E Aera Ngkai E Aki Katoka te Rawawata te Tia Ongoraei Tataro?
E NGAE ngke tao iai aika a tatataro, ma a bon nanououa naba tabeman bwa iai te Atua ke akea. Bukin tera? Tao ibukin noran te rawawata ae rangi ni bati n te aonnaba aio. Ko a tia n iangoia bwa e aera ngkai e aki katoka te rawawata te Atua?
E koaua bwa e karikiia aomata te Atua n aroia ae ngkai ae a aki kororaoi ao a karawawataaki? E na boni kangaanga karinean te atua ae e tangiriia aomata bwa a na rawawata. Ma iangoa aei: Ngkana ko matakuakina te kaa ae boou ao ko noria bwa e mwano iterana are teuana, ko iangoia bwa anne aroni karaoana n te tabo are e karaoaki iai? Ko na bon aki! Ko bae n iangoia bwa e karaoaki man te tabo ni karao kaa n te aro ae “moan te raoiroi,” ma e riki te mwano anne iroun te aomata ke tao man te bwai teuana.
N aron naba anne, tera ara iango ngkana ti taraa te aonnaba ma bwaina nako aika rangi ni kamimi baireaia ma aroni karikaia, ao n nora naba te mangaongao ao te buakaka are a rawawata iai utu? E reiakinaki n te Baibara bwa e karikiia te moan taanga te Atua aika kororaoi, ma a a manga boni kabuakakaaia imwina riki. (Te Tua-Kaua 32:4, 5) Ma te rongorongo ae kakukurei iai bwa e a tia te Atua ni berita bwa e na kaoka mwin te urubwai ao kororaoia aomata aika ongeaba. Ma bukin tera ngkai e a rangi ni kamaanna?
Tera Bukini Kamaanakina?
E irekereke bukina ma te titiraki ae antai ae riai n tautaekania botannaomata. Tiaki ana kantaninga Iehova bwa a riai aomata ni bon tautaekania. E na riki ngaia bwa aia tia Tautaeka. E taekinaki ae kangai n te Baibara: “Tiaki ana bwai te aomata ae nakonako te kaeti eueutakina.” (Ieremia 10:23, BG) E kananokawaki bwa a rineia te moan taanga bwa a na ekaanako ana tautaeka te Atua. A a riki bwa taani bure imwin riaoan te tua. (1 Ioane 3:4) Ao ibukin anne a a kabuaa kororaoia ao ni karikii kangaanga nakoia n ikotaki naba ma kanoaia.
Inanoni nga ma nga te ririki, e a tia Iehova ni kariaiia aomata bwa a na tautaekania i bon irouia, ma e mataata n rongorongon rimoa bwa akea aia kona ni karaoa anne. E kaotaki iai bwa bon tautaeka n aomata ni kabane aika a karikii rawawata. Akea mai buakoia ae e a tia ni katoka te buaka, te iowawa, mwakuri n ribuaka ke te aoraki.
E na Kanga te Atua ni Kaoka Mwin te Urubwai?
E beritanaki n te Baibara bwa e na waekoa te Atua ni karokoa te waaki ae boou i aon te aba ae raoiroi. (2 Betero 3:13) A na tii rin iai te koraki ake a rineia bwa a na kamanenai inaomataia ni karaoa ae a tangiria, n aroia ni kaotiota te tangira i marenaia ao te Atua naba.—Te Tua-Kaua 30:15, 16, 19, 20.
E taekinaki naba n te Baibara bwa n “te bong ni motikitaeka” ae e a uakaan ao te Atua e na kamauna te rawawata ao te koraki ake a karikia. (2 Betero 3:7) Imwin anne, e na tautaekania aomata aika ongeaba Iesu Kristo are e rineaki iroun te Atua bwa te tia Tautaeka. (Taniera 7:13, 14) Tera ae na kakororaoia ana tautaeka Iesu? E taekinaki ae kangai n te Baibara: “A na abana te aba akana nimamanei; ao a na kukurei ni kabatian te raoi.”—Taian Areru 37:11, BG.
Ngkai e a Uea i karawa Iesu, e nang kaoka mwin te urubwai n aron te aoraki, te kara, ao ai te mate are e riki imwin aia karitei aomata nakon Iehova are iai irouna ‘koburaken te maiu.’ (Taian Areru 36:9, BG) E na kamaiuia aomata nako Iesu ake a butimwaea ana tautaeka ae tatangira. A na koro bukin ana berita te Baibara aikai i aan ana tautaeka:
◼ “Ane maeka iai e na aki kangai, I aoraki: a na kabaraki aia bure aomata aika maeka i nanona.”—Itaia 33:24, BG.
◼ “E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”—Te Kaotioti 21:4.
E aki ngkanne kabebetenano ataakin ae e na waekoa te Atua ni kakoroa bukin ana berita ni katoki rawawata ni kabane? Ma ti aki riai ni kabuaa onimakinan ae e ongoraei ara tataro, tii ibukin ae e aki katoka te rawawata ngkai moa.
Bon iai te Atua. E kona n ongo ngkana ko taekina rawawatam ao nanokawakim. E rangi n ingainga nanona ni kan noriko ni maiu ni kukurei ngkana a nangi bane n toki rawawatam ao nanokokorakim.