Kabwaiam, Man Am Rinerine!

KO KONA N RINEA TE BAE E NA RIKI NAKOIM N TAAI AIKA IMWAIM? A kakoauaa tabeman bwa a aki kona n rinea te bae e na riki ni maiuia, bwa e a kamani baireaki. Ngkana a aki roko n tiaia tabeua, ao a a iangoia naba bwa bon te babaire. A taku: “Bon te katautau!”

Iai aika rawawata n noran ae e a aki kona n toki te iowawa ao te ribuaka n ara aonnaba aei. Tao a a tia ni kataia ni kanakoraoa maiuia, ma a noria bwa e uruanaki aia babaire n taai nako, n te buaka, n te kakeru, ni kabuanibwai aika karina, ao n te aoraki. Ngaia are a taku: ‘E aera bwa ti na kanakoraoa maiura?’

E koaua ae a kona n rotakibuaka ara babaire ni baika riiriki ni maiura. (Te Minita 9:11) Ma reken te maiu ae akea tokina iroum, e boto i aon am rinerine. E boni kaotia te Baibara bwa maium n taai aika imwaim e boto i aon am rinerine. Nori baika taekinaki iai.

Ngke a nang rin n te Aba ni Berita I-Iteraera, ao e tuangia ni kangai Mote are aia tia kairiri: “I a tia ni kaaki i matami te maiu ao te mate, te kakabwaia ao te rekenikai, ao kam na rinea te maiu bwa kam aonga ni maiu, ngkami ma kanoami, n aromi n tangira Iehova ae Atuami, n ongo ni bwanaana, ao n nimtia.”—Te Tua-Kaua 30:15, 19, 20.

“I a tia ni kaaki i matami te maiu ao te mate, te kakabwaia ao te rekenikai, ao kam na rinea te maiu.”—Te Tua-Kaua 30:19

Eng! E kainaomataia I-Iteraera te Atua man tautoronakia i Aikubita, ao e kaota nakoia bannan te maiu ae rau ma ni kakukurei n te Aba ni Berita. Ma a aki kona ni karekei baikai ni kabane, n akean te bae a na karaoia. Ibukini karekeani kakabwaia akanne, a riai n “rinea te maiu.” Ni kangaa? ‘N aroia n tangira te Atua, n ongo ni bwanaana, ao n nimtia.’

Anne naba aekan te rinerine ae ko na karaoia, ao arom ni karaoia e na rota maium n taai aika imwaim. Ngkana ko rineia bwa ko na tangira te Atua, ko na ongo ni bwanaana, ao n nimtia, ai aron ae ko rinea te maiu n aki toki n te aonnaba ae bwaretaiti. Ma tera ae irekereke ma rinerine akanne?

RINEIA BWA KO NA TANGIRA TE ATUA

Te tangira bon aroaron te Atua ae rangi ni kakawaki. E korea ae kangai te abotoro Ioane ni kairana n te taamnei: “Te Atua bon te tangira.” (1 Ioane 4:8) Anne bukina ae e kangai iai Iesu ngke e titirakinaki bwa tera te tua ae te kabanea ni kakannato: “Ko riai n tangira Iehova ae Atuam ma nanom ni kabane, maium ni kabane, ao am iango ni kabane.” (Mataio 22:37) Te iraorao ni koaua ma Iehova ae te Atua, e riai ni boto i aon te tangira ao tiaki i aon te maaku ke te ongeaba ae aki nako man te nano. E aera ngkanne bwa ti riai n rinea ae ti na tangira te Atua?

Tangiraia aomata iroun Iehova titeboo ma tangiraia naati irouia kaaro. E ngae ngke a aki kororaoi kaaro aika tatangira, ma a boni kaetietiia naba natiia, a kaungaia, ao a angania te reirei ni kaetieti, ibukina bwa a tangiriia bwa a na kukurei ao n nakoraoi maiuia. Ma tera ae a tangiria kaaro mairouia natiia? A tangiriia natiia bwa a na tangiriia ao ni mutiakin raoi baike a tuangia ibukini kabwaiaia. Tiaki e riai naba Tamara ae kororaoi are i karawa ni kantaningaira bwa ti na kaota tangirana ibukini baike e karaoi ni kabane ibukira?

