Kakai aika A Nang Riki
NGKANA arona bwa e baireaki te taokita ae te tia korokoro bwa e na karaoa te korokoro ae kangaanga i aom, tera am namakin ngkana ko a ataia ae e tuai ni karaoa te aeka ni korokoro anne? Ni koauana ko na bon rangi n tabeaianga iai. Ma n te itera are teuana, tera am namakin ngkana ko a kunea bwa te taokita anne bon te mataniwi n te aeka ni korokoro anne, are e a tia naba ni karaoi korokoro aika bubua ma bubua mwaitiia aika nakoraoi ae titeboo ma are e na karaoia nakoim? Tiaki bwa ko na rangi n onimakinna bwa e boni kona ni buokiko?
E kainnanoaki naba te “korokoro” ae bubura nakon te aonnaba ae aoraki ae ti mena iai ngkai. E a tia Iehova ae te Atua ni beritanna n ana Taeka ae te Baibara, bwa e na kaoka te Bwaretaiti nakon te aonnaba aei . (2 Betero 3:13) Ma ni karaoan anne, e riai ni kamaunaaki moa te buakaka n te aro are ai bon akea. (Taian Areru 37:9-11; Taeka N Rabakau 2:21, 22) Imwaini kaokan te bwaretaiti, a riai ni kamaunaaki moa baika a karawawataira ni kabane aika ti nori aika a otabwaninira. Ai bon te mwakuri ni kakai ngkana e riki anne!—Te Kaotioti 21:4, 5.
A kakoauaa Ana Tia Kakoaua Iehova bwa a na waekoa n riki bitaki aika korakora. Bukin tera? Ibukina bwa kakai ake e a kamani karaoi Iehova ae te Atua, boni kakoauaan ae iai mwaakana ni kakoroi bukin ana berita. Kabotaui kakai aika onoua moa ma berita ibukin taai aika imwaira ake a koreaki n te Baibara.
Ko bia teimatoa n reiakini berita ake n te Baibara ibukin taai aika imwaira. Ngkana e rikirake am onimaki, e rikirake naba am kantaninga ae te maiu n te tai are ko nang kakabwaiaaki iai ni kakai ake e na karaoi Iehova.
[Bwaoki/Taamnei n iteraniba 7]
TE KAKAI:
E KAAMWARAKEIA AOMATA AIKA NGA MA NGA IESU N TATABEUA TE KARIKI AO IIKA.—MATAIO 14:13-21; MAREKO 8:1-9; IOANE 6:1-14.
TE BERITA:
“E kariki uaana aontano: E na kakabaiaira te Atua, ae bon Atuara.”—TAIAN ARERU 67:6, BG.
NANONA NAKOIRA:
AKEA AE E NA MANGA ROTAKIBUAKA N TE BAKI.
TE KAKAI:
E KANORAABAIA AKANA MATAKI IESU.—MATAIO 9:27-31; MAREKO 8:22-26.
TE BERITA:
“A na kaureaki iai mataia akana mataki.”—ITAIA 35:5, BG.
NANONA NAKOIRA:
A NA BANE N NORAABA AOMATA AIKA MATAKI.
TE KAKAI:
E KANAKONAKOIA MWAUKU IESU.—MATAIO 11:5, 6; IOANE 5:3-9.
TE BERITA:
“E na ewewe iai te mauku n ai aron te ria.”—ITAIA 35:6, BG.
NANONA NAKOIRA:
E NA AKI MANGA TOABUAKA BWAIN TE RABWATA NI KABANE.
TE KAKAI:
E KATOKI AORAKI AIKA KAKAOKORO IESU.—MAREKO 1:32-34; RUKA 4:40.
TE BERITA:
“Ane maeka iai e na aki kangai, I aoraki.” —ITAIA 33:24, BG.
NANONA NAKOIRA:
A NA KAMAUNAAKI AORAKIN TE RABWATA AIKA A KAKAIAKI NI KABANE. TI NANG KAREKEA TE MARURUNG AE KORORAOI.
TE KAKAI:
E TAUI TAEKANI BWAAI NAKO IESU.—MATAIO 8:23-27; RUKA 8:22-25.
TE BERITA:
“A na katei auti, ao a na maeka i nanoia; ao a na uniki kurebe, ao a na kang uaaia. A na aki matebuaka aia makuri.”—ITAIA 65:21, 23, BG.
“Ko na raroa man te karawawataki, ba ko na aki maku; ao man te kuba, ba e na aki kaaniko.”—ITAIA 54:14, BG.
NANONA NAKOIRA:
A NANG AKEA KABUANIBWAI AIKA KARINA.
TE KAKAI:
E KAUTIIA MAATE IESU.—MATAIO 9:18-26; RUKA 7:11-17.
TE BERITA:
‘A na bane n otinako aomata ake a mena i nanon taian ruanimate.’ —IOANE 5:28, 29.
“E anga maate ake i nanona, ao te mate ma Eriti, a anga maate ake i nanoia.”—TE KAOTIOTI 20:13.
NANONA NAKOIRA:
A NA KAUTAKI ARA KORAKI AIKA TANGIRAKI AKE A A TIA NI MATE.