Ko Tabwarabwara?
Ko tabwarabwara ni karaoa tera? Kanoaakin te booma ae te AMD (Advance Medical Directive) ae katauraoaki ibukia taani Kakoaua aika a tia ni bwabetitoaki. Ngkai “kam aki ataia bwa tera aroni maiumi ningabong,” e rangi ni kakawaki ngkanne bwa ko na kamani baireia ao ni koreia bwa tera te bwainnaoraki ao aaro ni bwainnaoraki raa ake ko na butimwaei n tain te aoraki ae karina. (Iak. 4:14; Mwa. 15:28, 29) E a tia ni karaoaki te birim ae te Transfusion-Alternative Health Care—Meeting Patient Needs and Rights ibukini buokam. Mataku iai ao tataro ni kauringi baike ko reiakin ma titiraki n ibuobuoki ake a oti i nano.—Kauring: Ibukina bwa iai taamneini korokoro aika karaoaki iai, a riai ngkanne kaaro n tararuaia ataei ngkana a mataku iai.
(1) Bukin tera bwa iai taani kuakua tabeman ake a a manga tuoa riki aroni kabonganaakin te karinraraa? (2) Anga tenua katotoni korokoro aika kakaokoro ake a kona ni karaoaki n akea te karinraraa. (3) Iraman taokita ao taani korokoro ni katobibia te aonnaba ake a kaota nanoia ni kani bwainnaorakia aoraki n akea te karinraraa? Bukin tera bwa a kukurei ni karaoa aei? (4) Tera ae e oti imwin taian ukeuke man te onnaoraki ni boong aikai ibukini kabonganaakin te raraa? (5) Baikara karuanikai nakoni marurungin te rabwata aika irekereke ma te karinraraa? (6) Tera tokin aia iango taokita aika mwaatai ae a a tia n roko iai ni kaineti ma kakabwaia ibukini bwainnaoraki ake a onea mwin te karinraraa? (7) Tera ae karika te aoraki ae te akea n raraa? Tera aroia aomata ni kamarurungaki mai iai, n akea te karuanikai? Tera ae e kona ni karaoaki ni buoka te akea n raraa? (8) E na kanga ni buokaki rabwatan te aoraki bwa e na karikii taian red cell? (9) Baikara aanga aika kakabonganaaki ibukini kauarerekean tiinakon te raraa n tain te korokoro? (10) A kona n uaana bwainnaoraki ake a onea mwin te karinraraa nakoia ataei ke aomata ake a karina ni kaaitara ma kabuanibwai aika kakaiaki? (11) Tera te kaetieti teuana ae moanibaan te kakawaki ni kaineti ma te bwainnaoraki ae riai? (12) Bukin tera bwa e kakawaki irouia Kristian bwa a na kamani baireia bwa aeka ni bwainnaoraki raa, i tinanikun te karinraraa ae a na butimwaeia? Ti na kanga ni karaoa aei?
Butimwaeani bwainnaoraki tabeua ake a kaotaki n te birim aei, e boto i aoni mataniwin te nano ae kataneiaaki n te Baibara. Ko a tia ni motinnanoia bwa te bwainnaoraki raa n onea mwin te karinraraa, ae ko kukurei ni bwainnaorakiaki iai ma natim, ao imwina ko a kanoaa naba te booma ae te AMD? Ibukini bwaninin raoi maroroakinani baikai, rinanon raoi mwakoro 7 n te boki ae “God’s Love” ao bwaai n ibuobuoki riki tabeua ake a taekinaki iai. Tao a bati bwainnaoraki ao aaro ni bwainnaoraki aika oti n te birim aika akea n am tabo, ma e kakawaki iroum bwa ko na tauraoi ni kamataataa raoi ao ni kamatoaa am motinnano ibukin te raraa. Imwin anne, taraia raoi bwa ko a tia ni korei am motinnano n te aro ae eti n am booma ae te A
MD. A riai ni mataata n am motinnano aomata ake ko mwiokoiia ibukin tabeakinam ngkana ko aoraki n ikotaki naba ma kaain am utu ake tiaki taani Kakoaua, ao n ataa naba bukini karaoan anne iroum.
[Te bwaoki n te iteraniba 3]
• Ko a tia ni motinnanoia bwa bwainnaoraki raa ao aaro ni bwainnaorakiaki raa ake ko kukurei ni butimwaei ibukim ma natim?
• Ko teimatoa n uouota te booma ae te AMD ae e a tia ni kanoaaki ibukini kabuanibwai aika karina?