Titiraki Aika Kaekaaki Man Te Baibara

A kona ni buokira anera?

E karikiia anera aika mirion ma mirion Iehova ae te Atua imwaini karikaia aomata. (Iobi 38:4, 7) Anera aikai bon taamnei aika mwaaka ao ni beku ibukin te Atua ao n tabetai a kanakoaki irouna bwa a na kaiririia ao ni kamanoia ana toro i aon te aba. (Taian Areru 91:10, 11) Ni boong aikai, a buokaki aomata n te rongorongo ae raoiroi are a tataekinna taan rimwin Iesu.—Wareka Te Kaotioti 14:6, 7.

Ti riai n tataro nakoia anera ibukini buokara? Ti bon aki. Te tataro bon te mwakuri ae reitaki ma taromaurian tii te Atua. (Te Kaotioti 19:10) Kioina ngkai anera bon ana toro te Atua, a ongeaba nakon ana kaetieti ao tiaki aomata. Mangaia are ti riai n tataro n taai nako tii nakon te Atua rinanon Iesu.—Wareka Taian Areru 103:20, 21; Mataio 26:53.

Iai anera aika buakaka?

Titeboo karikaia aomata ma anera ae iai inaomataia n rinea ae a kani karaoia ao a kona n rineia bwa a na karaoa ae eti ke ae kairua. Ma e kananokawaki bwa a karitei nakon te Atua anera aika bati. (2 Betero 2:4) Te moani mai buakoia naakai bon Tatan ao ake tabeman a kakairi irouna ao a a riki bwa taimonio. N taai aika tibwa nako, e boni karenakoaki Tatan ma ana taimonio mai karawa nako aon te aba.—Wareka Te Kaotioti 12:7-9.

E korakora rikiraken te buakaka ao mwakuri n tiritiri man 1914, ae boni kanikinaean are e na waekoa te Atua ni kamaunaia Tatan ma ana taimonio. E nang boni kaoka aron te aonnaba te Atua nakon arona ae raoiroi.—Wareka Te Kaotioti 12:12; 21:3, 4.