ONGO NI BWANAANA

N te taetae are e moani koreaki iai te Baibara, ao te taeka ae “ongo” e aki toki n iangoaki iai te “ongeaba.” Tiaki anne te bae ti nanonna ngkana ti kangai nakon te ataei, “Ongo irouia am karo”? Ngaia are te ongo ni bwanaan te Atua, e nanona reiakinan te baere e taekinna ao te ongeaba iai. Kioina ngkai ti aki kona n ongo raoi bwanaan te Atua, ma ti ongo ngkana ti wareware ao ti maiuakina ana Taeka ae te Baibara.—1 Ioane 5:3.

E taku Iesu n te taina ni kaota iai kakawakin te ongo ni bwanaan te Atua: “E aki riai ni maiu te aomata n tii te amwarake, ma e na maiu naba n taeka nako aika otinako mai win Iehova.” (Mataio 4:4) N aron te amwarake ae kakawaki iroura, e a kakawaki riki iroura karekean te atatai ibukin te Atua. Bukin tera? E kabwarabwaraa ni kangai te Uea ae wanawana ae Toromon: “Bon te bwai ni kamanomano te wanawana, n aron te mwane ngkai te bwai ni kamanomano, ma aio raoiroin riki te atatai: Te wanawana e kateimatoa maiun te aomata are ana bwai te wanawana.” (Te Minita 7:12) Te atatai ao te wanawana are mairoun te Atua, a kona ni kamanoira ni boong aikai ao ni buokira ni karaoa te rinerine ae raoiroi ae kairiri nakon te maiu ae aki toki n te tai ae e na roko.

NIMTIA

Kauringa ana kaikonaki Iesu are ti rinanona n te kaongora are mai mwaina, are e kangai iai: “E wariki te mataroa ao e reme te kawai ae tiki nakon te maiu, ao a karako akana kunea.” (Mataio 7:13, 14) Ngkana ti toua te kawai anne, ti na buokaki ngkana iai te tia kairira ae mwaatai, ao man teimatoara n nimtia ti na roko n tokini kawaira ae te maiu n aki toki. Ngaia are iai bukina ae raoiroi ngkai ti na teimatoa n nimta te Atua. (Taian Areru 16:8) Ma ti na kangaa ni karaoa anne?

Ni katoabong ao a bati baika ti riai ni karaoi ao a a bati riki baika ti kani karaoi. A kona baikai ni kana ara tai ke ni katabetabeira n te aro are e a uarereke, ke ai bon akea ara tai n iaiangoa te bae e tangiria te Atua bwa ti na karaoia. Anne bukina ae e kauringira iai te Baibara ni kangai: “Taratarai raoi aromi n nakonako, bwa kam na aki nakonako bwa aomata aika nanobaba ma kam na nakonako bwa aomata aika wanawana, ni kabonganai raoi ami tai ni kabane, ibukina bwa a bubuaka boong aikai.” (I-Ebeto 5:15, 16) Ti kaania te Atua n arora ni moanibwaia ni maiura ara iraorao ma ngaia.—Mataio 6:33.

E A NAKOIM AM RINERINE

E ngae ngke ko aki kona ni bitii baike a riki nakoim n taai aika nako ma ko kona ni karaoa am rinerine ae e na karekea nakoim ao nakoia aika tangiraki iroum, te maiu ae tamaroa n taai aika imwaim. E kaotia te Baibara bwa e rangi n tangirira Tamara are i karawa ae Iehova ae te Atua, ngaia ae e tuangira iai baika e tangiria bwa ti na karaoi. Nori ana taeka te burabeti are Mika:

“E a tia n tuangko te bwai ae raoiroi ngkoe ae te aomata. Ao tera ae e tangiria Iehova mairoum? Tii bwainan te kaetitaeka ae riai, kawakinan te kakaonimaki ni koaua, ao te nakonako ma Atuam ma te nanorinano!”—Mika 6:8.

Ko na butimwaea ana kakao Iehova ae ko na nakonako ma ngaia ao ni karekei kakabwaia aika akea tokia, ake e katauraoi ibukia akana butimwaea te kakao anne? E a nakoim am rinerine!