TITIRAKI AIKA KAEKAAKI MAN TE BAIBARA

E boni kautiia aomata Iesu?

E taekinaki n te aro ae mataata n te Baibara bwa e boni kautiia aomata Iesu man te mate. Bon tiaki otokaraki rongorongo aikai bwa a karaoaki n taabo ao n taai aika a kakoauaaki raoi. N te katoto, n tain te kabuebue n 31 C.E, a mwananga te koraki ae uanao ma Iesu mai Kaberenaum nako Nain. N rokoia ikanne ao a kaitiboo ma te koraki riki aika uanao. Ko kona ni kakoauaa rongorongon te mangauti are riki imwina, ibukina bwa e koreaki n Ana Taeka te Atua ae te Baibara ao ibukina naba bwa e karaoia i mataia naake a noria ni kabane.​—Wareka Ruka 7:11-15.

E kauta naba raoraona Iesu are Rataro, are e a tia ni mate i nanon abong. Ko boni kona ni kakoauai baika a taekinaki n te bwai are e karaoia Iesu n te bong anne, ibukina bwa a mwaiti taani kakoaua aika a noria.​—Wareka Ioane 11:39-45.

Bukin tera bwa e kautiia aomata Iesu?

E kautiia aomata Iesu ibukina bwa e nanoangaiia. E karaoa naba anne bwa e aonga ni kaotaki iai bwa e a tia n anganaki te mwaaka i aon te mate iroun Tamana are te tia Karika te maiu.​—Wareka Ioane 5:21, 28, 29.

E kairira kautiuti ake e karaoi Iesu bwa ti na kakoauai raoi ana berita ibukin taai aika a na roko. E na boni kautiia aomata aika mwaitikurikuri, n ikotaki naba ma aomata aika aki raoiroi ake a aki ataa taekan te Atua ae koaua. A na bon anganaki aia tai bwa a na ataa ao n tangira Iehova ae te Atua.​—Wareka Mwakuri 24:15.