Titiraki Aika Kaekaaki Man te Baibara
Ti na kanga ni kakabwaiaaki ni maten Iesu?
Ngke e karikia aomata te Atua ao e baireiia bwa a na maiu n aki toki i aon te aba n akea karawawataaia n te aoraki ke te mate. Ma e ngae n anne, e aki ongeaba iroun te tia Karikiriki te moan aomata are Atam ao e a kabuaa te kantaninga ibukin te maiu n aki toki. Kioina ngkai kanoan Atam ngaira, ti a ituaki n te mate mairouna. (I-Rom 5:8, 12; 6:23) E boni kanakoa Natina Iehova ae te Atua ae koaua bwa e na mate ma ni kabwakaa booni mwin te bwai are e kabuaa Atam.—Wareka Ioane 3:16.
E mate Iesu bwa e aonga n reke te maiu n aki toki irouia aomata. Ko na kanga ni kataamneia n am iango te maiu n aki toki i aon te aba?
A kabwaraaki ara bure ni maten Iesu ao ti a kona naba ni karekea te maiu n aki toki. E kateretereaki n te Baibara aron te maiu i aon te aba ngkana ti aikoa manga karawawataaki n te kara, te aoraki ao te mate.—Wareka Itaia 25:8; 33:24; Te Kaotioti 21:4, 5.
Tera arora ae riai ibukini kauringani maten Iesu?
E tuangia taan rimwina Iesu n te tairiki are imwaini matena bwa a na kakauringa matena rinanoni karaoan te botaki ae uarereke. Ngkana ti katoa ririki ni karaoa kauringani maten Iesu n aron anne, e a reke iai ara tai n iaiangoa korakoran tangiraia aomata iroun Iesu ma Iehova.—Wareka Ruka 22:19, 20; 1 Ioane 4:9, 10.
N te ririki aei, e bwakara raoi te Moanibong n Eberi 14 imwini bungin taai te tai are e na karaoaki iai Kauringani maten Iesu. Ko a kaoaki bwa ko na airi ma Ana Tia Kakoaua Iehova akana n am aono nakon te botaki aei.—Wareka I-Rom 1:11, 12.