Ti Riai ni Maaka Tatan?

Bon akea rabwatan Tatan n aron naba te kaeti ae te carbon monoxide, e rangi ni kangaanga norakina irouia aomata ao e rangi ni karuanikai. Ma e bon tuai ni kitanira te Atua n akea buokara. Ko bon riai n aki maaka Tatan ngkana ko kamanenai raoi bwaintituaraoi mairoun te Atua aikai.

Te mwaaka n rinerine. Ti tuangaki n Iakobo 4:7, (BG) ae kangai: “Rarawa nakon te Riaboro, ao ane e na birinako mairoumi.” E ngae ngke e korakora Tatan ma e aki kona ni kairoroko nakoni karaoani baika ko aki kani karaoi. Ko riai ni karaoa am motinnano. E taekinaki ae kangai n 1 Betero 5:9: “Kamatoaingkami ni kaitaraa te Riaboro, kaneneingkami n te onimaki.” Uringnga bwa e kitanaki Iesu iroun Tatan imwini kamatoaan nanona n rawa nakon ana kariri ake tenua. (Mataio 4:11) Ko kona naba n rinea ae ko na rarawa nakon ana mwakuri nako Tatan.

Te iraorao ma te Atua. Ti kaungaaki n Iakobo 4:8 bwa ti na “kaania te Atua.” E boni kaoira Iehova bwa ti na karikirakea te iraorao ae kaan ma ngaia. Ko na kangaa ni karaoa anne? Te anga ae te kabanea n tamaroa iai bon reiakinan ae bati riki ibukina man te Baibara. (Ioane 17:3) Ko kaungaaki bwa ko na tangira Iehova mani baika ko reiakin ibukina, ao e na kairiko te tangira anne bwa ko na karaoa nanona. (1 Ioane 5:3) E na tera aron Tamam are i karawa ngkana ko a kaaniko riki ma ngaia? E reitia ni kangai Iakobo: “Ane e na kaaningkami [te Atua].”

Te berita ibukin te kamanomano. Ti wareka ae kangai n Taeka N Rabakau 18:10, (BG): “Aran Iehova bon te taua ae korakora: E biri nako nanona te aomata ae raoiroi, ao e maiu.” Ni koauana, e aki nanonaki n anne bwa aran te Atua te ananga ni katekeraoi. Ma e nanonaki iai bwa a kona ni wetea aran te Atua naake a karinea arana ma nanoia ni koaua, ibukini kamanoaia n taai ni kabane ake a kainnanoia iai.

Te ibuobuoki ae manena. Ti tuangaki te bwai ae rangi n ibuobuoki ibukia naake a a tibwa riki bwa Kristian i Ebeto ni Mwakuri 19:19 ae kangai: “A mwaiti naba taan tabunea ake a ikotii aia boki ao a kabueki i mataia te koraki. Ao a warebwaia mwaitini booia ao a kunea bwa nimabwi tenga te mwakoro n tirewa.”a A bane ni kabueki baika irekereke ma te tabunea Kristian akanne, n aki ongea batin aia kabanemwane iai. Ti kona n rangi ni buokaki n te katoto anne ni boong aikai. E mamate riki nanoia kaain te aonnaba n te tabunea. Ti kona ni kaririaki irouia taimonio ngkana iai bwaai n tabunea ao ara mwakuri aika aongkoa a aki bure. E rangi ni kakawaki bwa ko na katinanikui baikanne ni kabane n aki ongei baika riki nakoira.—Te Tua-Kaua 18:10-12.

E aki kakoauaa Rogelio are e taekinaki ni moan te kaongora mai buakon aikai teuana imwin teuana, bwa iai te Riaboro n ana moan ririki ni maiu aika 50. Ma e a manga bon rinanon riki ana iango aikai. Bukin tera? E ururing rikaaki ao e taku: “N te moantai are e reke iai au Baibara ao I a kakoauaa imwin reiakinana bwa bon iai te Riaboro. I boni kamanoaki man au atatai anne, bwa N na aki mwane n ana kariri.”

Ko kan nora te bong are e nang akea iai Tatan? Ko boni kona. E a kaman taekinaki n te Baibara te tai are e na ‘tewenakoaki iai nako nanon te nama ae te ai’ te Riaboro are mwamwanaia aomata aika rangi ni bati. (Te Kaotioti 20:10) Ni koauana, e bon aki kona ni kammarakaki te taamnei ae aki kona n noraki rabwatana n te ai ni koaua. Ai ngaia are e riai n tei te nama ae te ai ibukin te kamaunanakoaki. E nangi maunanako Tatan n aki toki. Ai boni kakukureira te tai anne nakoia naake a tangira te Atua!

Mangkai ni karokoa te tai anne, teimatoa n reiakini bwaai ni kabane aika ko konai ibukin Iehova ma kawaina.b Iangoia bwa aongkoa ko maiu ni kabanean te tai are e na kakoauaaki raoi iai ae kangai: “Ai bon akea Tatan!”