A Kukurei n Anga Ngaiia​—i Turkey

A KAKORAKORAIA Kristian n te moan tienture ni karokoa te ‘rongorongo ae raoiroi ae taekan te Tautaeka n Uea,’ irouia aomata aika bati ake a kona n reke. (Mat. 24:14) Tabeman a mwananga nakon aaba aika ianena iai. N te katoto, e mwananga te abotoro Bauro nakon te aono ae mena iai Turkey n taai aikai, ao e karababaa ana uarongorongo iai ni mwanangana ni mitinare.a Tao 2,000 te ririki imwina n 2014, e a manga iangoaki naba karaoan te mwakuri n uarongorongo ae okoro i Turkey. E aera bwa e baireaki te mwakuri ae okoro aei? Antai aika uataboia?

“TERA AE RIKI?”

E a raka i aon 2,800 taan uarongorongo i Turkey, ma mwaitiia kaain te aba aei ae 79 te mirion. Ae nanona bwa te katautau ni mwaitiia taan uarongorongo ni kabotauaki ma kaain te aba i Turkey, tao bon 1 nakon 28,000. N aron ae ko kona n iangoia, tii tabeman kaain te aba ake a a tia ni kawaraki irouia taan uarongorongo. Te kantaninga n te mwakuri ae okoro aei bwa a na kawaraki aomata aika bati ake a kona n reke, i nanon te tai ae kimototo. Tao 550 taari aika rabakau te taetae n Turkey ake a roko man aaba tabeua nako Turkey ao n uarongorongo ma taari ake iai, n tain te mwakuri ae okoro aei. Tera mwina?

E a raababanako te mwakuri n uarongorongo. E korea aei te ekaretia teuana i Istanbul: “Ngke a norira aomata ao a taku: ‘Iai te bwabwaro ae okoro ae e na boo ikai, ngkai ti a noriia Ana Tia Kakoaua Iehova n taabo nako?’ ” E korea aei te ekaretia n te kaawa ae Izmir: “E kawara unimwaanen te ekaretia te mwaane temanna ae mwakuri n te tabo n taxi ao e taku, ‘Tera ae riki? Kam a karababaa riki ami mwakuri?’ ” Eng, e bon noraki te mwakuri ae okoro aei.

A rangi n unga n te mwakuri n uarongorongo taan ibuobuoki aika ianena. E taku Steffen mai Denmark: “I uarongorongo ni katoabong nakoia aomata aika tuai n ongo taekan Iehova, ao I namakina iai ae I a boni kaotiota raoi aran Iehova.” E korea aei Jean-David mai Buranti: “Ti uarongorongo n te aono ae tii teuana i nanon aoa aika bati. E rangi ni kaunga! Angia aomata a aki kinaia Ana Tia Kakoaua Iehova. A kuri ni bane auti ni butimwaeira ao ti maroro iai, ti kaota teuana te taamnei, ao ni katuka ara boki irouia kaaina.”

A kanakoi booki aika tao 60,000 tii i nanon uoua te wiki, taan ibuobuoki aika 550! E a raababanako te uarongorongo n te mwakuri ae okoro aei.

E a rikirake te ingaingannano n te mwakuri. E korakora rotakia taari ake kaain te aba n te mwakuri ae okoro aei. A bati ake a a iangoa kabwaninan aia tai n te mwakuri ni minita. Ni koauana, e a keerake 24 te katebubua mwaitiia bwaiania aika katoatai i Turkey, i nanon namwakaina aika 12 imwin te mwakuri ae okoro aei.

A kaota aron rotakia n te mwakuri ae okoro aei taan ibuobuoki ake a roko man aaba tabeua, imwin okiran abaia. E korea aei te tari te aine ae Şirin mai Tiaman: “Akea aia kangaanga taari i Turkey n uarongorongo n te tai ae aki baireaki. I rangi ni mamaamaa n uarongorongo n te aekaki aei. Ma I karabwaa te mwakuri ae okoro aei, bwa I a kona ngkai ni karaoa te bwai are I aki kona ni karaoia mai mwaina, man aia katoto taari ikai ao te kakorakora n tataro. I uarongorongo naba ao ni kanakoi turaeki ni kawain te turein mai nano! I a aki ngkai maamaa n aron are mai mwaina.”

E taku Johannes mai Tiaman: “I karekei reireiau tabeua ibukin au mwakuri ni minita. A rangi ni kan tataekina te koaua taari i Turkey nakoia aomata aika bati ake a kona n reke. A uarongorongo n taai ake a boo iai ma aomata. I motikia bwa N na karaoa naba anne ngkana I okira Tiaman. Ao I a uarongorongo ngkai nakoia aomata aika bati riki nakon are mai mwaina.”

E taku Zeynep mai Buranti: “E korakora rotakin au mwakuri ni minita n te mwakuri ae okoro aei. I buokaki iai bwa N na ninikoria ao n onimakina riki Iehova.”

A a kaaniaki riki i marenaia taan uarongorongo. E rangi n anainano noran te tangira ao te katiteuanaaki i marenaia taari man aaba aika kakaokoro. E taku Jean-David are taekinaki mai mwaina: “Ti a ‘katoonga’ aia akoi taari.” E reitia ni kangai: “A butimwaeira bwa raoraoia ao kaain aia utu. A butimwaeira nakoni mwengaia. I a kaman ataia ae ti kaaina te botaki n itaritari ae katobibia te aonnaba. E bati au tai ni wareka taekana n ara boki. Ma I a bon rinanona ngkai. I a namakina ae I a kakatia riki ngkai temanna ngai ana aomata Iehova, ao I karabwaa ibukin te kakabwaia ae tamaroa aei.”

