E Kakawaki Iroun Iehova Am “Amen”
E KAKAWAKI ara taromauri iroun Iehova. E “kakauongo ao n ongora” irouia ana toro ao e nori bwaai ni kabane ake a karaoi ibukin neboana, e ngae naba ngkana e uarereke. (Maraki 3:16) N te katoto, iangoa te taeka teuana ae ti aki toki n taekinna, ae “amen.” E kakawaki iroun Iehova te taeka ane uarereke anne? Eng! Ngkana ti kan ataa bukina, ti na neneria bwa tera ae nanonaki iai ao tera aroni kabonganaana n te Baibara.
“A NA BANE AOMATA NI KAEKA NI KANGAI, ‘AMEN!’”
Te taeka n Ingiriti ae “amen” nanona “ngaia anne,” ke “boni ngaia.” E nako man te taeka n Ebera ae nanona “kakaonimaki,” “kona n onimakinaki.” E kabonganaaki n tabetai n tain te boowi. Imwin ana taetae n tuea te aomata, e na taekina “amen” ni kamatoaa bwa e eti te baere e taekinna ao e na butimwaea mwina. (WarIte. 5:22) Ngkana e taekina amen i mataia aomata, e a kani kakororaoa riki iai ana taeka.—Neem. 5:13.
Te katoto ae rianako ni kamanenaan te taeka ae “amen” e koreaki n Te Tua-Kaua mwakoro 27. Imwin rinia tibun Iteraera n te Aba ni Berita, a ikotaki i marenan te Maunga ae Ebara ao te Maunga ae Keritim bwa a na ongora n te Tua are warekaki. A aki roko ikanne tii n ongora ma a na taekina naba ae a kukurei ni butimwaea te Tua. A kaota anne n aia kaeka ae “Amen!” ngke a warekaki rekenikai man te aki ongeaba. (TuaKau. 27:15-26) Iangoa karongoaaia nga ma nga mwane, aine, ao ataei ngke a takarua ni kaeka! (Iot. 8:30-35) A bon aki kona ni mwaninga aia taeka ake n te bong anne. A kakoroa bukin aia taeka tibun Iteraera akanne, bwa e taekinaki ae kangai: “A teimatoa tibun Iteraera n toro iroun Iehova ni kabane ana bong Iotua, ao ni kabane aia bong unimwaane ake a reitinako maiuia imwin Iotua, ake a atai ana mwakuri ni kabane Iehova ibukia tibun Iteraera.”—Iot. 24:31.
E kabongana naba Iesu “amen” ni kaota iai koauan te baere e taekinna, ma e karaoia n te aro ae okoro. N oneani mwin are e na taekinna imwin te bwai ae e taekinna temanna, e kakamanena “amen” (ae rairaki n te taetae n Ingiriti bwa “te koaua”) imwain taekinan te bwai teuana, ni katuruturua iai koauan ana taeka. N tabetai e okioki n taekinna ni kangai, “amen amen.” (Mat. 5:18; Ioa. 1:51) E karaui nanoia naake a ongora irouna bwa a koaua raoi ana taeka. E kona Iesu n taetae n aron anne ma te aki nanokokoraki ibukina bwa boni ngaia ae mwiokoaki bwa e na kakoroi bukin ana berita nako te Atua.—2Kor. 1:20; TeKao. 3:14.
“A TAKU AOMATA . . . ‘AMEN!’ AO A KARAOIROA IEHOVA”
A kabongana naba “amen” tibun Iteraera ngkana a karaoiroa Iehova ao n tataro nakoina. (Neem. 8:6; TaiAre. 41:13) Taekinan te taeka anne imwin te tataro irouia naake a ongora, a kaotia iai bwa a inanoi ma te baere e taekinaki. Ngaia are a kona ni bane n uataboa te taromauri ma te kukurei naake a roko. E riki anne ngke e uota Ana Ati ni Berita Iehova, te Uea ae Tawita nako Ierutarem. N tain te bukamaru anne, e tataro ni katituaraoa Iehova n te anene, ae koreaki taekana n 1 Rongorongo 16:8-36. A ringaki iai nanoia aomata ni kabane ake a roko ao “a taku . . . ‘Amen!’ ao a karaoiroa Iehova.” Eng, e a kauaataoaki riki te kimwareirei n te bong anne n aia kaeka are a kaai n taekinna.
A kabongana naba “amen” Kristian n te moan tienture ngkana a karaoiroa Iehova. A kakarina naba te taeka anne taani korea te Baibara n aia reta. (IRom 1:25; 16:27; 1Bet. 4:11) E kaotaki naba n te boki ae Te Kaotioti bwa a karaoiroa Iehova anera i karawa ngke a kangai: “Amen! Kam na karaoiroa Iah!” (TeKao. 19:1, 4) A tataekina “amen” Kristian ake rimoa imwin te tataro n aia tai ni bobotaki. (1Kor. 14:16) Ma a aki tii taekinna n akea nanona.
KAKAWAKIN AM “AMEN”
Imwin reiakinan aroia ana toro Iehova ni kamanena te taeka ae “amen,” ti a ataa iai kakawakina ni motin te tataro. Ngkana ti taekinna ni banen ara tataro, ti kaotia bwa ti nanona raoi te baere ti taekinna. Ao ti kairaki bwa ti na taekina “amen” i nanora ke ni kabaibati ni motin te tataro ae karaoaki ibukia aomata nako, ni kaotia iai bwa ti inanoi ma te tataro. Iangoa riki bukini kakawakin ara “amen.”
Ti kakauongo raoi ngkana e tataro temanna bwa bon iteran naba ara taromauri. Ti taromauria Iehova n tain te tataro, tiaki tii n ara taeka ma n aroarora naba. Ibukina bwa ti kan taekina “amen” ma nanora ni koaua, ti kona ni buokaki iai bwa ti na kateimatoa te iango ae riai ao ni kakauongo raoi nakon te tataro.
Ti katiteuanaaki iai n te taromauri. Te tataro ae karaoaki ibukia aomata nako e na kaatuui ara iango n te baere a kakauongo naba iai kaain te ekaretia. (Mwa. 1:14; 12:5) Ngkana ti uaia ni kaeka ma tarira n te onimaki, ti a katiteuanaaki riki iai. E ngae ngkana ti taekina ara “amen” ni kabaibati ke i nanora, ma e kona ni kairaki iai Iehova bwa e na karaoa nanon te baere ti bubutiia.
E boutokaaki karaoiroan Iehova n ara “amen”
Ti karaoiroa iai Iehova. E nori Iehova bwaai ni kabane ake ti karaoi ibukin taromauriana. (Ruka 21:2, 3) E nora bukini karaoani bwaai iroura ao e nora nanora. E ngae naba ngkana ti kakauongo nakon te botaki n taromauri teuana rinanon te tareboon, ma ti kakoauaa bwa e bon ongo Iehova ara “amen.” Ti a katiteuanaaki iai ma kaain te ekaretia ni karaoiroia.
E kona ara “amen” n taraa n akea nanona ma e boni kakawaki. E taekinaki n te encyclopedia teuana ibukin te Baibara bwa “mani kamanenaan te taeka ae tii teuana aei,” a kona ana toro te Atua ni kaota iai “te aki nanokokoraki, te kariaia, ao te kantaninga ae nene i nanoia.” E bia riki ara “amen” bwa te bwai ae kakukureia nanon Iehova.—TaiAre. 19:14.