TE TATARO​—Aroni Buokam Iai

Imwaini waakinan am mwakuri, ko bae n iango ni kangai: ‘Tera buokau iai?’ I bangaomata ngkana I tabeka te titiraki aei ibukin te tataro? I aki. Ti kan ataia bwa ti buokaki iai ke ti aki. E titiraki naba te aomata ae raoiroi are Iobi ni kangai: “Ngkana tao e ongo au wewete ao e na mutiakina au taeka ke e na aki.”—Iobi 9:16, BK.

Ni kaongora ake mai imwaina, ti rinanoi iai kakoaua ibukin te tataro bwa e rangi n ibuobuoki ao tiaki tii te bae e kakaraoaki n Aaro ke te bwainnaoraki ibukin te iango. E bon ongoraei tataro te Atua ae koaua. E na bon ongo ngkana ti tataro n te aro ae eti ao ibukini baika riai. Ni koauana, e kaumakira bwa ti na kaanira riki ma ngaia. (Iakobo 4:8) Ngaia are tera ae ti kona ni kantaningaia ngkana ti karika te tataro bwa anuani maiura? Ti na iangoi tabeua kakabwaia mai iai.

Te raunnano.

Ko namakinna ae ko taonakinako n te raraoma n rikini kangaanga ma kataaki? Ti kaungaaki n te Baibara bwa ti na “tataro n aki toki” ao ni kaotii ara “bubutii ni bwaai ni kabane nakon te Atua,” n aron taai akanne. (1 I-Tetaronike 5:17; I-Biribi 4:6) E beritanaki n te Baibara bwa ngkana ti kawara te Atua n te tataro ao “te rau are mairoun te Atua ae riaon aia iango aomata, e na kawakin [nanora ma ara iango].” (I-Biribi 4:7) Ti kona ni karekea te rau ngkana ti kaotii raraomara nakon Tamara are i karawa. Ni koauana, e kaungaira bwa ti na karaoa anne. E taekinaki ae kangai n Taian Areru 55:22, (BK): “Angani Iawe rawawatam, ao e na buokiko.”

A a tia aomata aika mwaitikurikuri ni katobibia te aonnaba ni karekea te raunnano. E taku Hee Ran mai Korea Maiaki: “E ngae ngke a a bati au kangaanga aika kakaiaki ma ngkana I tataroakini, I a kabebeteaki ao ni kakorakoraaki bwa N na nanomwaaka.” E taekina ae kangai Cecilia mai Biribin: “Kioina ngkai bon te tina ngai, e korakora raraomau ibukia natiu ao tinau are e aikoa kinaai ngkai imwin rotakibuakana n te aoraki ae kakaiaki. Ma ibukina bwa I tatataro, I a kona ni karaoi tabeu ma te aki rangi n raraoma. I bon ataia bwa e na boni buokai Iehova n tabeakinia.”

Te kabebetenano ao te kakorakora ni kaaitarai kataaki.

Ko kaaitarai karawawata aika kakaiaki are tao e a ruanikai iai maium ke baika riiriki aika rangi ni karawawata? E kona n reke kabebeteam ngkana ko tataro nakon “te Atua ae te tia anga te kabebetenano n aekana nako.” E taekinaki n te Baibara bwa e “kabebeteira n rawawata nako.” (2 I-Korinto 1:3, 4) N te katoto, n te tai teuana ngke e rangi ni karawawataaki Iesu, e a “katorobubua ma n tataro.” Tera are riki? “E kaoti ngkanne te anera mai karawa nakoina ma ni kakorakoraa.” (Ruka 22:41, 43) E rotakibuaka naba te mwaane ae kakaonimaki are Neemia ni kakamaakana irouia aomata aika buakaka ake a kataia ni katokia mani karaoan ana mwakuri te Atua. E tataro ni kangai: “Ao ngkai, te Atua, Ko na kakorakorai baiu.” E oti mani baika riki bwa e boni buokia te Atua n tokanikai i aon te maaku ao ni katiaa ana mwakuri. (Neemia 6:9-16, BG) E kabwarabwaraa te baere e rinanona Reginald mai Ghana n te tataro ni kangai: “Ngkana I tataro ai moarara riki n taai ake I taonakinako iai n au kangaanga, I bon namakinna ae I kona tuanga temanna ae e boni kona ni buokai ao ni kaungaai bwa akea riaina bwa N na maaku.” Eng, e kona te Atua ni kabebetei nanora ngkana ti tataro nakoina.

