‘E Kani Kaota Tamana Te Nati’
“Akea ae ataa te Tama bwa tii te Nati ae e ataia, ao ane e kani kaotia te Nati nakoina.”—RUKA 10:22.
KO NA KANGA NI KAEKA?
․․․․․
E aera ngkai tii Iesu ae tau ni kaota Tamana?
․․․․․
E kanga Iesu ni kaota Tamana nakoia aomata?
․․․․․
N aaro raa ake ko kona ni katotonga iai Iesu ni kaota te Tama?
1, 2. Tera te titiraki ae kaminoi aia iango aomata aika bati, ao bukin tera?
‘ANTAI te Atua?’ A kamangaoaki aia iango aomata aika bati n te titiraki aei. N te katoto, e ngae ngke angiia ake a taku bwa Kristian ngaiia a kakoauaa te Atua bwa te Temanna n teniman, ma a bati aika a taekinna bwa e kangaanga otaia iai. E taku te mitinare temanna ae te tia kororongorongo: “Aio te reirei ae kangaanga te ota iai. E riaon te konabwai n iango n aron ae e taneiai te aba iai.” N te itera teuana, a kakoauaa angiia ake a butimwaea te karioiango ibukin rikini bwaai i bon irouia, bwa akea te Atua. A taekinna bwa a bane ni manennanti n riki baika karikaki aika rangi n tamaroa. Ma e ngae n anne e aki kakewea ae iai te Atua Charles Darwin ae kabutaanako te reirei i aon rikini bwaai i bon irouia ngke e kangai: “Taraan te iango aei irou, bon akea aia konabwai aomata ni katabwanina raoi otaia ibukin taekan te Atua.”
2 E ngae ngke tera aia koaua angiia aomata ma bon iai aia titiraki ibukin te Atua. Ma ibukin aki raun nanoia ni kaekaan aia titiraki ake a reke irouia, a a bati aika a bwara nanoia n nenera taekan te Atua. Ni koauana, e a tia Tatan ni ‘kamataki nanoia te koraki ake a aki onimaki.’ (2 I-Korinto 4:4) Maroaka ae a a bon aki ataibwai angiia aomata ao a minotaki aia iango n te koaua ibukin te Tama ae te tia Kariki bwaai ni kabane!—Itaia 45:18.
3. (a) Antai ae e a tia ni kaota te tia Karikiriki nakoira? (b) Baikara titiraki aika ti na rinanoi?
3 Ma e ngae n anne, e rangi ni kakawaki reiakinan te koaua ibukin te Atua irouia aomata. Bukin tera? Ibukina bwa a na tii kamaiuaki aika a taboa “aran Iehova.” (I-Rom 10:13) E irekereke taboan aran te Atua ma kinaakin te Aomata ae arana anne. E kaota te koaua ae rangi ni kakawaki aei Iesu Kristo nakoia taan rimwina. E kaota naba te Tama nakoia. (Wareka Ruka 10:22.) Bukin tera bwa tii Iesu ae e kona ni kaota te Tama? E kanga Iesu ni karaoa anne? Ao ti na kanga ni katotonga Iesu ni kaota naba te Tama nakoia aomata? Ti na rinanoi kaekaan titiraki aikai.
BON TII IESU KRISTO AE TAU IAI
4, 5. E aera ngkai tii Iesu ae tau ni kaota Tamana?
4 Bon Iesu n tii ngaia ae tau ni kaota Tamana. Bukin tera? Ibukina bwa imwaini karikani baika maiu ni kabane, e a kaman riki Iesu bwa te anera i karawa ike e a riki imwina bwa te aomata ae “Natin te Atua ae ana rikitemanna.” (Ioane 1:14; 3:18) E rangi n tau te mwioko aei nakoina! Ngke a tuai ni karikaki bwaai, e mwaneaki raoi te Nati n ana tangira Tamana ao e reiakina taekana ma aroarona. E korakora reitakin te Tama ma te Nati i nanon te tai ae rangi ni maan, ike e a korakora iai rikiraken aia tangira i marenaia. (Ioane 5:20; 14:31) Ai batira ataakin anuan te Tama iroun te Nati!—Wareka I-Korote 1:15-17.
5 E aranaki te Nati bwa “Ana Taeka te Atua” ibukina ngke e rineaki iroun te Tama bwa Ana tia taetae. (Te Kaotioti 19:13) Ai ngaia are bon tii Iesu ae tau ibukini kaotan te Tama nakoia aomata. E tonu raoi ana kabwarabwaraa te tia korea te Euangkerio ae Ioane ibukin Iesu ae “te Taeka,” bwa “e mena i bwanibwanin te Tama.” (Ioane 1:1, 18) Ngke e taekina anne Ioane, e bae n iangoa te katei teuana n ana tai are e rangi bwabwainaki n tain te amwarake. E na bae n tekateka te iruwa temanna ni kaania are temanna i rarikina bwa a aonga ni kaai ni kakaraki. Ngaia are ngkai e mena te Nati “i bwanibwanin” Tamana, e a reke iai aia tai ni kaatuui aia iango n aia maroro.
