Iangoia Bwa Tera Arom Ae Riai
‘Aromi ae riai ngkai kam a riki bwa aomata aika itiaki n aroaroni maiumi ao ni karaoani mwakuri ibukin tangiran te Atua!’ —2 BETERO 3:11.
1, 2. ‘Tera arora ae riai’ bwa ti aonga n akoaki iroun te Atua?
TI BON raraoma bwa tera aia iango aomata ibukira. Ti riai ni mutiakina riki ana iango Iehova ibukira ngkai Kristian ngaira? Ni koauana, boni ngaia Teuare te kabanea ni kakannato n te iuniweeti ao iai irouna ‘koburaken te maiu.’—Taian Areru 36:9, BG.
2 Ibukini kamatataan ‘arora ae riai’ man ana taratara Iehova, e kaumakira te abotoro Betero bwa ti riai n ‘itiaki n aroaroni maiura ao ni karaoi mwakuri ibukin tangiran te Atua.’ (Wareka 2 Betero 3:11.) Ngkana ti kan akoaki iroun te Atua, a riai n tabu “aroaroni maiura” ae nanona bwa a na itiaki aroarora, ara iango ao taromauriana. Irarikin anne, ti riai ni karaoi “mwakuri ibukin tangiran te Atua” ma te karinerine ao ni kakaonimaki ni koaua nakoina. Ngkana ti ukera akoara mairouna, e a irekereke ngkanne anne ma aroaroni maiura ao nanora naba. Kioina ngkai Iehova bon te tia ‘tirotiroi naano,’ e bon ataia bwa tao a itiaki aroaroni maiura ke a aki ao ti kabanei nanora n tangiria ke ti aki.—1 Rongorongo 29:17, BK.
3. Baikara titiraki aika ti riai n iaiangoi ni kaineti ma ara iraorao ma te Atua?
3 E aki tangirira Tatan te Riaboro bwa ti na ukera akoara mairoun te Atua. Ni koauana, e karaoa ana kabanea ni kona bwa ti aonga ni katoka ara iraorao ma Iehova. Bon akea tabwarana ni kamanenai reirei aika kewe ni mwamwanaira iai ao ni katikiiranako mairoun te Atua ae ti taromauria. (Ioane 8:44; 2 I-Korinto 11:13-15) Mangaia are ti wanawana ngkana ti titirakinira ni kangai: ‘Tera aron Tatan ni mwamwanaia aomata? Tera ae I kona ni karaoia ibukini kamanoan au iraorao ma Iehova?’
TERA ARON TATAN NI MWAMWANAIIA AOMATA?
4. Tera ae kainetia riki Tatan ngkai e kakorakoraa n urua ara iraorao ma te Atua, ao bukin tera?
4 E korea ae kangai te tia rimwini Kristo ae Iakobo: “A kataaki aomata n tatabemania nako ngkana a katikakinako n oin aia kaibwabwaru ao ni mwamwanaaki iai. Ao ngkana e bikoukou te kaibwabwaru ao e bungia te bure, ao ngkana e a tia ni karaoaki te bure ao e karekea te mate.” (Iakobo 1:14, 15) Ibukin ana kakorakora Tatan n urua ara iraorao ma te Atua, e a kaineti riki nibwani baika ti tangiri, ae bon nanora.
5, 6. (a) N te aro raa are e a kainetira riki iai Tatan? (b) Baikara abean Tatan ake e kakorakoraa ni kamanena ni bureburei nanora ni baika ti tangiri, ao tera aroni mwaataina ni kamanenai?
5 N te aro raa are e kaineti riki iai nanora Tatan? E taekinaki ae kangai n te Baibara: “A bane kaain te aonnaba ni mena i aani mwaakan teuare buakaka.” (1 Ioane 5:19) A irekereke ana bwai ni buaka Tatan ma ‘ana waaki nako te aonnaba.’ (Wareka 1 Ioane 2:15, 16.) Inanon nga ma nga te ririki, e a tia Tatan ni karaua raoi ni bitii baika a otabwaninira. Kioina ngkai ti maeka n te aonnaba aei, ti riai ni kawakinira man ana kunemwaan aika aki teretere raoi nakoira.—Ioane 17:15.
6 E kabonganai aanga ibukini burebureara ni baike e tangiri te nano. A kaotaraeaki iroun te abotoro loane abean Tatan aika tenua ake e kakamanenai: (1) “ana kaibwabwaru te rabwata,” (2) “baika tangiri maata,” ao (3) “te kainikatonga ni kaubwain te maiu aei.” E kamanenai naba baikai Tatan ngke e kariria Iesu n te rereua. Ibukina bwa e a tia ni kakamanenai aeka ni bwai ni kamwane akanne Tatan i nanon ririki aika bati, e a rangi ni kokona ngkanne ni kamanenaaia ni boong aikai, ao e bibitii ana aanga ni kaineti ma baika a tangiri aomata n tatabemania nako. Imwain rinanoakin aanga ake ti kona ni kamanenai ibukini kamanoara n aei, ti na nora aron te Riaboro ngke e tokanikai ni kamanena abeana tabeua nakon Ewa, ma e ngae n anne e aki tokanikai i aon Natin te Atua.
