5 E Butimwaei Taromauri Aika Nako Man te Nano te Atua e Koaua Anne?

Tao ko a tia n ongongo aei: “N aron ae a kairiri kawai aika bati nakon te tabo teuana, iai naba kawai aika bati aika kairiri nakon te Atua. A riai aomata n tatabemania nako ni kaakaei kawaia nakon te Atua.”

Ana reirei te Baibara: Ti riai n taromauri ma nanora ni koaua, ao n rarawa ni kabwarabae ke ni mwamwanaa te aba n arora n taromauri. E tuangia mataniwi n Aaro n ana tai Iesu bukini kakeaakia iroun te Atua ngke e kangai: “E eti ana taeka Itaia ngke e taetae ni burabetina taekami, ngkami aika taani mwamwanaa te aba, n aron ae koreaki ni kangai, ‘A karineai aomata aikai ni wiia, ma e rangi n raroa nanoia mairou.’” (Mareko 7:6) Ma e aki nanonaki n aei bwa e na butimwaei ara taromauri te Atua tii ibukina bwa ti taromauria ma nanora ni koaua.

E katereterea aei Iesu ngke e kaotaraei kairuan aia taromauri mataniwin Aaro ma taan rimwia. E kaineti ana taeka aikai te Atua nakoia ni kangai: “Akea bongan taromauriau irouia, ibukina bwa a tataekin aia tua aomata bwa aia taeka n reirei.” (Mareko 7:7) “Akea bongan” aia taromauri ke e matebuaka ibukina bwa a moanibwaia katein aia Aaro nakoni baika tangiraki iroun te Atua.

E aki boutokaaki n te Baibara te iango ae iai kawai aika bati ake a kariaiakaki ibukini kaanian te Atua, ma e kateretereaki iai bwa tii teuana te kawai. E taekinaki ae kangai ni Mataio 7:13, 14: “Riin n te mataroa ae wariki, bwa e raababa ma ni mwawaawa te kawai ae tiki nakon te kamaunanakoaki, ao a mwaiti aika a rin iai. Ma e wariki te mataroa ao e reme te kawai ae tiki nakon te maiu, ao a karako akana a kunea.”

Buokam n ataan te koaua: Iangoa arom ngkana ko a tia ni kataneiai i nanon namwakaina aika bati bwa ko na ira te kabobirimwaaka. Ko moanna ma e kakeaaki am bwi bwa ko urua tuan te kabobirimwaaka teuana n akea am atatai iai. Ko bae n iangoia bwa e matebuaka am kekeiaki. E kona naba n riki anne ni kaineti ma taromaurian te Atua iroura?

E korea ae kangai te abotoro Bauro ni kabotauan ara taromauri ma te kaiangatoa n te takaakaro: “Ngkana iai ae e kauaaba n taian takaakaro, e na aki katokaaki ana bau, ma tii ngkana e kauaaba n te aro ae boraoi ma tuan te takaakaro.” (2 Timoteo 2:5) Ti kona ni karekea akoara iroun te Atua ngkana ti taromauria n te aro ‘ae boraoi ma tuana,’ ae katauaki irouna. N aron ae e aki kona n tokanikai te tia kabobirimwaaka ngkana e urua te tua, ti aki kona naba ni karekea akoara mairoun te Atua ngkana ti bon rinea kawaira ni beku irouna.

Ngkana ti na kakukureia te Atua, ti riai n taekina te koaua ibukina. E taku Iesu: “A nang taromauria iai te Tama n te taamnei ao n te koaua, taan taromauri ni koaua.” (Ioane 4:23) Ti reiakina te kawai ae eti nakon te Atua man ana Taeka ae te Baibara.—Ioane 17:17.a

[Kabwarabwara ae nano]

[Kabwarabwaraan n iteraniba 8]

E koaua bwa a bane Aaro n reireinia aomata aroia n taromauria te Atua n aron ae boraoi ma nanona?