ATUN TE MAEKATIN | TERA ANA REIREI TE BAIBARA IBUKIA ANERA?
Aroia Anera ni Buokiko
A rangi n tabeakinia aomata anera aika kakaonimaki ao a kakaraoa naba nanon Iehova. Ngke e karika te aonnaba te Atua ao a “tatakarua ni kimwareirei itoi ni ngaina, ao a a bane natin te Atua n tatakarua ni kakatonga.” (Iobi 38:4, 7) A kakan “tirotiroi” taian taetae ni burabeti anera ibukini baika a na riki n te aonnaba n taai aika a na roko.—1 Betero 1:11, 12.
E kaotia te Baibara bwa n tabetai ao a kamanoaki taan taromauri ni koaua irouia anera ibukini kakororaoan nanon te Atua. (Taian Areru 34:7) N te katoto:
Ngke e kamaunai kaawa ake a buakaka ake Totom ma Komora Iehova, ao a buoka te aomata ae raoiroi are Rota ma ana utu anera bwa a na birinako.—Karikani Bwaai 19:1, 15-26.
I Baburon ngkoa ngke e a moti taekaia ataeinimwaane ake teniman ake taian Ebera bwa a na kamateaki ni nnen te ai ae uramwaaka, ao te Atua “e kanakoa ana anera ao e kamaiuia ana toro.”—Taniera 3:19-28.
Imwin tikun te mwaane are raoiroi are Taniera n uaa ae ngaina ni nneia raian aika rangi ni baki, ao e a kabwarabwaraa bwa e maiu ibukina bwa “e kanakoa ana anera [Atuana] ao e kaini wia raian.”—Taniera 6:16, 22.
A a kamani buobuokiia aomata aika kakaonimaki anera
E BOUTOKAAKI TE EKARETIA NI KRISTIAN RIMOA IROUIA ANERA
N tabetai ao a buokaki kaain te ekaretia ni Kristian ake rimoa irouia ana anera te Atua ake taan uataeka, ibukini kakororaoan ana kantaninga Iehova. N te katoto:
E kauki mataroan te karabuuti te anera ao e kairiia abotoro ake a kabureaki bwa a na reitaanako aia mwakuri n uarongorongo n te tembora.—Mwakuri 5:17-21.
E tua te anera nakon te tia tataekina te rongorongo ae raoiroi ae Biribo bwa e na nakon te kawai n te rereua ae nako mai Ierutarem nako Kaata, ao e na uarongorongo nakon te I-Tiobia are nako Ierutarem bwa e na taromauri.—Mwakuri 8:26-33.
Ngke e a boo aia tai mairoun te Atua naake tiaki I-Iutaia n riki bwa Kristian, ao e a kaoti te anera n te miitara nakon te mataniwi n tautia irouia I-Rom ae Korenerio, ao e tua nakoina bwa e na wetea te abotoro Betero nakoni mwengana.—Mwakuri 10:3-5.
Ngke e kabureaki te abotoro Betero, ao e kaoti te anera nakoina, ao e kairia ni kaotinakoa man te karabuuti.—Mwakuri 12:1-11.
AROIA ANERA NI KONA NI BUOKIKO
Akea te bwai ni kakoaua bwa e kabonganaia naba ngkai te Atua anera ni buokiia aomata n te kakai, n aron ae e taekinaki n te Baibara. Ma e taku Iesu ni kaineti ma ara tai ngkai: “E na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.” (Mataio 24:14) Ko ataia ae a karaoa te mwakuri aei taan rimwini Kristo i aan aia kairiri anera?
A ibuobuoki anera n tataekinan te rongorongo ae raoiroi ni kabutaa te aonnaba
E kaotaki n te boki ae Te Kaotioti bwa a taningamarau anera ni buokiia aomata, bwa a na reiakina taekan Iehova ae te Atua ao ana kantaninga ibukia aomata. E korea ae kangai te abotoro Ioane: “I nora te anera riki temanna ae kibakiba i nukani karawa, ao iai irouna te rongorongo ae raoiroi ae teimatoa n aki totoki, ae e na taekinna nakoia aomata ake a maeka n te aonnaba, nakoia natannaomata nako ao baronga ao taian taetae ao botannaomata. E kangai n te bwanaa ae korakora: ‘Kam na maaka te Atua ao anganna te neboaki, ibukina bwa e a roko te tai ae e na motikitaeka iai, mangaia ae taromauria Teuare karaoa karawa ma aonnaba ma marawa ma koburake n ran.’ ” (Te Kaotioti 14:6, 7) E oti ni baika riki n taai aikai bwa a boni boutokaa uarongorongoan te Tautaeka n Uea ni katobibia te aonnaba anera. E ngae ngke tii temanna ae raira nanona ao e okira Iehova, ma “e na ueke te kimwareirei irouia ana anera te Atua.”—Ruka 15:10.
Tera ae e na riki ngkana e a tia raoi te mwakuri n uarongorongo? Anera ake “te taanga ni buaka ake i karawa” a nang boutokaa Iesu Kristo ae aia Uea ueea, ni buaka n “te buaka n te bong ae kakannato ae ana bong te Atua ae Moan te Mwaaka” n Aremaketon. (Te Kaotioti 16:14-16; 19:14-16) A na riki anera aika rangi ni korakora aikai bwa taani kakoroa nanon ana motikitaeka te Atua “ngkana e a karekei kaia te koraki ake . . . a aki ira nanon te rongorongo ae raoiroi ae taekan ara Uea ae Iesu.”—2 I-Tetaronike 1:7, 8.
Mangaia ae ururingnga ae a rangi n tabeakiniko anera. A rangi n tabeaianga irouia naake a kani beku iroun te Atua, ao e okioki ni kabonganaia Iehova bwa a na kakorakoraia ana toro aika kakaonimaki n te aonnaba ma ni kamanoia.—Ebera 1:14.
Iai te motinnano ae kakawaki ae ti na karaoia ngaira n tatabemanira nako. Ti na butimwaea ao n ongeaba n te rongorongo ae raoiroi ae e a tabe n tataekinaki ni kabutaa te aonnaba? A na kukurei Ana Tia Kakoaua Iehova n am tabo ni buokiko bwa ko aonga ni kakabwaiaaki man aia ibuobuoki ae tatangira ana anera te Atua aika korakora.