“ANA KAIBWABWARU TE RABWATA”
7. E kanga Tatan ni kamanena “ana kaibwabwaru te rabwata” ni kariria iai Ewa?
7 Iai kaetieti aika kakawaki nakoia aomata ibukini kateimatoaani marurungin rabwataia, ae boni kainnanoan te amwarake. E karaoa te aonnaba te tia Karikiriki bwa a na rangi ni bati iai amwarake. E kona ni kataia Tatan ni kamanena rikiara ae tangiran te amwarake n te aro are e a katannakoira iai mani karaoan nanon te Atua. Iangoa arona ni karaoa anne nakon Ewa. (Wareka Karikani Bwaai 3:1-6, BG.) E tuangaki Ewa iroun Tatan bwa e kona ni kana uaan “te kai n ata te raoiroi ma te buakaka” ao e na aki mate bwa n te bong are e kanna iai, e na riki bwa kaanga te Atua. (Karikani Bwaai 2:9, BG) Ni karaoan anne, e a wiwina Ewa te Riaboro bwa e aki kainnanoa te ongeaba iroun te Atua bwa e aonga ni maiu. Bon te kewe ae rangi n riao anne! N te tai are e a rin iai te iango aei iroun Ewa, e a kona n rinea ana motinnano mai buakoni baika uoua: E kona n rawa nakon te iango aei, ke e kona n teimatoa n iaiangoia n te aro are e a kariaia iai rikirakeni kani kanakin uaan te kai arei. E ngae ngke e ataia ae e inaomata ni kang uaani kaai ni kabane ake irarikin te kai aei, ma e motinnanoia neiei bwa e na iaiangoa ana taeka Tatan ni kaineti ma te kai are i nukan te onnaroka ao e a “kinika uaana, ao e kanna.” Ibukin anne, e a karikirakeaki iroun Tatan tangiran te bwai are e katabua te tia Karikiriki i nanon neiei.
8. E kanga Tatan ni kataia ni mwamwanaa Iesu ni kamanenaan “ana kaibwabwaru te rabwata,” ao bukin tera bwa e aki tokanikai iai?
8 E kamanena naba te bwai ni kamwane anne Tatan ngke e kataia ni kariria Iesu n te rereua. Imwin ana aki mamatam Iesu i nanon 40 te ngaina ao 40 te bong, e a kataia ni kariria Tatan n tangiran te amwarake ni kangai: “Ngkana ngkoe temanna natin te Atua, ao tuanga te atibu aei bwa e na riki bwa te amwarake.” (Ruka 4:1-3) E kona n rinea ana motinnano Iesu mani baika uoua aikai: E kona n rineia bwa e na aki kamanena mwaakana n te kakai ibukini katokani bakina, ke e kona n rineia bwa e na kamanena. E bon ataia Iesu bwa e aki riai ni kamanena te aeka ni mwaaka anne tii ibukina. E ngae ngke e baki, ma e boni kakawaki riki irouna kateimatoaan ana iraorao ma Iehova nakoni katokani bakina. E kaeka Iesu ni kangai: “E koreaki ae kangai, ‘E aki riai ni maiu te aomata n tii te amwarake, ma e na maiu naba n taeka nako aika otinako mai win Iehova.’ ”—Mataio 4:4.
“BAIKA TANGIRI MAATA”
9. Tera nanon te taeka ae “baika tangiri maata,” ao tera aron Tatan ni kamanena te bwai ni kamwane aei nakon Ewa?
9 E taekini naba “baika tangiri maata” Ioane bwa te abea. E nanonaki n taeka akanne bwa e kona temanna ni moana tangiran te bwai teuana tii man taraakina. N rongorongon Ewa, e burebureia nakon tangiran te bwai aei Tatan ngke e kangai nakoina: ‘A na kaureaki matam.’ Ngke e kabatiaa tarataraan uaan te kai ae tabuaki anne Ewa, e a kakorakoraa riki iai kani kanakina. E noria bwa “e kan tarataraki ni maata” te kai anne.
