Kaekaan au titiraki ake I bwarui man te Baibara

AROU RIMOA:

I bungiaki i Baku i Azerbaijan, ao bon tii ngaira uoman ao ngai te kauoman. Bon te Mutirim tamau ao tinau kaain te Aro n Iutaia. A uaia n tangiriia au karo ao a kariaia bwa a na kaokoro aia Aro. E boutokaaki Bwabwa iroun Mwamwa n ana tai n aki mamatam n Ramadan, ae aia karuaiwa n namwakaina Mutirim. Ao Bwabwa e boutokaa naba Mwamwa ngkana e kaea te Toa ae te Riao. Ni mwengara, iai booki aika te Koran, te Torah ao te Baibara.

I bon iangoai bwa kaain te Mutirim. E ngae ngke I tuai man titiraki bwa iai te Atua ke akea ma bon iai titiraki aika I aki ota raoi iai. I iangoia bwa ‘Bukin tera bwa e karikiia aomata te Atua, ao tera bukina ae kakawaki ngkai e karawawataaki te aomata ngkana ngaia bwa e na kammarakaki n aki toki n te ai ni moone? Kioina ngkai a taekinna aomata bwa a bane n riki bwaai ni kabane ibukin nanon te Atua, I a iangoia bwa ‘E karikii aia kangaanga aomata te Atua ao imwina ekukurei ni matakuakinia ngkai a a karawataaki?’

Ngke te 12 au ririki, I a moanna n tataro n te namaz ae te aro n tataro aika nimaua ni katoabong irouia Mutirim. N te tai anne, e kanakoai tamau ma tariu nakon aia reirei I-Iutaia. Mai buakoni baika reiakinaki riki tabeua, ti reiakin naba taiani katei n Torah ao te taetae n Ebera. Imwain te reirei ni katoabong, ti riai n tataro ni kaineti ma te katei n I-Iutaia. Ai ngaia are n te moan ingabong, I tataro n te namaz ni mwengau ao imwina riki n te bong naba anne, I a manga ira te tataro n I-Iutaia n te reirei.

I rangi ni bwarui kaekaan au titiraki aika eti raoi. I okioki n titirakinia mitinare n te reirei ni kangai: “Bukin tera bwa e karikiia aomata te Atua? Tera ana iango te Atua iroun tamau ae te Mutirim? Bon te mwaane ae raoiroi ma e aera ngkai e iangoaki bwa e aki itiaki? Bukin tera ngke e karikia te Atua?” A bon aki karaunano kaekaan au titiraki tabeua ake I anganaki ao akea koauaia.

ARONI BITAKINI MAIU MAN TE BAIBARA:

N 2002, ai bon akea onimakinan te Atua irou. Ti a bon tibwa tia ni mwaing nako Tiaman ao teuana te wiki imwina e a ituaki naba n te boo tamau ao e a tabwakeinuku. I tataro i nanon ririki aika bati ibukini marurungia ao kukureia kaain au utu. Kioina ngkai I kakoauaa ae bon tii Teuare Moan te Mwaaka ae iai mwaakana i aon te maiu ma te mate, I onnon ni katoabong ibukini marurungin tamau. I iango ni kangai: ‘Bon te bwai ae uarereke iroun te Atua kakoroan nanon ana bubutii te teinnaine ae uarereke.’ I kakoauaa bwa e na kaekai au bubutii, ma e boni mate tamau.

I rangi ni mimi bwa e taraa n aki tabeakina au bubutii te Atua, ao I rawawata iai. I iangoia bwa ‘tao e bure arou n tataro ke bon akea te Atua.’ I rangi n rawawata iai ao I aikoa kona n tataro n te amaz. Bon akea koauaia Aaro riki tabeua irou ngaia are I a motikia bwa bon akea te Atua.

