Te Kewe ae Kairiri Nakon Iangoan te Atua Bwa E Ribuaka

TE BWAI AE A KAKAOAUAA AOMATA AIKA BATI

“A kanakoaki taamneia aomata aika kakaiaki aia bure nako moone n te tai are a mate iai, bwa a na kammarakaki ni katuuaaeaki ‘n te ai ae aki mamate.’ ” (Catechism of the Catholic Church) A taekinna mataniwi n Aaro tabeman bwa te nako moone bon te kaokoroaki ao te karaurenakoaki mairoun te Atua.

TE KOAUA MAN TE BAIBARA

“Te aomata ae e bure, boni ngaia ae e na mate.” (Etekiera 18:​4, BK) A “aki ata te bwai teuana akana mate.” (Te Minita 9:​5, BG) E na kanga ni maraki n te “ai ae aki mamate” te aomata ae mate ngkai e a aki namakinaaba ao e a tia n anaa boon ana bure are te mate?

E aki toki n rairaki n te Baibara n Ebera ao ni Kuriiti te taeka ae “moone” bwa ruanimateia aomata. N te katoto, ngke e rawawata Iobi n aorakina ae kammaraki ao e tataro ni kangai: “Ko bia karabaai i buakoia mate [ae “moone,” Douay-Rheims Version].” (Iobi 14:​13, Te Baibara ni Katorika) E boni kani motirawa Iobi ma tiaki n te tabo ae kammaraki ke ae e na riki n ianena iai ma te Atua ma bon te ruanimate.

BUKINI KAKAWAKINA

Ti aki kona n tangiraki iroun te Atua ngkana e ribuaka ma ti boni kararoaaki iai mairouna. E taku Rocío ae maeka i Mexico: “Ngke I uarereke, ao I reireinaki te koaua ibukin te ai ni moone. I rangi ni maaku ao I a aki kona n iangoa ae iai aroaron te Atua aika raraoi. I iangoia bwa e unun ao e ribuaka.”

E boni bitaki ana iango Rocio ibukin te Atua man taeka aika mataata n te Baibara ni kaineti ma Ana motikitaeka ao aroia maate. E taku neiei: “I namakina kainaomataau bwa titeboo ma e a tia n tabekaki mai aou rawawatau ae korakora. I a moanna ni kakoauaa ae e tangira ae moan te raoiroi ibukira te Atua ao e bon tangirira naba, ike I kona naba n tangiria. Bon titeboo ma te tama ae kairiria natina n taui baia ao e tangira ae moan te raoiroi ibukia.​—Itaia 41:13.

A bati aika kakorakoraia n taua te Aro ao ni kakaonimaki ibukini maakakin te ai ni moone, ma e aki tangiria te Atua bwa ti na toro irouna ibukina bwa ti maakua. Ma e taku Iesu: “Ko riai n tangira Iehova ae Atuam.” (Mareko 12:​29, 30) Irarikin anne, ngkana ti ataia bwa e aki karaoi mwakuri n ribuaka te Atua ni boong aikai, ti a kona n onimakina ana motikitaeka n taai aika imwaira. Ti kona n aki nanououa n taekina ae kangai n aron raoraon Iobi are Eriu: “E bon raroa mairoun te Atua karaoan te buakaka; ao mairoun Teuare Moan te Mwaka te bure.”​—Iobi 34:​10, BG.