6, 7. E kanga n teimatoa n ririkirake te reitaki i marenan te Tama ma te Nati?
6 E teimatoa n ririkirake reitakin te Tama ma te Nati. E ‘riki te Nati bwa ana bwai ni kukurei te Atua n te bong ae koraki.’ (Wareka Taeka N Rabakau 8:22, 23, 30, 31, BG.) E eti ngkanne bwa e rikirake ni korakora aia reitaki i marenaia, ngkai a kaai ni mwakuri ao n aron naba te Nati n reireinna ni katotonga aroaron Tamana. E nora aron Iehova te Nati n tabeakinia aomata aika wanawana n tatabemania nako ngke e karikia, ao e a rikirake ni korakora iai tangiran ao karinean aroaron Tamana.
7 Ibukini karitein Tatan rimwi riki nakon riain Iehova n tautaeka, e a kona n reke iai ana tai te Nati n reiakina aron Iehova ni kaotiota ana tangira, wanawanana ao mwaakana ngke E kaaitara ma te kangaanga. Ibukin anne, akea te nanououa bwa e a ataa arona ni kekeiaki te Nati ribuakoni kangaanga ake e aitara ma ngaai rimwi riki n ana mwakuri ni minita i aon te aba.—Ioane 5:19.
8. Ti kanga ni buokaki n ataa ae bati ibukin aroaron te Tama, n rongorongo aika n te Euangkerio?
8 E kabwarabwaraaki taekan te Tama iroun te Nati n te aro ae nakoraoi riki nakon are e kona ni karaoia temanna, ibukin ana reitaki ae rangi ni kaan ma Iehova. Tera te anga ae nakoraoi riki ibukira ae ti kona n ataa iai te Tama n iaiangoani baike e reiakin ao ni karaoi Natina ae ana rikitemanna? Ibukini kamatataana, iangoa aroni kangaangan otara raoi n nanon te taeka ae “tangira” ngkana ti tii wareka nanona n te rikitinare. Ma ngkana ti iaiangoi aia rongorongo taani korea te Euangkerio ibukin ana mwakuri ni minita Iesu ao arona n tabeakinia aomata nako, ti a kona ngkanne ni karekea otara ae bati n te kibuntaeka ae, “te Atua bon te tangira.” (1 Ioane 4:8, 16) Titeboo naba anne ma aroaron te Atua ake tabeua riki ake e kaotii Iesu nakoia taan rimwina ni menana i aon te aba.
ARON IESU NI KAOTA TAMANA
9. (a) Baikara aanga aika uoua aika kakawaki ake e kaota iai Tamana Iesu? (b) Taekina te katoto ae oti iai aron Iesu ni kaota Tamana n ana angareirei.
9 E kanga Iesu ni kaota Tamana nakoia taan rimwina ao ake a na riki bwa taan rimwina rimwi riki? E karaoa aei n aanga aika uoua aika kakawaki, rinanon ana angareirei ao anuani maiuna. Ti na rinanon moa ana angareirei Iesu. Ti reiakin ana kawai te Tama, ana iango ao ana namakin man te baere e reiakinia iai taan rimwina Iesu. N te katoto, e kabotaua Tamana Iesu ma te tia kawakina te nanai ni man are e nako ni kakaaea ana man temanna are e tiotionako. E taku Iesu bwa ngkana e kunea ana tiibu are e bua teuare ana man, e na “bati riki kimwareireina ibukin te tiibu anne nakoia ake ruangauni ma ruaman ake a aki tiotionako.” E aera ngkai e kamanena te kaikonaki anne? E kamataataa Iesu ni kangai: “N aron naba anne, e aki tangiria Tamau are i karawa bwa e na bua temanna mai buakoia aika uarereke aikai.” (Mataio 18:12-14) Tera reireiam ibukin Iehova man te kaikonaki aei? E ngae ngkana ko namakinna n taai tabetai bwa akea manenam ao ko mwanuokinaki, ma e boni mwannanoiko ao n tangiriko Tamam are i karawa. N ana taratara, boni ngkoe naba temanna mai buakoia aika “uarereke aikai.”
