Aremaketon Tera Aia Taeka Tabemwaang Iai?

“Ao a botiia n te tabo ae aranaki n te taetae n Ebera bwa Aremaketon.”—TE KAOTIOTI 16:16, English Standard Version.

TERA am iango ngkana ko ongo te taeka ae “Aremaketon”? E na bae n rio n am iango taamnein te kabuanibwai ae kakaiaki. E ngae ngke e kaoti tii te taina te taeka aei n te Baibara, ma n angiin te tai e okioki taekinana n te waaki ni kanakorongorongo ao irouia mataniwi n Aaro.

A boraoi iango aika taabangaki ibukin Aremaketon ma ana reirei te Baibara? E kakawaki ataakini kaekaana. Bukin tera? Ibukina bwa ataakin te koaua ibukin Aremaketon, e kona ni kainaomatako man te maaku ae akea uaana, ko na kukurei riki n iangoi taai aika imwaim ao e na kanakoraoa riki iaiangoan te Atua iroum.

Iangoi titiraki aika tenua aika n te iteraniba ae imwina, ao kaboraoi koaua aika taabangaki ibukin Aremaketon ma ana reirei ni koaua te Baibara.

1. E KOAUA BWA AREMAKETON BON TE KABUANIBWAI AE KARINA N RIKI MAIROUIA AOMATA?

A aki toki taani kanakorongorongo ao taani kakaae ni kamanena te taeka ae “Aremaketon,” ibukini kabwarabwaraani kabuanibwai aika riiriki mairouia aomata. N te katoto, e taekinaki te Moan ao te Kauoua ni Buaka Are Kabutaa Aonnaba bwa Aremaketon. Imwini buaka akanne, a a tabeaianga botannaomata bwa aongkoa a nang kabwakai aia boom aika mwaakaroiroi i marenaia te United States ao te Soviet Union. E aranaki te buaka anne n te waaki ni kanakorongorongo, bwa “Aremaketon are a na kamanenaaki iai bwaai ni buaka aika mwaakaroiroi.” Ni boong aikai, a kanakoa aia kauring ibukini kaanin “baika a nang riki n Aremaketon” taani kakaae ake a maaku, bwa n aia iango e na karikii bitaki aika korakora nakon tauani mwini kanoani boong kabarekaan te ea.

Te bwai ae nanonaki n aia kabwarabwara: Iai mwaakaia aomata n tau aroni baika a na riki n taai aika a na roko n te aonnaba ao baika maiu ni kabane. E na uruaki te aonnaba n aki toki ngkana a kabwaka tautaeka ni karaoi aia mwakuri ma te wanawana.

Ana reirei te Baibara: E na aki kariaia te Atua uruakan te aonnaba irouia aomata. E beritanaki n te Baibara bwa e “aki matebuaka” karaoan te aonnaba iroun Iehova.a Ma e karaoia “ba e na maekanaki.” (Itaia 45:18, BG) N oneani mwin are e na kariaia te Atua uruakan te aonnaba irouia aomata, e na “kamaunaia iai te koraki ake a urua te aonnaba.”—Te Kaotioti 11:18.

2. E KOAUA BWA AREMAKETON BON TE KABUANIBWAI AE KARINA?

N tabetai, a kamanena te taeka ae “Aremaketon” taani kororongorongo ni kabwarabwarai kabuanibwai aika karina aika rangi ni korakora. N te katoto, n 2010 e ribootinaki n te kaongora teuana bwa e roko “‘Aremaketon’ i Haiti.” E taekinaki iai te karawawata, te urubwai ao buani maiuia aomata man te mwaeiei ae moan te korakora are e uruaka te aba anne. A kamanena te taeka anne taani kanakorongorongo ao taani karaobirim, tiaki tii nakoni baike a a kaman riki ma nakon naba baike a na riki ake a nako nanoia iai. N te katoto, a a tia ni kamanena te taeka ae “Aremaketon” ni kabwarabwarai iai aia katautau ibukini baika a na n riki imwin orean te aonnaba n atibuni karawa.

Te bwai ae nanonaki n aia kabwarabwara: Aremaketon bon te bwai ae karina n riki ae okoro are a a tiringaki iai aomata n aki akaka aika akea aia bure. E karako ae ko kona ni karaoia ibukini kamanoam.

Ana reirei te Baibara: A na bon aki tiringaki aomata n aki akaka n Aremaketon. Ma bon tii aika buakaka aika a na kamaunaaki. E beritanaki n te Baibara bwa ai tii teutana riki ao “akea te aomata ae buakaka: Eng, ko na tarataraa raoi ana tabo, ao akea naba.”—Taian Areru 37:10, BG.

3. E NA KAMAUNA TE AONNABA TE ATUA N AREMAKETON?

A bati aika a taua te Aro ake a kakoauaa bwa iai te kabanea ni buaka i marenaia aomata aika raoiroi ao aika buakaka, ike e nang roko iai n tokina ara buraneti. N te kakaae are e karaoaki n te Princeton Survey Research Associates n te United States, e noraki iai bwa 40 te katebubua mai buakoia ikawai ake a titirakinaki, aika a kakoauaa bwa e nang roko n tokina te aonnaba n “te buaka are Aremaketon.”

Te bwai ae nanonaki n aia reirei: A aki karikaki aomata bwa a na maiu n aki toki i aon te aba, ao e aki naba karaoaki te aonnaba bwa e na teimatoa n aki toki. E karikiia aomata te Atua ma te kantaninga ae a na mate imwin tabeua te tai.

Ana reirei te Baibara: E kamatataaki raoi n te Baibara bwa e “kawene aonaba [te Atua] i aoni bouana, ba a aonga n aki mwemwe n aki totoki.” (Taian Areru 104:5, BG) E taekinaki ae kangai n te Baibara ibukia kaain te aonnaba: “A na abana te aba akana raoiroi, ao a na mamaeka iai n aki toki.”—Taian Areru 37:29, BG.

E a teretere raoi ngkanne bwa a kauntaba iango aika bati aika taabangaki ibukin Aremaketon ma ana reirei te Baibara. Mangaia are tera ngkanne te koaua?

[Kabwarabwara mai nano]