Te Raoiroi​—Ko na Kangaa ni Karikirakea?

TI BANE n tangiria bwa a na iangoira aomata bwa ti raoiroi. Ma e ngae n anne, e kangaanga kaotiotan te raoiroi n ara bong aikai. A bati aomata aika “riribaa te raoiroi.” (2Tim. 3:3) A rawa n ira ana kaetieti Iehova ibukin te bwai ae raoiroi ao ae buakaka, n te aro are a a taekina “te raoiroi bwa te buakaka ao te buakaka bwa te raoiroi.” (Ita. 5:20) Ti bane n nanoraoi ma baike a a tia n riki nakoira ao aki kororaoira. Ngaia are ti kona naba ni katotonga Annea are e ngae ngke e a maan ni beku ibukin Iehova ma e taku: “E kangaanga kakoauaan ae I kona n riki bwa te aomata ae raoiroi.”

E kakukurei bwa ti bane ni kona ni karikirakea te raoiroi! Bon teuana naba uaan te taamnei ae raoiroi mairoun te Atua, ao e korakora riki mwaakana nakon aia kariri aomata ke aki kororaoira. Ti na neneria bwa tera raoi te raoiroi ao n reiakina arora ni kabatiaa riki kaotiotana ni maiura.

TERA TE RAOIROI?

Te raoiroi e bon irekereke ma te aroaro ni maiu ae moan te tamaroa ae itiaki ao akea baarekana. E noraki te raoiroi man uaana ae tamaroa irouia aomata. Bon te aroaro ae tamaroa ae kaotiotaki iai te mwakuri n ibuobuoki.

Ko bae n noria bwa iai tabeman aika tauraoi ni karaoi mwakuri aika raraoi ibukia aia utu ao raoraoia, ma tii anne ae nanonaki n te raoiroi? Ni koauana, akea iroura ae kororaoi n taai nako, bwa e taekinaki n te Baibara bwa “akea te aomata ae raoiroi n te aonnaba ae kakaraoa ae raoiroi n taai nako ao e aki bubure.” (TeMin. 7:20) E kakoauaa aei te abotoro Bauro ngke e kangai: “I ataia bwa akea te bwai ae raoiroi irou, ae taekan rabwatau aei.” (IRom 7:18) E teretere ngkanne bwa ti riai n reireinaki iroun teuare Nibwan te raoiroi ngkana ti kani karikirakea te aroaro anne.

“E RAOIROI IEHOVA”

E karaoa te kaetieti Iehova ae te Atua bwa tera te bwai ae raoiroi. Ni kaineti ma taekan Iehova, ti wareka ae kangai: “Ko raoiroi ao a raoiroi am mwakuri. Reireinai am moti nako.” (TaiAre. 119:68) Ti na neneri itera aika uoua ibukin raoiroin Iehova ake a taekinaki n te kibu anne.

E raoiroi Iehova. Te raoiroi bon aroaron naba Iehova ae rianako. Iangoa te baere riki ngke e kangai Iehova nakoni Mote: “N na kariaia bwa ko na nori raoiroiu ni kabane.” Ngke e kaota Iehova mimitongina nakoni Mote n ikotaki naba ma raoiroina, e ongo Mote te taeka ae kabwarabwaraaki iai taekan Iehova ae kangai: “Iehova, Iehova, ae te Atua ae nanoanga ao e atataiaomata, ae iremwe n un ao e bati irouna te tangira ae koaua ao e bwabwaina te koaua. E kaota te tangira ae koaua nakoia rooro aika nga ma nga, e kabwarai kairua ma buure, ma tiaki n ae e na aki katuuaaeia akana bure.” (TeOti. 33:19; 34:​6, 7) E teretere iai bwa e bon raoiroi Iehova n aroarona nako. E ngae ngke te banna ae kororaoi ibukin te raoiroi Iesu ni maiuna n aomata, ma e taku: “Akea ae raoiroi bwa tii temanna, bwa te Atua.”​—Ruka 18:19.