Onoua te namwakaina imwina ao a a roko Ana Tia Kakoaua Iehova n ara auti. Kioina ngke ti aki rangi n iaiangoa te aroaro ni Kristian, I tangiria ma tariu bwa ti na taetae n te aro ae riai nakoia naakai ae a boni kairua. Ti bon titirakinia ni kangai: “A na kangaa Kristian ni kona n taromauria Iesu, te kaibangaki, Maria ao bouannanti riki tabeua ngkai e aki boraoi ma Tuua Ake Tebwina?” A kaotii kiibu man te Baibara taani Kakoaua, aika a kakoauaaki iai bwa e tabu irouia Kristian ni koaua taromauriani boua, ao bon tii te Atua ae e na tataro te aba nakoina. I rangi ni kubanako n anne.

Imwina, ti titirakinia ni kangai: “Tera ami koaua n te Temanna n teniman? Ngkana ngaia bwa te Atua Iesu, e na kangaa ni kona ni mena i aon te aba ao n tiringaki irouia aomata?” A a manga kaekaira naba man te Baibara ao ni kabwarabwaraa ae bon tiaki te Atua Iesu ao e aki boraoi ma Ngaia. A kabwarabwaraa naba bwa ibukin aei, a a bon aki kakoauaa te Temanna n teniman. I rangi ni kubanako ao I iangoia bwa ‘boni Kristian aika okoro naakai.’

Ma I bon teimatoa naba ni kan ataia bwa e aera ngkai a mate aomata ao bukin tera bwa e aki katoka te rawawata te Atua. A kaota te boki ae te Knowledge That Leads to Everlasting Life a taani Kakoaua, ae iai i nanona mwakoro ni kabane aika a kaekaaki iai au titiraki. A waekoa ni moana te reirei n te Baibara ma ngai.

Ni katoai ara tai n reirei, I kunei kaekaan au titiraki aika eti raoi aika boto man te Baibara. I a ataia ae aran te Atua bon Iehova. (Taian Areru 83:18) Te tangira ni koaua bon aroarona ae moan te kakawaki. (1 Ioane 4:8) E karikiia aomata ibukina bwa e kan tibwaa nako te bwaintituaraoi ae te maiu. I a ataia ae e ngae ngke e aki katoka te ribuaka te Atua, ma e bon ribaia ao e na waekoa ni kamauna n aki toki. I a ota bwa a karawawataaki aomata imwin aia karitei Atam ma Ewa. (I-Rom 5:12) Ao teuana mai buakoni mwia aika kananokawaki, boni mateia aika tangiraki n aron tamau. Ma e ngae n anne, e na boni kamaunai aeka ni kangaanga akanne te Atua n te waaki ae boou i aon te aba ae e a kaan roko, ike a nang kautaki iai naake a a tia ni mate.—Mwakuri 24:15.

E a torobaki nanou n te koaua man te Baibara bwa a a kaekaaki au titiraki ake I bwarui. I a manga moanna ni kakoauaa te Atua. Ngke I a moanna ni kinaia riki Ana Tia Kakoaua Iehova, I a ataia ae boni kaain te botaki n itaritari ae katobibia te aonnaba. E anaaki nanou n aia itangitangiri i marenaia ao katiteuanaakia. (Ioane 13:34, 35) I kaungaaki mani baike I reiakin ibukin Iehova bwa N na motinnanoia ae N na riki bwa Ana Tia Kakoaua Iehova. I boni bwabetitoaki n Tianuare 8, 2005.

AROU NI KAKABWAIAAKI:

E bitaki maiu nakon ae raoiroi riki n taeka aika n te Baibara ake a kairai bwa N na kakoauai. E a reke raun nanou mani kaeka aika koaua ake I kunei n Ana Taeka te Atua. I a rangi ni kimwareirei ao ni kabebeteaki n te kantaninga are N na manga nora tamau n te mangauti ae beritanaki n Ana Taeka te Atua.—Ioane 5:28, 29.

I a tia n tekateka n taanga ma te kukurei i nanon onoua te ririki ma kaainnabau ae mamaaka te Atua ae Jonathan. Ti a tia ni kaai n reiakina te koaua ibukin te Atua ae eti raoi ao ni kai ota, ao bon te kakabwaia naba ae akea kabotauana. Anne bukina ngkai ti kukurei n tibwaa nako ara koaua ao ara kantaninga ae moan te tamaroa nakoia aomata nako. I a ataia ni boong aikai bwa a aki “okoro” Ana Tia Kakoaua Iehova ma boni Kristian ni koaua.