Tii te Bwai ae Tei Ibukin te Buakaka Tatan?

E bebete iroura kamatoaan taekinan ae Tatan are ti wareka taekana n te Baibara, e bon tii tei ibukini baika buakaka ni kabane. Ma e koaua bwa bon anne ae reiakinaki n te Baibara? Ngkana ngaia anne, ao bukin tera bwa e kabwarabwaraaki n te Baibara are e maroro Tatan ma Iesu Kristo n ikotaki naba ma te Atua ae Moan te Mwaaka? Iangoi taai aika uoua ibukin aeka ni maroro akanne.

ANA MARORO IESU MA TATAN

Ni moanakin ana mwakuri ni minita Iesu ao e kataia te Riaboro ni kamwanea ni kataakina aika tenua. Te moan, e kakorakoraa Tatan ni karawawataa Iesu bwa e aonga ni kamanena mwaakana are mairoun te Atua i bon ibukina ni katoka iai bakina. Imwin anne, e kataa Iesu te Riaboro bwa e na karuanikaia maiuna n aron te nanobaba bwa e na onimakinna i bon irouna. N te kabanea n tai, e a anganaki iroun Tatan te tautaeka i aoia tautaeka n te aonnaba ni kabane ngkana e bobaraaki n taromauria n tii teuana te tai. E rawa nakon ana kunemwaan n nanowanawana Tatan aika tenua aikai ao e a katoatai ni mwanewei kiibu man te Baibara.—Mataio 4:1-11; Ruka 4:1–13.

Antai are e taetae Iesu nakoina? Nakon te aroaro ae buakaka are i nanona? Ni kaineti ma ae taekinaki n te Baibara, “e a tia [Iesu] ni kataaki ni bwaai ni kabane n ai arora, ma e aki bure.” (Ebera 4:15) E taekinaki naba ae kangai n te Baibara: “E aki karaoa ae bure, ao akea te uarao i wina.” (1 Betero 2:22) E teimatoa ni kororaoi n arona ni maiuakina te eti. E tuai mani kariaia bwa e na rikirake i nanona te aroaro teuana ae buakaka. E teretere ngkanne bwa e aki taetae Iesu nakon te aroaro ae buakaka are i nanona, ma e bon taetae nakon te aomata ni koaua.

A kaotaki n te maroro naba anne bwaai ni kakoaua bwa Tatan bon te aomata ni koaua.

• Uringnga bwa e anganaki ngkoa Iesu iroun te Riaboro bwa e na tautaekana te aonnaba ngkana e bobaraaki n taromauria n tii teuana te tai. (Mataio 4:8, 9) E na bon akea nanon anganakin Iesu baikai ngke arona bwa tiaki te aomata ni koaua Tatan. Irarikin anne, ngke e taekinna Tatan bwa iai mwaakana ae korakora, e bon aki kakewea Iesu.

• Imwin rawan Iesu nakoni kataaki aikai, e a “kitanna [te Riaboro] n taningaa reken te tai ae angaraoi.” (Ruka 4:13) E koaua bwa e taraaki Tatan n te bwai ae riki aei bwa kaanga te aroaro ae buakaka ke iai rabwatana?

• Noria bwa ‘a roko anera, ao a moana tabeakinani kainnanon’ Iesu. (Mataio 4:11) E koaua bwa anera akanne bon taamnei aika iai rabwataia, ake a kaungaa ao ni buoka Iesu? E teretere raoi anne. Ma e aera ngkai ti riai n iangoa Tatan n te aro riki teuana ao tiaki te aomata ngaia ae te taamnei?

MARORON TATAN MA TE ATUA

Te kauoua n tai, e bon irekereke ma rongorongon te mwaane ae mamaaka te Atua are Iobi. A taekinaki n te rongorongo anne maroro aika uoua i marenan te Riaboro ao te Atua. N taai aika uoua aikai, e kamoamoaaki Iobi iroun te Atua ibukin etin arona. Ao Tatan e kamatoaa n taekinna bwa e beku Iobi iroun te Atua tii ibukini kakabwaiaana, ao e uaraoa te Atua bwa e kabooa mwin ana kakaonimaki ni koaua Iobi. Ni koauana, e taekinna te Riaboro bwa e kinaa riki Iobi nakon te Atua. E anga te kariaia Iehova nakon Tatan bwa e na anai ana bwai Iobi, natina ao marurungina naba.a Imwin te tai ae aki maan, e a otara bwa e bon eti ana taeka Iehova ibukin Iobi, ao e a kakoauaaki Tatan bwa te tia kewe. E boni kakabwaiaaki Iobi iroun te Atua ibukin etin aroarona.—Iobi 1:6-12; 2:1-7.

