Arora ni Kona ni Buokiia Tabemwaang ni Baika A Kainnanoi

“E KARINA n riki te mwakuri n tiritiri imwin te kauntaeka n te rinerine mairouia ake a konaaki, ike a a kairoroaki iai Ana Tia Kakoaua Iehova bwa a na birinako mani mwengaia n rawei maiuia. E a rikirake ni karako te amwarake ma te bwainnaoraki ao a a tiku baika rangi ni bobuaka. A aini bangke, ao ai akea kanoani mitiin ni mwane ke a aikoa mwakuri,” aikai ana taeka François ae te unimwaane n te ekaretia n te aba ae e a tibwa rikirake.

A waekoa taari man te aobiti n tararua ni kanakoa te mwane ao bwaai nakoia taani Kakoaua ake a kanakoaki mani mwengaia, ao n ikoikotaki n Taabo n Taromauri n te aba anne. A katei bwaai n tutuki i nanoni kawai taani kakaaitara ma ibukina bwa a ataia itera akana uoua akanne bwa a teimatoa n tei i nuka taani Kakoaua, a aikoa tabareaki kaa man te aobiti n tararua ni katoatai are a buti iai.

E taku François: “Ngke ti tabe ni buti nakon te Tabo n Taromauri, ao a a moanna naba ni katiia ara kaa taan kakatii. A bakarere nako i marenara kanoani katii akanne. Ngke ti nora te tautia temanna bwa e biri ni kainetira ma te katii i baina, ti a waekoa naba n raira bween te kaa n okirikaki ao ni kabanea butira nakon te aobiti n tararua. Ti rangi ni kakaitaua Iehova bwa ti boni maiu. N te bong are imwina, a a roko taari aika 130 mwaitiia n te tabo ni kamanomano ae te Tabo n Taromauri anne. A roko tabeman n te aobiti n tararua ike ti a buokiia iai ni baika a kainnanoi ibukini maiuia ao aia onimaki ni karokoa tokin te kabuanibwai anne.”

E taku François: “A roko reeta ni kakaitau n te aobiti n tararua mairouia taari man te aba anne. A a bon nora aroia tariia man taabo riki tabeua ni buokiia ao ni karikirakea onimakinan Iehova irouia.”

N taini kabuanibwai aika karina ao kabuanibwai mairouia aomata, ti aki tuangia taari aika kainnanoa buokaia bwa a na ‘kaabueia ao ni kanuaia.’ (Iakobo 2:15, 16) Ma n oneani mwin anne, ti ukeri aanga aika ti kona iai n angania baika a kainnanoi ibukini maiuia. N aron naba anne, imwin reken te kauring ibukin te rongo are e na roko n te moan tienture, “a baireia taan rimwin Iesu bwa a na kanakoa aia ibuobuoki n aron ae a kona n tatabemania nako, nakoia taari ake a maeka i Iutaia.”​—Mwakuri 11:28-30.

Ngkai ana toro Iehova ngaira, ti ingainga ni buokiia naba aomata nako aika a kainnanoa buokaia ibukini maiuia. Ma e ngae n anne, a boni kainnanoa naba te Atua aomata. (Mataio 5:3) Ibukini buokaia bwa a na ataa kainnanoan te Atua ao karaoani bwaai tabeua ibukini katokan nanoia iai, e tua Iesu nakoia taan rimwina bwa a na karekeia naba taan rimwina. (Mataio 28:19, 20) Ti kabanei ara tai aika bati, korakorara ao kaubwaira ibukini waakinakoan te tua aei. Kioina ngkai ngaira kaain te botaki aei, ti a kamanenai bwaintangira mwaane tabeua ni karekei iai baika kainnanoaki ibukini maiuia aomata. Ma a rangi ni kamanenaaki riki bwaintangira aikai ibukini karikirakeani baika irekereke ma te Tautaeka n Uea ao kabutanakoan te rongorongo ae raoiroi. Ibukin anne, ti a kaota iai tangiran te Atua ao aomata.​—Mataio 22:37-39.

A kona ni kakoauaa te koraki ake a boutokaa aia mwakuri Ana Tia Kakoaua Iehova ni katobibia te aonnaba, bwa e boni kamanenaaki aia bwaintangira n te aro ae riai ao ni moan te raoiroi. Ko kona n ibuobuoki ni kabebeteia taari aika kainnanoa buokaia? Iai nanom ni kani boutokaa te mwakuri ibukini karekeaia taan rimwini Kristo? Ngkana ngaia anne, “tai taua te bwai ae raoiroi mairouia akana e riai anganakiia, Ngkana e kona baim ni karaoia.”​—Taeka N Rabakau 3:27, BG.