10. E kanga Iesu ni kaota Tamana rinanon anuani maiuna?
10 Te anga ae te kauoua are e kaota Tamana iai Iesu nakoia taan rimwina, boni man anuani maiuna. Ngaia are ngke e tuanga Iesu te abotoro Biribo bwa e na ‘kaota te Tama nakoia,’ e bon eti ngkanne ana taeka Iesu ngke e kangai: “Ane e a tia n norai ao e a tia naba n nora te Tama.” (Ioane 14:8, 9) Iangoi katoto tabeua n aron Iesu ni kaotiotii aroaron Tamana. Ngke e butiaki Iesu iroun te rebera bwa e na katoka aorakina, e bon ringa te mwaane ane e “rebera” anne ao e taku: “I kani karaoia. Ko na itiaki.” Akea te nanououa bwa e nora mwaakan Iehova te rebera aei n te baere e karaoia Iesu. (Ruka 5:12, 13) A kona taan rimwini Kristo n namakina ana nanoanga te Tama ni maten naba Rataro ngke “e ngirangira Iesu i nanona, ao e rawawata nanona” ma n ‘tiinako rannimatana.’ E ngae ngke e ataia Iesu bwa e nang kauta Rataro, ma e bon rotaki naba n te maraki are a taonaki iai ana utu Rataro ao raoraona. (Ioane 11:32-35, 40-43) Akea te nanououa, bwa e bae n iai rongorongo n te Baibara ae ko tatangiria ae e na buokiko n nora ana nanoanga te Tama ae kateretereaki n ana mwakuri Iesu.
11. (a) Tera are e kaotia Iesu ibukin Tamana ngke e kaitiaka te tembora? (b) E aera ngkai a karauaki nanora n rongorongon Iesu ngke e kaitiaka te tembora?
11 Ma tera am iango iroun Iesu ngke e kaitiaka te tembora? Kataamneia n am iango aei: E karaoa ana kai ni kataere man te roobu ao e kaotinakoia taani kaboonakoi kaao ma tiibu. E kabwaroi aia maibibi taan raimwane ao e karangai aia taibora. (Ioane 2:13-17) N noran te mwakuri ae matoatoa aei irouia taan rimwini Kristo, a a uringi iai ana taeka te Uea are Tawita aikai: “E kanai tangirani maneabam.” (Taian Areru 69:9, BG) E kaota korakoran nanona Iesu n teina n nene ibukin te taromauri ae koaua. Iai irouna aroaron te Tama ae ko noria n te rongorongo anne? Ti kauringaki bwa iai mwaakan te Atua, ae akea tiana ni kamauna te buakaka mai aon te aba ao e rangi n ingainga ni kani karaoia. Ibukini matoatoan Iesu n ribaa te mwakuri ae bure, e a kaotaki iai aron ana namakin te Tama ngkana e tarataraa te buakaka ae taabangaki i aon te aba ni boong aikai. Ai karaunanora anne nakoira ngkai ti kekeiaki ribuakon te ribuaka!
12, 13. Tera reireiam ibukin Iehova man aroaron Iesu nakoia taan rimwina?
12 Ti na iangoa te katoto riki teuana ae aroaron Iesu nakoia taan rimwina. A teimatoa ni kauntaeka i marenaia bwa antai ae e kakannato riki i buakoia. (Mareko 9:33-35; 10:43; Ruka 9:46) E atai ana namakin Iehova ni kaineti ma aaro ni kainikatonga Iesu ibukina bwa e rangi ni maan ana tai irarikin Tamana. (2 Tamuera 22:28; Taian Areru 138:6) Irarikin anne, e a tia Iesu n nori aeka n nano akanne ni kaotiotaki iroun Tatan te Riaboro. E bangaomata ao e rangi n tabe riki ma kakannatona ao nakoana. Ai rawawatara nanon Iesu n noran te kani kakannato ae teimatoa i marenaia taan rimwina ake e a tia ni kataneiaia! E bon riki naba i marenaia ake e a tia n rineia bwa abotoro! A kaotiota te kani kakannato ni karokoa ana kabanea ni bong Iesu i aon te aba. (Ruka 22:24-27) Ma e ngae n anne, e teimatoa Iesu ni kaetiia ma te akoi ao e aki bwara nanona bwa a na kakairi n arona ni kaotiota te nanorinano, teutana imwin teutana.—I-Biribi 2:5-8.
13 Ko kona n nora aroaron te Tama n aron Iesu n taotaona nanona ni kaetii baika a kairua ake a kakaraoi taan rimwina? Ko nora ana mwakuri Iesu ao ana taeka ake a kaota aron te Tama n aki kitania ana aomata, e ngae ngkana a okioki ni karaoi baika kairua? Ti aki ngkanne kaungaaki bwa ti na tataro nakon te Atua ao n raraoma ngkana ti kairua kioina ngkai iai ara atatai ibukin aroarona?
