Ko Kinaaki Iroun Iehova?

“E ataiia aika bon ana aomata Iehova.”​—2 TIMOTEO 2:19.

1, 2. (a) Tera are e tabeaianga iai Iesu? (b) Baikara titiraki aika ti na rinanoi?

E KAWARA Iesu n te bong teuana te Baritaio ao e titirakinna ni kangai: “Tera te tua ae te kabanea ni kakannato i buakon te Tua?” E kaekaa Iesu ni kangai: “Ko riai n tangira Iehova ae Atuam ma nanom ni kabanea, maium ni kabanea ao am iango ni kabanea.” (Mataio 22:35-37) E korakora iroun Iesu tangiran Tamana are i karawa ao e maiuakin raoi taeka akanne. E tabeaianga Iesu n arona i matan Iehova, ao e kaotiota aio n ana kakaonimaki ni maiuna. Ai ngaia are teutana te tai imwaini matena, e kona n taekinna ae e kinaaki iroun te Atua bwa boni ngaia temanna ae kakaonimaki n ongeaba n Ana tua. Ma e teimatoa Iesu n ana tangira Iehova.​—Ioane 15:10.

² A bati ni boong aikai ae a taekinna bwa a tangira te Atua. Bon akea te nanououa bwa ti warekaki naba i buakon te mwaiti anne. Ma iai baika ti riai n iangoi raoi n aron aikai: ‘I kinaaki iroun te Atua? Tera aron ana taratara Iehova ibukiu? I kinaaki bwa ana bwai ngai?’ (2 Timoteo 2:19) Bon te kakabwaia iangoan te iraorao ae kaan ma te tia Tautaeka i aoni bwaai ni kabane!

3. E aera ngkai e kangaanga irouia tabeman iangoan ae a kona n riki bwa ana aomata Iehova, ao tera ae na buokiia ni katoka te iango anne?

³ Ma e kangaanga irouia tabeman aika a tangira Iehova bwa a na onimakinna ae na kona n reke aia iraorao ma te Atua. A kakoauaa bwa bon akea manenaia. Ibukin anne, a a iangoia bwa a aki kona n riki bwa ana aomata Iehova. Ma e rangi n raoiroi iangoan ae e kinaira Iehova n te aro ae kaokoro! (1 Tamuera 16:7) Iangoa aei: Bukin tera ngkai ko wareka te maekatin aei? Bukin tera ngkai ko kabanea korakoram ni beku iroun Iehova ma nanom, maium, am iango ao korakoram ni kabanea? Bukin tera ngkai ko katabua maium nakon te Atua ao ni bwabetitoaki? E taekinaki n te Baibara bwa e nori naano Iehova, ao n te aro anne e a kona n ataia iai aika ‘tangiraki’ irouna. Ngaia are e “katikia” ke e kaoia bwa a na riki bwa raoraona. (Wareka Akai 2:7; Ioane 6:44.) Mangaia ae ko kona ni kakoauaa bwa ko beku iroun Iehova ibukina bwa e tangiriko bwa ko na karaoia. E na bon aki kitania te koraki ake e a tia ni burimaunia ngkana a teimatoa ni kakaonimaki irouna. A kakawaki i matan te Atua ao e rangi n tangiriia.​—Taian Areru 94:14.

4. Bukin tera ngkai ti riai n teimatoa n iangoa aron ae ti kinaaki iroun te Atua?

⁴ Ti riai ni kateimatoa tangirara iroun Iehova ngkai e a tia ni burimaunira. (Wareka Iuta 20, 21.) Uringnga are e kaotaki n te Baibara bwa ti kona ni betinako ke ni kitana te Atua ao n aki riki bwa raoraona. (I-Ebera 2:1; 3:12, 13) N te katoto, imwain norakin taeka aika n te 2 Timoteo 2:19 ao e taekinia Umenaio ao Bireto te abotoro Bauro. E taraa n ae mwaane aika uoman aikai, a a tia ni beku iroun Iehova n te tai teuana, ma imwina a a manga kitana te koaua. (2 Timoteo 2:16-18) A kitana naba te koaua tabeman kaain te ekaretia are i Karatia. A bon aki teimatoa n te koaua. (I-Karatia 4:9) Ti riai n ururingnga n taai nako bwa e kakawaki ara iraorao ma Iehova.

