Ko Uringnga?

Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

N ningai are e riai ni kamateaki iai te tiibutetei ni bongin te Toa ae te Riao n Nitian 14?

A taekinna taan rairai n te Baibara tabeman bwa e riai ni kamateaki “i marenan tairiki aika uoua,” ae nanonaki iai te airoo ke e tuai n rangi n roo ae imwini bungin taai ma bon imwain te rotongitong. (Te Otinako 12:6, BG)—12/15, iteraniba 18-19.

Baikara booto n reirei man te Baibara aika a kona ni kamanenai rooro n rikirake ibukini karaoan aia motinnano ma te wanawana?

Bon tenua bwa (1) Ukoukora moa Ana Tautaeka n Uea te Atua ma ana raoiroi. (Mataio 6:19-34) (2) Karekea kukureim n te beku ibukia aomata. (Mwakuri 20:35) (3) Kimwareirei n am beku ibukin Iehova n am bongi n ataei. (Te Minita 12:1)—1/15, iteraniba 19-20.

Tera aia waaki taan toka i aoia aoti aika aman ni moa man 1914?

E a tia Iesu are te tia toka i aon te aoti ae mainaina ni karenakoa Tatan ma ana taimonio mai karawa. A kaotaki taekani buaka ake a a tia ni karawawataia botannaomata iroun te tia toka i aon te aoti ae uraura. E tei te tia toka i aon te aoti ae roroo ibukin te rongo. E uota te mate te tia toka i aon te aoti ae maii man te aoraki ae kamamate are a a mate iai mirion ma mirion aomata. (Te Kaotioti 6:2-8)—2/1, iteraniba 6-7.

E na boo n ningai “ana tai ni mare te Tiibutetei”? (Te Kaotioti 19:7)

E na boo “ana tai ni mare te Tiibutetei” imwin tokanikain te Uea ae Iesu Kristo ae nanona bwa imwini kamaunaani Baburon ae Kakannato ao imwin naba te buaka are Aremaketon.—2/15, iteraniba 10.

Bukin tera bwa a “kariariaa” te Mesia I-Iutaia ake n ana bong Iesu? (Ruka 3:15)

Ti aki kona ni koaua raoi bwa a bon ota I-Iutaia ake n te moan tienture n ana taetae ni burabeti Taniera ibukin te Mesia n aron otara ngkai. (Taniera 9:24-27) Ma e ngae n anne, a bae n tia n ongo ana katanoata te anera nakoia tabeman taani kawakintiibu ke te bwai are e taekinna Ana are te burabeti n aine ngke e nora te teei are Iesu n te tembora. A ukoukora naba “teuare bungiaki ae aia uea I-Iutaia” taani kaiwani bwaini karawa. (Mataio 2:1, 2) Imwina riki, e a taekinna Ioane te tia Bwabetito bwa e na waekoa ni kaoti te Kristo.—2/15, iteraniba 26-27.

Ti na kanga n rarawa ni kariaia ara Eng bwa nanona Tiaki? (2 I-Korinto 1:18)

Ni koauana, e kona ni kangaanga iroura kakoroani bukin ara taeka n taai tabetai ngkana iai te bwai ae riki ae riaon ara kona. Ma ngkana ti karaoa ara berita ke te boraraoi, ti riai ni karaoa ara kabanea ni kona ni kakoroa nanona.—3/15, iteraniba 32.

Ti na kanga ni kona n rarawa nakon te kariri ae matakuakinan te bwaitingako?

Aikai mwaneka aika tenua aika rangi n ibuobuoki: (1) Ti riai ni kawaekoaira n tannako man taamnein te bwaitingako. (2)Ti riai ni kawakin ara iango rinanoni kaatuuan iangoani bwaai aika raraoi ao te tataro nakon te Atua. (3) Ti riai ni kawakin arora n nakonako rinanon te rarawa ni matakuakina te bwaitingako n taiani birim ke n te Internet.—4/1, iteraniba 10-12.

Baikara bwaai aika aki kantaningaaki rikia ngkana e katikuia imwina ana utu te Kristian ibukini karekean ana mwane n te aba teuana?

Ngkana a rineia kaaro bwa a na aki botaki ni maeka ma aia utu, e kona n rotakibuaka aia namakin ao aroaroia natiia. A kona ataei n ribaia aia karo. Ao a kona naba ikawai aika raroa nako ma buuia ni kaaitara ma kariri nakon te wene ni bure.—4/15, iteraniba 19-20.

E aera ngkai a oteaki waeia taani kamwarua ake a tiringaki i aon te kai?

A bon tiringaki taani kamwarua tabeman i aon te kai irouia kaain Rom. A tuatua I-Iutaia bwa a na oteaki waeia taani kamwarua ake a tine i rarikin Iesu. E na kangaanga iai ikeikeia naake a tine n te kai ao a a waekoa ni mate. Mangaia are a aikoa riai n tiku ni kangaina i aon te kai. (Te Tua-Kaua 21:22, 23)—5/1, iteraniba 11.

Baikara titiraki aika aua aika ti riai n ururingi ngkana ti maroro ma aomata n ara mwakuri ni minita?

Antai nakanne? N na maroro ma ngaiia ia? N ningai ae N na maroro iai ma ngaiia? Tera arou ae riai ngkana I maroro ma ngaiia?—5/15, iteraniba 12-15.

Tera aroni kamamaten te moko?

N te tienture ae nako ao a mate iai aomata aika 100,000,000 mwaitiia. N taai aikai, a a bua iai maiuia aomata aika 6,000,000 ni katoa ririki.—6/1, iteraniba 3.