E taku Claire mai Buranti: “N aki ongeia bwa ti roko mai Denmark, Buranti, Tiaman, ke Turkey, ma bon te utu ae tii teuana ngaira. Ai aron ae e kamaunai tian aaba ni kabane te Atua n te bwai ni kamauna ae bubura.”

E reitia ni kangai Stéphanie mai Buranti: “Ti reireinaki n te mwakuri ae okoro aei bwa te bwai ae katiteuanaira bon tiaki te katei ke ara taetae, ma bon tangiran Iehova iroura ni kabane.”

KAKABWAIA AIKA TEIMAAN

A bati taan ibuobuoki aika ianena ake a a moana iangoan te mwaing nako Turkey ni buoka te mwakuri ae bubura are e na karaoaki ikekei. Iai tabeman ake a a kamani mwaing. E bati te kakaitau ibukia taan ibuobuoki aikai.

N te katoto, iai te kurubu n te aono teuana ae raroanako ae kaaina 25 taan uarongorongo. Bon tii temanna aia unimwaane i nanon ririki aika bati. Iangoi kukureia taan uarongorongo aikai ngke a roko onoman taan ibuobuoki n 2015 mai Tiaman ao mai Netherlands!

TE BEKU N TE TABO AE KAINNANOAKI RIKI IAI TE IBUOBUOKI

Tera aia taeka taan ibuobuoki ake a mena i Turkey ibukini maiuia? E boni kangaanga n tabetai, ma e rangi ni kakukurei. Iangoi aia taeka tabeman:

E taku Federico mai Tibein, ae te tari te mwaane ae iai buuna ao ai tibwa 40 tabun ana ririki: “E a mwaawa au tai bwa ai akea au bwai aika bati ake N na tabetabe iai, ao I a kona ni kaatuua au iango i aoni baika kakawaki riki.” E na kaungaa teuaei karaoan te aeka ni beku aei? E taku: “Boni ngaia anne! Ngkana ko mwaing nakon te aba teuana ae oin am kantaninga iai buokaia aomata n ataa Iehova, ai aron ae ko boni mwiokoiko i nanoni baina. Ko na namakina riki iai tabeakinam iroun Iehova nakon are mai mwaina.”

E taku Rudy mai Netherlands, ae te tari te mwaane ae iai buuna ao e a kaani koro 60 ana ririki: “Ti karekea te raunnano ae bati n ara beku n te tabo ae kainnanoaki riki iai te ibuobuoki, n tibwaa te koaua nakoia aomata aika bati, ake a tuai n ongo taekana mai mwaina. Moan te kakukurei norakini kimwareireia aomata ngkana a butimwaea te koaua.”

E taku Sascha are mwaing mai Tiaman, ae te tari te mwaane ae iai buuna ao ai tibwa 40 tabun ana ririki: “Ni katoatai are I uarongorongo iai, I kaitiboo ma aomata ake ai tibwa aia moantai n ongora taekan te koaua. E anganai te raunnano ae bati buokaia aomata akanne n ataa Iehova.”

E taku Atsuko mai Tiaban, ae te tari te aine ae iai buuna ao ai 30 tabun ana ririki: “N taai aika nako ao I rangi n tangiria bwa e na waekoa n roko Aremaketon. Ma imwini mwaingiu nako Turkey, I a karabwaa Iehova ngkai e teimatoa n taotaona nanona. Ngkai I a ota riki n aron Iehova ni bairei bwaai, I a kani kaania riki.”

E taku Alisa mai Rutia, ae te tari te aine ae ai tibwa 30 tabun ana ririki: “Te beku iroun Iehova n te aeka n uarongorongo aei, e buokai bwa N na katoonga ao n nora raoiroina ni kabane.” (TaiAre. 34:8) E a manga taku: “Bon tiaki tii Tamau Iehova, ma bon Raoraou ni kaan naba ae I a kinaa riki imwini kaitaraani kangaanga aika kakaokoro. A rangi ni bati baika kakukurei ni maiuu, baika I rinanoi aika kaunga, ao kakabwaia aika bati!”

“TARAI TAWAANA”

E a roko te rongorongo ae raoiroi irouia aomata aika bati riki, rinanon te mwakuri ae okoro i Turkey. Ma e boni bubura naba te aono ae tuai ni mwakuriaki. A kaitiboo ni katoabong taan ibuobuoki ake a mwaing nako Turkey ma aomata ake a tuai man ongo taekan Iehova. Ko kani beku n te aeka n aono anne? Ngkana ngaia anne, ti kaungako bwa ko na karaoa aei: ‘Euta matam ao tarai tawaana, bwa a a tai ibukin te taiaki.’ (Ioa. 4:35) Ko kona n ibuobuoki n te aba teuana ae tawaana ake iai a a “tai ibukin te taiaki”? Ngkana ngaia anne, moanna mani karaoani mwaneka aika kakawaki ngkai ibukin rokom n te tia anne. Ma aei te bwai ae boni koaua: E na anganiko te kakabwaia ae akea n ai arona kabatiaan riki am tai n tataekina te rongorongo ae raoiroi “nakon taabo ake taiani kabanea n raroa n te aonnaba”!​—Mwa. 1:8.