Te Bwaintangira ae Akea n ai Arona

E TARAA n aki rangi ni kakawaki bwain taiman te bentira, ae tein te kaibuke, ae mena i nanoni bain Jordan. Ma aei bon teuana mai buakon ana bwai aika rangi ni kakawaki. E kabwarabwaraa Jordan ni kangai: “E anganai Russell te baei ngke I uarereke, ao teuaei bon te unimwaane ae raoraoia au utu.” Imwini maten Russell ao e a ataia Jordan bwa iai te bwai ae rangi ni kakawaki are e karaoia Russell nakon tibun Jordan ae te unimwaane ao nakoia ana karo, ae e kakaraui nanoia n aia tai n rawawata. E taku Jordan: “Ngkai I a atai riki rongorongon Russell, ao e a rangi ni kakawaki riki irou ngkai te bwaintangira ae rangi n uarereke aei.”

N aron rongorongon Jordan ae taekinaki ikai, e kona n uarereke kakawakin te bwaintangira ke bon akea kakawakina irouia tabeman. Ma e kona n rangi ni kakawaki ke moan te kakawaki iroun te aomata are e anganaki, ao akea naba kabotauana irouna. E kabwarabwaraa te bwaintangira teuana te Baibara ae akea kabotauana n taeka aika rangi n ataaki aika kangai: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane e onimakinna, ma e na reke irouna te maiu are aki toki.”​—Ioane 3:16.

Bon te bwaintangira ae karekea te maiu n aki toki nakon te aomata are butimwaeia! Iai ngkanne te bwaintangira ae kakawaki riki nakon aei? E ngae ngke iai tabeman aika a bae n aki ataa kakawakin te bwaintangira aei, ma e “rangi ni kakawaki” irouia Kristian ni koaua. (Taian Areru 49:8; 1 Betero 1:​18, 19) Ma e aera ngkai e anga maiun Natina te Atua bwa te bwaintangira ibukia kaain te aonnaba?

E kabwarabwaraa bukin anne te abotoro Bauro n taeka aikai: “Rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.” (I-Rom 5:12) E bure te moan aomata are Atam nakon te Atua n oin nanona, ngaia are e a reke n te tuuaa ae te mate. A bane n rotaki kanoan Atam n te mate rinanon teuaei, ae taekaia kaain te aonnaba.

“Boon te bure te mate, ma te bwaintituaraoi ae e anga te Atua, bon te maiu are aki toki rinanoni Kristo Iesu ae ara Uea.” (I-Rom 6:23) Ibukini kainaomataaia aomata man te rekenikai ae te mate, e a kanakoa Natina ae Iesu Kristo te Atua nakon te aonnaba, bwa e na kareana maiuna ae kororaoi ibukia kaaina. Ibukin te karea aei ae e ataaki bwa “te kaboomwi,” a nang karekea te maiu are aki toki aomata nako aika onimakina Iesu.​—I-Rom 3:24.

E taku Bauro ni kaineti ma kakabwaia ni kabane ake a reke rinanon Iesu Kristo, ake e karaababai nako te Atua nakoia taan taromauria: “Ke e katituaraoaki te Atua ibukin ana bwaintituaraoi ae akea boona ao akea n ai arona.” (2 I-Korinto 9:15) Eng, e bon rangi ni kamimi te kaboomwi n te aro are ti a aki kona ni kabwarabwaraa raoi. Ma e aera ngkai e rianako te kaboomwi mai buakon nako ana bwaintangira te Atua nakoia aomata? N te aro raa ae e kaokoro iai ma ana bwaintangira te Atua ake tabeua riki?a Ao tera ae ti riai ni karaoia iai? Ti kaoko bwa ko na wareki ana kaeka te Baibara nakon titiraki akanne ni kaongora aika uoua aika imwina.