3 E Ibuobuoki ni Kaaitarai Kangaanga

Iai kangaanga ake a aikoa kona n tukaki rikia ngkai ke ni katokaki. N te katoto, ngkana e mate ae ko tangiria ke ko kaaitara ma te aoraki ae wenemaan, ao bon akea riki am anga iai, ma ko na bon tii kakaaei aanga ake ko na kekeiaki iai ma rawawatam. E kona n ibuobuoki te Baibara ni baika kakaiaki aikai?

TE AORAKI AE WENEMAAN

E kangai Rose: “Iai aorakin au utu ae reke irou ae e kakaiaki te maraki iai ao e okioki. E a kekerikaaki iai marurungiu.” Te bwai ae rangi n tabeaianga iai neiei, bwa n tabetai e a aikoa kona ni kaatuua ana iango i aon ana reirei n te Baibara ao ni baike a irekereke ma ana taromauri. Ma e rangi ni buokaki n ana taeka Iesu ae koreaki ni Mataio 19:26 ae kangai: “E konai bwaai ni kabane te Atua.” E reke reireian Rose bwa e bati nako te anga n reirei. Ibukina bwa e rangi ni kangaanga n tabetai te wareware ibukini marakina, e a ongongora ni warekan te Baibara ao booki aika aanaki n te Baibara, aika raweaki.a E taku: “Ngke arona bwa akea baikai ao I a aki ataia bwa ai tera arou ni kateimatoa reitakiu ma te Atua.”

Ngkana e nanokawaki Rose bwa e a aki kona ni karaoi baike e kakaraoi ngkoa, ao e kabebeteaki n taeka aika koreaki n 2 I-Korinto 8:12, ae kangai: “E butimwaeaki riki te angabwai ngkana e tauraoi te aomata ni kan anga. E aki kantaningaaki bwa e na anga are akea irouna, ma e na anga are iai irouna.” E kakauringaki Rose n taeka aikai ae e kukurei te Atua ni baike e karaoi, ibukina bwa e kabanea ana konaa iai ribuakoni mamaarana.

TE RAWAWATA AE RANGI NI KORAKORA

E ururing ni kangai Delphine are taekinaki mai mwaina: “Imwini maten natiu te aine are 18 ana ririki, ao I a rangi n rawawata, ao I a aki kakoauaa ae N na teimatoa ni maiu. A a rangi ni bitaki bwaai.” Ma e rangi ni korakora kabebetean nanona n taeka ake n Taian Areru 94:19, ike e kangai iai te tia areru nakon te Atua: “Ngkana a taonainako iango n raraoma, ao ko kabebeteai ma ni karaua nanou.” E taku neiei: “I tataro nakon Iehova bwa e na buokai ni karekei baika N na kabebeteaki iai.”

E kakatabetabea neiei ni karaoa te mwakuri n anganano ae kakawaki. Imwina riki ao e a kabotaua neiei ma aia kureiaon ataei, are e ngae ngkana e uruaki ma e boni manena naba ibukini karanakin te bwai teuana. N aron anne, e ngae ngke e rangi n uruaki nanon neiei, ma e boni kona naba ni buokiia tabemwaang. E ururing ni kangai: “I a noria bwa kabonganaan ana boto n reirei te Baibara, ao aanga n iaiango aika oti n te kibu ni kabebeteia aomata, bon ana anga naba Iehova ni kabebeteai ao ni karaua nanou.” E korei araia naake n te Baibara neiei ake a boo ma te rawawata ae rangi ni korakora ni maiuia. Ao e noria bwa “a bane n tatataro.” E noria naba bwa “ko aki kona ni buokaki ngkana ko aki wawareka te Baibara.”

E reke riki reireian Delphine man ana ukeuke n reirei n te Baibara bwa e na kaatuua iangoan taai aika a na roko, ao tiaki taai aika nako. E karaua nanon neiei te kantaninga ae taekinaki ni Mwakuri 24:15 ae kangai: “A na boni mangauti akana raoiroi ma akana aki raoiroi.” Tera aroni kakoauaan Iehova iroun neiei ni kaineti ma kautan natina? E kaeka Delphine ni kangai: “N na nora natiu n taai aika a na roko. E a tia ni baireaki ara tai ni manga kaitiboo, kaanga aron ae e a mwakoro i aon ana karenta Iehova. I bon norira raoi ngaira ni kauoman n ara onnaroka n aron naba are I noria raoi ao n tangiria man te bong are e bungiaki iai.”

a A bati aeka n rawerawe aikai aika mena n ara atureti n te Intanete ae jw.org.

E kona ni buokiko te Baibara ni karaua nanom n taai naba aika rangi ni karuanikai

E NA KANGAA TE ATUA NI BUOKIRA?

E teretere ana kaeka te Baibara. E kangai: “E kaan Iehova nakoia akana weteia ni kabane, ao nakoia akana weteia ni kabane n te koaua. E kanuaiia akana maakua ni baika a tangiri. E ongo tangia ni kani buokaki ao e kamaiuia.” (Taian Areru 145:18, 19) Tiaki e kaunganano anne? Ma e na kangaa te Atua ni kaekai aia tataro aomata ake a boni kakaaea raoi kairaia mairouna?

A kona kangaanga ni kabwarai nanora ao n urua rabwatara, ara namakin, ao ara onimaki. (Taeka N Rabakau 24:10) Ma Iehova “e anga te korakora nakon ane e kua, ao te korakora ae bati nakoia akana akea korakoraia.” (Itaia 40:29) E taku te abotoro Bauro are nanomwaaka rinanoni kataaki aika kakaiaki: “I konai bwaai ni kabane ni karaoi iroun teuare anganai te korakora.” (I-Biribi 4:13) E kakorakoraaki Bauro n taamnein te Atua. Ko kona naba ni butiia te Atua bwa e na anganiko te taamnei ae raoiroi.—Ruka 11:13.

Tera arom ngkana ko kani buokaki n ota n ana reirei ni kairiri te Baibara ao ni maiuakinna? E korea ae kangai te tia rimwini Kristo ae Iakobo: “Ngkana iai temanna iroumi ae e aki tau wanawanana, ao ke e teimatoa ni butiia te Atua ao e na anganaki, bwa e tituaraoi n anga nakoia aomata ni kabane n aki ngurengure.” (Iakobo 1:5) Ko kona ni mwakuria am tataro n arom ni wawareka te Baibara ao ni maiuakin reirei ake iai. (Iakobo 1:23-25) Ni karaoan anne, ko na reiakinna iai bwa a kawanawana te aba taian reirei ni kairiri ake iai.

E ngae ngkana e korakora raraomam, ma e kona ni buokiko Iehova bwa ko na rau. E kangai ana Taeka: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi, ao te rau are mairoun te Atua ae riaon aia iango aomata, e na kawakin nanomi ma ami iango rinanoni Kristo Iesu.” (I-Biribi 4:6, 7) E aera ko aki butiia Iehova bwa e na anganiko te rau?

Ma tera arom ngkana a wenemaan am kangaanga? Tai motikia bwa e a kitaniko te Atua. E ngae ngkana a wenemaan, ma e kona te Atua ni kaninikoriako ao ni kakorakorako bwa ko na nanomwaaka. (1 I-Korinto 10:13) E berita naba te Baibara bwa e na roko te tai are a nangi boni katokaki raoi iai ara kangaanga!