A raoiroi ana mwakuri Iehova. E noraki bwa e raoiroi te Atua n ana mwakuri ni kabane. “E raoiroi Iehova nakoia aomata ni kabane, ao e oti raoi ana nanoanga n ana mwakuri ni kabane.” (TaiAre. 145:9) E aki tabeitera raoiroin Iehova bwa e anga te maiu ao bwaai nako ake a kainnanoi aomata ibukini kateimatoaani maiuia. (Mwa. 14:17) E kaotaki naba raoiroina ni kabwaraan ara bure. E korea aei te tia areru: “Ko raoiroi ngkoe ae Iehova, ao ko tauraoi ni kabwarabure.” (TaiAre. 86:5) Ti kona ni kakoauaa bwa “e na aki taua te bwai teuana ae raoiroi Iehova mairouia te koraki aika nakonako ma etin aroia.”​—TaiAre. 84:11.

“REIREININGKAMI KARAOAN AE RAOIROI”

Ti karikaki ni katotongan te Atua, ngaia are ti kona n riki bwa aomata aika raoiroi ao ni karaoi baika raraoi. (KBwaai 1:27) Ma e ngae n anne, e kaumakia te Atua ana toro rinanon Ana Taeka bwa a na ‘reireinia karaoan ae raoiroi.’ (Ita. 1:17) Ma ti na kangaa n reiakina anne? Iangoi aanga aika tenua ake ti kona ni karaoa iai aei.

Te moan, ti kona n tataroa te taamnei ae raoiroi, are kona ni buokiia Kristian bwa a na raoiroi i matan te Atua. (IKar. 5:22) Eng, e kona taamnein te Atua ni buokira bwa ti na tangira te raoiroi ao n ribaa te buakaka. (IRom 12:9) Ni koauana, e taekinaki n te Baibara bwa e kona Iehova ni ‘kateimatoaira ni mwakuri nako aika raraoi ma taeka aika raraoi.’​—2Tet. 2:​16, 17.

Te kauoua, ti riai ni wareka Ana Taeka te Atua ae kairaki koreana n te taamnei. Ni karaoan aei, e kona n reireinira Iehova “kawain nako te raoiroi” ao ni kataubobongaira “nakoni mwakuri aika raraoi ni kabane.” (TaeRab. 2:9; 2Tim. 3:17) Ngkana ti wareware ao ni kananoi ara iango, ti a kaon nanora ni baika raraoi ibukin te Atua ao ana kantaninga. Ai aron ae ti kaona ara ati ni kaubwai aika rangi ni kakawaki ake a na buokira rimwi riki.​—Ruka 6:45; IEbe. 5:9.

Te katenua, ti kataia ni kabanea ara konaa ni “kakairi n te bwai ae raoiroi.” (3Ioa. 11) Ti nori katoto man te Baibara aika ti na kakairi iai. Bon Iehova ao Iesu banna ni katoto aika rianako. Ma ti kona naba n iangoiia tabeman riki ake a kinaaki ibukin raoiroia. Uoman aika ti kona n iangoiia bon Tabita ao Barenaba. (Mwa. 9:36; 11:​22-24) Ko kona ni kakabwaiaaki man aia katoto aika tamaroa ngkana ko neneri rongorongoia, ma aroia n ibuobuoki nakoia tabemwaang n aanga aika manena. Iangoa arom n ibuobuoki nakoia tabeman kaain am utu ke kaain te ekaretia. Ao iangoi naba baika raraoi aika riki nakoia Tabita ao Barenaba mani karaoan ae raoiroi nakoia tabemwaang. Ko kona naba ni kakabwaiaaki n aroia.

Ti kona naba n iangoi aia katoto naake a karaoi mwakuri aika raoiroi n ara bong aikai. N te katoto, iangoia unimwaane aika mwakuri korakora n te ekaretia aika “tangira te raoiroi.” Iangoi naba aia mwakuri ao aia taeka taari aine aika kakaonimaki aika “angareirei i aoni baika raraoi.” (Tito 1:8; 2:3) E taku te tari te aine ae Roslyn: “E kakorakoraa raoraou ni buokiia ao ni kaungaia tabeman kaain te ekaretia. E iaiangoa aroia ao e katoatai n angania bwaintangira aika uarereke, ke ni buokiia n aanga riki aika manena. I iangoa neiei bwa bon te aomata ae raoiroi.”

E kaungaia ana aomata Iehova bwa a na “ukoukora te bwai ae raoiroi.” (Amota 5:14) Kakaraoan anne iroura, ti na aki tii tangiri iai ana kaetieti ma e na kakorakorai nanora nakoni karaoan ae raoiroi.

