E a Tau te Mwaiti ae I Karaoia?
1. Tao tera ana tabeaianga te Kristian ae kakaonimaki?
1 Ko a tia n titirakiniko te titiraki aei? Tao e kona n tiatianaki aron am mwakuri ni minita ibukin te kara ao kangaanga nakon marurungim ke rikiraken tabem n te utu, are e a karika iai bwaran nanom. E taku te tari aine temanna ae teniman natina bwa n taai tabetai ao e namakinna bwa e kairua, ngkai e a kabanea ana tai ao korakorana ibukin tararuaan ana utu ao e a uarereke ana tai ae e kona ni karaoia n te mwakuri ni minita. Tera ae na buokira n tarai baikai ma te iango raoi?
2. Tera ae kantaningaia mairoura Iehova?
2 Tera ae E Kantaningaia Mairoura Iehova: Akea te nanououa bwa ti bane n tangiria ni karaoa ae mwaiti riki n te mwakuri ni minita. Ma iai te kaokoro ae bubura i marenan bwaai aika ti kani karaoi, ao bwaai aika ti boni kona ni karaoi. Ti kaotia ae iai nanora ni kani karaoa raoi ara mwakuri ngkai ti tangiria ni karaoa ae mwaiti riki. Ti riai n uringnga are e atai tian ara kona Iehova ao e aki kantaningaia bwa ti na karaoa ae riaon ara kona. (TaiAre. 103:13, 14) Tera ae e kantaningaia mairoura? E tangiria bwa ti na beku irouna ma nanora ni koaua ao n anganna ara kabanea ni kona.—IKoro. 3:23.
3. Ti na kanga n tuoi korakorara n ara mwakuri ni minita?
3 Ti na kanga ni buokaki n ataa tian ara konabwai? Ti kona ni butiia Iehova bwa e na buokira n tuoi raoi aroni maiura nako ni bwainan te iangoraoi. (TaiAre. 26:2) Tao e kona naba n riki bwa te tia buokira raoraora ae onimakinaki ae te Kristian ae ikawai n te onimaki, ae kinaira raoi ao e aki maaku n tuangira baika ti riai ni katamaroai riki. (TaeRab. 27:9) Uringnga naba bwa e boni manena tutuoan aroarora n tabetai kioina ngkai a kona ni bibitaki baika bati ni maiura.—IEbe. 5:10.
4. Tera ara iango ae riai ni kaineti ma taiani kauring ibukin ara mwakuri ni minita aika aanaki man te Baibara?
4 Te Iango ae Riai ni Kaineti ma Kauringara: Ti aki toki ni kantaningaia bwa a na iai taani mataku n te kabobirimwaaka aika a na tatakarua ni kaungaia taani biri. E ibuobuoki nakoia taani biri aei bwa a aonga n roko n tiaia ma tiaki ibukini kabwaraan nanoia. N aron naba anne, e boto man te Baibara kaungara ao kauringara n ara bobotaki ao man ara boki ibukin ‘tataekinan te taeka ni kakorakoraira iai.’ A manena nakoira reirei aikai ao e aki nanonaki iai ae e aki tau ara kakorakora ngkai. (2 Tim. 4:2) Ti kona n onimakinna bwa ngkana ti teimatoa ni kataia ni karaoa ara kabanea ni kona, e na uring ma te tangira Iehova ‘ara tangira ao ara mwakuri.’—Ebera 6:10.