Titiraki Aika Kaekaaki Man Te Baibara

E koaua bwa te Baibara bon Ana Taeka te Atua?

Ko kantaningaa Ana Taeka te Atua bwa e okoro ao bon anne ae noraki n te Baibara. E a tia ni boreetiaki katotona aika birion ma birion mwaitiia n taetae aika bubua ma bubua. Iai mwaakan te atatai ae n te Baibara ni bitii maiuia aomata bwa a na raoiroi riki.​—Wareka 1 I-Tetaronike 2:13; 2 Timoteo 3:16.

Ti ataia bwa te Baibara boni mairoun te Atua ibukina bwa a eti raoi taetae ni burabeti ake iai ibukin taai aika a na roko. Akea te aomata ae kona ni karaoa anne i bon irouna. N te katoto, iangoa te boki ae Itaia. E kuneaki katotona n te nangananga ae uakaan ma Taari ae Mate are e karaoaki i nanon tebubua tabun te ririki imwaini bungiakin Iesu. E taekinaki iai bwa e na aki maekanaki te kaawa ae Baburon. E moani koro bukin anne i nanon ririki aika bati imwin ana mwakuri ni minita Iesu i aon te aba.​—Wareka Itaia 13:19, 20; 2 Betero 1:20, 21.

E kanga ni koreaki te Baibara?

E koreaki te Baibara i nanon tao 1,600 te ririki. Iai taani korea te Baibara aika tao 40 mwaitiia ao a toua mwin te boto n iango ae tii teuana n akea kauntaban aia iango. E kanga ni kona n riki anne? E boni kaira koreana te Atua.​—Wareka 2 Tamuera 23:2.

N tabetai, e taetae te Atua nakoia taani korea te Baibara rinanoia anera, miitara ke taiani mii. N angiin te tai, e karina ana iango te Atua n aia iango ao e kariaia bwa a na rinei taeka ake a na kabonganai ibukin taekinan ana rongorongo.​—Wareka Te Kaotioti 1:1; 21:3-5.