E Kona ni Bwainaki te Kakaonimaki n te Aonnaba ae a Babakanikawai Kaaina?
“Ti kani bwaina te kakaonimaki ni bwaai ni kabane.”—I-EBERA 13:18.
E NGAE ngke taani bure ngaira, ti maeka i buakon te kariri n te aonnaba ao e kakorakoraa te Riaboro ni karirira, ma ti boni kona n rarawa nakoni kariri akanne. N te aro raa? Rinanoni kaaniara ma te Atua ao maiuakinani booto n reirei aika rangi ni bongata man ana Taeka ae te Baibara. Iangoi katoto aika uoua aikai.
TE BOTO N REIREI MAN TE BAIBARA: “Tai katotonga aron aon te aba.”—I-Rom 12:2, Te Baibara.
Te rongorongo ae koaua: Boni kaaini Brazil Guilherme ae te tia bitineti ae rangi ni mwaatai. E kakoauaa teuaei bwa e kangaanga bwainan te kakaonimaki. E taku: “E kona ni kai iraraang te tia bitineti bwa e na aki kakaonimaki ni moanakin ana bitineti, tao ibukin te kariri ni kaineti ma uaiakinan tiia ibukin te kambwana ke teimatoana ni waakinako n te aonnaba ae a kaiangatoa kaaina. A bati aomata aika a iangoa te kamaraato bwa bon te waaki ae riai. Ngkana ko a tibwa moana am bitineti ma iai am kangaanga ma te mwane, ao e rangi ni bati uotam iai, e na bae ni kangaanga ngkanne iroum bwainan te kakaonimaki.”
E ngae n anne, e tokanikai Guilherme n rarawa nakon te kariri ae bwainan te aki kakaonimaki. E taku: “E boni kona naba ni bwainaki te kakaonimaki n taabo ake e kariaiakaki iai uruakan tuua irouia taani bitineti. E kakawaki bwa ko na bwaini aroaro ni maiu aika riai. I a tia ni buokaki man te Baibara bwa N na kakabwaiaaki ni bwainan te kakaonimaki. Bon iai iroun te aomata ae kakaonimaki mataniwin nanona ae itiaki, te raunnano ao te karinerine. E kona n riki bwa te katoto ae raoiroi nakoia aomata ake irarikina.”
TE BOTO N REIREI MAN TE BAIBARA: “Akana kani bwaibwai a bwaka n te kaririaki ma te ao-ni-katatai ma taiani kaibabaru aika bati aika nanobaba aika kamaraki, aika kaiinakoia aomata n te tiringaki ma te kamateaki. Ba wakaani baika bubuaka ni kabane tangiran te mane.”—1 Timoteo 6:9, 10, Te Baibara.
Te rongorongo ae koaua: Bon te tia bwaibwai André n te kambwana are e kakanimi baika a kona ni kaotaki iai mwakuri n akiako. Te tabo teuana naba are e buokia bon te kirabu ni butibooro ae bubura. N te taina imwin te butibooro, e a kawara te aobiti are babairea te waaki, bwa e na nikira te invoice ae te beeba ibukini kabwakaani booni mwakuri ake e a tia ni karaoi. A rangi n tabetabe kaain te aobiti are e tabe ma te mwane ni wareki mwaane ake a a tibwa roko man aobiti ake a tabe ma tiiketi. E a boni bwakanako te tai, ngaia are e a katawe te mataniwi ni kabwakai aia mwane kambwana ake e reitaki ma ngaai, n ikotaki naba ma André.
E reitia André ni kangai: “I aoni kawaiu n okira mwengau ao I a noria bwa e a raka au mwane are e anganai te mataniwi. I ataia ae e na bon aki roko n te ataia bwa antai are e raka ana mwane. Ao I ataia naba bwa e na boni kabooa mwin te mwane are bua te mwaane aei. Ngaia are I a iangoia bwa N na okirikaki. I kataia n ribuakoia aomata aika mwaitikurikuri ake a mamate nanoia n te butibooro ao n nikira te raka ni mwane. E rangi ni kubanako iai te mataniwi bwa bon akea temanna ae e a tia n ninikira te mwane nakoina.”
E reitia riki ni kangai André: “E kairaki te mataniwi bwa e na onimakinai man au kakaonimaki anne. Imwin ririki aika bati, bon tii ngai mai buakoia kambwana ake e boraraoi ma ngaiia rimoa ae I teimatoa ni boraraoi ma ngaia. I rangi ni kakaitau ni maiuakinani booto n reirei ibukin aroaro ni maiu aika tamaroa man te Baibara, bwa e karekea taekau ae raoiroi.”
E rangi ni kaunganano ataakin ae ti boni kona n rarawa ni kaririaki n te babakanikawai, n ana ibuobuoki te Atua. E ngae n anne, e bon aki kona ni katoka te babakanikawai ni kabane ara kakorakora n tatabemanira nako. E kangaanga katokani baika a karika te babakanikawai bwa bon akea aomata aika aki kororaoi aika a kona ni karaoia i bon irouia. E nanonaki n anne ngkanne bwa e na aki kona n toki te babakanikawai? E na katuruturuaki kaekaana ae kaunganano man te Baibara, n te kabanea ni kaongora.