Tangira Te Raoiroi Ma Nanom Ni Kabane

“Ko tangira te raoiroi.”​—TAIAN ARERU 45:7, BG.

1. Tera ae na buokira n toua “kawain te raoiroi”?

E KAIRIIA ana aomata Iehova ni “kawain te raoiroi” rinanon ana Taeka ao taamneina ae raoiroi. (Taian Areru 23:3, BG) Ma ibukin aki kororaoira, ti aki toki n tibanako man te kawai anne. E kainnanoaki te kakorakora ngkana ti na manga okiri arora ni kakaraoa ae eti. Tera buokara n tokanikai i aon aei? Ti riai n tangira kakaraoan ae raoiroi n aron Iesu.​—Wareka Taian Areru 45:7.

2. Tera “kawain te raoiroi”?

² Tera “kawain te raoiroi”? Bon te kawai ae irariki. A kamatoaaki “kawai” aikai n ana kaetieti Iehova aika raoiroi. N te taetae n Ebera ao Kuriiti, nanon “raoiroi” bon te bwai ae “eti,” ae e irekereke ma touan raoi mwini booto n reirei ibukin te aroaro ni maiu ae riai. Ngkai Iehova “nen te motiki-taeka ae eti,” a kukurei taan taromauria ni kantaningaia bwa e na bairea te kawai ae eti ibukin te aroaro ni maiu ae riai are a na toua.​—Ieremia 50:7, BG.

3. Ti na kanga n reiakina ae bati riki ibukin ana raoiroi te Atua?

³ Ti na kakukureia raoi nanon te Atua tii mani kaboraoani maiura ma ana kaetieti aika raoiroi ma nanora ni kabane. (Te Tua-Kaua 32:4) E moanaki anne man reiakinani bwaai nako ibukin Iehova ae te Atua man ana Taeka ae te Baibara. Ngkana ti kabatiaa riki reiakinan taekana, ti a kaanira riki ma ngaia ni katoabong, ao e na bati riki iai tangiran ana raoiroi iroura. (Iakobo 4:8) Ti riai naba ni butimwaea te kairiri man Ana Taeka te Atua ae kairaki koreana rinanon te taamnei, ni karaoan ara motinnano aika kakawaki ni maiura.

Ukoukora Ana Raoiroi te Atua

4. Tera ae irekereke ma ukoukoran ana raoiroi te Atua?

⁴ Wareka Mataio 6:33. E bati riki ae irekereke ma ukoukoran ana raoiroi te Atua nakon ae tii kabanean ara tai n tataekina te rongorongo ae raoiroi ibukin te Tautaeka n Uea. E riai ni boraoi aroarora ni katoabong ma ana kaetieti Iehova aika kakawaki, ngkana e na butimwaei ara beku aika tabu. Tera ae a riai ni karaoia aomata nako ake a ukoukora ana raoiroi Iehova? A riai ni “karina te aroaro ae boou ae karaoaki ni kaineti ma nanon te Atua ao e boraoi ma te itiaki ni koaua ao te kakaonimaki.”​—I-Ebeto 4:24.

5. Tera ae na buokira n tokanikai i aon te bwarannano?

⁵ A kona ni bwara nanora n tabetai ibukin ara kairua, ngkai ti kakorakoraira ni maiuakin ana kaetieti te Atua aika raraoi. Tera buokara ae ti na tokanikai iai i aon te bwarannano ae kamamaaraira ao n reiakina tangiran ao kakaraoan ae raoiroi? (Taeka N Rabakau 24:10) Ti riai ni katoatai n tataro nakon Iehova “ma nanora ni koaua n te aki nanokokoraki ae reke man te onimaki.” (I-Ebera 10:19-​22) E ngae ngkai Kristian aika kabiraki ngaira ke ti kantaningaa te maiu i aon te aba, ma ti kaotiota onimakinan ana karea ni kaboomwi Iesu Kristo ao ana mwakuri nako ngkai ara Ibonga ae Rietata. (I-Rom 5:8; I-Ebera 4:14-16) E kabwarabwaraaki uaani kawawaean raraan Iesu n te moani kaongora n ara maekatin aei. (1 Ioane 1:6, 7) Aio ae taekinaki n te kaongora anne: “Bon te koaua bwa ngkana e taraaki i aan te oota te bwai ae uraura ke e uraroo rinanon te kiraati ae uraura, e na taraa ngkanne ni mainaina te bwai anne; mangaia are e ngae ngkana a uraura ke n uraroo ara bure, ma ngkana e a iangoi ara bure te Atua rinanon raraan Kristo, a na atongaki iai bwa a mainaina.” (Te Taua-n-Tantani ae bwain Turai 1879-E, i. 6) Ai kamimira ngkai e a tia Iehova ni kabwakaa te kaboomwi ibukira rinanon ana karea Natina ae e rangi n tangiria!​—Itaia 1:18.

Tuoi Am Bwai ni Buaka Ake Mairoun te Atua

6. E aera ngkai e kakawaki tuoan ara bwai ni buaka ake mairoun te Atua?

⁶ Ti riai ni karina ‘nangoani bwabwaara ae bwainan te raoiroi,’ n taai nako bwa bon irian ara bwai ni buaka mairoun te Atua. (I-Ebeto 6:11, 14) E rangi ni kakawaki tuoan ara bwai ni buaka ake mairoun te Atua ni katoabong, e ngae ngke ti a tibwa katabui maiura nakon Iehova ke ti a kamani beku irouna i nanon tatabebwi te ririki n nako. Bukin tera? Ibukina bwa e a tia ni karenakoaki te Riaboro ma ana taimonio nako aon te aba. (Te Kaotioti 12:7-12) E un Tatan ao e ataia bwa e a kimototo ana tai. Ngaia are e a tia ni kakorakoraa ni buakania ana aomata te Atua. Ti a ataa ngkanne kakawakini karinan ‘te nangoa ni bwabwaa ae bwainan te raoiroi’?

7. Tera ae ti riai ni karaoia ngkana ti a ataa raoi kainnanoan ‘te nangoa ni bwabwaa ae bwainan te raoiroi’?

⁷ E kamanoaki te buroo n te nangoa ni bwabwaa ao ai aron naba te nano ngkai e kamanoaki n te raoiroi. Ibukin aki kororaoira, e kai mwamwanaira riki nanora ao e kakaiaki aorakina. (Ieremia 17:9) Kioina ngkai e kani kakaraoa ae bure nanora, e kakawaki bwa e na kataneiaaki raoi ao n anganaki te reirei ni kaetieti. (Karikani Bwaai 8:21) Ngkai ti ataa raoi kainnanoan ‘te nangoa ni bwabwaa ae bwainan te raoiroi,’ ti na aki kani buutia i nanon te tai ae uarereke, n arora n rinea te kaakibotu ae irekereke ma aaro ake e ribai te Atua; ao ti na aki naba kariaia bwa ti na iaiangoa kakaraoan ae bure. Ti na aki naba bakataei ara tai aika bati aika kakawaki ni mataku iai n te TV. Ma ti na teimatoa ni kakorakoraira ni kakaraoa ae e kukurei iai Iehova. E ngae naba ngkana ti bwaka nakon iangoani kaibwabwarun te rabwata i nanon te tai ae aki maan, ma ti na bon teirake n ana ibuobuoki Iehova.​—Wareka Taeka N Rabakau 24:16.

8. E aera ngkai ti kainnanoa “te otanga ae bubura ae te onimaki”?

⁸ Bon irian naba ara bwai ni buaka ake mairoun te Atua “te otanga ae bubura ae te onimaki.” Ti a kona iai n “tiringi ana kai ni kareteke ni kabane aika uramwaaka teuare buakaka.” (I-Ebeto 6:16) Ibukin anne, ti a buokaki iai ni kakaraoa ae raoiroi ao n teimatoa n toua te kawai nakon te maiu ae aki toki, man onimakinan ao tangiran Iehova ma nanora ni kabane. E na rangi ni kakawaki riki iroura ana raoiroi Iehova ngkana ti kabatiaa riki tangirana. Ma tera aroni mataniwin nanora? E na kanga ni buokira mataniwin nanora ngkai ti kakorakoraira n tangira te raoiroi?

Kateimatoaani Mataniwin te Nano ae Raoiroi

9. Ti na kanga ni kakabwaiaaki mani kateimatoaani mataniwin nanora aika raoiroi?

⁹ Ti bubutiia Iehova n ara tai ni bwabetito ibukini ‘mataniwin nanora aika raoiroi.’ (1 Betero 3:21) Ibukina bwa ti kaotiota onimakinan te kaboomwi, a a kaitiakaki ara bure n raraan Iesu ao e a kona n reke ara iraorao ae kaan ma te Atua. Ma ti riai ni kateimatoa mataniwin nanora ae raoiroi ngkana ti kani kateimatoa ara iraorao ae kaan ma te Atua. Ngkana e bukinira ao ni kauringira mataniwin nanora n taai tabetai, ti riai ni kakaitau bwa e mwakuri raoi. E kaotaki n te kauring anne bwa e tuai ni matenteni mataniwin nanora ike e aki namakinaaba iai ni kaineti ma kawain Iehova aika raraoi. (1 Timoteo 4:2) Ma e kona n riki mataniwin te nano bwa te tia ibuobuoki n te aro ae raka riki nakoia akana a tangira te raoiroi.

10, 11. (a) Taekina te rongorongo ae kaotaki iai bukin riaira ni mutiakini mataniwin nanora aika a kataneiaaki n te Baibara. (b) E aera bwa e karekea kukureira ae korakora tangiran te raoiroi?

¹⁰ Ngkana ti karaoa ae bure, e kona n aki kariaia ke ni karawawataira mataniwin nanora. Iai te roro n rikirake temanna are e tiotionako mani “kawain te raoiroi.” E tautoronaki n tangiran te bwaitingako ao e a moanna ni moko n te mwaruana. E uringaaba ngke e a iriri ni bobotaki ao e namakinna bwa kaanga ai te tia mwamwanaa te aba ngaia n uataboan tataekinan te rongorongo ae raoiroi, ai ngaia are e a aikoa iririi bobotaki ni Kristian aikai. E taku: “I aki ataia ae e na bukinai mataniwin nanou n au mwakuri.” E reitia riki ni kangai, “I waakinaanako te maiu n aki wanawana aei i nanon tao aua te ririki.” Imwina, e a moanna n iangoa okina nakon te koaua. E ngae ngke e iangoia teuaei bwa e na aki ongoraei ana tataro Iehova, ma e bon tataro naba ao ni bubutii kabwaraan ana bure. Tao tebwina te miniti imwin aei, ao e a roko naba tinana ni kaungaa bwa e na manga iririi bobotaki. E nakon te Tabo n Taromauri ao e butiia unimwaanen te ekaretia temanna bwa e na reirei ma ngaia. Imwin tabeua te tai, e a bwabetitoaki, ao e a rangi ni kakaitaua Iehova ni kamaiuana.

¹¹ E koaua bwa ti tuai ataia ae e kona n reke te kukurei ae korakora mani karaoan ae eti? Ngkai ti a ataa tangiran te raoiroi ao ni kakaraoia ma nanora, ti a noria iai bwa e bati riki te kukurei ni kakaraoan ae e kukurei iai Tamara are i karawa. Ao iangoia moa! E nang roko te bong are a na namakina iai tii te kukurei mani mataniwin nanoia aomata nako, ao a nang kaotiota katotongan te Atua n te aro ae kororaoi. Mangaia are ti bia karikirakea i nanora ngkai tangiran te raoiroi ao ti a kakimwareireia iai Iehova.​—Taeka N Rabakau 23:15, 16.

12, 13. Ti na kanga ni kataneia mataniwin nanora?

¹² Tera ae ti kona ni karaoia ibukini kataneiaani mataniwin nanora? Ngkana ti ukeuke n reirei n te Baibara ao booki aika boto i aon te Baibara, e kakawaki ururingan ae “e iangoa arona ni kaeka te aba nanon te aomata ae raoiroi.” (Taeka N Rabakau 15:28, BG) Iangoa koauan aei ngkana ti kaaitara ma titiraki ibukin te kammwakuri. Ngkana e kauntaba te mwakuri teuana ma ana kaetieti te Baibara, angiina mai buakora a waekoa n toua mwin te kairiri ae katauraoaki iroun te toro ae kakaonimaki ma ni wanawana. Ma ngkana e aki mataata bwa tao e boraoi ma ana kaetieti te Baibara te mwakuri anne ke e aki, ti riai n ukeri booto n reirei n te Baibara aika kaineti ma aei, n iaiangoi ao n tataroi.a E kaineti aei ma booto n reirei n aron ae ti riai n tabeakini mataniwin nanoia aomata nako bwa ti na aki riki bwa bwaai ni kabwakabwaka. (1 I-Korinto 10:31-33) Ma ae moamoa riki, ti riai ni mutiakini booto n reirei aika irekereke ma ara iraorao ma te Atua. Ngkana ti kakoauaa bwa iai Iehova, ti riai moa n titirakinira ni kangai, ‘Ngkana I a kateirakeaki n te mwakuri aei, e na maraki iai nanon Iehova ao ni karawawataaki?’​—Taian Areru 78:40, 41.

¹³ Ngkana ti katauraoi ibukin te Reirei n Te Taua-n-Tantani ke te Reirei n te Baibara n te Ekaretia, ti na ururingnga bwa ti riai ni kananoi ara iango i aon te rongorongo ae maroroakinaki. E koaua bwa ti a waekoa naba ni mwaakeni ara reke ibukin te titiraki ao ti a manga nakon te barakirabe are imwina? E na bae n aki nano tangiran te raoiroi iroura n aeka n ukeuke n reirei akanne, ke a na aki karikirakea naba mataniwin nanora aika namakinaaba. Ngkana ti na karikirakea tangiran te raoiroi, ti riai n taningamarau n ukeuke n reirei n te Baibara ao ni kananoi ara iango i aoni baika ti wareki man Ana Taeka te Atua. Ai korakorara kainnanoan reiakinan tangiran te raoiroi ma nanora ni kabane!

Bwaruani Kakaraoan ae Raoiroi

14. Tera ae e tangiria Iehova ae te Atua ao Iesu Kristo bwa e na reke iroura ni karaoan ara mwakuri ae tabu?

¹⁴ E tangirira Iehova ae te Atua ma Iesu Kristo bwa ti na kukurei ni karaoan ara mwakuri ae tabu. Tera ae na boutokaa kukureira? Bon tangiran te raoiroi! E taku Iesu n ana Kabwarabwara i aon te Maunga: “A a kukurei akana bwarua kakaraoan ae raoiroi bwa a na rauaki n te raoiroi.” (Mataio 5:6) Tera nanon taeka aikai nakoia ake a tangira te raoiroi?

15, 16. N te aro raa are a a kona iai n rauaki akana bwarui bwaai n taamnei?

¹⁵ E taua taekan te aonnaba ae ti maekanna teuare buakaka. (1 Ioane 5:19) Ngkana ti wareka te nuutibeeba n taabo tabeua, ti ongoraei iai rongorongon aaro n ribuaka ao te tiritiri n aron ae tuai man nonoraki mai mwaina. E kananokawaki iaiangoan aroia aomata n iowawa i marenaia iroun te aomata ae raoiroi. (Te Minita 8:9) N aroia aika tangira Iehova, ti ataia naba bwa tii ngaia ae e kona ni kanuaiia n tatabemania nako te koraki ake a bwarui bwaai n taamnei ake a kan reiakina te raoiroi. A nang aki manga namakina te rawawatannano are e riki mairouia aomata aika akiako ma aia mwakuri aika bubuaka te koraki aika tangira te raoiroi, ma a na waekoa ni kamaunaaki aika a bubuaka aroaroia. (2 Betero 2:7, 8) Ai karaunanora anne!

¹⁶ Ngkai ana toro Iehova ngaira ao taan rimwin Iesu Kristo, ti ataia bwa “a na rauaki” te koraki ake a bane ni bwarua tangiran te raoiroi. A na bane n rauaki n ana babaire te Atua ni kaineti ma karawa ao aonnaba ae boou “ae e na mena iai te raoiroi.” (2 Betero 3:13) Ngaia are ti bia aki bwarannano ke ni mimi ngkai e a taonakinako te raoiroi n te ribuaka ao te tiritiri n ana aonnaba Tatan. (Te Minita 5:8) E atai baika riiriki Iehova are Teuare Moan te Rietata ao e na waekoa ni kamaiuia aika tangira te raoiroi.

Kakabwaia Man Tangiran te Raoiroi

17. Baikara kakabwaia tabeua aika reke man tangiran te raoiroi?

¹⁷ E katuruturuaki n Taian Areru 146:8 (BG) te kakabwaia ae rianako man touani kawain te raoiroi. E anene te tia areru ni kangai: “E tangiriia akana raoiroi Iehova.” Iangoia moa! E tangirira te tia Tautaeka i aoni bwaai ni kabane ibukina bwa ti tangira te raoiroi! Ibukin ana tangira Iehova, ti a kakoauaa iai bwa e na taraia raoi bwa a reke nakoira baika ti kainnanoi, ngkai ti teimatoa ni moanibwaia te Tautaeka n Uea ni maiura. (Wareka Taian Areru 37:25; Taeka N Rabakau 10:3.) N tokina, e nang riki te buraneti aei bwa abaia akana tangira te raoiroi. (Taeka N Rabakau 13:22) A nang kakabwaiaaki angiia ana aomata te Atua aika a tia ni kakaraoa ae raoiroi, n te kimwareirei ae taonako ao te maiu n aki toki n te bwaretaiti ae tikauarerei n te aonnaba. A boni kakabwaiaaki naba ngkai te koraki aika a tangira ana raoiroi te Atua bwa e a reke irouia te raunnano are e boutokaa te boonnano i nanon aia utu ao aia ekaretia.​—I-Biribi 4:6, 7.

18. Baikara baika ti riai n teimatoa ni kakaraoi ngkai ti tabe ni kariariaa rokon ana bong Iehova?

¹⁸ Ti riai n teimatoa n ukoukora ana raoiroi Iehova ngkai ti tabe ni kariariaa rokon ana bong ae kakannato. (Tebania 2:2, 3) Mangaia are ti bia kaotiota tangirani kawain Iehova ae te Atua aika eti. E reitaki n anne karinan ‘nangoani bwabwaara ae bwainan te raoiroi’ ni kamatoaa ni nnena ibukini kamanoani buroora. Ti riai naba ni kateimatoai mataniwin nanora aika raraoi bwa e kimwareirei iai Atuara ao ngaira naba.​—Taeka N Rabakau 27:11.

19. Tera ae ti riai ni motinnanoia bwa ti na karaoia, ao tera ae na rinanoaki n te kaongora ae imwina?

¹⁹ “A biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.” (2 Rongorongo 16:9, BG) Ai karaunanora taeka akanne nakoira ngkai ti kakaraoa ae eti, e ngae ngkai e tabe n rikirake te mwebuaka, te tiritiri, ao te buakaka n te aonnaba ae bati te kangaanga iai! Ni koauana, ngkai ti kakaraoa ae raoiroi, a a kona iai ni kakiriweaki nanoia aomata aika rangi ni bati ake a ianena mairoun te Atua. Ma e korakora kakabwaiaara ni mutiakinan ana raoiroi Iehova. (Itaia 48:17; 1 Betero 4:4) Mangaia are ti bia motinnanoia mai nanora bwa ti na teimatoa n tangira te raoiroi are e na anganira te kakukurei. Ma e reitaki kabanean nanora iai naba ma ribaan te buakaka. E na kaotaki nanon aei n te kaongora ae imwina.

[Kabwarabwara ae nano]

Ko na Kanga ni Kaeka?

• E aera bwa e kakawaki ataakin te kaboomwi bwa ti aonga n tangira te raoiroi?

• E aera bwa e kakawaki karinan ‘nangoani bwabwaara ae bwainan te raoiroi’?

• Ti na kanga ni kataneia mataniwin nanora?

[Taamnei n iteraniba 26]

Ti buokaki n rinanoi raoi titiraki ibukin te kammwakuri mani mataniwin nanora aika kataneiaaki raoi