10. E kanga Tatan ni kamanenai “baika tangiraki ni maata” ni kairiria iai Iesu, ao tera ana kaeka Iesu?
10 Tera ae riki ni karirian Iesu? “E kaotii [Tatan] nakoina tautaekan nako te aonnaba ni kabutaa i nanon tii teuana te tekan, ao e taku nakon Iesu: ‘N na anganiko te mwiokoaki i aoni baikai ni kabane ma tamaroaia.’ ” (Ruka 4:5, 6) E na aki tarai taian tautaeka ni kabane Iesu n tii teuana te tekan, ma e bae n tia n namakinna Tatan bwa e na anaaki nanon Iesu n tamaroan tautaeka aikai n aron ae kaotaki n te miitara. E taku Tatan are bon akea kubana: “Ngkana ko bon taromauriai naba tii teuana te tai, ao ai bon am bwai naba baikai ni kabane.” (Ruka 4:7) Bon akea nanon Iesu ni kan riki bwa te aeka n aomata are e tangiria Tatan. Ngaia are e a waekoa naba ni kaekaa. E taku: “E koreaki ae kangai, ‘Ko riai n taromauria Iehova ae Atuam, ao ko riai n toro irouna n tii ngaia.’ ”—Ruka 4:8.
“TE KAINIKATONGA NI KAUBWAIN TE MAIU AEI”
11. E kanga Tatan ni bureburea Ewa?
11 Ni mwaneweani bwain te aonnaba iroun Ioane, e a taekina iai “te kainikatonga ni kaubwain te maiu aei.” Ngkai bon tii kaain te aonnaba Atam ma Ewa, ni koauana akea aomata ake a kona ni kaotiota te ‘kainikatonga ni kaubwaia n te maiu aei’ i mataia. Ma a boni kaotiota te kainikatonga. Ngke e kaririaki Ewa iroun Tatan, e wiwinna bwa e taua te bwai teuana ae tamaroa mairouna te Atua. E tuangnga te Riaboro bwa n te bong are e kana iai uaan “te kai n ata te raoiroi ma te buakaka,” e na boni ‘kaureaki matana, ao e na riki ba kaanga te Atua n ata te raoiroi ma te buakaka.” (Karikani Bwaai 2:17; 3:5, BG) Ibukin anne, e a tuangaki Ewa iroun Tatan bwa e boni kona ni karekea inaomatana mairoun Iehova. E noraki bwa bon te kainikatonga are e kairia bwa e na iraraang n te kewe. E kana te uaanikai are e tabuaki ao e kakoauaa are aongkoa e na aki mate. Ai boni kairuara ana iango!
12. Tera te anga riki teuana are e kataia Tatan ni kariria iai Iesu, ao tera ana kaeka Iesu?
12 Ai bon raoiroira ana katoto Iesu ni kaineti ma te nanorinano ao boni kaitaraana are e karaoia Ewa! E kataia Tatan ni kariria Iesu n te anga riki teuana, ma e bon rawa ni karaoa te bwai teuana ae e anai nanoia aomata ae kataaki iai te Atua. Ai boni kaotiotan te aroaro ae te kainikatonga anne! Ma e rangi ni mataata ao ni kaineti raoi nakoina ana kaeka Iesu: “E taekinaki ae kangai, ‘Ko na tai kataa Iehova ae Atuam.’ ”—Wareka Ruka 4:9-12.
TI NA KANGA NI KAMANOA ARA IRAORAO MA IEHOVA?
13, 14. Kabwarabwaraa aron Tatan ni kamanenai abea tabeua ni boong aikai.
13 E kamanenai ni boong aikai Tatan abea aika tii te arona ma ake e kamanenai nakon Ewa ao Iesu. N ana kariri te Riaboro nakon “ana kaibwabwaru te rabwata,” e kamanena ana waaki ae buakaka ae ngkai ni karikirakea iai te aroaro ni maiu ae kammaira ao tangiran te amwarake ma te moi ae rangi n riao. E kona ni kariria te aomata ae mataku ao n aki taratara raoi nakoni “baika tangiraki ni maata,” rinanon te bwaitingako ai moarara riki n te Internet. Ao ai korakorara te kariri man tangiran te mataai ni kanibwaibwai, te mwaaka, ao te kani kakannato ae tauia aomata aika kamoamoa ao naake a tangira te “kainikatonga ni kaubwain te maiu aei”!
14 Titeboo ‘ana waaki nako te aonnaba’ ma abean te tia akawa. A anainano ma iai te matau i nanoia. E kamanenai Tatan baika a kona n iangoia aomata bwa boni baika kainnanoaki ni katoabong bwa a na kani karaoa ae bobuaka ma ana tua te Atua. A karaoaki kariri aika aki rangi n teretere raoi nakoira bwa a na kairaraangira ni baika ti tangiri ao ni kabaarekai nanora iai. Boni bwaai ni kariri bwa ti aonga ni kakoauaa ae ti riai ni moanibwai baika ti kainnanoi ao kamwengaraoara n oneani mwini karaoan nanon te Atua. Ti na burebureaki n aeka n abea aikai?