5. (a) Baikara aroaro aika kakawaki iroun te Atua? (b) Baikara katoto aika ti na maroroakin?

⁵ Iai aroaro aika rangi ni kakawaki iroun Iehova. (Taian Areru 15:1-5; 1 Betero 3:4) A kaokoroaki n te onimaki ao te nanorinano tabeman aika kinaaki iroun te Atua. Ti na neneri aia katoto uoman mwaane ao n noria bwa a kanga n tangiraki iroun Iehova man aroaro aikai. Ti na iangoa te mwaane are e taku bwa e kinaaki iroun te Atua, ma e a manga aki butimwaeaki iroun Iehova ibukina bwa e kainikatonga. Ti kona ni karekei reireiara aika kakawaki mani katoto aikai.

Tamaia te Koraki Aika Onimaki

6. (a) Tera are e kaotiotia Aberaam ni kaineti ma onimakinan ana berita ni kabane Iehova? (b) Tera aroni kinaakin Aberaam iroun Iehova?

⁶ Aberaam bon te mwane ae e “onimakina Iehova.” Ni koauana e atongaki bwa “tamaia taan onimaki ni kabaneia.” (Karikani Bwaai 15:6, BG; I-Rom 4:11) E kitana abana Aberaam, raoraona ao ana bwai nakon te aba ae raroanako ibukin ana onimaki. (Karikani Bwaai 12:1-4; I-Ebera 11:8-10) E teimatoa korakoran ana onimaki Aberaam i nanon ririki aika bati imwina. E kateretereaki korakoran ana onimaki ngke e “kuri ni kareana Itaaka” are natina ibukin ongeabana nakon ana tua Iehova. (I-Ebera 11:17-19) E kaotiota onimakinan ana berita nako Iehova Aberaam ai ngaia are e a iangoia te Atua bwa e kakawaki irouna, ao e kinaa raoi Aberaam. (Wareka Karikani Bwaai 18:19.) E aki tii ataia Iehova bwa e maiu Aberaam, e rangi n tangira Aberaam bwa raoraona.​—Iakobo 2:22, 23.

7. Tera ae kakawaki n ataakini kakoroan ana berita nako Iehova, ao tera aron rotakin Aberaam iai?

⁷ E kakawaki ataakin ae e aki karekea tibwangana Aberaam n te aba are beritanaki nakoina n ana tai ni maiu. E aki nora naba ana kariki are e na kabatiaaki “n ai aron tanon aon te bike.” (Karikani Bwaai 22:17, 18, BG) E ngae ngke a tuai ni kakoroaki bukini berita nako n ana tai ni maiu Aberaam, ma e teimatoa ni korakora onimakinan Iehova irouna. E ataia bwa e na boni kakoroi bukin ana taeka te Atua ake e a tia n taekin. Eng, e maiu Aberaam ni kaineti ma te onimaki anne. (Wareka I-Ebera 11:13.) Ti kinaaki iroun Iehova ngkai iai ara onimaki n aron Aberaam?

Kanikinaean te Onimaki Kantaningaan Ana Babaire Iehova

8. Baikara bwaai tabeua aika rangi n tangiri angiia aomata?

⁸ E kona n iai baika ti tangiri riki n aron te mare, karikaia natira ao ti na marurung raoi. A na aki koro bukin teuana ke uoua mai buakoni baika tangiraki aikai irouia aomata aika bati. Ngkana anne ae riki nakoira, e na ataaki korakoran ara onimaki n arora ni kaaitarai baika riki.

9, 10. (a) A kanga tabeman n ukera kakoroani bukini baika a tangiri? (b) Tera am namakin ibukini kakoroan ana berita nako te Atua?