E KANI KAOTA TAMANA TE NATI
14. E kanga ni kaotia Iesu bwa e kukurei ni kaota Tamana?
14 A bati taan tautaeka aika a kataia n tauia aomata i aan aia kairiri bwa a na bangabwai mani karabaan rongorongo mairouia. Ni kaitaraan anne, e tangiriia aomata Iesu bwa a na reiakina taekan te Tama, ngaia are e kaotiota raoi taekan Tamana nakoia aomata nako. (Wareka Mataio 11:27.) Irarikin anne, e angania taan rimwina Iesu “te ataibwai bwa [a] aonga ni karekea te atatai ibukin Teuare koaua,” ae Iehova ae te Atua. (1 Ioane 5:20) Tera nanon anne? E kauki aia iango taan rimwina Iesu bwa a aonga n ota n ana angareirei ibukin te Tama. E aki karabaa Tamana n ana angareirei ae kamimi, n aron te Temanna n teniman ae akea ae kona n ota iai.
15. E aera Iesu ngke e aki taekin rongorongon Tamana tabeua?
15 E kaotii bwaai ni kabane Iesu ake e atai ibukin Tamana? E aki, ma e wanawana n aki taekin baika bati ake e atai. (Wareka Ioane 16:12.) Bukin tera? Ibukina bwa n te tai anne ao a “aki kona n ota moa” taan rimwina n te atatai anne ni kabane. Ma n aron are e kabwarabwaraa Iesu, e kona ni kaotaki te atatai ae rangi ni bati n rokon “te tia ibuobuoki” ae te taamnei ae raoiroi, are e na kairiia bwa a na “ota raoi n te koaua.” (Ioane 16:7, 13) N aroia kaaro aika wanawana ake a aki kaotii rongorongo tabeua nakoia natiia ni karokoa a ikawai raoi ao ni kona n ota, ai aron naba Iesu n tataningaa ikawaia n te onimaki taan rimwina ao ni kona n ota raoi ni koaua tabeua ibukin te Tama. E mutiakina tian aia konabwai Iesu.
KATOTONGA IESU NI BUOKIIA AOMATA BWA A NA ATAA IEHOVA
16, 17. Bukin tera bwa ko kona ni kaota te Tama nakoia aomata?
16 Ngkana ko a kinaa raoi temanna ae bwabwaina te tangira, ko aki ngkanne kaungaaki bwa ko na kaongoia aomata taekana? Ni menan Iesu i aon te aba ao e tataekina taekan Tamana. (Ioane 17:25, 26) Ti kona naba ni katotongnga ni kaotiota taekan Iehova nakoia aomata?
17 N aron ae ti a tia n rinanona, e rangi ni korakora riki ana atatai Iesu ibukin Tamana nakoia aomata. Ma e ngae n anne, e kukurei n tibwai tabeua baike e atai ao e bon angania naba taan rimwina te ataibwai, bwa a aonga n ota raoi ni baika nano ibukin aroaron te Atua. Tiaki ti a ataa Tamara n te aro ae kaokoro ma aomata ni boong aikai man ana ibuobuoki Iesu? Ai kakaitaura ngaira bwa e kukurei Iesu ni kaota Tamana nakoira rinanon ana angareirei ao anuani maiuna! Ni koauana, ti a kakaitau n ataakin te Tama. (Ieremia 9:24; 1 I-Korinto 1:31) E boni kaanira naba Iehova ngkai ti kakorakoraira ni kaania. (Iakobo 4:8) Ngaia are ti a kona ngkai n tibwaa ara atatai aio nakoia aomata. Ti na kanga ni karaoa anne?
18, 19. N aaro raa ake ko kona ni kaota iai te Tama nakoia aomata? Kabwarabwaraa.
18 Ti riai ni katotonga Iesu ni kaota te Tama n ara taetaenikawai ao ara mwakuri. Uringnga ae a bati ake ti kaitiboo ma ngaiia n te mwakuri ni minita aika a aki ataa te Atua. E kona ni maabubu taraan te Atua irouia n reirei aika kairua. Ti kona n tibwaa ae ti ataia nakoia n aron aran te Atua, ana kantaninga ibukin te botannaomata ao aroarona ae kaotaki n te Baibara. Irarikin anne, ti kona ni maroro ma raao n te onimaki i aon rongorongo tabeua man te Baibara, ake a kaota aroaron te Atua ake ti aki ota iai ngkoa. Ni karaoan anne, a a kona ni kakabwaiaaki naba.
19 Tera arom ni kaota te Tama n anuani maium ngkai ko kakorakorako ni katotonga Iesu? A na kaaniaki aomata nakon te Tama ao Iesu ngkana a nora tangirani Kristo iroura n ara mwakuri. (I-Ebeto 5:1, 2) E kaungaira te abotoro Bauro bwa ti na ‘kakairi irouna n ai arona ngkai e kakairi irouni Kristo.’ (1 I-Korinto 11:1) Ai kakawakira mwiokoara ae buokaia aomata bwa a na ataa Iehova n anuani maiura! Eng, ti bia bane n teimatoa ni katotonga Iesu ni kaota te Tama nakoia aomata.