Ko Karaoa ae E Butiiko te Atua?

“N aki ongeia bwa tera ae ko tangiria, tii tuangai ao I kukurei ni karaoia.” Ko boni bae n tabwarabwara n taekina anne nakon te aomata ae ko aki kinaa ke ko a tia ni kaitiboo ma ngaia ao ko aki rangi ni kinaa. Ma e ngae n anne, bon akea am kangaanga n taekina anne nakon raoraom ae ko rangi n tangiria. A taneiai ni bubutii i marenaia raao ni kaan bwaai tabeua ibukia ao a kukurei ni kaai ni karaoi.

E kaotaki n te Baibara bwa e katoatai Iehova ni karaoa ae e ataia bwa a na kukurei iai taan taromauria. N te katoto, e taekina ae kangai te Uea are Tawita are e kaan ana iraorao ma te Atua: “Iehova, a bati am makuri aika kamimi aika Ko karaoi, Ma nanom aika kaeti nako ira. A aki konaki ni baireaki ni warekaki nako Im.” (Taian Areru 40:5, BG) Ma ae kakawaki riki nakon anne, e boni karaoa naba Iehova ae a na kukurei iai naake a tuai moa n ataia ake e ‘angania te amwarake ae bati ma ni kaon nanoia n te kimwareirei.’—Mwakuri 14:17.

Kioina ngkai e kukurei Iehova ni karaoi baika a na kimwareirei iai aomata nako, a a bon riai ngkanne naake a tangira te Atua bwa e na riki bwa raoraoia, ni karaoi naba bwaai ake a na ‘kakukureia nanona.’ (Taeka N Rabakau 27:11, BG) Ma tera ae ko kona ni karaoia ibukini kakukureian riki te Atua? E kaekaaki anne n te Baibara ni kangai: “Tai mwamwaninga ni karaoa ae raoiroi ma n tituaraoi ni buokiia aomata tabemwaang n ami bwai, bwa e kukurei te Atua n aeka ni karea akanne.” (Ebera 13:16) E koaua ae e nanonaki n aei bwa karaoan te raoiroi ao te tituaraoi ni buokiia aomata, bon tii ngaia te bwai ae kakawaki ibukini kakukureian Iehova?

E taekinaki ae kangai n te Baibara: “Ngkana akea te onimaki ao e aki kona ni kakukureiaki te Atua.” (Ebera 11:6) E kakawaki ataakin ae ngke e a tia n “onimakina Iehova Aberaam” ao “e a atongaki iai bwa raoraon Iehova.” (Iakobo 2:23) E katuruturua naba Iesu Kristo riaira n “onimakina te Atua” ngkana ti kani kakabwaiaaki iroun te Atua. (Ioane 14:1) Mangaia are ko na kangaa ni karekea te onimaki ae e ukoukoria te Atua irouia naake e kaania? Ko kona ni moanna man am katoatai n reiakina Ana Taeka te Atua ae te Baibara. Ni karaoan aei, ane ko na karekea te “atatai ae eti ibukin ana kantaninga” ao ngkanne ko a ataa arom ni ‘kakukureia ni bwaai ni kabane.’ Ngkana e teimatoa n rikirake am atatai ae eti ibukin Iehova ao ko maiuakina ae ko reiakinna n ana tua, ane e na rikirake onimakinana iroum ao e na kaaniko riki.—I-Korote 1:9, 10.