E Kona ni Bita Maium te Koaua
TAO ko a tia n ongo ke n reiakina teuana mai buakoni keewe ake a tia n kaotaraeaki ni kaongora aikai. Ma tao ko teimatoa n rawa ni bitii am koaua, ai moarara riki ngkai ko a maan iai.
E mataata bukin rawam. A tuangaki aomata n Aaro tabeua bwa e aki kainnanoaki kabotauan aia reirei, ma ae taekinaki n te Baibara. A kekeiaki Aaro riki tabeua ni boutokai aia reirei aika kewe, n taekinna bwa e kangaanga te ota n te Baibara, ao e aki kantaningaaki bwa e na ataaki nanona irouia aomata nako. Bon aomata aika a aki kakannato ke a uarereke aia reirei angiia taan rimwin Iesu, ma a boni mataata ni baike e taekin.—Mwakuri 4:13.
Ko bae n iangoia bwa e mamaara am onimaki ngkana ko tuoa am koaua. Ma e riai iangoan ae e aki kukurei te Atua ngkana ti nenera te Baibara, ao ana rongorongo nakon te botannaomata, bwa ti aonga n ota ni baika e tangiri mairoura? Ni koauana, ko kaungaaki n ana Taeka bwa ko na nenera te Baibara bwa ko aonga ni “kakoauaa raoi bwa tera nanon te Atua ae raoiroi ma n riai ao ni kororaoi.”—I-Rom 12:2.
E kakawaki ataan te koaua ibukin te Atua, tiaki tii ibukin reiakinan te bwai ae boou ma ibukin naba kanakoraoani maium. (Ioane 8:32) E a tia ni karikirakea ana onimaki n Ana Taeka te Atua Deanne are e taekinaki n te moani kaongora. E taku: “A bon aki mataata kibun te Baibara irou ni karokoa are I a moana iai au reirei n te Baibara. I a kinaa ngkai Iehova bwa tiaki tii te Atua ae mwaaka ma bon Tamau ae tatangira are i karawa. I a tia ni karekea te kantaninga ae raoiroi ibukini maiu.”
Tao ko a tia n reiakina te Baibara mai mwaina ma ko tuai n namakina kakabwaiaam. Ngkana ngaia anne, tai kabwaraa nanom. E kona ni kabotauaki te kekeiaki ni karekea te ota n te Baibara ngkana ko a tia n reiakini baika a kewe ibukin te Atua, ma te mwananga nakon te tabo ae ko tuai n roroko iai ni kamanenaan te kabwarabwara ae kairua.Tao e na nakoraoi moani mwanangam ma e na bae ni bwara nanom ngkana ko a aki roroko n am tabo. Ngaia are ngkana ko kan roko n am tabo, toua te kawai n aron kabwarabwaraana ae eti nakon te tabo are ko na nako iai.
Ko kan reiakina te koaua ibukin te Atua? Ti kaungako bwa ko na n reitaki ma Ana Tia Kakoaua Iehova n am aono, ke ni koroboki nakon te atureti ae riai n iteraniba 4 n te maekatin aei ibukin te reirei n te Baibara ae e aki kabooaki.
[Kabwarabwaraan n iteraniba 9]
“Kakoauaa raoi bwa tera nanon te Atua ae raoiroi ma n riai ao ni kororaoi.”—I-ROM 12:2