Te wanawana mairoun te Atua.

Ti kona n rotakibuaka man ara motinnano tabeua ake ti karaoi ao ake a tangiraki naba iroura. Ti na kangaa ni karaoi motinnano aika raraoi? E taekinaki ae kangai n te Baibara: “Ngkana iai temanna iroumi ae e aki tau wanawanana, ao ke e teimatoa ni butiia te Atua ao e na anganaki, bwa e tituaraoi n anga nakoia aomata ni kabane n aki ngurengure.” (Iakobo 1:5) E kona te Atua ni kabongana taamneina ae raoiroi ni kairira bwa ti na karaoi ara motinnano aika raraoi ngkana ti tataroa te wanawana mairouna. Ni koauana, ti kona ni bubutii te taamnei ae raoiroi bwa e kaungaira Iesu bwa e korakora nanon “te Tama are i karawa ni kan anga te taamnei ae raoiroi nakoia akana butiia!”—Ruka 11:13.

E ataia naba Iesu bwa e riai ni bubutiia Tamana te ibuobuoki ni karaoan ana motinnano aika kakawaki. E taekinaki n te Baibara bwa “e kangaina n tataro nakon te Atua” ngke e tangiria n rineiia mwaane aika 12 ake a na riki bwa ana abotoro.—Ruka 6:12.

N aron Iesu, a a bati ni boong aikai ake a kaungaaki n noran aron te Atua ni kaekai aia bubutii ibukini buokaia ni karaoan aia motinnano aika raraoi. E taekinna Regina mai Biribin bwa a kakaokoro ana kangaanga ake e kaaitarai n aroni karekeani maiuna ma ana utu imwini mateni buuna, buan ana mwakuri ao rinanoan te kangaanga ni kaikawaaia natina. Tera are e buokia ni karaoi ana motinnano aika raraoi? E taku: “I onimakina Iehova rinanon te tataro bwa e na buokai.” E taekina ae kangai Kwabena mai Ghana ibukini butiian ana ibuobuoki te Atua: “I kitana au mwakuri ni kateitei are bubura boou iai.” E taku ngke e rinanoi baike e na karaoi: “I katoatai n tataro ibukin ana kairiri Iehova ni karaoan au motinnano ae raoiroi.” E taku riki: “I namakina te korakora are e buokai iai Iehova n rinea au mwakuri ae N na kona n tabeakina iai kainnanou n te itera n taamnei ao n rabwata.” Ko kona naba ngkoe ni kakabwaiaaki n ana kairiri te Atua ngkana ko tataroakini baika e rotakibuaka iai am iraorao ma ngaia.

Ti a tia n taekini bwaai tabeua ake ko na buokaki iai n te tataro. (Ibukini katoto riki tabeua, nora te bwaoki ae “Ibuobuoki Aika Reke Man te Tataro.”) Ma ibukini karekeani kakabwaia aikai iroum, ko riai n ataa raoi moa te Atua ao nanona. Ngkana ko tangiria, ti kaungako bwa ko na tuangia Ana Tia Kakoaua Iehova bwa a na buokiko n reiakina te Baibara.a E kona n riki aio bwa te moani mwaneka ibukim ni kaaniaki riki ma te ‘tia Ongoraei tataro.’—Taian Areru 65:2, BG.