Titiraki Aika Kaekaaki Man Te Baibara

Bukin tera bwa e rangi ni kangaanga reken te Rau n te aonnaba?

A katuruturuaki bukina aika uoua n te Baibara. Te moan, e ngae ngke a a tia aomata ni kakororaoi baika kamimi, ma a aki karikaki ma te konabwai ni kaeti eueutakini waeia. Te kauoua, a aki kokoro bukin aia babaire aomata ibukina bwa “a bane kaain te aonnaba ni mena i aani mwaakan teuare buakaka” ae Tatan te Riaboro. Ibukin anne, e tuai man reke te rau n te aonnaba man aia kakorakora aomata.​—Wareka Ieremia 10:23; 1 Ioane 5:19.

E rangi ni kangaanga naba reken te rau n te aonnaba ibukina bwa a kani karaoa riki oin nanoia aomata ao a kani kakannato. Bon tii te tautaeka n te aonnaba ae kona n reireinia aomata tangiran te eti ao n tabeakinia i marenaia, ae e na karekea te rau n te aonnaba.​—Wareka Itaia 32:17; 48:​18, 22.

Antai ae na karekea te rau n te aonnaba?

E a tia ni berita te Atua ae Moan te Mwaaka bwa e na katea te tautaeka ae tii teuana ae na tautaeka i aoia botannaomata ni kabane. E na bon onei mwin aia tautaeka aomata. (Taniera 2:44) E na tautaeka Natin te Atua ae Iesu bwa te Uea n Raoi. E na kamauna te buakaka mai aon te aba ni kabutaa ao e na reireinia aomata te aro ae a na rau iai.​—Wareka Itaia 9:​6, 7; 11:​4, 9. 

A a kamani kamanena Ana Taeka te Atua ae te Baibara mirion ma mirion aomata ni katobibia te aonnaba aika mena i aan ana kairiri Iesu, n reireinia iai aroia ni karekea te rau i marenaia n tatabemania nako. E na waekoa n noraki te rau n te aonnaba.​—Wareka Itaia 2:​3, 4; 54:13.