KAREKEA REIREIAM MAN ANA TAEKA TE ATUA

Tera Ana Tautaeka n Uea te Atua?

A ueke titiraki aika ko bae n tia n titiraki iai n te kaongora aio, ao e kaotaki iai bwa ko na karekei ia kaekaaia n am Baibara. A kukurei Ana Tia Kakoaua Iehova ni maroroakini kaeka aikai ma ngkoe.

1. Tera Ana Tautaeka n Uea te Atua?

Ana Tautaeka n Uea te Atua, bon te tautaeka mai karawa. E na onei mwin tautaeka ni kabane, ao e na kakoroa nanon ana kantaninga te Atua i karawa ao i aon te aba. Ai ngaia are Ana Tautaeka n Uea te Atua, boni ngaia katokan ara kangaanga ibukini kainnanoan te tautaeka ae raoiroi.​—Wareka Taniera 2:44; Mataio 6:9, 10.

E riai n iai te uea n te tautaeka n uea anne. E a tia Iehova n rinea Natina ae Iesu bwa te Uea n Ana Tautaeka n Uea.​—Wareka Ruka 1:30-33.

2. Bukin tera bwa Iesu bon te tia Tautaeka ae kakannato?

Bon te Uea ae kakannato Natin te Atua ibukina bwa e akoi, e matoa ibukin te bwai ae eti, ao e tau mwaakana ni kona ni buokiia aomata. (Mataio 11:28-30) Imwini kautana ao e waerake nako karawa ao e a tataninga i angaatain Iehova. (I-Ebera 10:12, 13) Imwina ao e a anganna te Atua mwaakana ni moana ana tautaeka mai karawa.​—Wareka Taniera 7:13, 14.

3. Antai aika a na tautaeka ma Iesu?

A na tautaeka ma Iesu i karawa te koraki aika rineaki iroun te Atua aika atongaki bwa “ake a itiaki.” (Taniera 7:27, BG) Te moani koraki ake a rineaki bwa a na riki bwa aomata aika itiaki, bon ana abotoro Iesu ake a kakaonimaki. E teimatoa Iehova n rineia mwaane ma aine aika kakaonimaki ma ngkekei ni karokoa ngkai, bwa aomata aika itiaki. A kautaki nakon te rabwata n taamnei n aron Iesu.​—Wareka Ioane 14:1-3; 1 I-Korinto 15:42-45.

Iraman aomata aika a na nako karawa? E atongia Iesu bwa te “nanai ae uarereke.” (Ruka 12:32) N tokina, mwaitiia te koraki anne bon 144,000, ao a na kairiri n tautaekana te aonnaba ma Iesu.​—Wareka Te Kaotioti 5:9, 10; 14:1.

4. E moana n ningai ana kairiri Ana Tautaeka n Uea te Atua?

E riki Iesu bwa te Uea n 1914.a Teutana te tai imwina, e a tewenakoa Tatan ma ana taimonio nakon te aonnaba. (Te Kaotioti 12:7-10, 12) Man te tai anne ni karokoa ngkai, e a rikirake ni kakaiaki ana kangaanga te botannaomata. Boni kanoan te kanikina bwa e a mena i nanoni kabaneani bongina te waaki ae ngkai i aon te aba taiani buaka, mwaeiei, roongo, butinakon te aoraki ao riaoan te tua. (2 Timoteo 3:1-5) A riai n reiakina aroia ae a na riki iai bwa taan rimwin te Uea ae Iesu, te koraki nako ake a kani kakabwaiaaki n Ana Tautaeka n Uea te Atua.​—Wareka Ruka 21:7, 10, 11, 31, 34, 35.

5. Tera ae e na kakororaoia Ana Tautaeka n Uea te Atua?

A a tia ni buokaki aomata aika mirion ma mirion mai buakoia botannaomata nako n Ana Tautaeka n Uea te Atua, bwa a na reiakina kawain te Atua rinanon te mwakuri n uarongorongo ni katobibia te aonnaba. (Mataio 24:14) A na kamanoaki “te koraki ae uanao” aika kakaonimaki n aantaeka iroun Iesu ngkana e kamaunaaki te waaki ae buakaka ae ngkai i aon te aba.​—Wareka Te Kaotioti 7:9, 10, 13-17.

I nanon te tai ae 1,000 te ririki, e na bita te aonnaba nakon te bwaretaiti te Tautaeka n Uea anne teutana imwin teutana. N tokina, e na manga kaoka te Tautaeka n Uea Iesu nakon Tamana. (1 I-Korinto 15:24-26) Iai ae ko kinaa ae ko kan tuangnga taekan Ana Tautaeka n Uea te Atua?​—Wareka Taian Areru 37:10, 11, 29.

Ibukin rongorongona riki, nora mwakoro 8 ao 9 n te boki aio, Tera Ana Reirei ni Koaua te Baibara? ae boreetiaki irouia Ana Tia Kakoaua Iehova.

[Kabwarabwara ae nano]