⁹ Ti aki wanawana ngkana ti ukeri kakoroani bukini baika ti tangiri n te aro ae aki boraoi ma wanawanan te Atua. E na kona n uruanaki ara iraorao ma Iehova n aei. N te katoto, a tia tabeman n rinei waaki ibukin tararuaani marurungia aika kauntaba ma ana reirei ni kairiri Iehova. A tia tabemwaang ni karekei aia mwakuri ae a kabooaki iai are e a totokoa reken aia tai ma aia utu ke bobotaki n te ekaretia. Ke tera arom ngkana ko a iraorao ni karekenano ma temanna ae tiaki kaain te onimaki? E koaua bwa e ukera ae e na kinaaki iroun Iehova te Kristian ae kakairi n te aroaro ni maiu aei? Tera ana namakin Iehova ngke arona bwa e aki taotaona nanona Aberaam ni kaineti ma kakoroani bukin ana berita nako te Atua ibukina? Ma tera aron Aberaam ngkana e uota oin nanona ni maeka n aron ae tangiria, ao ni karekea kamoamoaan arana i bon irouna n oneani mwin are e na kantaninga Iehova? (Kabotaua ma Karikani Bwaai 11:4.) E na kona ni kateimatoa kinaakina iroun Iehova?

¹⁰ Baikara baika ko tangiri ni kan nori kakoroani bukia? E tau korakoran am onimaki ni kantaninga Iehova are e beritanna bwa e na karekei baika ko tangiri aika ko na rauaki iai? (Taian Areru 145:16) A na aki waekoa n riki kakoroani bukin tabeua mai buakon ana berita nako te Atua aika ti tangiri, n aron are e riki nakon Aberaam. Ma e kakawaki iroun Iehova rikiraken ara onimaki n aron Aberaam, ao ni maiuakina ae boraoi ma anne. Ni koauana, bon te kakabwaia ae rianako ibukira karaoan aei.​—I-Ebera 11:6.

Te Kaokoro i Marenan te Nanorinano ao te Nanorieta

11. Tera are e a tia ni karaoia Kora i nanon ririki aika bati?

¹¹ Ti na nori aia katoto mwaane aika uoman ae Mote ma Kora ake a karaoi baike a kakaokoro. Ti kona ni buokaki n ota ni baike a karaoi bwa e boto ana iango Iehova ibukira i aon kaotiotani karinean ana moti iroura ao arona ni kaetii bwaai. Kora bon te I-Rewi ae kanoan Koata. Tao e a tia n reke ana tai n nora te baere e a tia ni karaoia Iehova ni kainaomataaia tibun Iteraera rinanon Taari ae Uraura. E boutokaa ana motikitaeka Iehova i aoia tibun Iteraera ake a aki ongeaba n te Maunga are Tinai, ao e buoka naba uotakin te ati ni berita. (Te Otinako 32:26-29; Warekaia Iteraera 3:30, 31) E taraa n tia ni kakaonimaki nakon Iehova i nanon ririki aika bati, ao ibukin anne, a bati aomata aika a karinea i aon Iteraera.

12. Tera aron rotakin kinaakin Kora iroun te Atua n ana nanorieta, n aron ae kaotaki n iteraniba 31?

¹² E ngae n anne, ngke a mwananga te botannaomata ae Iteraera nakon te Aba ni Berita, ao e a iangoia Kora bwa iai te bae kairua n ana babaire te Atua ni kairaia te botannaomata. E tangiria ni karaoi bitaki. Ma a ira Kora 250 mwaane mai buakon te botannaomata anne. A kakoauaa raoi bwa a kinaaki iroun Iehova bwa ana aomata ao a kariaiakaki irouna. A tuanga Mote ni kangai: “Kam kanima te aro n uea ae aki riai i aomi, ngkai a bane n tabuaki kaain te botaki n tatabemania, ao E memena Iehova i buakoia.” (Warekaia Iteraera 16:1-3, BG) Te waaki aei bon te iango ao te mwakuri ni kainikatonga. A kabatiaa onimakinan aroia ni karaoi baike a kani karaoi. E taku Mote nakoia: “E na kaotiia ana aomata Iehova.” (Wareka Warekaia Iteraera 16:5.) Ni kaanin tokin te bong are imwina, ao e a mate Kora ma te koraki ake a raonna ni karitei.​—Warekaia Iteraera 16:31-35.

