengam?