Utu Ni Kristian​—“Kam Na Tauraoi”

“Kam na tauraoi . . . ibukina bwa e na roko Natin te aomata n te aoa are kam aki kantaningaia iai.”​—RUKA 12:40.

1, 2. E aera ngkai ti riai ni mutiakina ana kaumaki Iesu ae kangai: “Kam na tauraoi”?

TERA ae na riki nakoim ma am utu “ngkana e a roko Natin te aomata ni mimitongina” ao ni kaokoroia “te korakina ma te korakina”? (Mataio 25:31, 32) Kioina ngkai e na riki aei n te aoa are ti aki kantaningaia, ai kakawakira mutiakinan ana kaumaki Iesu ae kangai: “Kam na tauraoi”!​—Ruka 12:40.

² E maroroakinaki n te kaongora ae imwain aei aroia kaain te utu n tatabemania nako ni buokiia kaain aia utu ni kabane bwa a na teimatoa n nene n te onimaki ni karaoan tabeia ma nanoia. Ti na rinanoi aanga riki tabeua ake ti kona iai ni boutokaa marurungin aia onimaki kaain ara utu.

Kaatuua Taraan “te Bwai ae Tii Teuana”

3, 4. (a) A riai ni kawakinia man tera utu ni Kristian? (b) Tera ae nanonaki ni kaatuuan taraan “te bwai ae tii teuana”?

³ Ngkana a kan tauraoi utu nako imwain rokoni Kristo, a riai n taraia raoi bwa a na aki atikaki nako mani baika irekereke ma te taromauri ae koaua ao a na kawakinia naba bwa a na aki bwaka ni baika katabetabea te iango. Kioina ngkai a a tia n iraraang utu aika bati n te bwai ni kamwane ae te kani bwaibwai, ti na iangoa ana taeka Iesu ibukini kaatuuan taraan “te bwai ae tii teuana.” (Wareka Mataio 6:22, 23.) E kaotaa te kawai te taura ao ti kona n nakonako iai n aki bwaka, ao ai aron naba te bwai ae ti karinna ‘i nanora’ bwa e kona ni kaotaira ao ni buokira bwa ti na kakaraoa ae raoiroi ao n aki bwaka.​—I-Ebeto 1:18.

⁴ E riai n itiaki te taratara ao ni kona ni kaatuua taraan te bwai teuana ngkana e na noraaba raoi te mata. Akea kaokoron anne ma te nano. Ni kaatuuan taraan te bwai ae tii teuana ni matara n te aro ni kaikonaki, e nanonaki iai kaatuuan te iango i aon te kantaninga ae tii teuana. Ti teimatoa ni kaatuui taraani baika irekereke ma te onimaki, n oneani mwin are ti na kabotoi maiura ni bwaikorakin te maiu aei, ao n rangi n tabeaianga ma kainnanoia kaain te utu tii ibukini marurungia. (Mataio 6:33) E nanonaki n aei bwa a na teimatoa n rau nanora ni baika iroura, ao ni moanibwaia te beku ibukin te Atua.​—I-Ebera 13:5.

5. E kanga te teinnaine ae tebwi tabun ana ririki ni kaotia bwa e kaatuua “taraan” te beku ibukin te Atua?

⁵ Ai raoiroira mwini kataneiaakia ataei bwa a na kaatuua taraan te bwai ae tii teuana! Iangoa ana katoto te teinnaine ae tebwi tabun ana ririki i Itiobia. E rangi n tamaroa mwin ana kekeiaki n te reirei ao ni banen ana tai n te moanrinan, e a kariaiakaki n reita ana reirei n te kuura ae rietata riki. Ma ibukina bwa e kaatuua taraan te beku ibukin Iehova, e a aki butimwaea kaniwangana aei. Teutana te tai imwin anne, e a kariaiakaki neiei bwa e na mwakuri ao boona iai US$4,200 n te namwakaina ae rangi ni bati ni kabotauaki ma angiini booia aomata i abana. Ma e kaatuua “taraan” te mwakuri ni bwaiania neiei. E aki kainnanoa buokana mairouia ana karo ibukin rawana ni mwakuri. Tera aroia ana karo ngke a ataa arona aei? Eng, a kimwareirei ao a tuangnga bwa a rangi ni kakatonga irouna!

6, 7. Tera te kabuanibwai ae ti riai n ‘tarataraira’ mai iai?

⁶ Bon te kauring ibukin te mataai ni kani bwaibwai ana taeka Iesu ake a taekinaki n te aro ni kaikonaki ni Mataio 6:22, 23. E aki katerea kaokoron te taeka ae “te bwai ae tii teuana” ma kaitaraana ae “te bwai ae bati kanoana” ma e boni katerea kaokorona ma te taeka ae “buakaka.” Te taetae ni Kuriiti ae rairaki bwa “buakaka” e kona naba n nanona “mataai ni kani bwaibwai” ke “nanonrang.” (Mataio 6:23) Tera ana iango Iehova n te mataai ni kani bwaibwai ao te nanonrang? E taekinaki ae kangai n te Baibara: “E na aki taekinaki i buakomi te wene ni bure ma te kamwara n aekana nako, ke te nanonrang [ke, “te mataai ni kani bwaibwai”].”​—I-Ebeto 5:3.

⁷ E ngae ngke e kona ni bebete kinaakin temanna bwa e mataai ni kani bwaibwai, ma e kangaanga ataakin ae e a reke anne iroura. Ngaia are ti wanawana ni mutiakinan ana taeka n reirei Iesu aei: “Tarataraingkami ao kawakiningkami man te aeka ni mataai ni kanibwaibwai ni kabane.” (Ruka 12:15) Ni karaoan anne, ti riai n tuoi baika ti kaatuui i nanora. A riai utu ni Kristian n iangoi raoi aroia ni kamanenai aia tai ao aia mwane n aia kaakibotu ao ni kabooani bwaai riki tabeua irarikin ake iai irouia.

8. Tera arora ae ti kona n ‘taratara’ raoi iai imwaini kabooani bwaai?

⁸ Ko riai ni karababaa am iango imwaini kabooan te bwai teuana n oneani mwin are ko a tii iangoia naba bwa iai boona ke akea. Iangoi titiraki aikai: ‘N na katoatai ni kamanena te bwai aei ao ni kateimatoa nakoraoina? A na maanra au tai n reireinai aroni kabonganaana?’ Tai kakoauai aia katanoata bitineti ngkami rooro n rikirake bwa a kataia n anai nanomi ni kunnikai, ao bwaai riki tabeua aika kakaokoro ao n angiin te tai a rangi ni bobuaka ao a aki rangi ni kainnanoaki. Bwaina te taubaang. Iangoia bwa a na buokaki kaain am utu ibukini katauraoaia imwain rokon Natin te aomata ke a na aki, ni karekean te bwai anne. Onimakina ana berita Iehova aei: “N na bon aki kaakiko ao N na bon aki kitaniko.”​—I-Ebera 13:5.

Uaiakin Tiia ni Kaineti ma te Onimaki

9. Tera ae kona n riki nakon te utu man uaiakinan tiia ni kaineti ma te onimaki?

⁹ Te anga teuana ibukini kakorakoraan aia onimaki kaain te utu ae bwanin ao boutokaani marurungin aia onimaki, boni katean tiia ni kaineti ma te onimaki ao uaiakinaia. Ni karaoan aei, a a kona ni buokaki iai utu nako n ataa nakoraoin tiaia ae a uaiakinna ibukini kakukureian Iehova ao ni bairei naba mwakuri aika kakawaki riki.​—Wareka I-Biribi 1:10.

10, 11. Baikara tiia ni kaineti ma te onimaki aika kam uaiakin n ami utu, ao baikara tiami aika kam kani katei ibukin taai aika a na roko?

¹⁰ A kona naba n reke kakabwaia aika bati ni katean tiia aika uarereke ake a na uaiakinaki irouia kaain te utu ni kabane. Iangoa te katoto ibukini maroroakinan te kibu ibukin te bong ni katoabong. E buokaki atun te utu n ataa korakoran tangiran Iehova ao te koaua irouia kaaini batana man aia kaeka. E reke te tai ae moan te raoiroi ibukia ataei n te tia ae te katoabong ni wareware n te Baibara n te utu, ike e a katamaroaaki riki iai aroia ni wareware n ikotaki naba ma otaia n rongorongon te Baibara. (Taian Areru 1:1, 2) Ao ti aki ngkanne kani katea tiara ae karikirakean raoiroin ara tataro? Te tia ae moan te tamaroa naba ae riai n uaiakinaki, boni karikirakean aroaro aika uaan te taamnei n te aro ae rangi n tamaroa riki. (I-Karatia 5:22, 23) Ke tera arora n ukeran aanga ake ti na kaota iai te nanoanga nakoia ake ti kaitiboo ma ngaiia n te mwakuri ni minita? Ngkana ti kakorakoraira ni karaoa anne n ara utu, a a kona n reireinaki iai ataei bwa a na nanoanga naba, ike e a bae n rikirake i nanoia tangiran te regular bwaiania ke te mitinare.

¹¹ E aera ko aki maroroakin tiia tabeua ake ko na uaiakin ma kaain am utu? A kona kaain am utu ni katea tiaia ae kabatiaan riki aia tai n te mwakuri ni minita? Ko kona ni buokiia bwa a na tokanikai i aon te maaku n uarongorongo n te tareboon, i rarikin te kawai, ke n taabo ni bitineti? Tera aia iango n te mwakuri n te tabo ae korakora riki iai kainnanoaia taan uarongorongoa te Tautaeka n Uea? E kona kaain te utu temanna n reiakina te taetae riki teuana bwa e aonga n tibwaa nako te rongorongo ae raoiroi nakoia reeti riki tabeua?

12. Tera ae a kona ni karaoia atun utu ni buokiia kaain aia utu bwa e na rikirake aia onimaki?

¹² Ngkai atun te utu ngkoe, ko riai n atai itera ake a na kona n rikirake iai aia onimaki kaain am utu. Imwina, katei tiia aika okoro ibukini karekean te bwai ae kam uaiakinna. Ko riai ni katei tiia aika kona n uaiakinaki ao a kaineti ma aroni maiumi ao ami konabwai. (Taeka N Rabakau 13:12) Ni koauana, e kainnanoa te tai ae maan uaiakinan tiia aika manena. Ngaia are kamanenai raoi ami tai ake kam mamataku iai n te terewitin ao karaoi iai mwakuri aika irekereke ma te onimaki. (I-Ebeto 5:15, 16) Kakorakorako bwa ko na roko n tiia ake ko katei ibukin am utu. (I-Karatia 6:9) E na ‘noraki irouia aomata nako rikiraken’ te utu ae uaiakin tiia ni kaineti ma te onimaki.​—1 Timoteo 4:15.

Kateimatoaa te Taromauri n Utu n te Tairiki

13. Tera te bitaki ae karaoaki nakon te babaire ibukini bobotaki n te ekaretia ni katoa wiki, ao baikara titiraki aika ti riai n iaiangoi?

¹³ Te bwai n ibuobuoki ae moan te raoiroi ibukia utu nako bwa ‘a na tauraoi’ imwain rokon Natin te aomata, bon te bitaki ae kakawaki n te babaire ibukini bobotaki ni katoa wiki are e moa man Tianuare 1, 2009. E katokaki te botaki n te bong are kaokoroaki i nanon te wiki ibukin te Reirei n te Boki n te Ekaretia ngkoa, bwa e a uaia ni karaoaki ma Te Kuura ni Kataneiai Ibukia Taan Uarongorongo ao Te Botaki Ibukin te Uarongorongo. E karaoaki te bitaki aei ibukia utu ni Kristian bwa a na reke aia tai ni kakorakorai aia onimaki ni bairean te tairiki teuana ni katoa wiki ibukin aia taromauri n utu. Ibukina bwa e a maan teutana te tai ngkai imwini karaoan te bitaki anne, ti a kona n titirakinira ni kangai: ‘I kakabongana te tai ae kamwawaaki ibukin te Taromauri n Utu n te tairiki ke I kakaraoa au ukeuke n reirei i bon irou? E nakoraoi irou aei n te aro are I a kaaniaki riki iai ma te Atua?’

14. (a) Tera raoi bukini kateimatoaan te Taromauri n Utu n te tairiki ke te ukeuke n reirei i bon iroum? (b) E aera ngkai e kakawaki kamwawaan te tairiki teuana ibukin te ukeuke n reirei?

¹⁴ Bukin raoi kateimatoaan te Taromauri n Utu n te tairiki ke te tai ibukin te ukeuke n reirei i bon iroum, bwa ko aonga ni kaaniaki riki ma te Atua. (Iakobo 4:8) E na kakorakoraaki ara iraorao ma te tia Karikiriki ngkana ti katoatai ni kabanea te tai ae bati ibukin te ukeuke n reirei n te Baibara ao ni karikirakea ara atatai ibukina. Ngkana ti kaanira riki ma Iehova, e na korakora riki iai tangirana ‘ma nanora ni kabane, maiura ni kabane, ara iango ni kabane, ao korakorara ni kabane.’ (Mareko 12:30) Ni koauana, ti ingainga n ongeaba iroun te Atua ao n riki bwa taani katotongnga. (I-Ebeto 5:1) E rangi ni kakawaki kateimatoaan te Taromauri n Utu n te tairiki ibukini buokaia kaain ara utu bwa ‘a na tauraoi’ n aia onimaki, ngkai ti kariariaa “te rawawata ae korakora” are e a kaman taekinaki. (Mataio 24:21) E rangi ni kakawaki aei ibukini kamaiuara.

15. Tera rotakia kaain te utu n aroaroia i marenaia ae reke man te Taromauri n Utu n te tairiki?

¹⁵ Iai riki bukini karaoan te babaire n te Taromauri n Utu, bwa a aonga ni kaaniaki riki i marenaia kaain te utu. Iai uaan te uaia n iraorao ni maroroakini bwaai aika irekereke ma te onimaki ni katoa wiki, bwa e a nakoraoi riki iai reitakia kaain te utu. Ai korakorara riki katiteuanaakia taanga ni mare ngkana a kaai ni kimwareirei n reiakina te Baibara! (Wareka Te Minita 4:12.) A bae ni katiteuanaaki kaaro ao ataei aika bobotaki n taromauri, n te tangira ae “te bwai ni kabaebae ae katiteuanaia aomata n te aro ae kororaoi.”​—I-Korote 3:14.

16. Taekina kakabwaiaaia taari aine aika teniman ni kamwawaan te tairiki teuana ibukin te ukeuke n reirei n te Baibara.

¹⁶ Iangoa kakabwaiaaia teniman taari aine ake a a tia ni mate buuia n te babaire ibukini kamwawaan te tairiki teuana ibukin te reirei n te Baibara. A a tia n itangitangiri i nanon tabeua te ririki aine aika a maeka n te kaawa ae tii teuana aei, e ngae ngke a kakaokoro aia utu. Kioina ngkai a kani kabatiaa riki bobotakia ao ni kamanena ibukini baika kakawaki ibukin aia onimaki nakon are tii kakukureiaia, a a baireia bwa a na kamwawaa te tairiki teuana ni botaki iai ibukin aia ukeuke n reirei n te Baibara. A moana karaoan aei ni kamanenaan te boki ae “Bearing Thorough Witness” About God’s Kingdom. E taku temanna mai buakoia: “Ti rangi ni kukurei iai ao n angiin te tai e riaon teuana te aoa ara tai n ukeuke n reirei. Ti kataia ni kataamneia n ara iango baike a riki nakoia taari ake n te moan tienture, ao ti maroroakina arora ae ti riai ni karaoia ngkana a riki aaro akanne nakoira. Imwina, ti kataia ni karaoi baika kakawaki ake ti reiakin n ara maroro n te mwakuri ni minita. E a rangi ni kakukurei riki ngkai ao n uaana ara uarongorongo ibukin te Tautaeka n Uea, ao karekeaia taan rimwini Kristo nakon are mai mwaina.” Irarikin reireiaia ibukini kateimatoaan aia onimaki raao aika teniman aikai, a a rangi ni kaaniaki riki i marenaia man te babaire aei. A taku: “E rangi ni kakawaki iroura te babaire aei.”

17. Baikara baika boutokaa nakoraoin te Taromauri n Utu n te tairiki?

¹⁷ Ao ngkoe tera arom iai? Tera kakabwaiaam ni kamwawaan te tairiki teuana ibukin te taromauri n utu ke te ukeuke n reirei i bon iroum? E na aki reke kakabwaiaam man te babaire aei ngkana ko kakaraoia tii n tabetai. A riai kaain te utu n tatabemania nako n tauraoi nakon te ukeuke n reirei n te tai are e a tia ni baireaki. A riai n aki kariaia baika aki rangi ni kakawaki bwa a na katabea te tairiki anne. Irarikina e riai ni kaineti te reirei ma baike a kona ni kamanenai kaain am utu ni maiuia. Tera ae ko kona ni karaoia bwa a aonga ni kakukurei taai n ukeuke n reirei aikai? Kamanenai aaro n angareirei aika uaana, ao kateimatoaa te ikarinerine ao te rau n tain te reirei.​—Iakobo 3:18.a

“Tai Matunako” ma “Kam na Tauraoi”

18, 19. Tera aron rotakim ma am utu n ataakin ae e a kaan roko Natin te aomata?

¹⁸ Ibukin rikiraken te waaki ae buakaka n te aonnaba are e a kanikinaeaki iai ara bong aikai, ti a aki nanououa bwa ni moa man 1914 ao e a roko ni kabaneani bongina ana waaki Tatan ae buakaka. E a rangi ni kaan Aremaketon. N te tai ae waekoa, e na karaoaki ana motikitaeka Iehova i aoia aomata aika aki karinea, iroun Natin te aomata. (Taian Areru 37:10; Taeka N Rabakau 2:21, 22) Ko aki ngkanne rotaki ma am utu n ataakin anne?

¹⁹ Ko mutiakina ana taeka n reirei Iesu ibukini kaatuuan taraan “te bwai ae tii teuana”? Ngkai a tabe kaain te aonnaba n uaiakina te kaubwai, te kakannato, ke te korakora, a tabe ngkai n uaiakin tiia ni kaineti ma te onimaki kaain am utu? E manena iroum te babaire ibukin te Taromauri n Utu n te tairiki ke te tai ibukin am ukeuke n reirei i bon iroum? A a tia ni buokaki kaain am utu ni kaaniaki riki ma Iehova ao i marenaia naba? N aron ae maroroakinaki n te kaongora ae imwain aei, ko aonnangaa oin uotam ibukini mwiokoam ae taekinaki n te Baibara ngkai te buu te mwaane ngkoe, te buu te aine, ke te nati ibukini buokaia kaain am utu ni kabane bwa a na ‘aki matunako’? (1 I-Tetaronike 5:6) Ni karaoan anne, “kam na tauraoi” iai imwain rokon Natin te aomata.

[Kabwarabwara ae nano]

Tera ae Ko a Tia n Reiakinna?

• Kabwarabwaraa bwa a na kanga utu ni Kristian n ‘tauraoi’ rinanoni . . .

kaatuuan taraan “te bwai ae tii teuana.”

katean ao uaiakinan tiia ni kaineti ma te onimaki.

kateimatoaan te Taromauri n Utu n te tairiki.

[Taamnei n iteraniba 26]

Ti na buokaki n rarawa nakoni bwaikorakin te maiu aei ni kaatuuan taraan “te bwai ae tii teuana”