13, 14. N aaro raa ake e kaota iai nanorinanona Mote?

¹³ Ni kaitaraan anne, e “bati n nimamanei te aomata are Mote, ao e nimamanei riki nakoia aomata ni kabaneia aika mena i aonaba.” (Warekaia Iteraera 12:3, BG) E kaotiota te nimamannei ao te nanorinano ngke e motinnanoia bwa e na tou mwin ana kairiri nako Iehova. (Te Otinako 7:6; 40:16) Akea te tai teuana ae e nanououa iai Mote n aron Iehova ni karaoi bwaai, ke tao e na rangi n un n iriran nanon tuua ake e bairei Iehova. N te katoto, e anga te tua Iehova ibukini katean te umwanrianna ni kaineti naba ma rongorongona ae te kabanea n uarereke, n aron karan te kunnikai ma mwaitin taiani kai ni kareke aika a na kamanenaaki ibukin te umwanrianna. (Te Otinako 26:1-6) E kona ni kabwaranano n tabetai ngkana ko reireinaki ni kaetaki ibukini bwaai tabeua iroun te mataniwi n ana botaki Iehova. Ma Iehova bon te mataniwi ae kororaoi. E angania ana toro aia mwakuri ae a na karaoia ao e onimakinia bwa a na boni karaoia. Ngkana e anga kaetieti aika bati ao e karaoa anne bwa iai bukina ae raoiroi. E aki un Mote ke n iangoia bwa e aki butimwaeaki ana iango iroun Iehova kioina ngkai e a anganna kaetieti aika bati. E aki iangoia Mote bwa e a kakeaaki inaomatana iroun Iehova. E tuangia taani mwakuri Mote bwa a na karaoa raoi te baere e tuangia Iehova. (Te Otinako 39:32) Aio bon te iango ao te mwakuri n nanorinano. E ataia Mote ae bon ana mwakuri Iehova ao e boni kamanena Iehova bwa e na karaoi ana mwakuri.

¹⁴ E teretere nanorinanon Mote ngke e a kaaitarai baika riki aika aki kakukurei. N te tai teuana, e aikoa kona n taona nanona Mote ao e a kabwaka ni kamoamoaa te Atua ni butimwaean aia ngurengure aomata. Ibukin anne, e tuangaki Mote iroun Iehova bwa e na aki kairiia aomata nakon te Aba ni Berita. (Warekaia Iteraera 20:2-12) E a tia Mote ma tarina ae Aaron n nanomwaaka ni kaitaraa ngurengureia tibun Iteraera i nanon ririki aika bati. Ma e a aki karekea te baere e a kamani kantaningaia Mote i nanon te tai ae maan, ngkai e a tia ni karaoa te kairua aei! Tera are e karaoia Mote? E boni bwara nanona, ma e nanorinano ni butimwaea ana babaire Iehova. E ataia ae Iehova bon te Atua ae raoiroi ae aki inanonano. (Te Tua-Kaua 3:25-27; 32:4) Ngkana ko iangoa aroni Mote, ko aki iangoia bwa temanna ae e kinaaki iroun Iehova?​—Wareka Te Otinako 33:12, 13.

