A Kainnanoa te Tataro Minita Aika Kristian
1. Tera te bwai ae kainnanoaki ibukini kakororaoan ara mwakuri ni minita?
1 Ti aki kona ni kakororaoa te mwakuri ni minita i bon iroura. E anganira te korakora Iehova bwa ti na karaoa te mwakuri aei. (IBir. 4:13) E kabonganaia ana anera bwa a na buokira ni kakaaeia aomata aika ai aroia tiibu. (TeKao. 14:6) Bon Iehova ae e karikirakea koraan te koaua are ti unikia ma n tetebokia. (1 Kor. 3:6, 9) Ai kakawakira ngkanne irouia minita aika Kristian bwa a na mwiokoa ana ibuobuoki Tamara are i karawa rinanon te tataro!
2. Baikara bwaai tabeua ake ti na tataroakini?
2 Ibukira: Ti riai n tatataro n taai ake ti uarongorongo iai. (IEbe. 6:18) Baikara bwaai tabeua ake ti na tataroakini? Ti kona n tataro bwa ti na anganaki te iango ae raoiroi ni kaineti ma ara aono are ti na karaoia ao ibukin naba te ninikoria. (Mwa. 4:29) Ti kona ni butiia Iehova bwa e na kairira nakoia aomata aika raoiroi nanoia ake ti kona n reirei n te Baibara ma ngaiia. Ngkana e titirakinira kaain te auti, ti kona n tataro i nanora ni kakimototoa ni bubutiia Iehova bwa e na buokira ni kaeka n te aro ae riai. (Neem. 2:4) Ti kona naba ni bubutii te wanawana bwa ti aonga ni kateimatoa moanibwaian te mwakuri ni minita. (Iak. 1:5) Irarikin anne, e kukurei Iehova ngkana ti taekina naba ara kakaitau ngkai e kona n reke mwiokoara ae kakawaki ae te riki bwa ana minita.—IKoro. 3:15.
3. E kanga te tataro ibukia tabemwaang ni karikirakea riki te mwakuri n uarongorongo?
3 Ibukia Tabemwaang: Ti riai naba n ‘tataro ibukia raora,’ ke ni boni mwanewei naba araia raora ni minita ngkana e angaraoi. (Iak. 5:16; Mwa. 12:5) E tiatianaki am konabwai n te mwakuri n uarongorongo ibukin te aoraki? Tataro ngkanne ibukia raom ni minita ake a marurung. Tai iaiangoia bwa akea bongan am tataro ibukia! E kakawaki naba te tataro ibukia taan tautaeka bwa a na kukurei ma ni kariaia te mwakuri n uarongorongo, bwa a aonga “ni maiu i nanon te rau ma te mweraoi” tarira.—1 Tim. 2:1, 2.
4. E aera ngkai ti riai ni botumwaaka n tataro?
4 Tataekinan te rongorongo ni kabutaa te aonnaba bon te mwakuri ae ti aki kona ni karaoia n oini korakorara. Ngkana ti “botumwaaka n tataro,” ti na kakororaoa te mwakuri aei n ana ibuobuoki Iehova.—IRom 12:12.