AIA TITIRAKI TAANI WAREWARE . . .

Te koaua bwa te Itita aia bukamaru Kristian?

E kabwarabwaraaki te Itita n te Encyclopædia Britannica bwa “aia toa ae kakawaki kaain te Aro ni Kristian ike a bukamarua iai Mangautin Iesu Kristo.” Ma e koaua bwa bon aia bukamaru Kristian?

E rangi ni kakawaki neneran rongorongon te bwai teuana ibukini kakoauaana. N aron anne, e rangi ni kakawaki bwa ti na kakaai rongorongo ni kabane aika irekereke ma te Itita bwa bon aia bukamaru Kristian ke tiaki.

Te moanibwai, e tuangia taan rimwina Iesu bwa a na kauringa matena ma tiaki mangautina. E arana te botaki anne te abotoro Bauro bwa “Ana Katairiki te Uea.”​—1 I-Korinto 11:20; Ruka 22:19, 20.

Irarikin anne, e taekinaki n te Britannica bwa “akea irekereken” angiini katein te Itita ma mangautin Iesu “bwa a moan nako man aia katei aomata.” N te katoto, n aaba aika mwaiti ao e kamanenaaki te rabiti ao te bunnimoa bwa bannan te Itita.

E kabwarabwaraa Philippe Walter ae te tia rabakau i aoni bokin rimoa aron rikini katei akanne bwa kanoan te bukamaru n te Itita. E koreia naba bwa “n te waaki ni Kakiritianakia aomata irouia Aaro ni beekan,” a a kairekerekea mangautin Iesu ma aia toa beekan are bukamaruan “tokin te winter ao rokon te spring.” E reitia riki Walter bwa bon te mwaneka ae kakawaki ibukini kinaakin “aia bong ni kauring Kristian” n aia karenta beekan are e a bebete iai rairakia aomata nakon aia Aaro.

E bon aki riki te waaki ni “Kakiritiania aomata” aei n aia tai ni maiu abotoro ibukina bwa a a riki bwa taan “tutuki” ni kaaitarai aia waaki beekan. (2 I-Tetaronike 2:7) E kauring te abotoro Bauro bwa ‘imwin nakona’ ao “a na teirake . . . . mwaane aika a na taekin reirei aika kewe bwa a aonga ni katikiia taan rimwin Iesu bwa a na rimwia.” (Mwakuri 20:29, 30) N raatokin te moan tienture ao e koreia te abotoro Ioane bwa a a tia tabeman mwaane ni burebureia Kristian. (1 Ioane 2:18, 26) N tokina, a a reke angan rinin katei ni beekan.

Ma a iangoia tabeman bwa e aki bure butimwaeani katei tabeua ibukin te Itita bwa e a karekea riki otaia “beekan” n te bae e nanonaki ni mangautin Iesu. Ma e ngae n anne, e bon aki kona ni kariaia anne Bauro. E ngae ngke e kakaitiboo ma katei ni beekan aika bati ni mwamwanangana n te Embwaea n Rom, e bon aki butimwaei bwa e na karekea riki iai otaia aomata ibukin Iesu. Ni kaitaraan anne, e kauringia Kristian ni kangai: “Kam na tai reitaki ma ake a aki onimaki bwa bon te reitaki buaka anne. Bwa te iraorao raa iraoraon te raoiroi ma te buakaka? Ke tera ae a ibuokanibwai iai te oota ma te rotongitong? E taku Iehova, ‘Kam na otinako mai buakoia, ao kaokoroingkami, ao katoka ringakin te bwai ae kamwara.’”​—2 I-Korinto 6:14, 17.

Tera mwin ara ukeuke ae uarereke aei i aon rongorongon te Itita? E a mataata raoi bwa bon tiaki aia bukamaru Kristian te Itita.

[Kabwarabwaraan n iteraniba 8]

“Kam na tai reitaki ma ake a aki onimaki.”​—2 I-Korinto 6:14