Karekea Reireiam Man Ana Taeka te Atua

Tera Aron Rotakira Irouia Anera?

A na rinanoaki titiraki aika ko bae n tia n tabeki n te kaongora aei, ao ni kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.

1. Antai anera?

Anera bon taamnei aika maeka i karawa. A rine riki aroni karikaia nakoia aomata. Bon te taamnei te Atua ae koaua are e karikiia anera imwaini karikan te aonnaba. (Iobi 38:​4, 7; Mataio 18:10) E otabwaniniaki Iehova irouia anera aika kakaonimaki aika mirion ma mirion mwaitiia.​​—Wareka Taian Areru 103:​20, 21; Taniera 7:​9, 10.

2. A buokia aomata anera?

E buokaki Rota ae te aomata ae raoiroi irouia anera. E maeka n te kaawa ae bubura are e iangoia te Atua bwa e na kamauna ibukini buakakan aroaroia kaaina. A kauringa Rota ma ana utu anera aika uoman bwa a na waekoa ni kitana te kaawa. A iangoia tabeman bwa bon te manikangare te kauring arei ao a aki kan tabe iai. Ma a kamaiuaki Rota ma natina aine ibukin ongeabaia n te kauring are e anga te Atua rinanoia anera.​​—Wareka Karikani Bwaai 19:​1, 13-​17, 26.

N aron ae taekinaki n te Baibara, a buokaki aomata ni boong aikai irouia anera n aroia ni kaira aia mwakuri te koraki aika kakaonimaki, n tataekina te rongorongo ae raoiroi ae taekan Ana Tautaeka n Uea te Atua. (Mataio 24:14) E irianaki te rongorongo ae raoiroi aei n te kauring. Bon tiaki te manikangare te kauring are e anganaki Rota. E roko mairoun te Atua rinanoia ana anera.​​—Wareka Te Kaotioti 1:1; 14:​6, 7. 

E kona ni kabonganaia anera te Atua bwa a na kakorakoraira ngkana ti kaaitara ma kataaki. E kabongana naba te anera bwa a na kakorakoraa Iesu.​​—Wareka Ruka 22:​41-​43.

E na kabonganaia anera te Atua n te anga riki teuana n te tai ae waekoa, ni kamaunaia aomata aika buakaka ake a karika te rawawata. A na kukurei iai botannaomata ao ni kabebeteaki.​​—Wareka 2 I-Tetaronike 1:​6-8.

3. Tera aron rotakira irouia taimonio?

A bati anera i karawa ake a karitei nakon te Atua n aroia naba aomata aika bati i aon te aba, ake a aki ongeaba nakon te Atua ni karaoani mwakuri aika bubuaka. (2 Betero 2:4) A aranaki anera aika aki ongeaba bwa taimonio. Ma karoton te aki ongeaba bon Tatan te Riaboro. A burebureia botannaomata Tatan ma ana taimonio.​​—Wareka Te Kaotioti 12:9.

E kabonganai waaki ni bitineti aika babakanikawai Tatan, tautaeka n aomata, ao Aaro aika kewe ni kairaraangia aomata ao ni katannakoia mairoun te Atua. Ngaia are bon Tatan ae karika te ribuaka, te iowawa, ao ai te rawawata are a rotaki iai botannaomata.​​—Wareka 1 Ioane 5:​19.

4. Tera aroia taimonio ni mwamwanaia aomata?

E a tia Tatan ni mwamwanaia aomata aika bati n te reirei, are a riki maate bwa taamnei ao a kona n reitaki ma aomata. Ma e taekinaki n te Baibara bwa akea te bwai ae a kona ni karaoia maate. (Te Minita 9:5) Ma a aki toki ni burebureia aomata taimonio, n aroia ni katotongi bwanaaia ake a tangiraki iroura ake a a tia ni mate. (Itaia 8:​19) A burebureia naba tabemwaang rinanoni mwakuri n tabunea, naake a atai kanoan taai aika na roko, taani kaiwa ao ai taani kateimaro. Ti kauringaki n Ana Taeka te Atua bwa ti na rarawa nakoni mwakuri akanne ni kabane. Ngaia are ti riai ni kanakoi ara bwai aika irekereke ma taimonio ao mwakuri n tabunea.​​—Wareka Te Tua-Kaua 18:​10, 11; Mwakuri 19:19.

Ti aki riai ni maakuia taimonio ngkana ti tangira Iehova. Ngkana ti reiakina Ana Taeka te Atua ao ni maiuakinna, ti a kaitaraa iai te Riaboro ao ni kaaniaki ma te Atua. E rangi ni mwaaka riki Iehova nakoia taimonio. A kona ana anera aika kakaonimaki ni kakorakoraira n taai ake ti kainnanoa buokara iai.​​—Wareka Taian Areru 34:7; Iakobo 4:​7, 8.

Ibukin rongorongona riki nora mwakoro 10 n te boki aei Tera Ana Reirei ni Koaua te Baibara?, ae boreetiaki irouia Ana Tia Kakoaua Iehova.