E na Kangaa n Nakoraoi Riki Maium?
BON tiaki aei aron te maiu ae e kantaningaia te Atua. E riai n tia n onrake te aonnaba aei irouia aomata aika karinea mwaakan te tia Karikiriki n tautaeka, aika a kakabwaiaaki man ana kairiri, ao aika a kakairi n aroarona aika tatangira. A riai ni kaai ni kukurei ao n tabeakinia aia utu, a na reiakini baika boou, ao ni kabutaa te aonnaba aei bwa te bwaretaiti.
E BERITA TE ATUA BWA E NA BITA TE MAIU N TE AONNABA AEI NAKON ARE E BONI KANTANINGAIA
“E katoki buaka ni kabutaa te aonnaba.”—Taian Areru 46:9.
“Te tai . . . are ko na kamaunaia iai te koraki ake a urua te aonnaba.”—Te Kaotioti 11:18.
“Akea te tia maeka iai ae e na kangai:‘I aoraki.’”—Itaia 33:24.
“A na bati kimwareireia au aomata aika rineaki n aia mwakuri baia.”—Itaia 65:22.
A na kangaa ni kakororaoaki taetae ni burabeti aikai? E a tia te Atua n rinea Natina ae Iesu bwa te Uea n ana tautaeka ae kororaoi are e na tautaekana te aonnaba mai karawa. E arana te tautaeka anne te Baibara bwa Ana Tautaeka n Uea te Atua. (Taniera 2:44) E taekinaki Iesu n te Baibara ni kangai: “Te Atua e na anganna ana kaintokanuea . . . , ao e na tautaeka bwa te Uea.”—Ruka 1:32, 33.
Ni menan Iesu n te aonnaba ao e karaoi kakai ni kaotia iai bwa e kona ni kanakoraoa riki maiuia aomata ngkana e a riki bwa te tia Tautaeka.
E KAOTII BAIKA RARAOI IESU AKE E NA KARAOI IBUKIA AOMATA AIKA ONGEABA
Ni katokan aoraki nako, e kaotia iai bwa e na katoki aorakia aomata nako.—Mataio 9:35.
Ni katokani buakan te nama, e kaotia iai bwa e na kamanoia aomata n arona n taui aroni baika karikaki n aron te ang ma te karau.—Mareko 4:36-39.
Ni kaamwarakeaia nga ma nga, e kaotia iai bwa e na karekei baika a kainnanoi aomata ni maiuia.—Mareko 6:41-44.
Ni bitakin te ran nakon te wain n te mare teuana, e a kamatoaa iai bwa e na boni buokiia aomata bwa a na kukurei ni maiuia.—Ioane 2:7-11.
Ko na kangaa ni karekea te maiu ae e tangiria te Atua bwa e na reke irouia aomata ake a tangiria? Iai te “kawai” ae ko riai n toua. E kabwarabwaraa te Baibara bwa “te kawai ae tiki nakon te maiu, ao a karako akana kunea.”—Mataio 7:14.
UKERAN TE KAWAI NAKON TE MAIU AE NAKORAOI RIKI
Tera te kawai nakon te maiu? E kangai te Atua: “Bon Iehova ngai ae Atuam, are Teuare reireiniko bwa ko aonga ni kabwaia, are Teuare kaiririko n te kawai ae ko riai n nakonako iai.” (Itaia 48:17) E na nakoraoi maium ngkana ko toua te kawai aei.
E taku Iesu: “Boni ngai te kawai ao te koaua ao te maiu.” (Ioane 14:6) Ngkana ti karaoi baike e taekin Iesu ao ti kakairi n ana katoto, ti na kaaniaki riki ma te Atua ao e na nakoraoi maiura.
Ko na kangaa ni kunea te kawai nakon te maiu? A bati Aaro, ma e anga te kauring Iesu ni kangai: “A na aki bane n rin n te Tautaeka n Uea ae bwaini karawa akana kangai nakoiu, ‘Te Uea, te Uea,’ ma e na tii rin iai ane e kakaraoa nanon Tamau are i karawa.” (Mataio 7:21) E taku naba: “Kam na kinaia n uaaia.” (Mataio 7:16) E kona ni buokiko te Baibara ni kinaa te Aro ae koaua ao n ataa kaokorona ma Aaro aika kewe.—Ioane 17:17.
Ko na kangaa ni moana touan te kawai nakon te maiu? Ko riai ni karekea ataakin Teuare Nibwan te maiu: Antai ngaia? Antai arana? Te aeka n aomata raa ngaia? Tera ae e karaoia ibukira? Tera ae e tangiria bwa ti na karaoia?a
E tangiriia aomata te Atua bwa a na karaoa ae bati riki nakon ae tii te mwakuri, te amwarake, te takaakaro, ao ai tararuaan aia utu. Ti kona ni karekea ataakin ara tia Karikiriki ao n riki bwa raoraona. Ti kona ni kaotia bwa ti tangiria n arora ni karaoa nanona. E taku Iesu: “Ibukini karekean te maiu are aki toki, a riai n ataiko ae tii ngkoe te Atua ae koaua.”—Ioane 17:3.
E REIREINIKO TE ATUA RINANON TE BAIBARA “BWA KO AONGA NI KABWAIA.”—ITAIA 48:17
MOANAKIN TOUAN TE KAWAI NAKON TE MAIU
Te kona ni kakukureia te Atua ae tii temanna ae koaua, e kainnanoa karaoani bitaki tabeua. E kona n taraa ni kangaanga anne. Ma e na bon nakoraoi riki maiura ngkana ti a moana touan te kawai nakon te maiu. Ibukini buokam ni kaekai moan titiraki ibukin te Atua, a kakaira karaoan te reirei ae aki kabooaki Ana Tia Kakoaua Iehova n te tai ao n te tabo ae nakoraoi iroum. Ko kona n reitaki ma ngaira n ara atureti aei www.pr418.com.