Ni maroro akanne, are i marenan te Atua ma Tatan, e koaua bwa e maroro Iehova ma te aroaro ae buakaka i nanona? E taekinaki ae kangai n te Baibara: “Moan te raoiroi ana aro Iehova.” (2 Tamuera 22:31, BG) E taekinaki naba ae kangai n Ana Taeka te Atua: “E tabu, e tabu, e tabu Iehova ae te Atua ae Moan te Mwaaka.” (Te Kaotioti 4:8) Nanon te taeka ae tabu bon itiaki, ae te kaokoroaki man te bure. E kororaoi Iehova ao akea ana bure. E bon aki kona n reke te aroaro ae buakaka irouna.

Ma bon iai naba tabeman ake tao a iangoia bwa Iobi bon tiaki te aomata ni koaua, ngaia are bon te kaikonaki ni kabane te maroro anne. Ma e koaua bwa e eti te iango anne? E kaotaki ni kibun te Baibara ake tabeua riki bwa Iobi bon te aomata ni koaua. N te katoto, ti noria n Iakobo 5:7-11 bwa e kamanenaaki rongorongon Iobi bwa te katoto ibukini kaungaaia Kristian, bwa a na nanomwaaka n taai aika kangaanga ao te kauring naba ae kabebetenano bwa e boni kakabwaiaa te aeka n nanomwaaka anne Iehova. Tera kakorakoraara ae e na reke n te katoto anne ngke arona bwa Iobi, bon tiaki te aomata ni koaua ao ana buaka Tatan, bon tii otokaraki? Irarikin anne, e karinaki aran Iobi n Etekiera 14:14, 20, i buakoia Noa ao Taniera aika mwaane ake a raoiroi aika teniman. N aron Noa ma Taniera, bon te aomata naba ni koaua Iobi are e korakora ana onimaki. Ngkana ngaia bwa bon te aomata ni koaua Iobi, tiaki ngkanne te aomata ni koaua naba te tia buakanna are nibwani bwainikirinana?

E teretere raoi bwa e taekinaki Tatan n te Baibara bwa bon te aomata ni koaua ae te taamnei. Ma e ngae n anne, ko bae n iango ni kangai: ‘E koaua bwa e karuanikaiai ma au utu ni boong aikai n te aonnaba aei?’

MA TERA ARORA N TAAI AIKAI?

Iangoia bwa aongkoa a karina n roko taani kamwarua aika rangi ni bati n am kaawa. E teretere raoi bwa e na kerikaaki te aroaro ae riai ibukini kamanoara i bon iroura ao kaain rarikira. Iangoa ngkai te bwai ae kona n riki ae titeboo ma anne: A na boni karina ni karaoi aia mwakuri tii i aon te aba Tatan ma ana taimonio, aika anera ni koaua ake a karitei nakon te Atua n aron Tatan. Tera mwina? Eng, iangoi baika ko nori n rongorongon am tabo ao ni katobibia te aonnaba.

• Ko nori rikirakeni mwakuri n nanobaba ao n iowawa n aki ongea te kakorakora ibukini katokaia ni katobibia te aonnaba?

• Ko nori rikirakeni bwaai ni kaakibotu aika a kaungaaki iai matakuakinaia taimonio, n aki ongei tabeaiangaia iai kaaro aika bati?

• Ko nora te otabwanin ae aki toki n uruaki n aki ongei karaoani mwakuri aika kakawaki ibukini kamanoana?

• E taraa n ae iai te bwai teuana ae rangi ni bure irouia botannaomata, bwa iai te mwaaka teuana ae taumatoaia nakon te kabuanibwai?

Taiaoka ma noria bwa antai ae taekinaki n te Baibara ae e karika te kangaanga n taai aikai: “E a tewenakoaki te rakon are korakora, are te naeta nikawai, are arana te Riaboro ao Tatan, are e burebureiia kaain te aonnaba ni kabutaa. E tewenakoaki nakon te aonnaba, ao a tewenakoaki naba ana anera ma ngaia. . . . E na reke kain aon te aba ma marawa, ibukina bwa e a tia n ruo te Riaboro nakoimi, ao e korakora unna ngkai e ataia bwa e a kimototo ana tai.” (Te Kaotioti 12:9, 12) Imwin iaiangoan te bwai ni kakoaua, a bati aomata aika a kamatoaa n taekinna bwa Tatan bon te aomata ae te taamnei ae kakorakoraa ni kariria kaain te aonnaba aika otabwaninira.

Ko bae n iangoa bwa ko na kangaa ni kamanoaki iai. Bon anne te tabeaianga ae kakawaki. E na reke te ibuobuoki ae manena n te kaongora are imwina.