Ko Ataia?

Bukin tera bwa a mena taan raimwane n te tembora i Ierutarem?

▪ Tabeua te tai imwaini maten Iesu ao e anga ana taeka nakoia te koraki ake a rangi ni babakanikawai n te tembora. E taekinaki ae kangai n te Baibara: “E kakioianako taani kaboonakoi bwaai [Iesu] ao taani kaboobwai i nanon te tembora, ao e karangai aia taibora taan raimwane ao aia kaintekateka taani kaboonakoi taobe. Ao e taku nakoia: ‘E koreaki ae kangai, “E na aranaki umwau bwa te umwa n tataro,” ma kam karaoia bwa bwangaia taani kamwarua.’”—Mataio 21:12, 13.

A mwananga kaain Iuta ao I-Iutaia ake a rairaki man aia Aaro n te moan tienture man aaba aika bati ao kaawa aika bubura nakon te tembora, i Ierutarem ao a uotii aia mwane man aia tabo. Ma a riai ni kabonganai aeka ni mwane ake a katauaki ibukini kabwakaan te taekiti are katoa ririki ibukin te tembora, ni kaboaia maan ibukin te karea ao angakarea riki tabeua ake a bon nako man te nano. Mangaia are a na rairi taiani mwane taan raimwane, ake a uotii aomata man taabo aika kakaokoro nakon te mwane are katauaki, ma a na taua teutana mai iai bwa boon aia raimwane. N tain aia toa I-Iutaia, a katei naba aia taibora taan raimwane aikai i nanon aonon te tembora n aia Oo Tientaire, bwa a na rairi aia mwane aomata.

E teretere raoi kabuakakaaia taan raimwane iroun Iesu n taekaia are a a bita te tembora nakoni “bwangaia taani kamwarua,” bwa e rangi n riao mwaitin are a anaia mairouia aomata ibukini boon aia raimwane.