Ngkana E Riki te Kabuanibwai ae Karina
NGKANA ko a tia n rinanon te kabuanibwai ae karina, ko bae n ota n aia namakin naakai n aron: te buannano, te aki kani kakoauaa te bae riki, te mangaongao n iango, te tabeaianga, ao te miibuaka. A bati aika uruaki nanoia ao ni karawawataaki man te kangaanga aei ake a tangiria ni mate.
Ngkana ko a tia n rotakibuaka n te kabuanibwai ae karina, ko bae naba n namakinna ae ko a aki konaa moan am kangaanga, ao iroum ai akea uaani maium. Ma e kabwarabwaraa te Baibara bwa e boni manena maium ao ko kona ni kantaningaia bwa e na nakoraoi kanoan taai aika imwaim.
E KONA NI MANENA MAIURA NGKANA TI ATAA TE KOAUA MAN TE BAIBARA
E kangai Te Minita 7:8: “E raoiroi riki tokin te bwai teuana nakoni moanakina.” E kona n taraa ni kabwaranano te maiu aei ngkana ko a tibwa tia n rinanon te kabuanibwai ae karina. Ma ngkana ko mwakuria aroni kaokani korakoram ma te taotaonakinnano, ao ane a na bon nakoraoi bwaai.
E a kaman taekinaki n te Baibara te tai are “e na aki manga ongo te aba te tang . . . ke te tang n rawawata.” (Itaia 65:19) E na noraki koauan aei ngkana e a onikaki te aonnaba nakon te bwaretaiti i aan Ana Tautaeka n Uea te Atua. (Taian Areru 37:11, 29) A nang aki manga riki kabuanibwai aika karina. A nangi mauna n aki toki ururing ao namakin aika kammaraki, bwa e berita ni kangai te Atua ae Moan te Mwaaka: “A na aki manga rin n te iango bwaai ake rimoa, ao a na aki naba manga rin n te nano.”—Itaia 65:17.
Iangoa aei: E a tia ni baireia te tia Karikiriki bwa e “na anganingkami . . . te bwai ae raoiroi nakon taai aika a na roko, ao te kantaninga,” ae te maiu ae rau i aan ana waaki ni kairiri ae kororaoi. (Ieremia 29:11) E kona ataakin te koaua aei ni buokiko bwa e na manena maium? E taku Sally are mwaneweaki n te moani kaongora: “Ngkana ko ururingi baika raraoi ni kabane aika e nang karaoi ibukira Ana Tautaeka n Uea te Atua n taai aika imwaira, e kona ni buokiko ni mwaninga taekani baike a a tia n riki ao ni waakinako.”
E aera bwa ko aki reiakin riki taekani baika e na waekoa ni karaoi Ana Tautaeka n Uea te Atua ibukia aomata? Ni karaoan anne, ko na kakoauaa raoi ae n aki ongea rotakibuakam n te kabuanibwai ae karina, ma e boni manena naba maium aei, ngkai ko tabe ni kantaningaa te tai are e nang akea iai te kabuanibwai ae karina. Ma ngkai moa, iai te kairiri ae manena n te Baibara, are e na buokiko ni kekeiaki ma mwin rikin te kabuanibwai ae karina. Iangoi katoto tabeua.