Ti aki riai n iangoia bwa kakaraoan ae raoiroi e kainnanoaki iai anganakia aomata baika a na karineira iai ke bwaintangira aika bobuaka. Aei kamatataana: Ngkana e na rikirake te aroka, e na aki kabwaroaki te ran ae bati i aona n tii te taina, ma e na tebotebokaki teutana imwina teutana n taai aika bati. N aron naba anne ngkana ti karaoi mwakuri n ibuobuoki aika uarereke nakoia aomata, ti kaotia iai bwa ti karaoa ae raoiroi.

E kaumakira te Baibara bwa ti na ‘katauraoira’ ke n “tauraoi” nakoni karaoan ae raoiroi. (2Tim. 2:21; Tito 3:1) Ti kona n nori aanga aika ti na kakukureia iai raora n aomata bwa a na “karaoa ae raoiroi . . . bwa a aonga ni kateimatoaaki iai,” ngkana ti atai baika riki nakoia. (IRom 15:2) E kona n irekereke anne ma arora n anga baika iai iroura. (TaeRab. 3:27) Ti kona ni kaoa temanna n amwarake ke n ikaungaunga ma ngaia. Ngkana iai ae ti ataia bwa e aoraki, ti kona ni kororeta nakoina, ti kawaria, ke n tareboonia. Eng, ti kona ni katai aanga aika bati n taekina iai “te taeka ae raoiroi ae e na kateimatoa te aba n aron ae e kainnanoaki, bwa a aonga ni buokaki iai akana ongora.”​—IEbe. 4:29.

N aron Iehova, ti ukoukora naba karaoan ae raoiroi nakoia aomata nako. Ti kaota iai te aki inanonano. Te anga ae rianako iai bon tataekinan te rongorongo ae raoiroi ae taekan te Tautaeka n Uea nakoia aomata nako. N aron are e tua Iesu, ti ukoukora naba karaoan ae raoiroi nakoia naake a riribaira. (Ruka 6:27) E aki bure karaoan te mwakuri n akoi ao karaoan ae raoiroi nakoia aomata, bwa “akea te tua ae ekinako baikai.” (IKar. 5:​22, 23) Ti kona ni katikiia aomata nakon te koaua bwa a na karaoiroa te Atua, ngkana ti karaoa ae raoiroi n aki ongea kaitaraakira ke kataakira.​—1Bet. 3:​16, 17.

KANIWANGARA NI KARAOAN AE RAOIROI

“Te mwaane ae raoiroi e na taia kaniwangan aroarona nako.” (TaeRab. 14:14) Baikara kaniwanga tabeua? Ngkana ti karaoa ae raoiroi nakoia aomata, a na bae ni kani karaoa naba ae raoiroi nakoira. (TaeRab. 14:22) E ngae ngkana a aki karaoa anne ma e kona ni marau ao ni kerikaaki matoatoan nanoia man teimatoara ni karaoi mwakuri aika raraoi.​—IRom 12:​20, kbn.

A kakoauaa taari aika bati bwa a a tia ni kakabwaiaaki mani karaoan ae raoiroi ao katokan aia mwakuri aika bubuaka. Iangoa te baere riki nakon Nancy. E taku: “Ngke I ikawairake ao I rangi ni maiubuaka, I aki tabe ma te bwai ae eti ao ae bure, ao I aki karinerine. Ma ngke I a reiakin ana kaetieti te Atua ibukin te raoiroi ao ni maiuakin, I a kukurei riki. I namakinna bwa I a oi n aomata ngkai ao iai bongau.”

Bukina riki ae kakawaki ngkai ti riai ni karikirakea te raoiroi bwa e kakukureia Iehova. E ngae ngke a aki nori baika ti karaoi aomata aika bati ma e nori Iehova. E atai ara mwakuri ao ara iango aika raraoi. (IEbe. 6:​7, 8) Ao tera mwina? “E karekea te akoaki iroun Iehova te aomata ae raoiroi.” (TaeRab. 12:2) Ngaia are ti bia teimatoa ni karikirakea te raoiroi. E berita Iehova bwa “e na reke te mimitong ao te karineaki ao te rau irouia aomata nako aika kakaraoa ae raoiroi.”​—IRom 2:10.