E Kainnanoaki te Nanorinano n te Aantaeka Iroun Iehova

15. Tera ae ti reiakinna n aroni Kora ni kainikatonga?

¹⁵ E na rotaki kinaakira iroun Iehova n arora nakoni bitaki n te ekaretia ni Kristian ni katobibia te aonnaba, ao babaire aika karaoaki irouia taani kairiri. A riki n ianena iroun te Atua Kora ma raona ibukini kamoamoaia, nanorietaia ao akean aia onimaki. E iangoia Kora bwa e a kara Mote ni karaoi babaire ma e mwaninga ae bon Iehova ae kaira te botannaomata. E tarariaoa bongan te koaua anne Kora, ao e a kabwaka ni kaota kakaonimakina nakoia te koraki ake e kabonganaia te Atua. E na rangi ni wanawana riki Kora ni kantaningaan Iehova ni kamataatai ke ni karaoi bitaki ngkana a boni kainnanoaki. N tokina, e a uruana aroni kakaonimakina n ana beku Kora ibukini kainikatongana!

16. E na kanga n rotaki aroni kinaakira iroun Iehova n touani mwin ana katoto Mote ni bwainan te nanorinano?

¹⁶ A anganaki te kauring ae kakawaki unimwaane n te ekaretia man te rongorongo anne, ao tabemwaang i nanon te ekaretia ni boong aikai. E kainnanoaki te nanorinano ni kantaningaan Iehova ao touani mwin ana kaetieti mairouia ake e rineia bwa a na kairiri. Ti kaotia bwa ti nanorinano ao n nimamannei n aroni Mote? Ti butimwaea mwiokoaia te koraki aika kairiri i buakora ao n aantaeka nakon kaetieti aika ti anganaki? Ti kona n tokanikai ni baika ti namakin ngkana ti kaaitara ma te bwarannano? Ngkana ngaia anne, ti na kinaaki naba iroun Iehova. E na reke tangirara irouna ngkana ti nanorinano ao n aantaeka.

E Kinaia Ana Aomata Iehova

17, 18. Tera ae na buokira bwa ti na teimatoa ni kinaaki bwa ana aomata Iehova ngaira?

¹⁷ E raoiroi ibukira bwa ti na iangoi aia katoto te koraki ake a tangiraki iroun Iehova, ao a kaoaki bwa a na riki bwa raoraona. A a aki kororaoi Aberaam ao Mote bwa a kabwaka naba n arora. Ma e iangoia Iehova bwa raoraona ao ana aomata koraki aikai. E ngae n anne, e kabwarabwaraaki bwa ti boni kona ni kitana Iehova man ana katoto Kora, ao ngkanne ti aikoa manga kinaaki ao ni butimwaeaki irouna. Ti riai n titirakinira n tatabemanira nako ni kangai: ‘Tera aron ana iango Iehova ibukiu? Tera reireiau mani katoto aika n te Baibara?’

¹⁸ E iangoiia ana toro aika kakaonimaki Iehova bwa aomata aika riki bwa ana bwai. E rangi ni karaunano aio ibukira. Ai ngaia are ti na teimatoa ni kakorakoraira ni kaotiotii aroaro aika te onimaki ao te nanorinano. Ko na riki iai bwa te bwai ae rangi ni kakawaki iroun te Atua ae rianako raoiroina. Bon te aro ae rine ngkana ko kinaaki irouna. A karekea te maiu ni kukurei ngkai ao kakabwaia aika raraoi n taai aika a na roko, te koraki ake a butimwaeaki irouna.​—Taian Areru 37:18.

Ko Uringnga?

• Tera ae nanonaki n ae ko kinaaki iroun Iehova?

• Ko na kanga ni kakairi n ana onimaki Aberaam?

• Baikara reireiara aika ti kona ni karekei mairouni Kora ao Mote?

[Taamnei n iteraniba 29]

Ti onimakinna n aron Aberaam bwa e na boni kakoroi bukin ana berita nako Iehova?

[Taamnei n iteraniba 31]

E aki kukurei Kora n aantaeka ao n nanorinano nakon te kaetieti

[Taamnei n iteraniba 32]

Ko kinaaki iroun Iehova bwa ngkoe temanna ae ko nanorinano n aantaeka nakoni kaetieti?