15. Ti na kanga ni kakairi iroun Iesu n rarawa nakon ana kariri Tatan?
15 E ngae ngke e iraraang Ewa ni kaririana iroun Tatan, ma e bon tokanikai n rarawa Iesu. E kaeka n taai nako man te Baibara n atonga aei: “E koreaki ae kangai” ke “E taekinaki ae kangai.” Ngkana aomata ngaira aika ti reirei n te Baibara ma n taningamarau, ti na bon taneiai iai ao ni kona n uringi kiibu aika buokira ni kaetii ara iango n taai ake ti kaririaki iai. (Taian Areru 1:1, 2) Ngkana ti ururingi katoto man te Baibara ni kaineti ma aomata aika kakaonimaki ni koaua nakon te Atua, ti na buokaki iai ni kakairi irouia. (I-Rom 15:4) Ti na kawakinaki raoi ngkana ti karinea Iehova ma nanora ni koaua, ti tangiri baike e tangiri ao n ribai baike e ribai.—Taian Areru 97:10.
16, 17. Tera aroni mwaakan ‘wanawanara’ ni kaineti ma arora ae riai?
16 E kaungaira te abotoro Bauro bwa ti na kamanenai ‘wanawanara,’ bwa ti aonga n riki bwa aomata aika iango n aron Iehova ao tiaki n aron te aonnaba. (I-Rom 12:1, 2) E taekina ae kangai Bauro ni katuruturuan riaira ni kamatoaira ni baika ti kariaia bwa ti na iaiangoi: “Ti urui iango n rarabakau ma aaro ni kainikatonga nako ake a kauntabaa te atatai ibukin te Atua, ao ti kataenikai iango ni kabane bwa a na ongeaba iroun te Kristo.” (2 I-Korinto 10:5) Iai mwaakan ara iango ni kaineti ma arora ae riai, ngaia are ti riai n “teimatoa n iangoi” baika a kateimatoaira.—I-Biribi 4:8.
17 Ti aki kona ni kantaningaia bwa ti itiaki ngkana ti teimatoa ni kakarin i nanora iango aika aki riai ao tangirani baika bubuaka. Ti riai n tangira Iehova ma ‘nanora ae itiaki.’ (1 Timoteo 1:5) Ma e mwamwanaa te aba te nano ao ti kona naba n aki ataa korakoran rotakira n ‘ana waaki nako te aonnaba.’ (Ieremia 17:9) Ngaia are ti aki riai ngkanne n ‘teimatoa n tuoira bwa ti mena n te onimaki ke ti aki ao n teimatoa n tuoira bwa tera arora,’ rinanon tuoan raoi nanora bwa a na boraoi ma baike ti reiakin n te Baibara?—2 I-Korinto 13:5.
18, 19. E aera ngkai ti riai ni motinnanoia bwa ti na riki bwa te aeka n aomata are e tangiria Iehova?
18 Te bwai riki teuana ae buokira n rarawa nakon ‘ana waaki nako te aonnaba,’ bon teimatoara n ururingi ana taeka Ioane aika kairaki koreaia n te taamnei aikai: “A tabe ni maunanako kaain te aonnaba ma baike a tatangiri, ma e teimatoa n aki toki ane kakaraoa nanon te Atua.” (1 Ioane 2:17) E taraa ni koaua ao n teimatoa ana waaki Tatan. Ma e ngae n anne, e na bon roko n tokina n te bong teuana. Akea te bwai ae teimatoa ae kona n anganira Tatan n ana waaki ae ngkai. Ngkanne ti ururinga te koaua anne, ti na buokaki iai bwa ti na aki burebureaki n abean te Riaboro.
19 E kaumakira te abotoro Betero bwa ti na riki bwa aomata aika tangiraki iroun te Atua ngkai ti “kariariaa rokon ana bong Iehova ma n ururingnga, bwa e nangi waanako iai karawa ae ura, ao a nang ran bwaini karawa ma aonnaba, n te kabuebue ae korakora!” (2 Betero 3:12) E na rangi ni waekoa n roko te bong anne i aon te aba, ao e na urui ana waaki Tatan ni kabane Iehova. E na teimatoa Tatan ni kamanenai ‘ana waaki nako te aonnaba’ ni karirira iai mangkai ni karokoa te tai anne, n aron naba are e kariria iai Ewa ao Iesu. Ti riai n aki kakairi iroun Ewa ao n ukera raun nanora ni baika ti tangiri. Ni karaoan anne, titeboo iai ma ti kariaia Tatan bwa atuara. Ti riai ni kakairi iroun Iesu ao n rarawa nakon aeka n abea akanne, n aki ongea korakoran tangirana ke anaakin nanora iai n taraakia. Ti bia bane ni motinnanoia bwa ti na riki bwa te aeka n aomata are e tangiria Iehova.