TITIRAKI AIKA KAEKAAKI MAN TE BAIBARA
A bane ni karinea te Atua Aaro nako?
Ni kakauongom nakon rongorongon aonnaba, ko a bae n tia n ataia bwa n tabetai ao a karaoaki mwakuri aika bubuaka ibukin te Aro. A aki bane ni moan riki Aaro mairoun te Atua ae koaua. (Mataio 7:15) Ni koauana, a a tia ni mwamwanaaki aomata aika rangi ni bati.—Wareka 1 Ioane 5:19.
Ma e ngae n anne, ao te Atua e ukoukoriia aomata aika raoiroi nanoia ake a tangira te bwai ae raoiroi ao ni koaua. (Ioane 4:23) E tabe ni kaoia aeka n aomata akanne te Atua bwa a na reiakina te koaua man ana Taeka ae te Baibara.—Wareka 1 Timoteo 2:3-5.
Ko na kanga ni kinaa te Aro ae koaua?
A katiteuanaaki iroun Iehova ae te Atua aomata aika kakaokoro aia Aaro rinanon reiakinaia te koaua ao te itangitangiri i marenaia. (Mika 4:2, 3) Ai ngaia are ko kona ni kinaia kaain te Aro ae koaua man aroia n tabeakinia i marenaia.—Wareka Ioane 13:35.
E katiteuanaia aeka n aomata nako Iehova ae te Atua rinanon te taromauri ae koaua.—Taian Areru 133:1
A kabotoi aia onimaki ao aroaroni maiuia taan taromauri ni koaua i aon te Baibara. (2 Timoteo 3:16) A karinea naba aran te Atua. (Taian Areru 83:18) Ao a boutokaa Ana Tautaeka n Uea te Atua ngkai bon tii ngaia aan aia kantaninga botannaomata. (Taniera 2:44) A kakairi iroun Iesu n aroia ni kariaia ni ‘kaotiota aia oota’ ni karaoani baika raraoi nakoia raoia n aomata. (Mataio 5:16) Mangaia are a kona ni kinaaki Kristian ni koaua n aroia ni kawari mwengaia aomata ake i rarikia ibukin te kantaninga ae tibwaan te rongorongo ae raoiroi ni kaineti ma Ana Tautaeka n Uea te Atua.—Wareka Mataio 24:14; Mwakuri 5:42; 20:20.